मरकुस 10 - सादरी नवाँ नियम

बिहा करेक आउर छोड़ेक केर बारे में शिक्षा

¹ यीशु कफरनहूम नगर से निकइल के यहूदिया परदेस केर सिमान में यरदन नदी केर दोसर पाखी आलक। एक बेर फिन आदमी मनक भीड़ उकर ठिना जमा होई गेलक आउर उ अपन रीति केर मोताबिक उमन के परमेश्‍वर केर बचन सिखाएक लगलक।

² जब उ सिखात रहे तब थोरेक फरीसी दल केर आदमीमन परखेक लगिन उकर ठिना आलैं। उमन यीशु से पूछलैं, “का मूसा केर नियम केर मोताबिक इ उचित अहे कि आदमी अपन जनाना के छोइड़ देई?”

³ यीशु उमन के जबाब देलक, “मूसा तोहरेमन के अपन जनाना के छोड़ेक केर बारे में का आगया देई हे?”

⁴ उमन कहलैं, “मूसा केर नियम इ बतायला कि एगो आदमी अपन जनाना के लिखित देई के छोड़ेक पारी।”

⁵ यीशु उमन से कहलक, “काले कि तोहरेमन कठोर होई के परमेश्‍वर केर आगया के नी मानाला, से लगिन मूसा तोहरेमन ले इ आगया के लीख हे।

⁶ मगर दुनिया केर शुरु से परमेश्‍वर नर आउर नारी काइर के उमन के बनाय हे।

⁷ इ लगिन परमेश्‍वर कहलक कि जब एगो मरदाना जनाना से बिहा करेला तो उमन दुयो अपन आयो-आबा से जुदा होई के एके संगे रहोक।

⁸ अब उमन दुयो एके गो काया नियर होई गेलैं, से लगिन उमन दूई गो आदमी नियर निहीं मगर एगो आदमी नियर रहबैं।

⁹ एहे लगिन जब परमेश्‍वर उ दुयो के जोइड़ हे, तो केऊ आदमी उमन के जुदा करेक केर कोशिश ना करोक।”

¹⁰ जब उमन घर घूइर आलैं तो चेलामन यीशु से इकर बारे में पूछलैं।

¹¹ यीशु उमन के जबाब देलक, “परमेश्‍वर चाहेला कि जब-तक दुयो जीते रहबैं तब-तक दुयो एक दोसर से जुदा ना होवोक। जे केऊ अपन जनाना के छोइड़ के दोसर से बिहा करेला तो उ आदमी, उ पहली केर बिरोध में ब्यभिचार करेला।

¹² एहे लेखे अगर जनाना हों अपन आदमी के छोइड़ के दोसर से बिहा करेला, तो ओहो ब्यभिचार करेला।”

बालक छउवा आउर स्वरग केर राइज

¹³ एक दिन थोरेक आदमीमन अपन छउवामन के यीशु ठिना लानेक लगलैं कि यीशु उ मनक उपरे हाँथ राइख के आशीष देवोक। मगर चेलामन उमन के डाँटलैं।

¹⁴ यीशु इ देइख के खिसाय के उमन से कहलक, “छउवामन के मोर ठिना आवेक देवा, उमन के मना ना करा, काले कि जे आदमीमन इ छउवामन नियर बिसवास लायक आउर नरम अहैं, ओहेमन परमेश्‍वर केर राइज में रहबैं।

¹⁵ मोंय तोहरेमन के सच कहाथों कि जे केऊ परमेश्‍वर केर राइज के छउवामन नियर ग्रहण नी करी, उ उकर राइज में कहियो ढूकेक नी पारी।”

¹⁶ आउर यीशु छउवामन के गले लगालक आउर उमन उपरे हाँथ राइख के उमन के आशीष देलक।

धनी जवान आउर परमेश्‍वर केर राइज

¹⁷ जइसनेहें यीशु अपन चेलामन केर संगे जाएक शुरु करलक तइसनेहें एगो जवान आदमी उकर ठिना कूदते आलक। उ यीशु केर आगे ठेहुना टेइक के पूछलक, “हे बेस गुरु, जुग-जुग केर जिंदगी केर हकदार होवेक लगिन मोंय का काम करमूँ?”

