प्रकाशितवाक्य 18 - सादरी नवाँ नियम

बेबीलोन नगर केर नाश

¹ इकर पाछे मोंय एगो स्वरगदूत के स्वरग से उतरते देखलों, जेकर ठिना ढेइर शक्ति रहे आउर धरती उकर तेज रोशनी से चमइक गेलक।

² उ जोर से कहलक, “धाँइस गेलक, महान देस बेबीलोन धाँइस जाय हे! उ भूतमन केर डेरा आउर हर एक अशुद्ध आत्मामन केर अड्डा आउर हर एक अशुद्ध आउर घिनघिना चरई केर अड्डा बाइन गेलक।

³ काले कि उकर ब्यभिचार केर कड़ुवा नशा से सोउब जाइत केर आदमीमन गिर गेलैं, आउर धरती केर राजामन उकर संगे ब्यभिचार काइर रहैं, आउर धरती केर बेपारीमन उकर भोग-बिलास केर भरपूरी केर खातिर धनवान होई रहैं।”

⁴ फिन मोंय स्वरग से एगो आवाज सुनलों, “हे मोर आदमीमन, उकर में से निकइल के आवा ताकि तोहरेमन उकर पापमन में भागीदार ना होबा, आउर उकर बिपइतमन में से कोनों तोहर उपरे ना आय जाओक।

⁵ काले कि उकर पाप ऊँचा आकाश तक पोंहइच जाय हे, आउर उकर बुरा काममन के परमेश्‍वर याइद कराथे।

⁶ उ महान नगर जइसन तोहरेमन से करलक ठीक तइसनेहें तोहरेमन हों उकर से ब्यवहार करा, आउर उकर काम केर मोताबिक उके दूई गुणा बदला देवा। जे कटोरा में उ भाइर देई रहे ओहे कटोरा में उकर लगिन दूई गुणा भाइर देवा।

⁷ जेतना उ अपन बड़ाई करलक आउर भोग-बिलास करलक, उतना उके बाथा आउर शोक देवा। काले कि उ अपन मन में कहेला, मोंय रानी बाइन बाइठ हों, मोंय बिधवा ना लगों आउर मोंय कहियो नी दुःखी होमूँ।”

⁸ से लगिन एक हें दिन में उकर उपरे बिपइत आय जाई, मतलब माउत, दुःख आउर अकाल, आउर उ आइग में भसम होई जाई, काले कि फैसला करेक वाला प्रभु परमेश्‍वर शक्तिशाली अहे। उ उके दोषी ठहराय हे।

धरती में बेबीलोन नगर लगिन बिलाप

⁹ धरती केर राजामन जेमन उकर संगे ब्यभिचार आउर भोग-बिलास करलैं, जब उकर पोड़ेक केर धुंगिया देखबैं तो उकर लगिन काँदबैं आउर बिलाप करबैं।

¹⁰ उकर बाथा केर डार से दूर हें ठड़ाय के कहबैं, “हे महान देस, बेबीलोन! हे मजबूत नगर, हाय! हाय! तोके समय भाइर में हें दंड मिल जाय हे!”

¹¹ धरती केर बेपारीमन उकर लगिन काँदबैं आउर कलपबैं, काले कि अब केऊ उ मनक माल के नी किनी।

¹² मतलब सोना, चाँदी, रतन, मोती, मलमल, बैगनी, रेशमी, आउर लाल रंग केर लुगामन, आउर हर रकम केर बेस बसाएक वाला काठ, आउर हाथी दाँत केर हर रकम केर चीजमन, आउर ढेइर किमती काठ, पीतल, लोहा, आउर संगमरमर केर सोउब रकम केर बासन,

¹³ आउर दालचीनी, मसाला, धूप, सेंट, लोबान, मदिरा, तेल, मैदा, गोहोम, गाय-गारु, भेड़ीमन, छगरीमन, घोड़ामन, रथ, आउर सेवक आउर आदमीमन केर जान।

¹⁴ से लगिन बेपारीमन कहलैं, “हे महान नगर बेबीलोन तोंय जे फार केर आसरा करिसला, उ तोर से दूर चाइल गेलक। तोर ऐसो-आराम आउर उ सोउब चीजमन, जेमन से तोंय अपन काया के सिंगरात रहिस, तोर से दूर होई गेलक आउर अब उमन तोके फिन कहियो नी मिली।”

¹⁵ इ चीजमन केर बेपारीमन जे बेबीलोन नगर से धनवान बाइन जाय रहैं, अब उकर बाथा केर डार से दूर हें ठड़ाय के काँदते आउर कलपते कहबैं,

¹⁶ “हाय! हाय! इ महान नगर जे मलमल, बैगनी, आउर लाल रंग केर लुगा पिंधल रहे, आउर सोना, रतनमन आउर मोतीमन से सजाल रहे,

¹⁷ एके घड़ी में हें उकर एइसन भारी धन नाश होई गेलक।” हर एक माँझी, आउर हर एक आदमीमन जे जहाज से कहाँव जाएक पारत रहैं, आउर मल्लाह आउर जेतना आदमीमन समुदर से रुपया कमात रहैं, सोउब उ नगर से दूर ठड़ाय रहलैं।

¹⁸ आउर उकर पोड़ेक केर धुंगिया देइख के जोर से कहलैं, “इ महान नगर केर बराबरी के करेक पारी?”

¹⁹ आउर अपन-अपन मूँड़मन उपरे धूर मखाय के काँदते बिलखते जोर-जोर से कहबैं, “हाय! हाय! इ महान नगर जेकर सम्पति से समुदर केर सोउब जहाज मालिकमन धनी होई जाय रहैं, एके घड़ी में नाश होई गेलक।”

²⁰ हे स्वरग आउर हे पवितर आदमीमन, आउर चुनल खास चेलामन आउर परमेश्‍वर केर संदेश के बताएक वाला आदमीमन खुशी मनावा, काले कि परमेश्‍वर फैसला काइर के उकर से तोहर पलटा लेई हे।

²¹ फिन एगो बलवान स्वरगदूत बड़का जाँता केर पाटा केर नियर एगो पखना उठालक, आउर इ कइह के समुदर में फेइक देलक, “महान देस बेबीलोन एइसनेहें बड़का ताकत से गिराल जाई, आउर फिन कहियो उकर पता नी चली।

²² आउर बीना बजाएक वालामन आउर गीतकारमन आउर बाँसुरी बजाएक वालामन, आउर तुरही फुँकेक वालामन केर आवाज फिन कहियो तोर में सुनाई नी देवी। आउर कोनों काम केर केऊ कारीगर हों फिन कहियो तोर में नी मिली आउर जाँता केर चलेक केर आवाज फिन कहियो तोर में नी सुनाई देवी।

²³ दीया केर इंजोत कहियो तोर में फिन नी चमकी आउर दूल्हा आउर दुलहिन केर आवाज कहियो तोर में फिन नी सुनाई देई, काले कि तोर बेपारीमन धरती केर खास आदमीमन रहैं, आउर तोर ओझा से सोउब जाइतमन भरमाल जाय रहैं।

²⁴ आउर परमेश्‍वर केर संदेश के बताएक वालामन आउर पवितर आदमीमन, आउर धरती में माइर मोराल सोउब आदमीमन केर लोहू महान नगर बेबीलोन में पावल गेलक।”