मत्ती 26 - सादरी नवाँ नियम

यीशु के मोराएक केर चाल चलेक

¹ जब यीशु इ सोउब गोइठमन के कइह सिरालक, तब अपन चेलामन से कहलक,

² “तोहरेमन जानाला कि दूई दिन केर पाछे यहूदी मनक फसह परब अहे, आउर मोंय आदमी केर बेटा क्रूस उपरे चढ़ाल जाएक लगिन धरुवाय देवल जामूँ।”

³ तब यहूदी मुध पुरोहितमन आउर परजा मनक धरम केर अगुवामन काइफा नाँव केर यहूदी महापुरोहित केर महल केर अंगना में जमा होलैं,

⁴ आउर आपस में सलहा करलैं कि यीशु के छल से धरुवाय के माइर मोराब।

⁵ मगर उमन एक दोसर से कहत रहैं, “हमरे के फसह परब केर समय एइसन नी करेक चाही, कहीं आदमीमन में हुड़दंग ना मइच जाओक।”

एगो जनाना केर यीशु उपरे महंगा सेंट के लगाएक

⁶ उ बेरा यीशु बैतनिय्याह गाँव में सिमोन नाँव केर एगो आदमी केर घर में रहे, जेके यीशु कोढ़ बेमारी से ठीक काइर रहे।

⁷ जब यीशु खाएक लगिन बाइठ रहे, ओहे बेरा एगो जनाना संगमरमर केर पखना से बनाल एगो सीसी में महंगा सेंट भाइर के लानलक। उ शुद्ध जटामांसी तेल से बनाल रहे, उ जनाना यीशु ठिना आय के उकर मूँड़ उपरे सेंट के उझइल देलक।

⁸ इ देइख के उकर चेलामन झुंझलाय के कहेक लगलैं, “इ सेंट के काले सत्यानाश करल गेलक?

⁹ इ तो बेस दाम में बेचाय जातक आउर इकर पइसा के गरीब आदमीमन के देवल जातक।”

¹⁰ इ जाइन के यीशु उमन से कहलक, “जनाना के काले सताथा? उ मोर लगिन बेस हें काम काइर हे।

¹¹ गरीब आदमीमन तो तोहरेमन केर संगे सोउब दिन रहबैं, मगर मोंय तोहरेमन केर संगे सोउब दिन नी रहमूँ।

¹² उ मोर काया में जे इ सेंट लगाय हे, उ मोर दफनाएक जाएक ले तेयार काइर हे।

¹³ मोंय तोहरेमन से सच कहाथों, समूचा दुनिया में जहाँव-कहाँ शुभ समाचार केर परचार करल जाई, हूवाँ उकर इ काम केर चरचा हों उकर याइद में करल जाई।”

यहूदा इस्करियोती केर यीशु के धोखा देवेक

¹⁴ तब यहूदा जे इस्करियोत गाँव केर रहेक वाला आउर बारह खास चेलामन में से एगो रहे, यहूदी मुध पुरोहितमन ठिना जाय के कहलक,

¹⁵ “अगर मोंय यीशु के तोहरे केर हाँथ में धरुवाय देमूँ तो मोके का देबा?” उमन उके तीस गो चाँदी केर सिक्का तवइल के देलैं।

¹⁶ आउर उ ओहे बेरा से यीशु के धरुवाएक केर मोका खोजेक लगलक।

आखरी भोज खाएक

¹⁷ यहूदी मनक बिन खमीर रोटी केर परब आवेक वाला रहे। यीशु केर चेलामन उकर ठिना आय के पूछेक लगलैं, “तोंय कोन ठाँव के चाहिसला कि हमरे हूवाँ जाय के तोर लगिन फसह परब केर भोज खाएक केर तेयारी करब?”

¹⁸ यीशु कहलक, “नगर में फलना आदमी ठिना जाय के उकर से कहबा, ‘गुरु कहाथे कि मोर समय भीरे अहे, मोंय अपन चेलामन केर संगे तोर हिंयाँ फसह परब मनामूँ।’”

¹⁹ यीशु जइसन कइह रहे, तइसनेहें चेलामन फसह परब केर भोज तेयार करलैं।

²⁰ जब साँझ होलक तो यीशु अपन बारहों खास चेलामन केर संगे खाएक लगिन बइठलक।

²¹ जब उमन खात रहैं तो यीशु कहलक, “मोंय तोहरेमन से सच कहाथों कि तोहरेमन में से एक झन मोके धरुवाई।”

²² इ गोइठ सुइन के उमन ढेइर उदास होलैं, आउर हरेक झन यीशु से पूछेक लगलैं, “हे गुरु का उ मोंय हेकों?”

