मरकुस 9 - सादरी नवाँ नियम

¹ फिन यीशु भीड़ आउर अपन चेलामन से कहलक, “मोंय तोहरेमन से सच कहाथों कि तोहरेमन में से थोरेक आदमीमन जे हिंयाँ ठड़ाल अहैं, उमन परमेश्‍वर केर राइज के शक्ति केर संगे आवेक केर महसूस काइर लेबैं, उकर पाछे हें मोरबैं।”

यीशु केर रूप बदलाएक

² छाव दिन केर पाछे यीशु अपन चेला पतरस, याकूब आउर यूहन्ना के अपन संगे सुनसान पहार केर उपरे लेई गेलक। हूवाँ उमन केर आगे यीशु केर रूप बदइल गेलक।

³ आउर उकर लुगा एइसन चरका होई गेलक आउर चमकेक लगलक कि दुनिया केर केऊ धोबी हों उके धोई के ओतना चरका करेक नी पारी।

⁴ तब उमन के परमेश्‍वर केर संदेश बताएक वाला मूसा आउर एलिय्याह दिसलैं आउर उ दुयो यीशु केर संगे गोठियात रहैं।

⁵ पतरस यीशु से कहलक, “हे गुरु, हमर लगिन हिंयाँ रहेक कतइ बेस हेके, सेले हमरे तीन गो झोपड़ी बनाब, एगो तोर लगिन, एगो मूसा लगिन आउर एगो एलिय्याह लगिन।”

⁶ पतरस एइसन इ लगिन कहलक काले कि उ आउर दुयो चेलामन ढेइर डराय जाय रहैं आउर नी जानत रहैं कि का कहेक आउर का करेक अहे।

⁷ तब एगो बदरी आलक आउर उमन के ढाँइप देलक, उ बदरी में से उमन परमेश्‍वर के इ कहते सुनलैं, “इ मोर दुलार बेटा हेके, इकर गोइठ के सुना।”

⁸ तब उमन अचका चाइरो बटे देखलैं तो यीशु के छोइड़ अपन संगे आउर केखो नी देखलैं।

⁹ पहार से उतरेक बेरा यीशु उमन के आगया देलक कि जब तक मोंय आदमी केर बेटा मोरलमन में से जी नी उठमूँ, तब तक जे कुछ तोहरेमन देइख हा उके केखो ना बताबा।

¹⁰ उमन इ गोइठ के याइद रखलैं आउर ढेइर दिन तक केखो नी बतालैं। मगर आपस में बिचार करेक लगलैं, “मोरलमन में से जी उठेक केर का मतलब हेके?”

¹¹ फिन चेलामन यीशु से पूछलैं, “मूसा केर नियम के सिखाएक वालामन काले कहैना कि मसीह केर आवेक से आगे एलिय्याह केर आवेक जरुरी अहे?”

^12-13 यीशु उमन के जबाब देलक, “इ गोइठ सच अहे कि परमेश्‍वर मसीह केर आवेक से आगे एलिय्याह के भेजेक केर करार काइर रहे ताकि उ आदमीमन केर मन के तेयार करी। लेकिन एलिय्याह तो आय चुकलक आउर हमर अगुवामन जइसन चाहत रहैं तइसनेहें उकर संगे ढेइर बुरा बरताव करलैं, जइसन कि उकर बारे में लिखल अहे। अब तोहरेमन इ बतावा कि पवितर किताब में मोंय आदमी केर बेटा केर बारे में इ काले लिखल अहे कि मोंय ढेइर दुःख उठामूँ आउर आदमीमन मोके ठुकराबैं?”

भूत से छुटकारा

¹⁴ जब यीशु आउर उकर तीनों चेलामन दोसर चेलामन ठिना आलैं, तो उमन देखलैं कि ढेइर आदमीमन उ मनक चाइरो बटे जमा होई जाय हैं आउर मूसा केर नियम के सिखाएक वालामन उमन केर संगे बहस कराथैं।

¹⁵ आउर जइसनेहें आदमीमन यीशु के देखलैं सोउब ताजुब करेक लगलैं, उमन कूइद के यीशु ठिना आलैं आउर उके जोहार करलैं।

¹⁶ यीशु पूछलक, “तोहरेमन का केर बारे में इमन से बहस कराथा?”

