मत्ती 8 - सादरी नवाँ नियम

कोढ़ केर रोगी के छुई के ठीक करेक

¹ जब यीशु, उ पहार से उतइर के हेंठे आलक, तो एगो बड़का भीड़ उकर पिछे होई गेलक।

² आउर एगो कोढ़ बेमरिया आदमी यीशु ठिना आय के उके प्रणाम करलक आउर कहलक, “हे प्रभु, मोके ठीक काइर दे काले कि मोंय जानोना, अगर तोंय चाहबे तो मोके ठीक करेक पारबे।”

³ यीशु अपन हाँथ बढ़ाय के उके छुलक आउर कहलक, “हाँ, मोंय चाहोना कि तोंय ठीक होई जा।” उ तुरते कोढ़ बेमारी से ठीक होई गेलक।

⁴ यीशु उकर से कहलक, “देख, केकरो से ना कहबे कि मोंय तोके ठीक काइर हों, मगर जाय के खुद के यहूदी पुरोहित के देखाव कि तोंय ठीक होई जाय हिस आउर उ भेंट के चढ़ाबे जेकर बारे में मूसा अपन नियम में लीख हे, ताकि तोके यहूदी रीति केर मोताबिक शुद्ध मानल जाई आउर आदमीमन लगिन सबूत होवी।”

रोमी अधिकारी केर यीशु उपरे पक्का बिसवास

⁵ आउर जब यीशु कफरनहूम नगर में आलक तो सौ सिपाही मनक एगो रोमी अधिकारी उकर ठिना आय के उकर से बिनती काइर के कहलक,

⁶ “हे प्रभु, मोर धांगर लकवा केर बेमारी से घर में पड़ल अहे, जे हिलेक-डुलेक नी पाराथे।”

⁷ यीशु उकर से कहलक, “मोंय तोर घर में आय के उके ठीक करमूँ।”

⁸ रोमी अधिकारी जबाब देलक, “हे प्रभु मोंय इ लायक नखों कि तोंय मोर घर में आबे, मगर तोंय मुँह से भइर कइह दे, तो मोर धांगर ठीक होई जाई।

⁹ काले कि मोंय हों दोसर अधिकारी मनक हेंठे काम करेक वाला आदमी हेकों आउर मोर हेंठे हों सिपाहीमन काम करैना। जब मोंय एगो से कहोना, ‘जा!’ तो उ जायला, आउर दोसर से कहोना, ‘आव!’ तो उ आवेला आउर अपन धांगर से कहोना, ‘इ काम के कर!’ तो उ करेला।”

¹⁰ यीशु उकर एइसन गोइठ सुइन के ताजुब होई गेलक, आउर उ अपन पाछे अवाइया भीड़ से कहलक, “मोंय तोहर से सच कहाथों, ‘मोंय इसराइल देस में एको गो एइसन आदमी नी पालों, जे इ परजाइत आदमी नियर मोर उपरे पोक्ता बिसवास करेला।’

¹¹ आउर मोंय तोहरेमन से कहाथों कि दुनिया केर चाइरो कोना से दोसर जाइत केर ढेइर बगरा आदमीमन अब्राहम, इसहाक आउर याकूब केर संगे बाइठ के स्वरग राइज में खुशी मनाबैं।

¹² मगर ढेइर इसराइली आदमीमन, जेमन लगिन स्वरग राइज तेयार करल जाहे, बाहरे अंधार में फेइक देवल जबैं, जहाँ काँदेक आउर दाँत केटरेक होवी।”

¹³ तब यीशु सौ फौज मनक रोमी अधिकारी से कहलक, “जा! जइसन तोंय बिसवास काइर हिस, तइसनेहें तोर लगिन होई जाओक।” आउर उकर धांगर ओहे बेरा बेस होई गेलक।

पतरस केर घर में बेमरियामन केर ठीक होवेक

¹⁴ इकर पाछे यीशु पतरस केर घर में आलक आउर उ पतरस केर साइस के जार से डिसना में सुतल देखलक।

¹⁵ यीशु उकर हाँथ के छुलक आउर उकर जार उतइर गेलक आउर उ उइठ के उ मनक सेवा-सुसइर करेक लगलक।

¹⁶ जब यहूदी मनक आराम केर दिन बीत गेलक आउर साँझ होई गेलक, तब आदमीमन यीशु ठिना भूत धारल ढेइर आदमीमन के लानलैं। आउर यीशु भूतमन के अपन बचन से निकलाय देलक आउर सोउब बेमरिया आदमीमन के ठीक करलक।