²³ यीशु जबाब देलक, “जे मोर संगे एके डुभा में रोटी डुबाय के खाथे, ओहे मोके धरुवाई।

²⁴ काले कि मोंय आदमी केर बेटा लगिन तो जइसन मोर बारे में पवितर किताब में लिखल अहे, ओहे लेखे होवी। मगर उ आदमी जे मोके धोखा देई के धरुवाय देवी, उकर लगिन हाय! उकर ले एहे बेस होतक कि उकर जनम हें नी होतक।”

²⁵ तब उकर धरुवाएक वाला यहूदा कहलक, “हे गुरु, का उ मोंय हेकों?” यीशु उकर से कहलक, “हाँ, उ तोहें हेकिस।”

प्रभु भोज खाएक

²⁶ जब उमन खात रहैं तो यीशु रोटी लेलक, आउर आशीष माँइग के टुकरालक आउर चेलामन के देई के कहलक, “लेवा, खावा, इ मोर काया हेके।”

²⁷ फिन उ अंगूर केर रस भरल कटोरा लेई के परमेश्‍वर के धन्यबाद देलक आउर इ कहते अपन चेलामन के देलक, “तोहरेमन सोउब इकर में से पिया,

²⁸ काले कि इ अंगूर केर रस मोर करार केर उ लोहू हेके, जे ढेइर आदमी मनक पापमन केर क्षमा लगिन बहाल जायला।

²⁹ मोंय तोहर से कहाथों, ‘आइज केर पाछे अंगूर केर रस मोंय उ बेरा तक नी पीमूँ, जब तक कि मोंय अपन आबा केर राइज में तोहर संगे नवाँ अंगूर केर रस के नी पी लेमूँ।’”

³⁰ तब यीशु आउर उकर चेलामन फसह परब केर गीत गालैं आउर उकर पाछे उमन यरुशलेम शहर से बाहरे जैतून पहार उपरे चाइल गेलैं।

पतरस केर यीशु के मुकइर जाएक केर भविष्यवाणी

³¹ जब उमन पहार बटे जात रहैं तब यीशु उमन से कहलक, “तोहरेमन सोउब आइज हें राइत मोके छोइड़ के चाइल जबा, काले कि पवितर किताब में मोर बारे में लिखल अहे, ‘मोंय उ आदमी के मोरामूँ जे मोर आदमीमन केर चरवाहा नियर देखभाल करेला, जेकर से उ आदमीमन भेड़ीमन नियर तितिर-बितिर होई जबैं।’।

³² मगर मोंय मोइर के जी उठेक केर पाछे तोहरेमन से आगे गलील परदेस में जामूँ आउर हूवाँ मिलमूँ।”

³³ इ गोइठ सुइन के पतरस यीशु से कहलक, “चाहे सोउब चेलामन तोके छोइड़ देबैं तो छोइड़ देबैं, मगर मोंय तोके कहियो नी छोड़मूँ।”

³⁴ यीशु उकर से कहलक, “मोंय तोर से सच कहाथों कि आइज हें एहे राइत के मुरगा बोलेक से आगे तोंय तीन बेर मोर से मुकइर जाबे कि तोंय मोके नी जानिसला।”

³⁵ पतरस उकर से कहलक, “अगर मोके तोर संगे मोरेक हों होवी, फिन भी मोंय नी कहमूँ कि मोंय तोके नी जानोना।” आउर एइसन हें सोउब चेलामन हों कहलैं।

यीशु केर गतसमनी बगाइचा में प्रार्थना

³⁶ जाते-जाते यीशु आउर उकर चेलामन गतसमनी नाँव केर एगो बगाइचा में पोहोंचलैं। तब यीशु अपन चेलामन से कहलक, “जब तक मोंय हूवाँ से प्रार्थना काइर के नी आमूँ, तब तक तोहरेमन एहे ठिना बइठल रहा।”

³⁷ यीशु अपन संगे पतरस के आउर जबदी केर दुयो बेटा याकूब आउर उकर छोट भाई यूहन्ना के बगाइचा में थोरेक दूर लेई गेलक, हूवाँ उ ढेइर दुःखी आउर बेचाइन होवेक लगलक।

³⁸ तब यीशु उमन से कहलक, “मोर मन ढेइर दुःखी अहे, एइसन लगाथे कि मोंय मोरेक वाला अहों, तोहरेमन हिंयाँ रुका आउर जागते रहा।”

³⁹ फिन यीशु थोरेक दूर आगे गेलक आउर ठेहुना टेइक के परमेश्‍वर से प्रार्थना करेक लगलक, “हे मोर आबा, अगर तोर योजना में इ होवेक पराई, तो मोर उपरे आवेक वाला इ दुःख से मोके बचाय ले, फिन भी जइसन मोंय चाहोना तइसन ना कर, मगर जे तोंय चाहिसला ओहे कर।”

⁴⁰ जब यीशु चेलामन ठिना घूइर आलक तो उमन के निंदाते पालक, आउर पतरस से कहलक, “का तोंय मोर संगे एको घड़ी जागेक नी पारिसला?”