¹⁷ भीड़ में से एगो आदमी यीशु के जबाब देलक, “हे गुरु, मोंय अपन बेटा के तोर ठिना लाइन हों, उकर में एगो भूत अहे, जे उके कोका बनाय देई हे आउर उ गोठियाएक नी पारेला।”

¹⁸ जहाँव कहीं इ भूत मोर बेटा के धारेला, ओहे ठिना उके पटइक देवेला आउर उकर मुँह से फेन निकलेला आउर उ दाँत केटरेला आउर अकइड़ जायला। मोंय तोर चेलामन से उके निकलाएक ले कहलों, मगर उमन उके निकलाएक नी पारलैं।

¹⁹ इ सुइन के यीशु जबाब देलक, “हे अबिसवासी आदमीमन, मोंय कब तक तोहरेमन केर संगे रहमूँ? आउर कब तक तोहरेमन केर सहमूँ? उ छोंड़ा के मोर ठिना लाना।”

²⁰ तब उमन उके यीशु ठिना लानलैं। यीशु के देखते हें भूत तुरते उ छोंड़ा के आँइठलक आउर छोंड़ा भूंई में गिरलक आउर मुँह से फेन निकलाते लोटेक लगलक।

²¹ यीशु छोंड़ा केर आबा से पूछलक, “इकर इ दशा कहिया से अहे?” उ कहलक, “छोटपन से।

²² भूत इके नाश करेक लगिन कखनों आइग में आउर कखनों पानी में गिरालक। अगर तोंय कोनों करेक पारिसला, तो हमरे केर उपरे तरस खाय के हमरे केर मदइत कर।”

²³ यीशु उकर से कहलक, “अगर तोंय करेक पारिसला, इ का गोइठ हेके? तोके शंका नी होवेक चाही कि मोंय एइसन करेक पारोना अगर केऊ आदमी मोर उपरे बिसवास करेला तो उकर लगिन सोउब कुछ होवेक पारी।”

²⁴ छोंड़ा केर आबा तुरते गिड़गिड़ाय के कहलक, “हे प्रभु! मोंय बिसवास करोना, मोके आउर ढेइर बगरा बिसवास करेक ले मोर मदइत कर।”

²⁵ जब यीशु देखलक कि ढेइर आदमीमन उके देखेक लगिन कूइद के भीड़ लगाथैं, तो उ भूत के इ कइह के डाँटलक, “हे भूत, तोंय जे इ छोंड़ा के कोका आउर बहिरा बनाय देई हिस, मोंय तोके आगया देवाथों, उकर में से बाहरे निकइल जा, आउर उकर में कहियो ना ढूकबे।”

²⁶ तब भूत चिल्लाय के आउर उ छोंड़ा के ढेइर आँइठ के निकइल गेलक, आउर छोंड़ा मोरल जइसन होई गेलक, सेले ढेइरमन कहेक लगलैं, “इ मोइर जाय हे।”

²⁷ मगर यीशु उकर हाँथ धाइर के उके उठालक, उ बेस होई के ठड़ाय गेलक।

²⁸ पाछे जब यीशु अपन चेलामन केर संगे घर में एकले रहे, तब चेलामन उकर से पूछलैं, “हमरे उ भूत के काले निकलाएक नी पारली?”

²⁹ यीशु उमन के जबाब देलक, “इ लेखे केर भूत सिरिफ प्रार्थना से हें आदमीमन में से बाहरे निकलेला।”

यीशु केर अपन मोरेक केर बारे में दोबारा बताएक

³⁰ फिन यीशु आउर उकर चेलामन हूवाँ से चाइल गेलैं, आउर उमन गलील परदेस से होई के जात रहैं। यीशु नी चाहत रहे कि केखो पता चलोक।

³¹ काले कि यीशु अपन चेलामन केर संगे बगरा समय बिताय के उमन के सिखाएक चाहत रहे। यीशु उमन से कहत रहे, “मोंय आदमी केर बेटा आदमी मनक हाँथ में धरुवाल जामूँ, आउर उमन मोके माइर मोराबैं, आउर मोंय मोरेक केर पाछे तीसरा दिन जी उठमूँ।”

³² मगर इ गोइठ इमन केर समझ में नी आलक, आउर उमन यीशु से पूछेक से डरात रहैं।

सोउब से बड़का के हेके

³³ फिन यीशु आउर उकर चेलामन कफरनहूम नगर में अपन घर आलैं, आउर घर में आय के यीशु उमन के पूछलक, “डहर में तोहरेमन का केर बारे में गोठियात रहा?”

