प्रकाशितवाक्य 11 - सादरी नवाँ नियम

दूई गवाह

¹ इकर पाछे फिन मोके नापेक लगिन एगो डांग देवल गेलक, आउर केऊ कहलक, “उठ, परमेश्‍वर केर मंदिर आउर बेदी के नाइप ले, आउर उकर में आराधना करेक वालामन केर गिनती कर।

² मगर मंदिर केर बाहरे केर अंगना के छोइड़ दे, उके ना नाप काले कि उके परजाइत आदमीमन के देवल जाय हे, आउर उमन पवितर नगर के बेयालिस महिना तक रौंदबैं।

³ मोंय अपन दूई गो गवाहमन के इ अधिकार देमूँ कि एक हजार दूई सौ साठ दिन तक भविष्यवाणी करोक। उमन एक एइसन लुगा के पिंधल होबैं, जेके दुःख देखाएक लगिन पिंधल जायला।”

⁴ इ दुयो गवाह जैतून केर दूई गो गाँछ आउर दूई गो दीया रखेक केर खूँटा हेकैं, जे धरती केर प्रभु केर भीरे ठड़ाल रहैना।

⁵ अगर केऊ उमन के नोकसान पोहचाएक चाहैना, तो उमन केर मुँह से आइग निकइल के उमन केर बैरीमन के भसम करेला, आउर अगर केऊ उमन के नोकसान पोहचाएक चाही, तो उ जरूर एहे रीति से माइर मोराल जाई।

⁶ उमन के अधिकार अहे कि आकाश के बंद करोक, ताकि उमन केर भविष्यवाणी केर दिन में पानी ना बरसोक। उमन के सोउब पानी उपरे अधिकार अहे कि उके लोहू बनाओक आउर जब-जब चाहबैं तब-तब धरती में हर रकम केर बिपइत के लानोक।

⁷ जब उमन अपन गवाही देई चुकबैं, तो उ जानवर जे बेथाह गढ़हा में से निकली, उमन से लइड़ के उमन के जीत जाई आउर उमन के माइर मोराई।

⁸ उमन केर लाश उ बड़का नगर केर चौक में पड़ल रही, जे चिन्हा केर रूप से सदोम आउर मिसर देस कहायला, जहाँ उमन केर प्रभु हों क्रूस उपरे चढ़ाल जाय रहे।

⁹ आउर सोउब आदमीमन आउर गोतरमन आउर भाषामन आउर सोउब जाइत केर आदमीमन उमन केर लाश के साढ़े तीन दिन तक देखते रहबैं आउर उमन केर लाश के कबर में रखेक नी देबैं।

¹⁰ आउर धरती केर रहेक वाला आदमीमन, उ दुयो गवाह केर मोरेक से रिझे होई के खुशी मनाबैं, आउर एक-दोसर ठिना भेंट भेजबैं, काले कि इ दुयो संदेश के बताएक वालामन धरती केर रहेक वालामन के सताए रहैं।

¹¹ मगर साढ़े तीन दिन केर पाछे परमेश्‍वर केर बटले जिंदगी केर साँस आलक, आउर उमन उइठ के ठड़ाय गेलैं। तब उमन के देखेक वालामन केर उपरे डार समाय गेलक।

¹² फिन उमन के स्वरग से एक बड़का शबद सुनाई देलक, “हिंयाँ उपरे आवा!” इके सुइन के उमन बैरीमन केर देखते-देखते बदरी में से होई के स्वरग में उठाय लेवल गेलैं।

¹³ फिन ओहे बेरा एक बड़का भूंईडोल आलक, आउर नगर केर दसवाँ हिस्सा गिर गेलक। उ भूंईडोल से सात हजार आदमीमन मोइर गेलैं, आउर जे बचलैं उमन डराय गेलैं आउर स्वरग केर परमेश्‍वर केर महिमा करलैं।

¹⁴ दूसरा बिपइत बीत गेलक, देखा, तीसरा बिपइत जल्दी आवेक वाला अहे।

सातवाँ तुरही

¹⁵ जब सातवाँ दूत तुरही फुँकलक, तो स्वरग में से जोर से रकम-रकम केर आवाज इ कहते सुनाई देलक, “दुनिया केर राइज हमर प्रभु केर आउर उकर मसीह केर होई गेलक आउर उ जुग-जुग राइज करी।”

¹⁶ तब उ चोबिसो मुखियामन जे परमेश्‍वर केर सामने अपन-अपन सिंहासन में बाइठ रहैं, उमन निहइर के माथा टेकलैं आउर परमेश्‍वर केर आराधना करलैं।

¹⁷ उमन कहलैं, “हे सर्वशक्तिमान प्रभु परमेश्‍वर, तोंय जे अहिस आउर जे पहिले रहिस, हमरे तोर धन्यबाद करिला कि तोंय अपन बड़का शक्ति के काम में लाइन के राइज काइर हिस।

¹⁸ परजाइत आदमीमन तोर से खिसाल अहैं, काले कि बेरा आय पोंहइच हे कि तोंय अपन खीस के देखाबे, आउर उ बेरा हों आय पोंहइच हे कि मोरलमन केर फैसला करल जाओक, आउर तोर संदेश के बताएक वाला तोर सेवकमन आउर पवितर आदमीमन के आउर उ छोट बाड़मन के जे तोर नाँव से डरायना, इनाम देवल जाओक आउर धरती के बिगड़ाएक वालामन के नाश करल जाओक।”

¹⁹ तब परमेश्‍वर केर जे मन्दिर स्वरग में अहे, उ खोलल गेलक, आउर उकर मन्दिर में उकर करार केर बक्सा दिसलक। आउर बिजलीमन, आवाजमन आउर बदरी केर गरजेक केर आवाज आउर भूंईडोल होलक आउर भारी ओला गिरलक।