⁴¹ “तोहरेमन सोउब जागते रहा आउर प्रार्थना करते रहा, जेकर से तोहरे के शैतान बहकाएक ना पारोक। जे मोंय चाहोना उके तोहरेमन करेक तो चाहाला मगर तोहरे केर काया में उके पूरा करेक केर ताकत नखे।”

⁴² फिन उ दूसरी बेर जाय के इ प्रार्थना करलक, “हे मोर आबा, अगर इ दुःख के उठाएक मोर लगिन जरुरी अहे, तो तोर हें इच्छा पूरा होवोक।”

⁴³ यीशु फिन घूइर के आलक आउर उमन के फिन निंदाते पालक, काले कि उ मनक आँइख नींद से भरल रहे।

⁴⁴ यीशु उमन के छोइड़ के फिन चाइल गेलक आउर ओहे गोइठ फिन दोहराय के, तीसरी बेर प्रार्थना करलक।

⁴⁵ जब यीशु तीसरी बेर उमन ठिना आलक, तो उ तीनों चेलामन से कहलक, “एखन तक निंदाते अहा आउर आराम कराथा? बस! ढेइर होलक, उ बेरा आय जाय हे। देखा! मोंय आदमी केर बेटा, पापीमन केर हाँथे धरुवाल जाथों।

⁴⁶ उठा, चला देखा, मोके धरुवाएक वाला भीरे आय पोंहइच हे।”

यीशु के बंदी बनाएक

⁴⁷ यीशु इ कहते हें रहे कि यहूदा जे बारहों चेलामन में से एगो रहे, आय पोहोंचलक, उकर संगे एगो बड़का भीड़ हों रहे, जेके यहूदी मुध पुरोहितमन आउर आदमी मनक धरम केर अगुवामन भेइज रहैं, उ मनक हाँथ में तलवाइर आउर लाठीमन रहे।

⁴⁸ उके धरुवाएक वाला यहूदा उमन के आगे हें बताय देई रहे कि जेके मोंय चुमा करमूँ ओहे यीशु हेके, उके धाइर के लेई जबा।

⁴⁹ जइसनेहें यहूदा हूवाँ पोहोंचलक उ तुरते यीशु ठिना आय के कहलक, “हे गुरु, जोहार!” आउर उके चुमा करलक।

⁵⁰ यीशु उकर से कहलक, “हे संगी, जे काम लगिन तोंय आय हिस, उके काइर ले।” तब उमन भीरे आय के यीशु के धारलैं आउर उकर हाँथ के बाइंध देलैं।

⁵¹ यीशु केर संगमन में से एगो अपन हाँथ से छोट तलवाइर खींच के यहूदी महापुरोहित केर धांगर उपरे चलाय के उकर कान के काइट देलक।

⁵² तब यीशु उकर से कहलक, “अपन तलवाइर म्यान में राइख ले, काले कि जेमन तलवाइर चलायना, उमन के तलवाइर से नाश करल जाई।

⁵³ का तोंय नी जानिसला कि मोंय अपन आबा से मदइत माँगेक पारोना आउर उ मोर लगिन फौज केर बारह गो दल से हों बगरा स्वरगदूतमन के भेजेक पारी?

⁵⁴ अगर मोंय एइसन करमूँ तो पवितर किताब में लिखल गोइठ कइसन पूरा होवी, जेकर होवेक जरुरी अहे?”

⁵⁵ ओहे बेरा यीशु भीड़ से कहलक, “का तोहरेमन डाकू समइझ के मोके धारेक लगिन तलवाइर आउर लाठीमन लेई के आय हा? मोंय रोज दिन यहूदी मनक मंदिर केर अंगना में बाइठ के उपदेस देवत रहों, से बेरा तोहरेमन मोके नी धारला?

