मरकुस 4 - सादरी नवाँ नियम

बिहीन बुनाइया केर उदाहरन

¹ यीशु फिन गलील झील केर किनारे उपदेस देवेक लगलक, आउर उकर ठिना एतना बगरा भीड़ जमा होई गेलक कि उके झील में एगो डोंगा में चाइढ़ के बइठेक पड़लक, आउर भीड़ केर सोउब आदमीमन यीशु बटे मुँहराय के झील केर किनारे भूंई में ठड़ाय रहलैं।

² यीशु उमन के उदाहरन देई के ढेइर हें गोइठमन के सिखाएक लगलक, आउर उमन से कहलक,

³ “सुना, एगो किसान बिहीन बुनेक लगिन निकललक।

⁴ आउर बुनते-बुनते थोरेक बिहीन डहर केर किनारे गिरलक, आउर चरईमन आय के उके खाय देलैं।

⁵ आउर थोरेक बिहीन रुगड़ी भूंई केर उपरे गिरलक, हूवाँ माटी ढेइर कम रहे सेले जल्दी ओंकइर आलक।

⁶ आउर जब बेइर उगलक तो उकर गरमी से उ मुरझाय गेलक, आउर जाइर नी धारेक केर चलते सूइख गेलक।

⁷ आउर थोरेक बिहीन काँटा झूँड़ में गिरलक आउर काँटा झूँड़ बाइढ़ के उके दबाय देलक, आउर उ नी फारलक।

⁸ लेकिन थोरेक बिहीन उपजाऊ भूंई उपरे गिरलक, आउर उ ओंकइर के फूललक-फारलक, आउर केऊ तीस गुणा, केऊ साठ गुणा, आउर केऊ सौ गुणा फार लानलक।”

⁹ आउर यीशु कहलक, “जे केऊ मोर इ गोइठ के धेयान से सुनाथा, उमन इकर बारे में समझेक केर कोशिश करा।”

उदाहरन केर मकसद

¹⁰ जब यीशु एकले रहे, तो उकर संगमन आउर उकर बारहों झन खास चेलामन, यीशु ठिना आय के इ उदाहरन केर बारे में पूछलैं।

¹¹ यीशु उमन के जबाब देलक, “तोहरेमन के तो परमेश्‍वर केर राइज केर भेद के जानेक केर समझ देवल जाय हे, मगर उमन के जेमन मोर उपरे बिसवास नी करैना सोउब गोइठमन के उदाहरन से बताल जायला।

¹² जइसन पवितर किताब में लिखल अहे, ‘उमन देखेक तो पारबैं मगर उमन के कोनों ना सुझोक, सुनेक तो पारबैं मगर कोनों ना बुझोक, कहीं एइसन ना होवोक कि उमन मोर बटे घुरबैं, आउर उमन के क्षमा करल जाई।’ ”

बिहीन बुनाइया केर बखाइन

¹³ सेकर पाछे यीशु उमन से कहलक, “का तोहरेमन इ उदाहरन के नी बुझेक पारला? तो फिन आउर उदाहरन केर अर्थ कइसन बुझबा, जेके मोंय बताएक वाला अहों?”

¹⁴ तब यीशु कहलक, “इ उदाहरन केर अर्थ इ हेके, बिहीन बुनेक वाला आदमी उ हेके, जे परमेश्‍वर केर बचन के परचार करेला।

¹⁵ थोरेक आदमीमन उ डहर किनारे केर भूंई नियर अहैं, जेकर उपरे बिहीन गिरलक, उमन परमेश्‍वर केर बचन के तो सुनैना, मगर शैतान तुरते आय के उ मनक मन से बचन के मेटाय देवेला, जे बचन के उमन सुइन रहैना।

¹⁶ एहे लेखे थोरेक आदमीमन उ रुगड़ी भूंई नियर अहैं जेकर उपरे बिहीन गिरलक, उमन बचन के सुइन के तुरते रिझे-रिझे अपनाय लेवैना।

¹⁷ मगर उमन बचन के अपन मन में भीतरे तक बसेक नी देवैना, सेले उमन थोरे हें दिनमन लगिन रहैना। इकर पाछे जब बचन केर चलते उ मनक उपरे बिपइत या ससइत आवेला, तो उमन तुरते परमेश्‍वर केर बचन उपरे बिसवास करेक छोइड़ देवैना।

¹⁸ एहे लेखे थोरेक आदमीमन उ भूंई नियर अहैं जहाँ काँटा झूँड़ अहे, जेकर उपरे बिहीन गिरलक, उमन बचन के तो सुनैना।

¹⁹ मगर दुनिया केर चिंता-फिकिर, आउर धन केर मोह-माया, आउर चीज-बसूत केर लोभ, उ मनक मन में भाइर जायला आउर बचन के दबाय देवेला, आउर उमन बेगर फार केर जिंदगी जियैना।

²⁰ आउर एहे लेखे थोरेक आदमीमन उ उपजाऊ भूंई नियर अहैं, जेकर में बिहीन बुनल गेलक, उमन बचन सुइन के उके अपनाय लेवैना आउर अपन जिंदगी में बढ़ियाँ फार लानैना, केऊ तीस गुणा, केऊ साठ गुणा, आउर केऊ सौ गुणा।”