¹⁸ यीशु उकर से कहलक, “तोंय मोके बेस काले कहाथिस? सिरिफ परमेश्‍वर हें बेस अहे।

¹⁹ तोंय परमेश्‍वर केर आगयामन के तो जानिसला: हत्या नी करेक, ब्यभिचार नी करेक, चोरी नी करेक, झूठा गवाही नी देवेक, केखो धोखा नी देवेक, अपन आयो-आबा केर आदर करेक।”

²⁰ उ यीशु से कहलक, “हे गुरु, इ सोउब आगयामन के तो मोंय छोटपन से मानते आवाथों।”

²¹ यीशु उके धेयान से देखलक आउर उकर दिल में प्रेम भाइर गेलक। आउर उकर से कहलक, “तोर में एखनोहों एगो गोइठ केर कमी अहे। जा! जे कुछ तोर ठिना अहे, उके बेइच के गरीबमन के देई दे। तब तोके स्वरग में धन मिली। इकर पाछे मोर चेला बाइन जा।”

²² उ आदमी यीशु केर इ गोइठ के सुनलक तो उकर चेहरा उतइर गेलक। काले कि उ ढेइर धनी रहे आउर उ जवान आदमी शोक करते चाइल गेलक।

²³ यीशु चाइरो बटे देइख के अपन चेलामन से कहलक, “धनी आदमीमन के परमेश्‍वर केर राइज में ढूकेक ढेइर कठिन अहे।”

²⁴ चेलामन उकर इ गोइठमन से ढेइर ताजुब होलैं। (काले कि उमन मानत रहैं कि परमेश्‍वर धनी आदमीमन केर उपरे दयालु अहे, इ लगिन अगर उमन स्वरग राइज में नी ढूकेक पारबैं तो आउर केऊ हों नी ढूकेक पारबैं।) मगर यीशु उमन के सिखालक, “हे भाईमन, जे आदमीमन धन केर उपरे भरसा रखैना, उमन लगिन परमेश्‍वर केर राइज में ढूकेक ढेइर कठिन अहे।

²⁵ जे लेखे ऊँट के सूई केर टोका में ढूइक के निकलेक कठिन अहे, उकर से हों बगरा धनवान आदमी के परमेश्‍वर केर राइज में ढूकेक कठिन अहे।”

²⁶ जब चेलामन इके सुनलैं तो आउर हें ताजुब होई के एक-दोसर से कहेक लगलैं, “तो फिन केहर बचेक पारी?”

²⁷ यीशु उमन बटे देइख के कहलक, “आदमीमन से तो इ नी होवेक पराई, मगर परमेश्‍वर से होवेक पराई। काले कि परमेश्‍वर से सोउब कुछ होवेक परायला।”

²⁸ पतरस उकर से कहेक लगलक, “देख, हमरे सोउब कुछ छोइड़ के तोर पिछे होई लेई ही आउर तोर चेला बाइन जाय ही।”

²⁹ यीशु चेलामन से कहलक, “मोंय तोहरेमन से सच कहाथों कि जे केऊ हों मोर चेला बनेक लगिन आउर शुभ समाचार बताएक लगिन अपन घर, भाईमन, बहिनमन, आयो-आबा, छउवामन या खेतमन के छोइड़ देई हे।

³⁰ उ जरूर एहे जुग में सताव केर संगे इनाम केर रूप में घरमन, भाई-बहिनमन, आयोमन, छउवा-पुतामन आउर खेतमन सौ गुणा पावी। आउर आवेक वाला दिन में परमेश्‍वर उके जुग-जुग केर जिंदगी देई।

³¹ मगर इ बेरा दुनिया में ढेइर आदमीमन जेमन खुद के बड़का बुझैना, उमन परमेश्‍वर केर नजइर में छोट होई जबैं। आउर जेमन इ बेरा दुनिया में छोट समझल जायना, उमन परमेश्‍वर केर नजइर में बड़का होई जबैं।”

यीशु केर अपन मौत केर बारे में तीसरी बेर बताएक

³² थोरेक दिन केर पाछे उमन यरुशलेम शहर बटे जात रहैं आउर यीशु उ मनक आगे-आगे जात रहे। आउर उकर चेलामन ताजुब करत रहैं कि यीशु उ ठिना जाथे, जहाँ ढेइर आदमीमन उकर बिरोध काइर रहैं। आउर जेमन उकर संगे जात रहैं उमन के इ गोइठ केर डार रहे कि यरुशलेम शहर में का होवी। एक बेर फिन यीशु अपन बारहों चेलामन के एक बटे लेई के गेलक आउर उ गोइठमन के बताएक लगलक जे उकर उपरे होवेक वाला रहे।

³³ यीशु कहलक, “देखा, हमरे यरुशलेम शहर जाथी, मोंय आदमी केर बेटा यहूदी मुध पुरोहितमन आउर मूसा केर नियम के सिखाएक वालामन केर हाँथे धरुवाल जामूँ, उमन मोके मोराएक केर लायक ठहराबैं, आउर परजाइत आदमीमन केर हाँथे जिम्मा देबैं।

³⁴ आउर उमन मोर मजाक उड़ाबैं, आउर मोर उपरे थूकबैं, मोके कोड़रा से मारबैं, आउर मोके जान से मोराबैं, आउर मोंय तीसरा दिन फिन जी उठमूँ।”

सेवा करेक केर महानता

³⁵ तब जबदी केर बेटा याकूब आउर यूहन्ना यीशु ठिना आय के कहलैं, “हे गुरु, हमरे चाहाथी कि जे कुछ हमरे तोर से माँगब, उखे तोंय हमर लगिन करबे।”

³⁶ यीशु उमन से पूछलक, “तोहरेमन का चाहाथा कि मोंय तोहरेमन लगिन करमूँ?”