⁵⁶ मगर एखन जे कुछ होवाथे, उ इकर लगिन कि परमेश्‍वर केर संदेश के बताएक वालामन केर लिखल बचन पूरा होवोक।” तब सोउब चेलामन उके छोइड़ के भाइग गेलैं।

कैफा केर सामने यीशु के लेई जाएक

⁵⁷ आउर यीशु के धरुवाएक वालामन उके काइफा नाँव केर यहूदी महापुरोहित ठिना लेई गेलैं, जहाँ मूसा केर नियम के सिखाएक वाला आउर धरम केर अगुवामन जमा होई रहैं।

⁵⁸ पतरस थोरेक दूरी बनाय के यीशु केर पिछे-पिछे यहूदी महापुरोहित केर अंगना तक गेलक आउर हूवाँ अंत देखेक लगिन मंदिर केर पहरादारमन केर संगे बाइठ गेलक।

⁵⁹ यहूदी मुध पुरोहितमन आउर यहूदी अगुवा मनक महासभा यीशु के माइर मोराएक लगिन उकर बिरोध में झूठा गवाही केर खोज में रहैं।

⁶⁰ ढेइर आदमीमन यीशु केर बिरोध में झूठा गवाही तो देवत रहैं, मगर उके मौत केर सजा देवेक लायक उ मनक कोनों गवाही नी मिललक। आखरी में दूई झन आदमीमन आलैं,

⁶¹ आउर कहलैं, “इ कइह हे कि मोंय परमेश्‍वर केर मंदिर के धँसाएक पारोना, आउर उके तीन दिन में बनाएक पारोना।”

⁶² तब यहूदी महापुरोहित ठड़ाय के उकर से पूछलक, “इमन तोर बिरोध में जे गवाही देवाथैं, का तोंय इकर से खुद के बचाएक लगिन कोनों कहेक चाहिसला?”

⁶³ मगर यीशु चुप रहलक। तब यहूदी महापुरोहित यीशु से पूछलक, “मोंय तोके जिंदा परमेश्‍वर केर किरिया खाय के कहाथों कि अगर तोंय परमेश्‍वर केर बेटा मसीह हेकिस, तो मोर से कइह दे।”

⁶⁴ यीशु उके जबाब देलक, “तोंय खुद हें कइह देले, अब मोंय तोर से एहो कहाथों कि अब से तोहरेमन मोंय आदमी केर बेटा के सर्वशक्तिमान परमेश्‍वर केर भतखाइया बटे बइठल आउर आकाश केर बदरीमन में आते देखबा।”

⁶⁵ तब यहूदी महापुरोहित अपन लुगा फाइर के कहलक, “इ परमेश्‍वर केर निंदा काइर हे, अब हमरे के आउर गवाह मनक दरकार नखे। तोहरेमन एखन खुद इके परमेश्‍वर केर निंदा करते सुनला!

⁶⁶ इकर संगे हमरे का करब? तोहरेमन केर का बिचार अहे?” उमन जबाब देलैं, “इ मोराय जाएक केर लायक अहे।”

⁶⁷ तब उमन उकर मुँह उपरे थूकलैं आउर उके घूँसा मारलैं, आउरो आदमीमन थप्पड़ माइर के कहलैं,

⁶⁸ “अगर तोंय मसीह हेकिस तो हमरे के भविष्यवाणी काइर के बताव कि तोके केहर माइर हे?”

पतरस बटले यीशु के मुकइर जाएक

⁶⁹ जब पतरस बाहरे अंगना में बइठल रहे: हूवाँ एगो धांगरिन उकर ठिना आय के कहलक, “तोंय हों तो गलील परदेस केर रहेक वाला यीशु केर संगे रहिस।”

⁷⁰ उ सोउब केर आगे मुकइर के जबाब देलक, “मोंय नी जानोना तोंय का कहाथिस।”

⁷¹ इकर पाछे पतरस बाहरे दुरा बटे चाइल गेलक। मगर एगो दोसर धांगरिन उके देखलक आउर हूवाँ जेमन रहैं, उमन से कहलक, “एहो तो नासरत नगर केर रहेक वाला यीशु केर संगे रहे।”

⁷² पतरस किरिया खाय के फिन मुकइर गेलक आउर जबाब देलक, “मोंय उ आदमी के नी जानोना।”

⁷³ थोरेक देरी केर पाछे जेमन हूवाँ ठड़ाल रहैं, उमन पतरस ठिना आय के उकर से कहलैं, “सचमुच तोंय हों उमन में से एगो हेकिस, काले कि तोर बोली से पता चलाथे कि तोंय गलील परदेस केर हेकिस।”

⁷⁴ तब पतरस यीशु के कोसेक लगलक आउर किरिया खाय के कहलक, “मोंय उ आदमी के नी जानोना।” आउर ठीक ओहे बेरा तुरते मुरगा बोइल देलक।

⁷⁵ तब पतरस के यीशु केर कहल गोइठ याइद आलक कि “मुरगा केर बोलेक से आगे तोंय तीन बेर मोर से मुकइर जबे।” आउर उ बाहरे जाय के फफाइख-फफाइख के काँदेक लगलक।