दीया केर उदाहरन

²¹ यीशु उमन से आगे कहलक, “आदमीमन दीया के बाइर के पइला से नी ढपैना चाहे खटिया केर हेंठे नी रखैना, उके चौखट में रखैना, होले उकर इंजोत सोउब के दिसोक।

²² एहे लेखे परमेश्‍वर हर उ गोइठमन के दिस्तार करी, जेके आदमीमन अब तक नी जानैना। आउर उ सोउब भेद केर गोइठमन के दिस्तार करी, जे अब तक लुकल अहे।

²³ अगर केऊ मोर इ गोइठ के धेयान से सुनाथा, उमन इकर बारे में समझेक केर कोशिश करा।”

²⁴ उकर पाछे यीशु उमन से कहलक, “जे कुछ तोहरेमन सुनाथा, धेयान से सुना। जेतना बगरा तोहरेमन धेयान से सुनबा, ओतनेहें बगरा समझ तोहरेमन के देवल जाई, बल्कि तोहरेमन आउर हें बगरा समझबा।

²⁵ काले कि जेके समझेक केर इच्छा अहे, परमेश्‍वर उके आउर समझ देई, मगर जे समझेक केर इच्छा नी रखेला कि मोंय का सिखाथों, तो उकर ठिना जे समझ अहे, परमेश्‍वर उखो उकर से लेई लेवी।”

ओंकरेक वाला बिहीन केर उदाहरन

²⁶ फिन यीशु उमन से कहलक, “परमेश्‍वर केर राइज उ किसान जइसन अहे, जे खेत में बिहीन बुनेला।

²⁷ आउर बुइन के उके छोइड़ देवेला आउर बे फिकिर होई के अपन काम करते रहेला आउर बिहीन एइसन ओंकइर के बढ़ेला, जेके उ नी जानेला कि इ एइसन कइसन होवाथे।

²⁸ जमीन तो खुद से फसल उपजायला आगे नोगजा, तब बाइल, आउर उकर पाछे बाइलमन में पोठ माँजी।

²⁹ आखरी में जब कटनी केर समय आवेला आउर फसल पाइक जायला, तब किसान आय के हसुँवा से इके काइट लेवेला।”

राई माँजी केर उदाहरन

³⁰ फिन यीशु कहलक, “मोंय तोहरेमन के एगो आउर उदाहरन बताथों, इ देखाएक लगिन कि परमेश्‍वर केर राइज कइसन अहे।

³¹ उ राई केर माँजी लेखे अहे, आउर भूंई केर सोउब बिहीनमन में से छोट अहे।

³² मगर जब बुनल जायला, तो उ ओंकइर के सोउब बुदामन में से बड़का होई जायला, आउर उकर में एइसन बड़का-बड़का डाइरमन निकलेला कि आकाश केर चरईमन उकर में खोंता बनाय के रहेक पारैना।”

³³ यीशु एहे नियर ढेइर उदाहरन देई-देई के उमन केर बुझेक केर मोताबिक बचन सुनात रहे।

³⁴ यीशु आदमीमन के परमेश्‍वर केर राइज केर बारे में बताएक लगिन सोउब बेरा उदाहरन देई के बतात रहे, मगर अलगे अपन चेलामन के सोउब गोइठमन केर अर्थ बतात रहे।

आँधी के शांत करेक

³⁵ ओहे दिन जब साँझ होलक, तो यीशु चेलामन से कहलक, “आवा, हमरे गलील झील केर उ पाखी जाब।”

³⁶ आउर भीड़ के ओहे ठिना छोइड़ के चेलामन यीशु के जइसन रहे, तइसनेहें अपन संगे डोंगा में तुरते लेई गेलैं, आउर उ मनक संगे आउर हों डोंगा रहे।

³⁷ जब उमन झील के पार करत रहैं, तब एगो जोरदार आँधी-धुका आलक, आउर पानी केर लहरा एतना उठलक कि उ डोंगा से टकरात रहे आउर डोंगा पानी से भाइर जात रहे।

³⁸ यीशु डोंगा केर पिछे बटे मुड़सिरवा लगाय के निंदात रहे, तब चेलामन उके जगाय के उकर से कहलैं, “हे गुरु, हमरे डुबेक वाला अही, का तोके इकर फिकिर नखे?”

³⁹ तब यीशु उइठ के आँधी-धुका के डाँटलक आउर लहरा से कहलक, “स्थिर रह, थइम जा,” आउर आँधी-धुका थइम गेलक आउर सोउब कुछ स्थिर होई गेलक।

⁴⁰ यीशु चेलामन के देइख के कहलक, “तोहरेमन काले डराला? का तोहरेमन के एखन तक हों बिसवास नखे?”

⁴¹ इ घटना के देइख के उमन आउर हें बगरा डराय गेलैं आउर एक-दोसर से कहलैं, “इ केहर हेके? आँधी-धुका आउर पानी केर लहरा हों इकर आगया के मानैना।”