मत्ती 28 - सादरी नवाँ नियमयीशु केर जी उठेक ( मरकुस 16:1-8 ; लूका 24:1-12 ; यूहन्ना 20:1-10 ) 1 यहूदी मनक आराम केर दिन केर पाछे हफ्ता केर शुरु दिन बड़ बिहाने मगदला गाँव केर मरियम आउर दोसर मरियम कबर के देखेक आलैं। 2 ओहे बेरा अचका एगो बड़का भूंईडोल होलक आउर प्रभु केर एगो दूत स्वरग से उतरलक आउर कबर ठिना आय के दुरा केर पखना के लुढ़काय देलक, आउर उकर उपरे बाइठ गेलक। 3 उकर रूप बिजली जइसन आउर उकर लुगा बरफ नियर चरका रहे। 4 उके देइख के पहरादारमन डरे थरथराय गेलैं आउर मोरलमन नियर होई गेलैं। 5 प्रभु केर दूत जनानामन से कहलक, “तोहरेमन ना डरावा! मोंय जानोना कि तोहरेमन यीशु के जे क्रूस उपरे चढ़ाल जाय रहे, खोजाथा। 6 उ हिंयाँ नखे, उ जी उइठ हे। जइसन कि उ कइह रहे। आवा, इ ठाँव के देखा, जहाँ प्रभु रखल जाय रहे, 7 आउर जल्दी जाय के उकर चेलामन से कहबा, ‘उ मोरलमन में से जी उइठ हे, उ तोहरेमन से आगे गलील परदेस जाई, हूवाँ उके देखेक पारबा’ देखा, मोंय तोहरेमन के कइह देलों।” 8 उमन ताजुब होलैं आउर खुशी-खुशी कबर ठिना से जल्दी हें यीशु केर चेलामन के खबर देवेक लगिन कूदते चाइल गेलैं। 9 डहर में यीशु अचका उ जनानामन से भेटालक आउर कहलक, “जोहार” आउर उमन उकर भीरे आय के आउर ठेहुना टेइक के उकर भक्ति करलैं। 10 तब यीशु उमन से कहलक, “ना डरावा, जाय के मोर चेलामन से कइह देबा कि उमन गलील परदेस चाइल जाओक, हुवाँय उमन मोके देखबैं।” पहरादारमन बटले यीशु केर जी उठेक केर खबर सुनाएक 11 जब जनानामन चेलामन के इ खबर बताएक जात रहैं, तब थोरेक पहरादारमन हों नगर में आय के पूरा हाल के यहूदी मुध पुरोहितमन के बतालैं। 12 तब उमन धरम केर अगुवामन केर संगे जमा होई के सलहा करलैं आउर सिपाहीमन के ढेइर चाँदी देई के कहलैं, 13 “तोहरेमन इ कहबा कि राइत के जब हमरे निंदात रही, तो उकर चेलामन आय के उके चोराय के लेई गेलैं। 14 अगर इ गोइठ राजपाल के पता चली तो हमरे उकर से गोठियाब, तोहरेमन के चिंता करेक केर जरुरत नखे।” 15 उमन रुपया लेई लेलैं आउर जइसन सिखाल जाय रहैं, तइसनेहें करलैं। इ गोइठ फाइल गेलक आउर आइज तक यहूदीमन में एहे चलते आवाथे। चेलामन के देखाई देवेक आउर आखरी आगया ( मरकुस 16:14-18 ; लूका 24:36-49 ; यूहन्ना 20:19-23 ; खा.चेला.का. 1:6-8 ) 16 तब यीशु केर गारह चेलामन गलील परदेस में उ पहार उपरे गेलैं, जहाँ जाएक लगिन यीशु उमन के बताय रहे। 17 आउर चेलामन उके देइख के उकर भक्ति करलैं, मगर केऊ-केऊ के शंका होलक कि उ जिंदा होई जाहे। 18 यीशु उमन ठिना आय के कहलक, “स्वरग आउर धरती केर समूचा अधिकार मोके देवल जाय हे। 19 से लगिन तोहरेमन जाय के सोउब जाइत केर आदमीमन के चेला बनावा आउर उमन के एगो चिन्हा केर रूप में आबा, आउर बेटा, आउर पवितर आत्मा केर नाँव से बपतिस्मा जल संस्कार देवा, 20 आउर उमन के सोउब गोइठमन के जे मोंय तोहरेमन के आगया देई हों, मानेक लगिन सिखावा: आउर देखा, मोंय दुनिया केर अंत तक सोउब बेरा तोहरेमन केर संगे अहों।” |
Sadri Bible by The Love Fellowship is licensed under Creative Commons Attribution-ShareAlike 4.0 License.
Beyond Translation