फिलिप्पियनमन 3 - सादरी नवाँ नियम

सच्चा धरमी

¹ से लगिन हे मोर बिसवासी भाईमन, प्रभु में खुश रहा। ओहे गोइठमन तोहरेमन के घरी-घरी लिखेक में मोके तो कोनों तकलीफ नी होवेला, काले कि इ गोइठमन तोहरे के झूठा शिक्षामन से बचेक में मदइत करी।

² उ बुरा आदमीमन से सावधान रहा जेमन कुकूरमन नियर अहैं, आउर उ आदमीमन से हों सावधान रहा, जेमन कहैना कि तोहरेमन के बचेक लगिन खतना करवाएक जरुरी अहे।

³ काले कि असली खतना वाला तो हमरे हें हेकी, जे परमेश्‍वर केर आत्मा केर अगुवाई से भक्ति करिला आउर मसीह यीशु उपरे घमंड करिला, आउर अपन खुद केर काया से करल काम केर उपरे भरसा नी करिला।

⁴ जबकि मोर ठिना तो काया केर काममन उपरे हों भरसा रखेक केर बढ़ियाँ कारण अहे, अगर केखो काया केर काममन उपरे भरसा रखेक केर बिचार होवी, तो मोंय उकर से हों बाइढ़ के रखेक पारोना।

⁵ जइसन परमेश्‍वर आगया देई रहे, मोर जनम केर आठवाँ दिन मोर खतना होलक, मोंय जनम से इसराइली हेकों, आउर बिन्यामीन केर गोतर केर हेकों। मोर आयो आबा इब्रानी रहैं, से लगिन मोंय हों इब्रानी हेकों। एगो फरीसी दल केर आदमी केर रूप में मोंय मूसा केर नियम के कड़ाई से माइन हों।

⁶ उत्साह केर बारे में अगर कहबा तो कलीसिया के सताएक वाला, आउर यहूदी नियममन के मानेक में एगो धरमी आदमी रहों, काले कि मोंय सोउब मूसा केर नियममन के माइन हों।

⁷ मगर जे-जे गोइठमन मोर फायदा केर रहे ओहेमन के मोंय मसीह केर चलते हानि समइझ लेई हों।

⁸ काले कि यीशु मसीह के जानेक बाकी सोउब चीजमन से किमती अहे, से लगिन मोंय सोउब चीजमन के बेकार समझोना। जेकर चलते मोंय सोउब चीजमन के छोइड़ देलों, आउर उमन के कचरा समझोना, जेकर से मोंय मसीह के जानमूँ।

⁹ आउर उकर में जुड़ल रहमूँ; मसीह में इ लेखे जुड़ल जाएक मोर अपन धरम केर काम से निहीं जे मूसा केर नियम के मानेक केर उपरे टिकल अहे, मगर इ उ नियर धरमी बनेक से होई हे जे सिरिफ मसीह में बिसवास करेक से परमेश्‍वर मोके देवेला।

¹⁰ ताकि मोंय मसीह के आउर बढ़ियाँ से जाइन लेमूँ, आउर उकर मोरलमन में से जी उठेक केर शक्ति के महसूस करमूँ, आउर मौत में उकर लेखे बाइन के उकर दुःखमन में भागीदार होई जामूँ।

¹¹ जेकर से मोंय हों फिन से मौत से जिंदा करल जामूँ।

निशाना बटे कुदेक

¹² मोंय इ दावा नी कराथों कि इ सोउब चीजमन के पहिलेहें पाय लेई हों, या सिद्ध होई चुइक हों मगर मोंय कोशिश करते आगे बढ़ते जाथों कि मोके उ मिल जाओक, जेकर लगिन यीशु मसीह मोके चुइन हे।

¹³ हे भाईमन मोंय एक काम कराथों कि जे गोइठ पहिले होई चुकलक उके भुलाय के जे गोइठ पाछे पूरा होवेक वाला है उकर में भागी होवेक लगिन मेहनइत करते आगे बढ़ते जाथों।

¹⁴ मोंय निशाना बटे कूदते जाथों, ताकि उ इनाम के पामूँ, जेके देवेक लगिन परमेश्‍वर मोके स्वरग बोलाय हे आउर जेकर लगिन मसीह यीशु अपन जान के देई हे।

¹⁵ से लगिन हमर में से जेतनामन बिसवास में मजबूत अहैं, एहे बिचार रखबैं, आउर अगर कोनों गोइठ में तोहर आउर हें बिचार होवी तो परमेश्‍वर उके तोहरेमन लगिन खोइल देवी।

¹⁶ आउर हमरे के उ सच्चाई केर उपरे चलेक अहे जेके परमेश्‍वर पहिलेहें से हमरे के बताय हे।

¹⁷ हे भाईमन, तोहरेमन सोउब मिल के मोर जइसन चाइल चला, आउर उमन के हों धेयान से देखबा, जेमन मोर जइसन चाइल चलैना।

¹⁸ काले कि ढेइरमन एइसन चाइल चलैना, जेकर से उमन क्रूस उपरे मसीह केर मौत से घिरना करैना। उ मनक चरचा मोंय तोहर से घरी-घरी काइर हों, आउर एखन हों काइंद-काइंद के कहोना।

¹⁹ उ मनक अंत बिनाश हेके, काया केर जरुरत हें उ मनक ईश्‍वर हेके, उमन अपन लाज केर काममन उपरे घमंड करैना, आउर दुनिया केर चीजमन उपरे सोचते रहैना।

²⁰ मगर हमरे केर अपन देस स्वरग में अहे, आउर हमरे एगो छुटकारा देवाइया प्रभु यीशु मसीह के स्वरग से घूइर आवेक केर आसरा देखाथी।

²¹ उ अपन शक्ति केर उ असर केर मोताबिक जेकर से उ सोउब चीजमन के अपन कब्जा में करेक पारेला, हमर कमजोर आउर दुनिया केर काया केर रूप बदइल के अपन महिमा से भरल काया नियर बनाय देवी।