प्रकाशितवाक्य 10 - सादरी नवाँ नियम

स्वरगदूत आउर छोटका किताब

¹ फिन मोंय एगो आउर शक्तिशाली स्वरगदूत के बदरी से घेराल स्वरग से उतरते देखलों। उकर मूँड़ उपरे बदरी केर धनुष रहे। उकर मुँह बेइर नियर चमकत रहे आउर उकर गोड़ आइग केर खंभा नियर रहे।

² उकर हाँथ में एगो छोटका खोलल किताब रहे। उ अपन भतखाइया पाँव समुदर में आउर लेंगा पाँव धरती में रखलक।

³ आउर एइसन जोर से चिल्लालक, जइसन सिंह गरजेला, आउर जब उ चिल्लालक तो गरजेक केर सात शबद सुनालक।

⁴ जब सातों गरजेक केर शबद सुनाएक बंद होलक, तो मोंय लिखेक हें वाला रहों, मगर मोंय स्वरग से एक आवाज के इ कहते सुनलों, “जे गोइठमन के तोंय उ सात गरजेक वालामन से सुइन हिस, उके मन हें में रख, आउर ना लीख।”

⁵ जे स्वरगदूत के मोंय समुदर आउर धरती में ठड़ाल देइख रहों, उ अपन भतखाइया हाँथ स्वरग बटे उठालक,

⁶ आउर जे जुग-जुग जिंदा अहे, आउर जे स्वरग के आउर जे कुछ उकर में अहे, आउर धरती के आउर जे कुछ उकर में अहे, आउर समुदर के आउर जे कुछ उकर में अहे, उ सोउब के सिरजालक, उकरे किरिया खाय के कहलक, “अब तो आउर देरी नी होवी।

⁷ उ बेरा जब सातवाँ स्वरगदूत तुरही फूँकी तो परमेश्‍वर केर लुकल योजना पूरा होई जाई, जेके उ अपन सेवकमन मतलब अपन संदेश के बताएक वालामन के बताय रहे।”

⁸ आउर जे शबद के मोंय स्वरग से कहते सुइन रहों, उ फिन मोर संगे गोठियाएक लगलक, “जा, जे स्वरगदूत समुदर आउर धरती में ठड़ाल अहे, उकर हाँथ से उ खोलल किताब के लेई ले।”

⁹ मोंय स्वरगदूत ठिना जाय के कहलों, “इ छोट किताब के मोके दे।” उ मोर से कहलक, “ले इके खाय ले। इ तोर पेट के कड़ुवा तो करी, मगर तोर मुँह में माउद रस नियर मिठा लगी।”

¹⁰ मोंय उ छोट किताब के उ स्वरगदूत केर हाँथ से लेई के खाय देलों। उ मोर मुँह में माउद रस नियर मिठा तो लगलक, मगर जब मोंय उके खाय चुकलों, तो मोर पेट कड़ुवा होई गेलक।

¹¹ तब मोर से इ कहल गेलक, “तोके ढेइर आदमीमन आउर जाइतमन, भाषामन, आउर राजामन केर बारे में फिन भविष्यवाणी करेक होवी।”