मत्ती 27 - सादरी नवाँ नियम

पिलातुस केर आगे यीशु

¹ बिहाने-बिहान सोउब यहूदी मुध पुरोहितमन आउर यहूदी धरम केर अगुवामन यीशु के माइर मोराएक केर सलहा करलैं।

² आउर उमन यीशु के बाँधलैं आउर उके पिलातुस ठिना लेई गेलैं, जे यहूदिया परदेस केर रोमी सरकार में राजपाल रहे।

यहूदा इस्करियोती केर आत्महत्या करेक

³ जब यीशु के धरुवाएक वाला यहूदा जाइन गेलक कि उ दोषी ठहराल जाय हे, तो उ पसतालक आउर उ तीस गो चाँदी केर सिक्का के यहूदी मुध पुरोहितमन आउर धरम केर अगुवामन ठिना घुराय लानलक।

⁴ आउर कहलक, “मोंय निरदोष आदमी के मरुवाएक लगिन धरुवाय के पाप काइर हों।” उमन उकर से कहलैं, “इकर से हमरे के कोनों मतलब नखे, उकर लगिन तोहें जिम्मेदार हेकिस।”

⁵ तब यहूदा उ सिक्कामन के यहूदी मनक मंदिर केर अंगना में फेइक के चाइल गेलक आउर बाहरे जाय के फाँसी होई गेलक।

⁶ यहूदी मुध पुरोहितमन उ सिक्कामन के लेई के कहलैं, “हमर नियम केर मोताबिक इके मंदिर केर भंडार में रखेक उचित ना लगे, काले कि इ लोहू बहाय के मोराएक लगिन देवल दाम हेके।”

⁷ तब उमन सलहा करलैं आउर उ सिक्कामन से परदेसी आदमीमन के गाड़ेक लगिन कुम्हार केर खेत के कीन लेलैं।

⁸ एहे खातिर उ खेत आइज तक लोहू केर खेत केर नाँव से जानल जायला।

⁹ इ लेखे यिर्मयाह परमेश्‍वर केर संदेश के बताएक वाला केर कहल इ बचन पूरा होलक: “उमन चाँदी केर तीस गो सिक्का लेलैं, ओहे दाम इसराइल केर संतानमन उकर लगिन ठहराय रहैं,

¹⁰ आउर जइसन प्रभु मोके आगया देई रहे तइसनेहें उमन इ सिक्का से कुम्हार केर खेत के कीन लेलैं।”

पिलातुस केर यीशु से सवाल करेक

¹¹ जब यीशु राजपाल केर आगे ठड़ाय रहे तो राजपाल उकर से पूछलक, “का तोंय यहूदीमन केर राजा हेकिस?” यीशु उके जबाब देलक, “तोंय खुद हें कहाथिस।”

¹² यहूदी मुध पुरोहितमन आउर यहूदी धरम केर अगुवामन यीशु केर उपरे दोष लगात रहैं, मगर यीशु उ मनक कोनों सवाल केर जबाब नी देलक।

¹³ सेकर लगिन पिलातुस यीशु से कहलक, “का तोंय नी सुनाथिस कि इमन तोर उपरे केतना दोष लगाथैं?”

¹⁴ मगर यीशु उके कोनोवें सवाल केर जबाब नी देलक, इ देइख के राजपाल ढेइर ताजुब होलक।

पिलातुस से बरअब्बा के छोड़ेक आउर यीशु के माइर मोराएक केर बिनती

¹⁵ आउर राजपाल केर इ रीति रहे कि उ यहूदी मनक फसह परब में हर साल आदमीमन लगिन एगो कैदी के जेके उमन चाहत रहैं, छोइड़ देवत रहे।

¹⁶ उ समय बरअब्बा नाँव केर एगो नामी कैदी जेहेल घर में रहे।

¹⁷ जब आदमीमन जमा होलैं तो राजपाल पिलातुस उमन से कहलक, “तोहरेमन केके चाहाथा कि मोंय तोहर लगिन छोइड़ देमूँ? बरअब्बा के या यीशु के, जे मसीह कहायला?”

