मरकुस 15 - सादरी नवाँ नियम

पिलातुस केर यीशु से सवाल

¹ बिहान होते हें यहूदी मुध पुरोहितमन, धरम केर अगुवामन आउर मूसा केर नियम के सिखाएक वालामन बल्कि यहूदी अगुवा मनक महासभा केर सोउब आदमीमन सलहा करलैं कि यीशु के कइसन दोषी ठहराब। इकर पाछे उमन यीशु के बंधुवालैं आउर उके राजपाल पिलातुस ठिना लेई गेलैं।

² तब पिलातुस यीशु से पूछलक, “का तोंय यहूदी मनक राजा हेकिस?” यीशु उके जबाब देलक, “तोंय खुद हें कहाथिस।”

³ तब यहूदी मुध पुरोहितमन उकर उपरे ढेइर गोइठमन में दोष लगात रहैं।

⁴ से लगिन पिलातुस यीशु से फिन पूछलक, “देख, इ आदमीमन तोर उपरे ढेइर बुरा-बुरा गोइठमन केर दोष लगाथैं, का तोंय खुद के बचाएक ले कोनों जबाब नी देबे?”

⁵ मगर यीशु कोनोवें जबाब नी देलक, इके देइख के पिलातुस ढेइर ताजुब होलक।

यीशु के मौत केर आगया

⁶ यहूदी मनक फसह परब केर मोका में हर साल राजपाल यहूदी आदमीमन केर माँग केर मोताबिक एगो कैदी के छोइड़ देवत रहे।

⁷ उ बेरा बरअब्बा नाँव केर एगो कैदी रहे, जे रोमी सरकार केर बिरोध में लड़ाई करेक वालामन केर संगे जेहेल में रहे, इमन लड़ाई में हत्या केर दोषी रहैं।

⁸ भीड़ केर आदमीमन पिलातुस से बिनती करेक लगलैं, “जइसन तोंय हर साल फसह परब केर मोका में हमरे लगिन एगो कैदी के छोड़ते आय हिस, तइसनेहें हमरे लगिन कर।”

⁹ पिलातुस उमन के पूछलक, “का तोहरेमन चाहाथा कि मोंय तोहरेमन लगिन यहूदीमन केर राजा के छोइड़ देमूँ?”

¹⁰ काले कि पिलातुस जानत रहे कि यहूदी मुध पुरोहितमन उके हिसिंगा से धरुवाय हैं।

¹¹ मगर यहूदी मुध पुरोहितमन भीड़ के उसकालैं कि उमन अपन लगिन यीशु केर बदली बरअब्बा के हें छोड़ेक केर माँग करोक।

¹² इ सुइन के पिलातुस उमन से फिन पूछलक, “जेके तोहरेमन यहूदीमन केर राजा कहाथा, उके मोंय का करमूँ?”

¹³ आदमीमन फिन जोर से कहलैं, “उके क्रूस उपरे चढ़ाय दे।”

¹⁴ पिलातुस उमन से पूछलक, “काले, इ का बुराई काइर हे?” मगर उमन आउर हें जोर से चिल्लाय के कहलैं, “उके क्रूस उपरे चढ़ाय दे।”

¹⁵ तब पिलातुस भीड़ के खुश करेक केर इच्छा से बरअब्बा के उमन लगिन छोइड़ देलक आउर यीशु के कोड़रा मरुवाय के क्रूस उपरे चढ़ाएक लगिन रोमी सिपाहीमन के जिम्मा देई देलक।

सिपाहीमन बटले यीशु केर मजाक उड़ाएक

¹⁶ तब सिपाहीमन यीशु के राजपाल केर महल केर भीतरे अंगना में लेई गेलैं। जे राजभवन कहल जायला आउर हूवाँ सोउब रोमी सिपाहीमन के जमा करलैं।

¹⁷ आउर उमन यीशु केर मजाक उड़ाएक लगिन राजा नियर एगो बैगनी लुगा पिंधालैं आउर काँटा वाला डाइर से एगो मुकुट बनाय के उकर मूँड़ में पिंधाय देलैं।

¹⁸ आउर इ कइह के यीशु के जोहार करेक लगलैं, “हे यहूदी मनक राजा, जोहार!”

¹⁹ आउर उमन उकर मूँड़ में सोंटा से मारलैं आउर उकर उपरे थूकलैं आउर ठेहुना टेइक के उके प्रणाम करते रहलैं।

²⁰ इ लेखे यीशु केर मजाक उड़ाएक केर पाछे उमन बैगनी लुगा के खोइल के उकरे लुगा के पिंधालैं। फिन उके क्रूस उपरे चढ़ाएक लगिन शहर से बाहरे लेई गेलैं।

यीशु केर क्रूस उपरे चढ़ाल जाएक

²¹ जब उमन यीशु के शहर से बाहरे लेई जात रहैं, तब सिकंदर आउर रूफुस केर आबा सिमोन के धारलैं। उ कुरेन शहर केर रहेक वाला रहे, आउर गाँव से यरुशलेम शहर आवत रहे। उमन उके यीशु केर क्रूस उठाय के लेई जाएक लगिन जबरजस्ती करलैं।

²² आउर उमन यीशु के गुलगुता में लेई लानलैं जेकर मतलब “खोपड़ी केर ठाँव” हेके।

²³ आउर उके पित्त मिलाल अंगूर केर रस पियेक ले देलैं, मगर यीशु नी पीलक।

²⁴ तब उमन क्रूस उपरे उकर हाँथ गोड़ के काँटी से ठोइक के चढ़ाय देलैं, आउर उमन उकर लुगामन के बाँटेक लगिन चिट्ठी साजलैं कि केके का लुगा भेटाई, तब उमन लुगा के बाँइट लेलैं।