³⁴ उमन चुप रहलैं, काले कि डहर में उमन इ बारे में गोठियात रहैं कि हमर में से बड़का केहर हेके?

³⁵ तब यीशु बाइठ गेलक आउर बारहों झन चेलामन के अपन भीरे बोलाय के उमन से कहलक, “अगर केऊ आदमी बाड़ बनेक चाहेला तो खुद के सोउब से छोट समझोक आउर सोउब केर सेवक बनोक।”

³⁶ आउर यीशु एगो छउवा के लेई के उ मनक आगे ठड़ुवालक, आउर उके गले लगाय लेलक आउर चेलामन से कहलक,

³⁷ “जे केऊ मोर नाँव से एइसन छउवामन में से केऊ एगो केर स्वागत करेला आउर उकर मदइत करेला, उ मोर स्वागत करेला आउर जे मोर स्वागत करेला, उ सच में परमेश्‍वर केर स्वागत करेला, जे मोके भेइज हे।”

जे मोर बिरोध में नखे उ मोर बटे अहे

³⁸ तब यूहन्ना यीशु से कहलक, “हे गुरु, हमरे एगो आदमी के तोर नाँव से भूतमन के निकलाते देखली आउर हमरे उके एइसन करेक से मना करली। काले कि उ हमर नियर तोर चेला नी बाइन हे।”

³⁹ यीशु कहलक, “उके मना ना करा, काले कि केऊ हों जे मोर नाँव से चमत्कार केर काम करेला, उ जल्दी से नी बदली आउर मोर बारे में बुरा नी कही।

⁴⁰ काले कि जे हमर बिरोध में नखे, उ हमर बटे अहे।

⁴¹ जे केऊ एक गिलास पानी तोहरेमन के इ लगिन पियाई कि तोहरेमन मसीह केर चेलामन हेका, तो मोंय तोहरेमन से सच कहाथों कि परमेश्‍वर उ आदमी केर जरूर भला करी।”

यीशु केर, परीक्षा केर बारे में चेतावनी देवेक

⁴² यीशु एहो कहलक, “अगर केऊ छउवा जइसन आदमी के जे मोर उपरे बिसवास करेला आउर केऊ दोसर आदमी उके इ बिसवास करेक से भटकायला, उकर लगिन भला होवी कि उकर घेंचा में एगो बड़का पखना केर जाँता बाँधल जाओक आउर उके डुबेक लगिन समुदर में फेइक देवल जाओक।

⁴³ अगर तोर हाँथ तोके पाप करुवायला, तो उके काइट दे, ठुठा होई के हों स्वरग में जाएक तोर लगिन ठीक अहे, मगर दुयो हाँथ केर रहते नरक में जाएक ठीक नखे, जहाँ केर आइग कहियो नी बुतेला।

⁴⁴ काले कि हूवाँ केर आइग नी बुतेला आउर कीड़ा हों नी मोरेला।

⁴⁵ आउर अगर तोर गोड़ तोके पाप करुवायला, तो उके काइट दे, काले कि लंगड़ा होई के हों स्वरग में जाएक तोर लगिन ठीक अहे, मगर दुयो गोड़ केर रहते नरक में जाएक ठीक नखे।

⁴⁶ काले कि हूवाँ केर आइग नी बुतेला आउर कीड़ा हों नी मोरेला।

⁴⁷ आउर एहे लेखे अगर तोर आँइख तोके पाप करुवायला तो उके निकलाय दे। काना होई के हों परमेश्‍वर केर राइज में जाएक तोर लगिन ठीक अहे, मगर दुयो आँइख केर रहते नरक में जाएक ठीक नखे।

⁴⁸ काले कि हूवाँ केर आइग नी बुतेला आउर कीड़ा हों नी मोरेला।

⁴⁹ जइसन बलिदान के नोन से शुद्ध करल जायला, तइसनेहें हरेक झन के दुःख केर आइग से शुद्ध करल जाई।

⁵⁰ नोन बेस अहे, मगर नोन केर नोनछर चाइल जाई, तो उके दोबारा नोनछर नी बनाएक पराई। तोहरेमन अपन में नोन केर गुण के बनाय के रखा आउर एक दोसर केर संगे मेल-जोल से रहा।”