प्रकाशितवाक्य 17 - सादरी नवाँ नियम

बड़का बेश्या आउर जानवर

¹ इकर पाछे उ सात स्वरगदूतमन जेमन ठिना सात कटोरा रहे, उमन में से एक मोर ठिना आय के कहलक, “हिने आव, मोंय तोके उ बड़का बेश्या केर दंड के देखामूँ, जे कायनों नदीमन केर भीरे बसल महान शहर हेके।

² जेकर संगे धरती केर राजामन ब्यभिचार करलैं, आउर धरती केर रहेक वाला आदमीमन उकर ब्यभिचार केर नशा से माइत जाय रहैं।”

³ तब पवितर आत्मा केर मदइत से स्वरगदूत मोके सुनसान ठाँव में लेई गेलक। हूवाँ मोंय लाल रंग केर जानवर, जेकर उपरे परमेश्‍वर केर निंदा से भरल शबदमन रहे, देखलों। उकर सात गो मूँड़ आउर दस गो सींग रहे, आउर उकर उपरे एगो जनाना बाइठ रहे।

⁴ इ जनाना बैगनी आउर लाल रंग केर लुगा पिंधल रहे, आउर सोना आउर ढेइर किमती मणि आउर मोतीमन से सिंगराल रहे। आउर उकर हाँथ में एक सोना केर कटोरा रहे, जे घिनघिना चीजमन से आउर उकर ब्यभिचार केर अशुद्ध चीजमन से भरल रहे।

⁵ उकर माथा उपरे एक नाँव लिखल रहे जेकर मतलब लुकल रहे। इ लेखे रहे, “महान देस बेबीलोन धरती केर बेश्यामन आउर घिनघिना चीजमन केर आयो।”

⁶ मोंय उ जनाना के पवितर आदमीमन केर लोहू आउर यीशु केर गवाहमन केर लोहू पियेक से मातल देखलों। उके देइख के मोंय ताजुब होई गेलों।

जनाना आउर जानवर केर मतलब

⁷ तब उ स्वरगदूत मोर से कहलक, “तोंय काले ताजुब होले? मोंय इ जनाना, आउर उ जानवर केर, जेकर उपरे उ चढ़ल अहे, आउर जेकर सात गो मूँड़ आउर दस गो सींग अहे, तोके भेद बतावना।

⁸ जे जानवर तोंय देइख हिस, उ पहिले तो रहे, मगर अब नखे, मगर उ बेथाह गढ़हा से निकइल के आवी, सेहे बेरा उकर बिनाश होई जाई। आउर धरती केर रहेक वाला आदमीमन जेमन केर नाँव दुनिया केर सिरजेक बेरा से जिंदगी केर किताब में लिखल नखे, इ जानवर केर इ दशा देइख के कि पहिले रहे, आउर अब नखे आउर फिन आय जाई, ताजुब करबैं।

⁹ इके समझेक लगिन बुद्धि केर जरुरी अहे। उ सातों मूँड़ सात गो पहार हेकैं, जे मनक उपरे उ जनाना बाइठ हे।

¹⁰ आउर उमन सात राजामन हों हेकैं, पाँच तो होई चुकलैं, आउर एगो एखन अहे आउर एगो एखन तक नी आय हे। मगर जब आवी, तो थोरेक समय तक राइज करी।

¹¹ जे जानवर पहिले रहे, आउर अब नखे, उ खुद आठवाँ राजा हेके, मगर सचमुच में उ सातों राजामन में से एगो हेके, आउर उकर हों बिनाश होवेक वाला अहे।

¹² जे दस सींग तोंय देखले, उमन दस राजामन हेकैं, जेमन के एखन तक राइज नी मिल हे मगर उ जानवर केर संगे थोरेक समय लगिन राजामन केर नियर अधिकार पाबैं।

¹³ इमन सोउब एक मत होबैं, उमन अपन-अपन शक्ति आउर अधिकार के उ जानवर के देबैं।

¹⁴ इमन मेमना से लड़बैं, आउर मेमना उमन केर उपरे जीत जाई, काले कि उ प्रभुमन केर प्रभु आउर राजामन केर राजा हेके आउर जेमन बोलाल आउर चुनाल अहैं, आउर उकर परती बिसवास लायक अहैं, आउर उमन उकर संगे अहैं, उमन हों जीत जबैं।”

¹⁵ फिन उ मोर से कहलक, “जे ढेइर पानी तोंय देखले, जेकर उपरे बेश्या बाइठ हे, उ पानी तो आदमीमन, भीड़, जाइतमन आउर भाषामन हेकैं।

¹⁶ आउर जे दस सींग तोंय देखले, उमन आउर जानवर बेश्या से बैर करबैं। आउर उके लाचार आउर नंगा काइर देबैं आउर उकर माँस खाय जबैं, आउर उके आइग में पोड़ाय देबैं।

¹⁷ काले कि परमेश्‍वर उमन केर मन के एक मत काइर देई हे, ताकि जब तक उकर बचन पूरा नी होई जाई, तब तक उमन शासन करेक केर अपन अधिकार के उ जानवर के सोंइप देवोक।

¹⁸ आउर उ जनाना, जेके तोंय देइख हिस उ महान नगर हेके, जे धरती केर राजामन उपरे राइज करेला।”