¹⁸ काले कि पिलातुस जानत रहे कि उमन यीशु के हिसिंगा से धरुवाय हैं।

¹⁹ जब उ फैसला करेक केर कुरसी में बइठल रहे तो उकर जनाना उके कइह भेजलक, “तोंय उ बेकसूर आदमी केर गलत फैसला ना करबे, काले कि मोंय आइज सपना में उकर खातिर ढेइर दुःख उठाय हों।”

²⁰ एहे बेरा यहूदी मुध पुरोहितमन आउर धरम केर अगुवामन आदमीमन के बहकालैं कि उमन बरअब्बा के छोड़ेक लगिन आउर यीशु लगिन मौत केर सजा केर माँग करोक।

²¹ राजपाल पिलातुस उमन से फिन पूछलक, “तोहरेमन का चाहाथा? इ दुयो में से केके तोहरे लगिन छोइड़ देमूँ?” उमन कहलैं, “बरअब्बा के।”

²² पिलातुस उमन से पूछलक, “तो फिन यीशु के जे मसीह कहायला, उकर संगे मोंय का करमूँ?” सोउब आदमीमन उकर से कहलैं, “उ क्रूस उपरे चढ़ाल जाओक।”

²³ राजपाल पिलातुस पूछलक, “काले उ का बुराई काइर हे?” मगर उमन आउर हें चिल्लाय-चिल्लाय के कहेक लगलैं, “उ क्रूस उपरे चढ़ाल जाओक।”

²⁴ जब पिलातुस देखलक कि यीशु के बचाएक लगिन कोनों नी बनाथे, मगर इकर उल्टा गूल-गंजाइर बढ़ते जाथे, तो उ पानी मंगाय के भीड़ केर आगे हाँथ धोई के कहलक, “मोंय इ धरमी आदमी केर लोहू से निरदोष अहों, तोहरेमन हें इकर जिम्मेदार हेका।”

²⁵ सोउब आदमीमन जबाब देलैं, “हाँ इके लोहू बहाय के मोराएक केर दोष हमर आउर हमर छउवा पुता मनक उपरे होवोक।”

²⁶ तब पिलातुस उ मनक लगिन बरअब्बा के छोइड़ देलक, आउर यीशु के कोड़रा मरुवाय के क्रूस उपरे चढ़ाल जाएक लगिन सिपाहीमन के जिम्मा देई देलक।

सिपाहीमन बटले यीशु केर अपमान

²⁷ इकर पाछे यीशु के राजपाल पिलातुस केर सिपाहीमन महल भीतरे लेई गेलैं, आउर हूवाँ सोउब रोमी सिपाहीमन के चाइरो बटे जमा करलैं।

²⁸ आउर उमन यीशु केर लुगा खोइल के उके लाल रंग केर लुगा पिंधालैं।

²⁹ आउर काँटा वाला डाइर से एगो मुकुट बनाय के उकर मूँड़ में पिंधालैं आउर उकर भतखाइया हाँथ में एगो सोंटा धरुवाय देलैं। आउर उकर आगे ठेहुना टेइक के इ कहते उकर मजाक उड़ाएक लगलैं, “हे यहूदीमन केर राजा, जोहार।”

³⁰ आउर उकर उपरे थूकलैं आउर उकर हाँथ से सोंटा लेई के उकर मूँड़ में मारेक लगलैं।

³¹ इ लेखे यीशु केर मजाक उड़ाएक केर पाछे उमन लाल रंग केर लुगा के खोइल के उकरे लुगा के पिंधालैं आउर यीशु के क्रूस उपरे चढ़ाएक लगिन शहर से बाहरे लेई गेलैं।

