प्रकाशितवाक्य 13 - सादरी नवाँ नियम

दूई गो जानवर

¹ तब मोंय समुदर में से खूंखार जानवर के निकलते देखलों। उकर दस गो सींग आउर सात गो मूँड़ रहे। उकर दसो सींगमन में एक-एक राजमुकुट रहे आउर उकर मूँड़मन उपरे परमेश्‍वर केर निंदा करेक वाला नाँव लिखल रहे।

² जे जानवर के मोंय देखलों, उ चीता नियर रहे आउर उकर गोड़ भालू केर गोड़ नियर आउर मुँह सिंह केर मुँह नियर रहे। आउर उ अजगर अपन शक्ति, अपन सिंहासन आउर बड़का अधिकार उके देई देलक।

³ मोंय उकर एगो मूँड़ में एइसन भारी घाव लगल देखलों कि उ मोरेक वाला अहे। मगर उकर प्राण लेवेक जइसन घाव बेस होई गेलक आउर धरती केर समूचा आदमीमन ताजुब करते उ जानवर केर पिछे-पिछे चाइल गेलैं।

⁴ उ आदमीमन अजगर केर पूजा करलैं, काले कि उ जानवर के अपन अधिकार देई दे रहे आउर उमन इ कहते उ जानवर केर हों पूजा करलैं, “इ जानवर केर नियर के अहे? के उकर से लड़ेक पारेला?”

⁵ उ जानवर के घमंड से भरल गोइठ कहेक आउर परमेश्‍वर केर निंदा करेक केर अधिकार आउर बेयालिस महिना तक काम करेक केर अधिकार देवल गेलक।

⁶ उ जानवर परमेश्‍वर आउर उकर नाँव आउर उकर रहेक वाला ठाँव मतलब स्वरग आउर उ सोउब केर जे स्वरग में रहैना निंदा करेक शुरु काइर देलक।

⁷ आउर उ जानवर के एहो अधिकार देवल गेलक कि पवितर आदमीमन से लड़ोक आउर उ मनक उपरे जीत पाओक आउर उके हर एक गोतर, हर एक आदमीमन, हर एक भाषा आउर हर एक जाइत केर उपरे अधिकार देवल गेलक।

⁸ धरती केर उपरे रहेक वाला सोउब आदमीमन राक्षस केर पूजा करेक लगलैं। सिरिफ ओहेमन उकर पूजा नी करलैं, जेमन केर नाँव दुनिया केर सिरजन होवेक से पहिलेहें से जिंदगी केर किताब में लिखल जाय रहे। इ जिंदगी केर किताब उ मेमना केर किताब हेके, जेके बलिदान केर रूप में माइर देवल जाय रहे।

⁹ जेमन केर कान अहे उमन धेयान से सुइन लेवा।

¹⁰ जेकर बंदी बनेक लिखल अहे, उके बंदी बनाल जाई, आउर जेमन लगिन इ ठहराल जाय हे कि उमन तलवाइर से मारल जाबैं। उमन लगिन इ पक्का अहे कि उमन तलवाइर से हें मोराल जाबैं। से लगिन परमेश्‍वर केर आदमीमन के इ सोउब गोइठमन में धीरज धारेक चाही, आउर परमेश्‍वर उपरे भरसा करेक चाही।

धरती से निकलल जानवर

¹¹ फिन मोंय एगो आउर जानवर के धरती में से निकलते देखलों। उकर मेमना केर नियर दूई गो सींग रहे आउर उ अजगर केर नियर बोलत रहे।

¹² उ अजगर केर भीरे पहिला जानवर केर समूचा अधिकार के काम में लानत रहे, आउर धरती आउर उकर में रहेक वाला आदमीमन से उ पहिला जानवर केर जेकर प्राण लेवेक जइसन घाव बेस होई जाय रहे, पूजा करुवात रहे।

¹³ उ बड़का-बड़का चमत्कार केर चिन्हा देखात रहे, हिंयाँ तक कि आदमीमन केर सामने स्वरग से धरती में आइग बरसाय देवत रहे।

¹⁴ आउर उ चिन्हामन केर खातिर जेके उ जानवर केर सामने देखाएक केर अधिकार उके देवल जाय रहे, उ धरती केर रहेक वाला आदमीमन के बहकात रहे आउर उमन से इ कहत रहे कि जे जानवर के तलवाइर लाइग रहे, उ जी जाय हे, उकर मूर्ति बनावा।

¹⁵ उके उ जानवर केर मूर्ति के जिंदा करेक केर शक्ति देवल गेलक, ताकि जानवर केर मूर्ति बोलेक लगोक आउर जेतना आदमीमन उ जानवर केर मूर्ति केर पूजा नी करबैं उमन के माइर मोराओक।

¹⁶ आउर उ दूसरा जानवर छोट-बाड़, धनी-गरीब, आजाद या गुलाम सोउब केर भतखाइया हाँथ चाहे उ मनक माथा में एक-एक छाप लगाय देलक।

¹⁷ ताकि जेकर उपरे उ जानवर केर छाप मतलब उकर नाँव चाहे उकर नाँव केर अंक नी होवी, उ लेन-देन करेक ना पारोक।

¹⁸ गेयान इकरे में अहे: जेके बुद्धि होवी, उ इ जानवर केर अंक जोइड़ लेवोक, काले कि उ आदमी केर अंक हेके आउर उकर अंक छाव सौ छेयासठ हेके।