मरकुस 1 - सादरी नवाँ नियम

यूहन्ना बपतिस्मा जल संस्कार देवेक वाला केर परचार

¹ इ किताब में परमेश्‍वर केर बेटा, यीशु मसीह केर बारे में शुभ समाचार लिखल अहे।

^2-3 इ शुभ समाचार केर शुरुवात ठीक ओहे लेखे होई हे, जइसन परमेश्‍वर अपन बेटा केर बारे में मलाकी केर लिखल किताब में, जे परमेश्‍वर केर संदेश के बताएक वाला रहे, ढेइर आगे हें कइह देई रहे, “देख, मोंय अपन संदेश के पोंहचाएक वाला के तोर आगे भेजाथों। उ तोर से मिलेक लगिन आदमीमन के तेयार करी।” एहे लेखे यशायाह परमेश्‍वर केर संदेश बताएक वाला हों अपन किताब में लीख हे, “उ सुनसान ठाँवमन में रही आउर आदमीमन के तोर उपरे बिसवास करेक लगिन तेयार करी। ताकि उमन अपन मन के तेयार करोक आउर तोर से मिलेक पारोक।”

⁴ जे संदेश पोंहचाएक वाला केर बारे में यशायाह लीख हे, उ यूहन्ना रहे। उ आलक आउर अपन सेवा यरदन नदी केर भीरे सुनसान ठाँव में शुरु करलक। जेमन यूहन्ना ठिना आवत रहैं उमन के यूहन्ना इ बतात रहे, “पाप करेक छोइड़ देवा आउर बपतिस्मा जल संस्कार लेवा, तब परमेश्‍वर तोहरेमन केर पापमन के क्षमा करी।”

⁵ यहूदिया परदेस केर कायनों गाँव से, आउर यरुशलेम शहर से ढेइर आदमीमन निकइल के यूहन्ना केर उपदेस सुनेक लगिन उकर ठिना आलैं, आउर सुइन के अपन पापमन के मानलैं। तब यूहन्ना उमन के यरदन नदी में बपतिस्मा जल संस्कार देलक।

⁶ यूहन्ना ऊँट केर रोवाँ केर बनाल एगो साधारण लुगा पिंधत रहे, आउर अपन डाँड़ा में चमड़ा केर कसना बाँधल रहत रहे। उ फेनगा आउर बनमाउद केर रस खात रहे।

⁷ उ इ परचार करत रहे, “मोर पाछे एगो आदमी जल्दी आवेक वाला अहे, जे मोर से शक्तिशाली अहे। मोंय तो उकर धांगर केर लाएक हों नखों कि निहइर के उकर जूतामन केर बाँधल डोरा के खोलेक पारमूँ।

⁸ मोंय तो तोहरेमन के सिरिफ पानी से बपतिस्मा जल संस्कार देई हों, लेकिन उ तोहरेमन के पवितर आत्मा से बपतिस्मा देवी।”

यीशु केर बपतिस्मा जल संस्कार

⁹ जब यूहन्ना आदमीमन के उपदेस आउर बपतिस्मा जल संस्कार देवत रहे, उ बेरा यीशु गलील परदेस केर नासरत नगर से उकर ठिना आलक, आउर यरदन नदी में यूहन्ना से बपतिस्मा जल संस्कार लेलक।

¹⁰ आउर जब उ पानी से निकइल के उपरे आलक, तो तुरते स्वरग के खुलते आउर पवितर आत्मा के पेरवाँ केर रूप में अपन उपरे उतरते देखलक।

¹¹ तब स्वरग से परमेश्‍वर केर आवाज आलक, “तोंय मोर दुलार बेटा हेकिस। तोर से मोंय ढेइर खुश अहों।”

यीशु केर परीक्षा

¹² इकर पाछे पवितर आत्मा तुरते उके सुनसान ठाँव बटे भेजलक।

¹³ सुनसान ठाँव में यीशु चालीस दिन तक रहलक, हूवाँ सिरिफ बान केर जानवरमन रहत रहैं। शैतान उके चालीस दिन तक परखलक; मगर स्वरगदूतमन उकर सेवा करते रहलैं।

यीशु केर सेवा काम केर शुरुवात

¹⁴ थोरेक दिन केर पाछे राजा हेरोदेस यूहन्ना के धरुवाय के जेहेल में भितरुवाय देलक। तब यीशु गलील परदेस में घूइर आलक, आउर आदमीमन के परमेश्‍वर केर राइज केर शुभ समाचार बताएक लगलक।