²⁵ जब उमन यीशु के क्रूस उपरे चढ़ालैं, उ बेरा बिहान केर नौ बाइज रहे।

²⁶ आउर उमन एगो तख्ता में यीशु केर दोष पत्र लीख के उकर मूँड़ केर उपरे लगाय देलैं, उकर में लिखल रहे “यहूदीमन केर राजा।”

²⁷ आउर उमन यीशु केर संगे दूई झन डाकूमन के एगो के भतखाइया आउर एगो के लेंगा बटे क्रूस उपरे चढ़ालैं।

²⁸ इ लेखे से पवितर किताब में लिखल इ गोइठ पूरा होई गेलक, “उ अपराधीमन केर संगे गिनल गेलक।”

²⁹ आउर डहर में जाएक वालामन मूँड़ हिलाय-हिलाय के इ कइह के यीशु केर निंदा करत रहैं, “बाह! यहूदी मनक मंदिर के गिराएक वाला आउर तीसरा दिन में बनाएक वाला!

³⁰ क्रूस उपरे से उतइर के खुद के बचाय ले।”

³¹ एहे नियर से यहूदी मुध पुरोहितमन हों मूसा केर नियम के सिखाएक वालामन केर संगे मिल के यीशु केर मजाक उड़ाय के कहत रहैं, “इ दोसरमन के तो बचालक मगर खुद के नी बचाएक पारलक।

³² इसराइल देस केर राजा जे अपने के मसीह कहेला, अब क्रूस से उतइर के आवोक, तब हमरे इ देइख के उकर उपरे बिसवास करब।” आउर जेमन यीशु केर संगे क्रूस उपरे चढ़ाल जाय रहैं, ओहोमन यीशु केर निंदा करत रहैं।

यीशु केर प्राण छोड़ेक

³³ आउर दिन केर बारह बजे से लेई के तीन बजे तक गोटा धरती में अंधार होई गेलक।

³⁴ तीन बजे यीशु जोर से चिल्लाय के कहलक, “इलोई! इलोई! लमा शबकतनी?” जेकर मतलब इ हेके, “हे मोर परमेश्‍वर! हे मोर परमेश्‍वर! तोंय मोके काले छोइड़ देले?”

³⁵ जे आदमीमन भीरे ठड़ाल रहैं, उमन में से थोरेक आदमीमन इ सुइन के कहलैं, “देखा! इ एलिय्याह के हकाथे।”

³⁶ आउर एक झन कूइद के पाइनसोखा के अमल रस में डुबालक आउर सोंटा में चुभाय के उके पियेक ले देलक आउर कहलक, “रहेक देवा! देखब, एलिय्याह इके क्रूस से उतराएक लगिन आवेला कि निहीं।”

³⁷ तब यीशु जोर से चिल्लाय के प्राण छोइड़ देलक।

³⁸ आउर उ मोटा परदा जे यहूदी मनक मंदिर में लगाल रहे, उपरे से हेंठे तक फाइट के दूई टुकरा होई गेलक।

³⁹ हूवाँ एगो सूबेदार ठड़ाय रहे, जे सौ सिपाही मनक अधिकारी रहे। यीशु के एइसन चिल्लाय के प्राण छोड़ते देइख के कहलक, “सचमुच इ आदमी, परमेश्‍वर केर बेटा रहे।”

⁴⁰ थोरेक जनानामन हों दूर ठड़ाय के इ सोउब के देखत रहैं, उमन में मगदला गाँव केर मरियम, छोट याकूब आउर योसेस केर आयो मरियम आउर सलोमी रहैं।

⁴¹ जब यीशु गलील परदेस में रहे तो इ तीनों उकर संगे-संगे रहत रहैं आउर उकर सेवा सुसइर करत रहैं, आउर हों ढेइर जनानामन रहैं, जे यीशु केर संगे यरुशलेम शहर में आय रहैं।

यीशु के गाड़ल जाएक

⁴² जे दिन यीशु के क्रूस उपरे चढ़ाल गेलक उ दिन यहूदी मनक तेयारी केर दिन रहे, उ दिन केर साँझ होवेक केर पाछे अगला दिन आराम केर दिन शुरु होवेक वाला रहे,

⁴³ सेले तेयारी केर दिन हें साँझ होवेक से आगे अरिमतियाह गाँव केर रहेक वाला यूसुफ आलक, जे यहूदी महासभा केर मुध आदमी रहे आउर खुद हें परमेश्‍वर केर राइज केर आसरा देखत रहे, उ साहस काइर के पिलातुस ठिना गेलक आउर यीशु केर लाश के माँगलक।

⁴⁴ जब पिलातुस यूसुफ से यीशु केर मोरेक केर बारे में सुनलक तो ढेइर ताजुब होलक कि यीशु एतना जल्दी मोइर गेलक आउर सिपाही मनक अधिकारी के बोलाय के पूछलक, “का सचमुच में यीशु केर मोरल थोरेक देरी होई हे?”

⁴⁵ जब सिपाही मनक अधिकारी से पूरा हाल जाइन गेलक, तो यूसुफ के यीशु केर लाश के लेगेक केर मंजूरी देलक।

⁴⁶ तब यूसुफ एगो मलमल केर कफन लुगा कीनलक, उ यीशु केर लाश के उतराय के कफन लुगा से लपाइट के लेई गेलक, आउर चट्टाइन में खोदल कबर में राइख देलक, आउर कबर केर दुरा के बंद करेक लगिन एगो बड़का गोल चेपटा पखना के लुढ़काय देलक।

⁴⁷ इ सोउब के मगदला गाँव केर मरियम आउर याकूब आउर योसेस केर आयो मरियम देखत रहैं कि यीशु केर लाश कहाँ रखल जाय हे।