प्रकाशितवाक्य 1 - सादरी नवाँ नियम

¹ इ प्रकाशितवाक्य यीशु मसीह केर बटले अहे, जेके परमेश्‍वर उकर उपरे इ लगिन दिस्तार काइर हे कि उ अपन सेवकमन के, उ गोइठमन के जे जरूर हें जल्दी होवेक वाला अहे, देखाओक। यीशु मसीह अपन स्वरगदूत के भेइज के उकर जरिया से, इ प्रकाशन के अपन सेवक यूहन्ना के बतालक।

² यूहन्ना उ सोउब गोइठमन के लिखलक जे उके देखाल जाय रहे, मतलब परमेश्‍वर केर बटले देवल बचन आउर उ सोउब कुछ, जेके यीशु मसीह कइह रहे।

³ धाइन हेके उ, जे इ भविष्यवाणी केर बचन के पढ़ेला, आउर उमन, जेमन सुनैना आउर इकर में लिखल गोइठमन के मानैना, काले कि समय भीरे अहे।

सात कलीसियामन केर स्वागत

⁴ इ चिट्ठी मोंय यूहन्ना केर बटले हेके, जेके मोंय आसिया परदेस केर सातों कलीसिया केर आदमीमन के लिखाथों। मोंय प्रार्थना कराथों कि तोहरे सोउबमन के परमेश्‍वर बटले किरपा आउर शांति मिलते रहोक। उ जे अहे, आउर जे रहे, आउर जे आवेक वाला अहे, आउर उ सात आत्मामन बटले, जेमन उकर सिंहासन केर भीरे अहैं।

⁵ आउर यीशु मसीह केर बटले, जे बिसवास लायक गवाह आउर मोरलमन में से फिन से जी उठेक वालामन में पहिलौठा, आउर धरती केर राजामन केर हों राजा हेके, तोहरे के किरपा आउर शांति मिलते रहोक। उ हमरे से प्रेम करेला, आउर उ अपन लोहू से हमरे के पापमन से छोड़ाय हे।

⁶ आउर हमरे के एगो राइज, आउर अपन आबा परमेश्‍वर केर लगिन पुरोहित हों बनाय देलक, उकरे हें महिमा आउर शक्ति जुग-जुग बनल रहोक। आमीन।

⁷ देखा, उ बदरीमन केर संगे आवेक वाला अहे, आउर हर एक आदमीमन उके देखबैं, बल्कि जेमन उके बरछा से बेइध रहैं, उमन हों उके देखबैं, आउर धरती केर सोउब आदमीमन बिलाप करबैं। हाँ, इ होवी। आमीन।

⁸ प्रभु परमेश्‍वर इ कहेला, “मोंय हें अलफा आउर ओमेगा हेकों। मोंय हें उ हेकों, जे रहे, आउर जे अहे, आउर जे आवेक वाला अहे, आउर सर्वशक्तिमान अहे।”

मसीह केर दर्शन

⁹ मोंय यूहन्ना जे तोहर संगी बिसवासी आउर मसीह केर लगिन दुःख सहेक में, आउर आबा परमेश्‍वर केर राइज में, आउर धीरज केर संगे उ दुःखमन के सहेक में तोहर संगी हेकों, जे उ आदमीमन उपरे आवेला जेमन केर रिश्ता उकर संगे अहे। मोके पतमुस टापू में कैदी बनाय के भेइज देवल जाय रहे। काले कि मोंय आबा परमेश्‍वर केर बचन के परचार काइर रहों आउर यीशु केर सच्चा संदेश के बताय रहों।

¹⁰ आराधना करेक केर दिन मोंय पवितर आत्मा से भाइर गेलों, आउर मोंय अपन पिछे तुरही नियर ऊँचा आवाज सुनलों।

¹¹ उ कहत रहे, “जे कुछ तोंय देखाथिस उके किताब में लीख के सातों कलीसियामन ठिना भेइज दे, मतलब इफिसुस, स्मुरना, पिरगमुन, थुआतीरा, सरदीस, फिलदिलफिया आउर लौदीकिया शहर केर कलीसिया के भेइज दे।”

¹² तब मोंय उके, जे मोर से कहत रहे, देखेक लगिन पिछे मुड़लों आउर मुइड़ के मोंय सोना केर सात गो दीया रखेक केर खूँटा देखलों।

¹³ आउर उ दीया रखेक केर खूँटामन केर माझे मोंय एगो आदमी के देखलों, जे आदमी केर बेटा नियर केऊ आदमी रहे। उ अपन पाँव तक लम्बा लुगा पिंधल रहे। उकर छाती में सोना केर कसना बाँधल रहे।

¹⁴ उकर मूँड़ आउर केंस चरका रोवाँ मतलब बरफ नियर चरका रहे, आउर उकर आँइख हिदकल आइग नियर रहे।

¹⁵ उकर गोड़ भट्ठी में धिपाय के चमकाल पीतल नियर रहे आउर उकर शबद ढेइर पानी केर धार केर आवाज नियर रहे।

¹⁶ उ अपन भतखाइया हाँथ में सात गो तइरगन लेई रहे, आउर उकर मुँह से दुइयो आरा तेज धार वाला एगो तलवाइर निकलत रहे। उकर मुँह एइसन चमकत रहे, जइसन बेइर कलवा बेरा चमकेला।

¹⁷ जब मोंय उके देखलों तो उकर पाँव में मुरदा नियर गिर गेलों। उ मोर उपरे अपन भतखाइया हाँथ राइख के कहलक, “ना डराव, मोंय शुरु आउर आखरी हेकों आउर जिंदा अहों।

¹⁸ मोंय मोइर जाय रहों, आउर अब देख, मोंय जुग-जुग लगिन जिंदा अहों, आउर मरणलोक आउर अधोलोक केर कुंजी मोर हें ठिना अहे।

¹⁹ से लगिन जे गोइठमन तोंय देइख हिस आउर जे गोइठमन होवाथे आउर जे गोइठमन इकर पाछे होवेक वाला अहे, उ सोउब के लीख ले।

²⁰ उ सात तइरगनमन केर भेद, जेमन के तोंय मोर भतखाइया हाँथ में देइख रहिस, आउर उ सात गो दीया रखेक केर खूँटा केर भेद: उ सात तइरगनमन सातों कलीसियामन केर दूत हेकैं, आउर उ सात दीया खूँटा सात कलीसियामन हेकैं।”