¹⁵ आउर कहलक, “परमेश्‍वर केर ठहराल समय पूरा होई जाय हे, आउर परमेश्‍वर केर राइज भीरे पोंहइच जाय हे, पाप करेक छोइड़ देवा आउर शुभ समाचार केर उपरे बिसवास करा।”

मछुवामन केर बोलाल जाएक

¹⁶ एक दिन यीशु गलील झील केर किनारे-किनारे जात रहे, उ बेरा यीशु सिमोन आउर उकर छोट भाई अन्द्रियास के देखलक। उमन मछुवा रहैं आउर मछरी धारेक ले झील में जाल फेकत रहैं।

¹⁷ यीशु उमन से कहलक, “मोर पिछे होई लेवा आउर मोर चेला बाइन जावा। आइज तक तोहरेमन मछरी धारत रहा, मगर अब मोंय तोहरेमन के सिखामूँ कि आदमीमन के मोर ठिना बिसवास में कइसन लानेक अहे।”

¹⁸ उमन तुरते जालमन आउर मछरी धारेक केर काम के छोइड़ के, यीशु केर चेला बनेक लगिन उकर संगे चाइल गेलैं।

¹⁹ आउर यीशु हूवाँ से थोरेक दूर आगे गेलक तो जबदी केर बेटा याकूब, आउर उकर छोट भाई यूहन्ना के देखलक। उ दुयो अपन आबा केर संगे मछरी धारेक लगिन डोंगा उपरे जाल के सरियात रहैं।

²⁰ यीशु तुरते दुयो भाई के अपन ठिना बोलालक आउर उमन से कहलक, “मोर संगे आवा आउर मोर चेला बाइन जावा।” उ दुयो अपन आबा जबदी के कमियामन केर संगे डोंगा उपरे छोइड़ के यीशु केर चेला बनेक लगिन उकर संगे चाइल गेलैं।

भूत धारल आदमी के ठीक करेक

²¹ यीशु आउर उकर चेलामन कफरनहूम नगर में आलैं, तब जइसनेहें यहूदी मनक आराम केर दिन आलक, यीशु यहूदी मनक प्रार्थना घर में गेलक आउर उपदेस देवेक लगलक।

²² आदमीमन उकर उपदेस के सुइन के ताजुब होई गेलैं, काले कि यीशु उमन के मूसा केर नियम के सिखाएक वालामन नियर निहीं, मगर इ लेखे सिखात रहे कि उके सिखाएक केर अधिकार अहे।

²³ जेखन यीशु उपदेस देवत रहे, से बेरा यहूदी मनक प्रार्थना घर में एगो आदमी बइठल रहे, जेके भूत धाइर रहे।

²⁴ उ आदमी चिल्लाय के कहलक, “हे नासरत नगर केर रहेक वाला यीशु, तोंय हमरे से का चाहिसला? का तोंय हमरे के नाश करेक आय हिस? मोंय तोके जानोना कि तोंय केहर हेकिस? तोंय परमेश्‍वर केर पवितर आदमी हेकिस, तोंय परमेश्‍वर बटले आय हिस।”

²⁵ यीशु भूत के घुड़इक के कहलक, “चुप रह; आउर उ आदमी में से निकइल जा।”

²⁶ तब भूत उके आँइठ के आउर जोर से चिल्लाय के उकर में से निकइल गेलक।

²⁷ तब जेतना आदमीमन यहूदी मनक प्रार्थना घर में रहैं, सोउबमन ताजुब होई के एक दोसर से पूछेक लगलैं, “इ कोन लेखे केर उपदेस हेके? उ अधिकार केर साथ नवाँ उपदेस देवेला। उ भूतमन के हों आगया देवेला आउर उमन उकर आगया के मानैना।”

²⁸ इकर पाछे उ आदमीमन यीशु केर बारे में ढेइर आदमीमन के बतालैं, आउर जल्दी हें उकर नाँव गलील परदेस केर दूर-दूर केर गाँवमन में फाइल गेलक।

बेमरियामन के ठीक करेक

²⁹ यीशु अपन चेलामन केर संगे यहूदी मनक प्रार्थना घर से बाहरे निकइल के, तुरते याकूब आउर यूहन्ना केर संगे सिमोन आउर अन्द्रियास केर घर आलक।

