मरकुस 7 - सादरी नवाँ नियम

रीति रिवाज आउर नियम

¹ एक दिन फरीसी दल केर आदमीमन आउर मूसा केर नियम के सिखाएक वाला कायनों झन यरुशलेम शहर से आय के यीशु ठिना जमा होलैं।

² आउर उमन यीशु केर चेलामन के बेगर हाँथ धोले रोटी खाते देखलैं।

³ काले कि सोउब यहूदी आउर खास काइर के फरीसी दल केर आदमीमन पुरखा मनक नेग-दस्तूर केर मोताबिक चलैना, उमन जब तक नेग-दस्तूर केर मोताबिक हाँथ नी धोवाय लेवैना तब तक भात नी खायना।

⁴ बाजार से आय के हों जब तक नेग-दस्तूर मोताबिक हाँथ नी धोवाय लेवैना तब तक नी खायना आउर ढेइर नेग-दस्तूर इमन लगिन बनाल जाय हे, जेके इमन के मानेक होवेला। खास तरीका से डुभनी, लोटामन आउर तांबामन केर बासन के धोवेक-माँजेक।

⁵ से लगिन फरीसी दल केर आदमीमन आउर मूसा केर नियम के सिखाएक वालामन यीशु से पूछलैं, “तोर चेलामन पुरखा मनक नेग-दस्तूर के काले नी मानैना, आउर बेगर हाँथ धोले खायना?”

⁶ यीशु उमन के जबाब देलक, “तोहरे ढोंगीमन केर बारे में यशायाह परमेश्‍वर केर संदेश के बताएक वाला ठीक हें पवितर किताब में भविष्यवाणी काइर हे। जइसन लिखल अहे, ‘इमन मोर बारे में अपन मुँह से ढेइर बेस-बेस गोठियायना, मगर सचमुच में मोर से प्रेम नी करैना।

⁷ आउर बेकार में मोर भक्ति करैना, काले कि इमन आदमी मनक बनाल नियम के एइसन सिखायना जइसन कि इ परमेश्‍वर केर आगया हेके।’

⁸ तोहरेमन परमेश्‍वर केर आगया के ठुकराय के आदमी मनक बनाल नेग-दस्तूर के मानाला।”

⁹ यीशु उमन से कहलक, “तोहरेमन अपन नेग-दस्तूर के बनाय रखेक लगिन परमेश्‍वर केर आगया के अनदेखा काइर देवाला!

¹⁰ हमर पुरखा मूसा तोहरेमन के इ आगया परमेश्‍वर बटले देई रहे कि अपन आयो-आबा केर आदर करा आउर जे अपन आयो चाहे आबा केर बारे में बुरा कही, सेके जरूर मौत केर सजा देवल जाओक।”

¹¹ मगर तोहरेमन इ मानाला कि अगर केऊ अपन आबा चाहे आयो से कही, “अब मोंय तोर कोनों मदइत करेक नी पारमूँ काले कि जेके मोंय तोके देवेक वाला रहों, उके परमेश्‍वर के देवेक ले किरिया खाय हों। सेले इ भेंट सिरिफ परमेश्‍वर केर लगिन हेके।”

¹² आउर तब से तोहरेमन उ आदमी के अपन आयो-आबा केर मदइत करेक नी देवाला।

¹³ इ लेखे तोहरेमन अपन पुरखा मनक बनाल नेग-दस्तूर के मानेक लगिन परमेश्‍वर केर आगया के टाइल देवाला, आउर एइसनेहें तोहरेमन ढेइर बुरा काममन के करते रहाला।

आदमी के अशुद्ध करेक वाला गोइठमन

¹⁴ फिन यीशु आदमीमन के अपन ठिना बोलाय के उमन से कहलक, “तोहरेमन सोउब मोर गोइठ के सुना, आउर बुझा।

¹⁵ एइसन तो कोनों चीज नखे जे बाहरे से आदमी केर भीतरे जाय के उके अशुद्ध करेला। मगर जे चीजमन आदमी केर भीतरे से निकलेला, ओहे उके अशुद्ध करेला।

¹⁶ जे केऊ मोर इ गोइठ के धेयान से सुनाथा, इकर बारे में समझेक केर कोशिश करा।”

¹⁷ जब यीशु भीड़ के छोइड़ के घर गेलक, तो उकर चेलामन यीशु से इ उदाहरन केर अर्थ पूछलैं।

¹⁸ यीशु उमन से कहलक, “का तोहरेमन एतना अनबुझ हेका? का तोहरेमन इ नी बुझाला कि जे कोनों हमरे खाइला, उ हमरे के परमेश्‍वर केर आगे अशुद्ध नी करेला?