³⁷ उमन उकर से कहलैं, “जब तोंय अपन महिमा में राइज करेक शुरु करबे तो हमरे के हों तोर संगे राइज करेक देबे। हमर में से एगो तोर भतखाइया बटे आउर एगो तोर लेंगा बटे बइठेक चाहाथी।”

³⁸ यीशु उमन से कहलक, “तोहरेमन नी जानाला कि का माँगाथा? जे दुःख मोंय सहेक ले जाथों, का तोहरेमन उके सहेक पारबा? आउर जे लेखे दुःख उठाय के मोंय मोरेक जाथों, का तोहरेमन उसन मोरेक पारबा?”

³⁹ उमन उके जबाब देलैं, “हमरे से होवेक पराई।” यीशु उमन से कहलक, “ठीक अहे, जे दुःख मोंय सहेक ले जाथों, उके तोहरेमन सहबा आउर जे लेखे केर दुःख उठाय के मोंय मोरेक जाथों, से लेखे केर दुःख उठाय के मोरेक पारबा।

⁴⁰ मगर परमेश्‍वर जेके चुइन हे उकरे लगिन उ ठाँव के तेयार काइर हे, उके छोइड़ आउर केखो अपन भतखाइया आउर लेंगा बइठाएक केर अधिकार मोके नखे।”

⁴¹ इ सुइन के दसो चेलामन याकूब आउर यूहन्ना से नराज होई गेलैं।

⁴² तब यीशु सोउब के अपन ठिना बोलालक आउर उमन से कहलक, “तोहरेमन जानाला कि इ दुनिया में जे आदमीमन राजा समझल जायना, उमन अपन अधिकार के अपन से हेंठे केर आदमीमन के दबाएक लगिन काम में लानैना। उ मनक अगुवामन जबरजस्ती अपन गोइठ के आदमीमन के मनुवायना।

⁴³ मगर तोहरेमन के उमन नियर नी होवेक चाही, सेले जे केऊ तोहरेमन में से बाड़ बनेक चाहेला, उ तोहरेमन केर सेवक बनोक।

⁴⁴ आउर जे केऊ तोहरेमन में से मालिक बनेक चाहेला, उ सोउब केर धांगर बनोक।

⁴⁵ काले कि मोंय आदमी केर बेटा इकर लगिन नी आय हों कि मोर एगो महान राजा लेखे सेवा-सुसइर करल जाई। मगर इकर लगिन आय हों कि मोंय खुद दोसर मनक सेवा-सुसइर करमूँ आउर ढेइर आदमीमन केर पापमन से छुटकारा लगिन अपन जान देई देमूँ।”

अंधरा बरतिमाई के ठीक करेक

⁴⁶ यरुशलेम शहर बटे जाएक बेरा यीशु आउर उकर चेलामन यरीहो शहर में आलैं। जइसनेहें यीशु आउर उकर चेलामन आउर एगो बड़का भीड़ यरीहो शहर से निकलत रहे, ओहे बेरा तिमाई केर बेटा बरतिमाई जे कि अंधरा रहे सड़क केर किनारे बाइठ के भीख माँगत रहे।

⁴⁷ जब उ आदमीमन से इ सुनलक कि नासरत नगर केर रहेक वाला यीशु एहे डहर से जाथे तो हकाय-हकाय के कहेक लगलक, “हे यीशु! राजा दाऊद केर संतान! मोर उपरे दया कर।”

⁴⁸ ढेइर आदमीमन उके डाँटलैं कि चुप रहोक। मगर उ आउर हें जोर से हकाय के कहेक लगलक, “हे राजा दाऊद केर संतान! मोर उपरे दया कर।”

⁴⁹ जब यीशु उ अंधरा आदमी केर हकाएक के सुनलक तो रूइक गेलक आउर आसे-पासे केर आदमीमन से कहलक, “उके मोर ठिना लाना।” आउर आदमीमन उ अंधरा आदमी ठिना जाय के उकर से कहलैं, “उठ, धीरज धर, यीशु तोके बोलाथे।”

⁵⁰ उ आदमी अपन गमछा के फेइक के तुरते उछइल के ठड़ालक आउर यीशु ठिना आय गेलक।

⁵¹ यीशु उ अंधरा आदमी से पूछलक, “तोंय का चाहाथिस कि मोंय तोर लगिन करमूँ?” उ जबाब देलक, “हे गुरु, मोंय देखेक चाहाथों।”

⁵² यीशु उकर से कहलक, “चाइल जा, मोंय तोके ठीक काइर हों काले कि तोंय मोर उपरे बिसवास काइर हिस।” आउर उ तुरते देखेक लगलक, आउर डहर में यीशु केर संगे चलेक लगलक।