³⁰ उ बेरा सिमोन केर साइस जार से कुंहरत रहे आउर डिसना में सुतल रहे। जइसनेहें यीशु हूवाँ पोहोंचलक, उमन उके बतालैं कि सिमोन केर साइस के जार धाइर हे।

³¹ तब यीशु सिमोन केर साइस ठिना जाय के उकर हाँथ धाइर के उके उठालक, आउर उकर जार उतइर गेलक आउर उकर साइस उमन केर सेवा सुसइर करेक लगलक।

³² जब यहूदी मनक आराम केर दिन बीत गेलक आउर बेइर डूइब गेलक, तो आदमीमन सोउब बेमरियामन के आउर भूत धारल आदमीमन के उकर ठिना लानलैं।

³³ आउर आदमी मनक भीड़ दुरा केर बाहरे जमा होई गेलक।

³⁴ आउर जेमन बरने-बरन केर बेमारी से दुःखी रहैं उमन के यीशु ठीक करलक, उ भूत धारल ढेइर आदमीमन के हों छुटकारा देलक। मगर भूतमन के कोनों कहेक नी देलक, काले कि भूतमन जानत रहैं कि उ परमेश्‍वर केर बेटा हेके।

गलील परदेस में यीशु केर परचार

³⁵ बिहान के बेइर उगेक केर ढेइर आगे यीशु उइठ के एगो सुनसान ठाँव में गेलक, आउर प्रार्थना करेक लगलक।

³⁶ जब सिमोन आउर उकर संगमन के पता चललक कि यीशु हिंयाँ नखे, तो उमन यीशु के खोजेक गेलैं।

³⁷ जब उ मिललक, तो उकर से कहेक लगलैं, “ढेइर आदमीमन तोके खोजाथैं।”

³⁸ यीशु उमन से कहलक, “आवा, हमरे आसे-पासे केर गाँवमन में जाब कि मोंय हूवाँ केर आदमीमन के हों परमेश्‍वर केर संदेश के सुनामूँ। काले कि दुनिया में आवेक केर मोर एहे इरादा हेके।”

³⁹ तब यीशु गोटा गलील परदेस केर ढेइर नगरमन में गेलक, आउर हूवाँ केर यहूदी मनक प्रार्थना घर में जाय-जाय के परचार करलक आउर भूतमन के हों निकलालक।

कोढ़ बेमरिया के ठीक करेक

⁴⁰ एक दिन एगो आदमी यीशु ठिना आलक। उ आदमी केर कोढ़ बेमारी रहे, यीशु केर आगे ठेहुनाय के बिनती करलक, “मोके ठीक काइर दे, काले कि मोंय जानोना कि अगर तोंय चाहबे तो मोके ठीक करेक पारबे।”

⁴¹ यीशु उकर उपरे तरइस के हाँथ बढ़ालक आउर उके छुई के कहलक, “मोंय तोके ठीक करेक चाहोना, ठीक होई जा।”

⁴² आउर उ तुरते कोढ़ बेमारी से पूरा-पुरी ठीक होई गेलक।

^43-44 तब यीशु उके चेतालक आउर तुरते इ कइह के भेजलक, “देख, केकरो से ना कहबे कि मोंय तोके ठीक काइर हों। मगर यहूदी पुरोहित ठिना जा आउर उके देखाव कि तोंय ठीक होई जाय हिस, आउर परमेश्‍वर लगिन उ सोउब भेंट के चढ़ाव जेकर बारे में मूसा अपन नियम में लीख हे, होले तोके यहूदी रीति केर मोताबिक शुद्ध मानल जाई। इ गोइठ आदमीमन लगिन एक सबूत होवी कि तोंय सचमुच में ठीक होई जाय हिस।”

⁴⁵ उ आदमी हूवाँ से चाइल गेलक। मगर बाहरे जाय के इ गोइठ के ढेइर आदमीमन के बतालक, “यीशु मोके ठीक काइर हे।” इ लगिन यीशु नगर में फिन खुल्लम-खुल्ला नी जाएक पारलक। मगर उ नगर से बाहरे सुनसान ठाँव में रहलक, आउर चाइरो बटे से आदमीमन उकर ठिना आते रहलैं।