प्रकाशितवाक्य 12 - सादरी नवाँ नियम

जनाना आउर अजगर साँप

¹ फिन आकाश में एगो बड़का चिन्हा दिस्तार देलक, मतलब एगो जनाना बेइर के ओइढ़ रहे। उकर पाँव केर हेंठे चाँद रहे आउर उकर मूँड़ उपरे बारह गो तइरगनमन केर मुकुट रहे।

² उ गर्भवती रहे, आउर उकर छउवा जनम देवेक केर समय आय पोंहइच गेलक, आउर उ जनम देवेक केर बथा केर चलते कुंहरत रहे।

³ फिन एक आउर चिन्हा आकाश में दिस्तार देलक, एगो बड़का लाल अजगर रहे, जेकर सात मूँड़ आउर दस सींग रहे, आउर उकर मूँड़मन में सात राजमुकुट रहे।

⁴ उकर पूँइछ आकाश केर एक तिहाई तइरगनमन के खींच के धरती में फेइक देलक। उ अजगर उ जनाना केर भीरे ठड़ालक, जे छउवा जनम देवेक केर बाथा में रहे ताकि छउवा केर जनमते हें उके लील जाओक।

⁵ उ जनाना एगो बेटा के जनम देलक, जे राइज करेक वाला लोहा केर लाठी से सोउब जाइत केर आदमीमन उपरे राइज करेक ले रहे। उ छउवा के तुरते उठाय के परमेश्‍वर आउर उकर सिंहासन तक पोंहचाय देवल गेलक।

⁶ आउर उ जनाना, उ सुनसान ठाँव में भाइग गेलक, जहाँ परमेश्‍वर बटले उकर लगिन एगो ठाँव तेयार करल जाय रहे कि हूवाँ उके एक हजार दूई सौ साठ दिन तक पोसल जाओक।

अजगर केर स्वरग से फेकल जाएक

⁷ फिन स्वरग में लड़ाई होलक। मीकाईल आउर उकर स्वरगदूतमन केर लड़ाई अजगर आउर उकर दूतमन से होलक। अजगर आउर उकर दूतमन उकर से लड़लैं।

⁸ मगर उमन टिकेक नी पारलैं, से लगिन स्वरग में उमन लगिन फिन ठाँव नी रहलक।

⁹ तब उ बड़का अजगर मतलब ओहे पुरना साँप, जे इबलीस आउर शैतान कहायला, आउर गोटा दुनिया केर आदमीमन के भरमाएक वाला हेके, उकर दूतमन केर संगे उके धरती में गिराय देवल गेलक।

¹⁰ फिन मोंय स्वरग में से जोर से इ कहते सुनलों, “अब हमर परमेश्‍वर केर छुटकारा, शक्ति, राइज आउर उकर मसीह केर अधिकार दिस्तार होई हे, काले कि हमर भाईमन उपरे दोष लगाएक वाला, जे राइत दिन हमर परमेश्‍वर केर भीरे उ मनक उपरे दोष लगाते रहत रहे, गिराय देवल गेलक।

¹¹ आउर उमन मेमना केर लोहू केर खातिर आउर अपन गवाही केर बचन केर खातिर, उकर उपरे जीत पालैं, आउर उमन अपन प्राण केर मोह छोइड़ के माउत के अपनाय लेलैं।

¹² से लगिन, हे स्वरगमन आउर उकर में रहेक वाला आदमीमन, खुशी मनावा। मगर हे धरती आउर समुदर, तोहर उपरे हाय! काले कि शैतान तोहर ठिना पोंहइच जाय हे, उ खीस से भरल अहे, काले कि उके पता होई जाय हे कि उकर थोरहें समय आउर बचल अहे।”

जनाना केर सताल जाएक

¹³ जब अजगर देखलक कि मोंय धरती में गिराय देवल जाय हों, तो उ जनाना के जे बेटा जनमाय रहे, सतालक।

¹⁴ मगर उ जनाना के बड़का उकाब केर दूई गो पाँइख देवल गेलक ताकि उ साँप केर सामने से उइड़ के, उ सुनसान ठाँव में पोंहइच जाओक, जहाँ उके साढ़े तीन बरिस तक पोसल जाएक रहे।

¹⁵ तब साँप उ जनाना केर पिछे अपन मुँह से नदी केर नियर पानी बहालक ताकि उके नदी केर पानी बोहाय के लेई जाओक।

¹⁶ मगर धरती उ जनाना केर मदइत करलक। उ अपन मुँह खोइल के उ नदी के जे अजगर अपन मुँह से बहाय रहे, पी लेलक।

¹⁷ तब अजगर जनाना उपरे ढेइर खिसाय गेलक, आउर उकर बचल छउवामन से जे परमेश्‍वर केर आगया के मानैना आउर यीशु केर बारे में देवल गवाही में स्थिर अहैं, लड़ेक लगिन गेलक।

¹⁸ तब उ अजगर चाइल गेलक आउर समुदर केर किनारे जाय के ठड़ाय गेलक।