यीशु केर क्रूस उपरे चढ़ाल जाएक

³² जब उमन यीशु के शहर से बाहरे लेई जात रहैं तो सिमोन नाँव केर एगो आदमी मिललक, जे कुरेन शहर केर रहेक वाला रहे। उमन उके जबरजस्ती यीशु केर क्रूस के उठाय के लेई जाएक लगिन धारलैं।

³³ उमन उ ठाँव में पोहोंचलैं, जे गुलगुता कहायला, जेकर मतलब खोपड़ी केर ठाँव हेके।

³⁴ हूवाँ उमन यीशु के पित्त मिलाल अंगूर केर रस पियेक लगिन देलैं, यीशु उके चाखलक मगर पियेक नी चाहलक।

³⁵ तब सिपाहीमन क्रूस उपरे उकर हाँथ गोड़ के काँटी से ठोइक के चढ़ाय देलैं। इकर पाछे उमन यीशु केर लुगामन के बाँटेक लगिन चिट्ठी साजलैं आउर आपस में उकर लुगामन के बाँइट लेलैं।

³⁶ आउर उमन हूवाँ बाइठ के उकर पहरा देवेक लगलैं।

³⁷ उमन एगो तख्ता में यीशु केर दोष पत्र लीख के उकर मूँड़ उपरे टाइंग देलैं, जेकर में लिखल रहे: “इ यहूदीमन केर राजा यीशु हेके।”

³⁸ आउर उमन यीशु केर संगे दूई झन डाकूमन के एगो के भतखाइया आउर एगो के लेंगा बटे क्रूस उपरे चढ़ालैं।

³⁹ आउर डहर में आवेक-जाएक वालामन मूँड़ हिलाय-हिलाय के उकर निंदा करत रहैं,

⁴⁰ आउर इ कहत रहैं, “हे, यहूदी मनक मंदिर के गिराएक वाला आउर तीसरा दिन में बनाएक वाला, अगर तोंय परमेश्‍वर केर बेटा हेकिस तो खुद के बचाव आउर क्रूस से उतइर के आव।”

⁴¹ एहे लेखे यहूदी मुध पुरोहितमन, मूसा केर नियम के सिखाएक वालामन आउर यहूदी धरम केर अगुवामन हों सोउब मजाक काइर के कहत रहैं,

⁴² “इ दोसरमन के बचालक, मगर खुद के बचाएक नी पारी। इ तो इसराइल केर राजा हेके। अब क्रूस से उतइर के आवी, तब तो हमरे उकर उपरे बिसवास करब।

⁴³ उ परमेश्‍वर केर उपरे भरसा राइख हे, अगर उ इके चाहेला तो अब इके छोड़ाय लेवोक काले कि इ कइह रहे, ‘मोंय परमेश्‍वर केर बेटा हेकों।’ ”

⁴⁴ एहे लेखे डाकूमन हों जे यीशु केर संगे क्रूस उपरे चढ़ाल जाय रहैं, ओहोमन उकर निंदा करत रहैं।

यीशु केर मौत

⁴⁵ दिन केर बारह बजे से लेई के तीन बजे तक गोटा धरती अंधार होई गेलक।

⁴⁶ लगभग तीन बजे यीशु जोर से चिल्लाय के कहलक, “एली, एली लमा शबकतनी?” मतलब “हे मोर परमेश्‍वर, हे मोर परमेश्‍वर, तोंय मोके काले छोइड़ देले?”

⁴⁷ जे आदमीमन हूवाँ ठड़ाल रहैं, उमन में से थोरेक आदमीमन इ सुइन के कहलैं, “उ तो एलिय्याह के हकाथे।”

⁴⁸ उमन में से एक झन तुरते कूइद के पाइनसोखा लेई के उके अमल रस में डुबालक आउर सोंटा में चुभाय के यीशु के पियेक लगिन देलक।

⁴⁹ थोरेक आदमीमन कहलैं, “रहेक देवा, देखब एलिय्याह उके बचाएक लगिन आवेला कि निहीं।”