¹⁷ इ लेखे यशायाह परमेश्‍वर केर संदेश के बताएक वाला केर कहल इ गोइठ पूरा होलक, “उ खुद हमर कमजोरीमन के लेई गेलक आउर हमर बेमारीमन के उठाय लेलक।”

यीशु केर चेला बनेक केर कीमत

¹⁸ यीशु जब अपन चाइरो बटे आदमी मनक एगो बड़का भीड़ के देखलक तो अपन चेलामन से कहलक, “आवा हमरे झील केर उ पाखी जाब।”

¹⁹ आउर जइसनेहें उमन जाएक लगिन तेयार होवत रहैं, एगो मूसा केर नियम के सिखाएक वाला आदमी आय के उकर से कहलक, “हे गुरु, मोंय तोर चेला बनेक लगिन जहाँ-जहाँ तोंय जाबे, हूवाँ तोर पिछे-पिछे जामूँ।”

²⁰ यीशु उकर से कहलक, “सियार मनक रहेक लगिन माड़ा आउर आकाश केर चरईमन लगिन खोंता होवेला, मगर मोंय आदमी केर बेटा लगिन दुनिया में मूँड़ रखेक केर हों ठाँव नखे।”

²¹ एगो आउर चेला उकर से कहलक, “हे प्रभु, मोके आगे अपन घर जाएक दे, जब मोर आबा मोइर जाई आउर उके मोंय गाइड़ लेमूँ, तब आय के तोर चेला बनमूँ।”

²² यीशु उकर से कहलक, “तोंय मोर चेला बनेक लगिन मोर संगे आव, दुनिया में जे आदमीमन आत्मा में मोरल अहैं, उमन के अपन मुरदामन के गाड़ेक दे।”

यीशु बटले आँधी आउर तूफान के शांत करेक

²³ जब यीशु डोंगा उपरे चढ़लक तो उकर चेलामन उकर संगे चाइल गेलैं।

²⁴ थोरेक देरी पाछे झील में एगो बड़का आँधी तूफान उठलक, आउर पानी केर लहरा से डोंगा ढँपाय जात रहे आउर डुबत रहे, मगर यीशु डोंगा में निंदात रहे।

²⁵ तब चेलामन उकर ठिना आय के उके जगाय के कहलैं, “हे प्रभु, हमरे के बचाव, हमरे पानी में डुबाथी।”

²⁶ यीशु उमन से कहलक, “हे थोर बिसवास करइयामन, काले डराथा? तोहरेमन के बिसवास नखे कि मोंय तोहरेमन के बचाएक पारमूँ।” तब यीशु उइठ के आँधी आउर पानी के डाँटलक आउर सोउब स्थिर होई गेलक।

²⁷ इ घटना के देइख के चेलामन ताजुब काइर के कहेक लगलैं, “इ कइसन आदमी हेके कि आँधी आउर पानी हों उकर आगया के मानैना।”

भूतमन के सुवइर केर गोंहड़ा में भेजेक

²⁸ जब यीशु आउर उकर चेलामन गलील झील केर उ पाखी गिरासेनी मनक परदेस में पोहोंचलैं, तो दूई गो भूत धारल आदमीमन मसना से निकइल के यीशु ठिना आलैं। उ दुयो एतना बिरझल रहैं कि उ डहर से होई के केऊ हों आदमी आवा-जाही करेक नी पारत रहे।

²⁹ उमन चिल्लाय के कहलैं, “हे परमेश्‍वर केर बेटा, तोर से हमरे केर का काम अहे? का तोंय समय से पहिले हमरे के दुःख देवेक आय हिस?”

³⁰ उमन से थोरेक दूर सुवइर मनक एगो बड़का गोंहड़ा चरत रहे।

³¹ भूतमन इ कइह के यीशु से बिनती करलैं कि, “अगर तोंय हमरे के निकलाएक चाहिसला, तो सुवइरमन केर गोंहड़ा में भेइज दे।”

³² यीशु उमन से कहलक, “जावा” उमन निकइल के सुवइरमन केर भीतरे ढूइक गेलैं आउर देखते-देखते समूचा गोंहड़ा केर सोउब सुवइर हेंठे तेज ढलाउन में कूदते पानी में डूइब मोरलैं।

³³ आउर सुवइर चरवाहामन हूवाँ से भाइग के नगर में गेलैं आउर इ सोउब गोइठमन के आदमीमन के बतालैं, आउर जेमन में भूतमन रहैं उकर हाल के हों कइह सुनालैं।

³⁴ तब समूचा नगर केर आदमीमन यीशु से भेंट करेक लगिन निकइल के आलैं। उमन यीशु के आउर उ दुयो आदमीमन के देइख के यीशु से बिनती काइर के कहेक लगलैं, “हमर सिमान से बाहरे निकइल जा।”