¹⁹ काले कि उ हमर मन में निहीं, मगर पेट में जायला आउर दिसा बटले निकइल जायला।” इ कइह के यीशु सोउब खाएक चीजमन के शुद्ध बतालक।

²⁰ फिन यीशु कहलक, “जे आदमी में से निकलेला, ओहे उके अशुद्ध करेला।

²¹ काले कि भीतरे से मतलब आदमी केर मन से बुरा-बुरा बिचार, ब्यभिचार। चोरी, हत्या, दोसर जनाना केर संग संबंध बनाएक,

²² लोभ, दुष्टता, छल, लुचपन, बुरा नजइर, निंदा, घमंड आउर मूरखता निकलेला।

²³ इ सोउब बुरा बिचार जे मन से निकलेला आउर आदमी के अशुद्ध करेला।”

सुरूफ‍िनीकी जाइत केर जनाना केर बिसवास

²⁴ इकर पाछे यीशु आउर उकर चेलामन गलील परदेस से निकइल के सूर आउर सैदा नगर केर आसे-पासे केर इलाका में गेलैं, हूवाँ यीशु एगो घर में गेलक आउर चाहत रहे कि केऊ ना जानोक कि उ हूवाँ ठहइर हे, मगर आदमीमन के तुरते पता लइग गेलक कि यीशु उ घर में अहे।

²⁵ आउर तुरते एगो जनाना यीशु केर बारे में सुइन के यीशु ठिना आय के उकर गोड़ तरे निहइर के प्रणाम करलक, जेकर छोट बेटी केर उपरे भूत रहे।

²⁶ इ जनाना यहूदी नी रहे। उकर जनम सीरिया परदेस केर सुरूफ‍िनीकी नगर में होई रहे। उ यीशु से बिनती करलक, “मोर बेटी केर उपरे से भूत के निकलाय दे।”

²⁷ यीशु उकर से कहलक, “आगे मोके अपन आदमीमन केर, मतलब यहूदीमन केर मदइत करेक दे, काले कि छउवा मनक लगिन पोरसल रोटी के लेई के कुकूरमन केर आगे फेइक देवेक बेस ना लगे।”

²⁸ उ जनाना बुइझ गेलक कि यीशु परजाइत आदमीमन के कुकूर आउर यहूदी आदमीमन के अपन छउवा कहाथे, सेले उ यीशु के जबाब देलक, “सच कहले प्रभु! मगर कुकूरमन हों तो टेबुल केर हेंठे छउवा मनक गिराल रोटी केर टुकरा-टुकरी के खाय लेवैना।”

²⁹ तब यीशु उकर से कहलक, “तोंय बिसवास से जबाब देई हिस, तोर बिसवास केर खातिर भूत तोर बेटी में से निकइल जाय हे। सेले तोंय अब अपन घर चाइल जा।”

³⁰ आउर उ अपन घर में आय के देखलक कि बेटी खटिया उपरे पड़ल अहे आउर भूत निकइल जाय हे।

बहिरा आउर कोका आदमी के ठीक करेक

³¹ इकर पाछे यीशु आउर उकर चेलामन सूर नगर केर आसे पासे केर इलाका के छोइड़ के सैदा नगर से होई के आउर दस नगरमन केर परदेस दिकापुलिस सिमान के पार काइर के गलील झील केर किनारे पोहोंचलैं।

³² हूवाँ आदमीमन एगो आदमी के यीशु ठिना लानलैं। जे बहिरा आउर गोठियाएक में हकलात हों रहे, उमन यीशु से बिनती करलैं, “तोंय अपन हाँथ के उकर उपरे राइख दे कि उ ठीक होई जाओक।”

³³ तब यीशु उके भीड़ से अलगे लेगलक, आउर अपन अंगुर के उकर कान में साजलक, इकर पाछे अपन अंगुर में थूइक के उकर से उ आदमी केर जीभ के छुलक।

³⁴ आउर स्वरग बटे देइख के लम्बा साँस लेलक आउर उकर से कहलक, “इप्फत्तह!” माने “खुइल जा।”

³⁵ तुरते उ आदमी सुनेक लगलक, उकर जीभ केर लार सूत हों खुइल गेलक, आउर उ सफा-सफा गोठियाएक लगलक।

³⁶ तब यीशु उमन के चेताय के कहलक, “इकर बारे में केखो ना बताबा कि मोंय का काइर हों।” मगर जेतना उ चेतालक ओतनेहें उमन इ खबर के आदमीमन के बताएक लगलैं।

³⁷ आउर उमन ढेइर हें ताजुब होई के कहेक लगलैं, उ जे कुछ काइर हे, बेस हें काइर हे। हिंयाँ तक कि उ बहिरामन के सुनेक केर आउर कोकामन के बोलेक केर शक्ति देवेला।