प्रकाशितवाक्य 16 - सादरी नवाँ नियम

परमेश्‍वर केर परकोप केर सात कटोरा

¹ उकर पाछे मोंय मंदिर में केखो उ सातों स्वरगदूतमन से जोर से इ कहते सुनलों, “जावा, परमेश्‍वर केर परकोप केर सातों कटोरा के धरती केर आदमीमन उपरे उझइल देवा।”

² तब पहला स्वरगदूत जाय के अपन कटोरा के धरती केर आदमीमन उपरे उझइल देलक। तब उ आदमीमन केर जेमन केर उपरे जानवर केर छाप रहे, आउर जे उकर मूर्ति केर पूजा करत रहैं, एक रकम केर बुरा आउर बथुवाएक वाला फोड़ा निकललक।

³ दूसरा स्वरगदूत अपन कटोरा समुदर में उझइल देलक आउर उ मोरल आदमी मनक लोहू नियर बाइन गेलक, आउर समुदर केर सोउब जीव मोइर गेलैं।

⁴ तीसरा स्वरगदूत अपन कटोरा के नदीमन में आउर पानी केर सोतामन में उझइल देलक, आउर उमन लोहू बाइन गेलक।

⁵ तब मोंय पानी उपरे अधिकार रखेक वाला स्वरगदूत के इ कहते सुनलों, “हे पवितर, जे अहे, आउर जे रहे, तोंय उचित फैसला करेक वाला हेकिस आउर तोंय इ फैसला करले।

⁶ काले कि उमन पवितर आदमीमन आउर परमेश्‍वर केर संदेश के बताएक वालामन केर लोहू बहाय रहैं, आउर तोंय उमन के लोहू पियाले, काले कि उमन एहे लायक अहैं।”

⁷ फिन मोंय बेदी से इ गोइठ सुनलों, “हाँ, हे सर्वशक्तिमान प्रभु परमेश्‍वर, तोर फैसला ठीक आउर सच्चा अहे।”

⁸ चौथा स्वरगदूत अपन कटोरा बेइर उपरे उझइल देलक, आउर उके आदमीमन के आइग से झुलसाय देवेक केर अधिकार देवल गेलक।

⁹ आउर आदमीमन ढेइर आँच से झुलइस गेलैं, आउर परमेश्‍वर केर नाँव केर जेके इ बिपइतमन उपरे अधिकार अहे, निंदा करलैं मगर पाप करेक नी छोड़लैं आउर परमेश्‍वर के हों महिमा नी देलैं।

¹⁰ पाँचवाँ स्वरगदूत अपन कटोरा उ जानवर केर सिंहासन उपरे उझइल देलक आउर उकर राइज में अंधार होई गेलक आउर आदमीमन बाथा केर मारे अपन-अपन जीभ के चाबाएक लगलैं।

¹¹ आउर अपन बाथामन आउर फोड़ामन केर खातिर स्वरग केर परमेश्‍वर केर निंदा करलैं, मगर अपन-अपन पाप काम के करेक नी छोड़लैं।

¹² छठवाँ स्वरगदूत अपन कटोरा बड़का नदी फरात में उझइल देलक आउर उकर पानी सूइख गेलक, ताकि पूरब दिशा केर राजामन लगिन डहर तेयार होई जाओक।

¹³ फिन मोंय उ अजगर केर मुँह से, आउर उ जानवर केर मुँह से, आउर झूठा संदेश के बताएक वाला आदमी केर मुँह से तीन अशुद्ध आत्मामन के बेंगमन केर रूप में निकलते देखलों।

¹⁴ इमन चिन्हा देखाएक वाला भूतमन हेकैं, जे समूचा दुनिया केर राजामन ठिना निकइल के इ लगिन जायना कि उमन के सर्वशक्तिमान परमेश्‍वर केर उ महान दिन केर लड़ाई लगिन जमा करोक।

^15-16 उ भूतमन राजामन के आउर उमन केर सेनामन के उ ठाँव में जमा करलैं, जेके इब्रानी भाषा में हर-मगिदोन कहल जायला। एहे लगिन प्रभु यीशु कहलक, “सावधान! मोंय चोर नियर अचका आमूँ, धाइन हेके उ, जे जागते रहेला आउर अपन लुगा केर रखवाली करेला, ताकि उ नंगा ना फिरोक, आउर आदमीमन उकर नंगापन के ना देखोक।”

¹⁷ आउर सातवाँ स्वरगदूत अपन कटोरा हवा में उझइल देलक, आउर परमेश्‍वर केर मंदिर केर सिंहासन से इ बड़का शबद सुनालक, “होई चुकलक!”

¹⁸ तब तुरते बिजलीमन चमकलक, आउर गड़गड़ाहट आउर बदरी केर गरजेक सुनालक, आउर एगो एइसन बड़का भूंईडोल आलक कि जब से आदमी केर सिरजन धरती में होलक, तब से एइसन बड़का भूंईडोल कहियो नी होई रहे।

¹⁹ आउर उ बड़का देस बेबीलोन केर तीन टुकरा होई गेलक, आउर जाइत-जाइत केर नगरमन धाँइस गेलक। परमेश्‍वर उ महान देस बेबीलोन के याइद करलक ताकि उ अपन खीस केर कड़ुवा नशा उके पियाओक।

²⁰ आउर सोउब टापू अपन ठाँव से हइट गेलक आउर पहारमन केर पता नी चललक।

²¹ आकाश से आदमीमन केर उपरे मन-मन भइर केर बड़का ओला गिरलक, इ बिपइत ढेइर भारी रहे, आदमीमन इ बिपइत केर चलते परमेश्‍वर केर निंदा करलैं।