⁵⁰ तब यीशु फिन जोर से चिल्लाय के प्राण छोइड़ देलक।

⁵¹ आउर उ मोटा परदा जे यहूदी मनक मंदिर में लगाल रहे, उपरे से हेंठे तक फाइट के दूई टुकरा होई गेलक। आउर धरती हिल गेलक आउर चट्टाइनमन फारा होई गेलक।

⁵² आउर कबरमन खुइल गेलक आउर ढेइर पवितर आदमीमन जेमन मोइर जाय रहैं जी उठलैं।

⁵³ उमन यीशु केर जी उठेक केर पाछे कबरमन में से निकइल के पवितर शहर यरुशलेम में गेलैं, आउर ढेइर आदमीमन के देखाई देलैं।

⁵⁴ तब सूबेदार जे सौ सिपाही मनक अधिकारी रहे आउर उकर संगे जेमन यीशु केर पहरा देवत रहैं, भूंईडोल आउर जे कोनों होई रहे, उके देइख के खूब डराय गेलैं आउर कहलैं, “सचमुच, इ परमेश्‍वर केर बेटा रहे।”

⁵⁵ हूवाँ ढेइर बगरा जनानामन जे गलील परदेस से यीशु केर सेवा करते उकर संगे आय रहैं, उमन हों दूर से इके देखत रहैं।

⁵⁶ उमन में मगदला गाँव केर मरियम, याकूब आउर योसेस केर आयो मरियम आउर जबदी केर बेटामन केर आयो रहैं।

यीशु केर गड़ाय जाएक

⁵⁷ तेयारी केर दिन हें साँझ होवेक से आगे अरिमतियाह गाँव केर एगो धनी आदमी आलक। उकर नाँव यूसुफ रहे, जे खुद हें यीशु केर चेला रहे।

⁵⁸ उ पिलातुस ठिना जाय के यीशु केर लाश माँगलक आउर पिलातुस लाश के उके देई देवेक केर आगया देलक।

⁵⁹ यूसुफ लाश के उतराय के उके एगो मलमल केर कफन लुगा में लपटलक।

⁶⁰ आउर उके नवाँ कबर में रखलक, जेके उ अपन लगिन चट्टाइन में खुदवाय रहे, आउर कबर केर दुरा के बंद करेक लगिन एगो बड़का गोल चेपटा पखना के लुढ़काय के चाइल गेलक।

⁶¹ आउर मगदला गाँव केर मरियम आउर याकूब आउर योसेस केर आयो मरियम हूवाँ कबर केर आगे बइठल रहैं।

यीशु केर कबर उपरे पहरा

⁶² अगला दिन आराम केर दिन रहे, यहूदी मुध पुरोहितमन आउर फरीसी दल केर आदमीमन पिलातुस ठिना जमा होई के कहलैं,

⁶³ “हे महाराज, हमरे के याइद अहे कि उ भरमाएक वाला अपन जीते जी कइह रहे, ‘मोंय मोरेक केर पाछे तीसरा दिन फिन जी उठमूँ।’

⁶⁴ से लगिन सिपाहीमन के आगया दे कि तीसरा दिन तक कबर केर पहरा करल जाओक, अगर तोंय एइसन नी करबे तो उकर चेलामन आय के उके चोराय के लेई जाबैं आउर आदमीमन से कहबैं, ‘उ मोरलमन में से जी उइठ हे।’ तब पाछे केर धोखा आगे केर धोखा से हों बुरा होवी।”

⁶⁵ पिलातुस उमन से कहलक, “ठीक अहे, तोहरेमन थोरेक पहरादारमन के लेई के जावा, जेतना तोहर से बनी ओतना रखवाली करुवावा।”

⁶⁶ उमन सिपाहीमन के अपन संगे लेई के गेलैं, आउर कबर केर दुरा में सील माइर के उके बंद काइर देलैं आउर थोरेक सिपाहीमन के पहरादारी करेक लगिन हूवाँ छोइड़ देलैं, ताकि केऊ दुरा केर पखना के अपन ठाँव से ना हटाओक।