मत्ती 17 - सादरी नवाँ नियम

यीशु केर रूप बदलाएक

¹ छाव दिन केर पाछे यीशु अपन चेला पतरस, याकूब आउर याकूब केर छोट भाई यूहन्ना के अपन संगे एगो सुनसान ऊँचा पहार उपरे लेई गेलक।

² हूवाँ उ मनक आगे यीशु केर रूप बदइल गेलक आउर उकर मुँह बेइर लेखे चमकेक लगलक आउर उकर लुगा इंजोत लेखे चरका होई गेलक।

³ आउर अचका उमन परमेश्‍वर केर संदेश के देवेक वाला मूसा आउर एलिय्याह के उकर संगे गोठियाते देखलैं।

⁴ से लगिन पतरस यीशु से कहलक, “हे प्रभु, हमर लगिन हिंयाँ रहेक कतइ बेस हेके। अगर तोंय चाहबे होले हिंयाँ तीन गो झोपड़ी बनामूँ, एगो तोर लगिन, एगो मूसा लगिन आउर एगो एलिय्याह केर लगिन।”

⁵ उ कहते हें रहे कि एगो चमकीला बदरी उमन के ढाँइप देलक, आउर उ बदरी में से इ शबद सुनालक, “इ मोर दुलार बेटा हेके, जेकर से मोंय खुश अहों, इकर गोइठ के सुना।”

⁶ चेलामन इ गोइठ सुइन के हुमकुरिया गिर गेलैं आउर ढेइर डराय गेलैं।

⁷ यीशु भीरे आय के उमन के छुई के कहलक, “उठा, ना डरावा।”

⁸ तब उमन अपन नजइर उठाय के देखलैं तो हूवाँ यीशु के छोइड़ के आउर केखो नी देखलैं।

⁹ पहार से उतरेक बेरा यीशु उमन के इ आगया देलक, “जब तक मोंय आदमी केर बेटा मोरलमन में से नी जी उठमूँ, तब तक जे कोनों तोहरेमन देइख हा उके केखो ना बताबा।”

¹⁰ तब चेलामन उकर से पूछलैं, “फिन मूसा केर नियम के सिखाएक वालामन काले कहैना कि मसीह केर आवेक से आगे एलिय्याह केर आवेक जरुरी अहे?”

¹¹ यीशु जबाब देलक, “इ गोइठ सच अहे कि परमेश्‍वर मसीह केर आवेक से पहिले एलिय्याह के भेजेक केर करार काइर रहे, ताकि उ आदमी मनक मन के तेयार करी।

¹² मगर मोंय तोहर से कहाथों कि एलिय्याह आय चुकलक आउर आदमीमन उके नी चिन्हलैं आउर जइसन चाहलैं तइसनेहें उकर संगे ढेइर बुरा बरताव करलैं। एहे लेखे से मोंय आदमी केर बेटा हों उ मनक हाँथ से दुःख उठामूँ।”

¹³ तब चेलामन बुझलैं कि उ हमर से यूहन्ना बपतिस्मा जल संस्कार देवेक वाला केर बारे में कहाथे।

मिरगी गिरेक वाला छउवा के ठीक करेक

¹⁴ जब यीशु आउर उकर तीनों चेलामन भीड़ ठिना पोहोंचलैं, तो एगो आदमी उकर ठिना आलक, आउर उकर आगे ठेहुना टेइक के कहलक,

¹⁵ “हे प्रभु, मोर बेटा केर उपरे दया कर, उ मिरगी गिरेला, आउर ढेइर दुःख उठायला, उ कखनों आइग में, तो कखनों पानी में घरी-घरी गिर जायला।

¹⁶ मोंय तोर चेलामन ठिना उके लाइन रहों, मगर उमन ठीक करेक नी पारलैं।”

¹⁷ यीशु जबाब देलक, “हे अबिसवासी आउर ढींठ आदमीमन, मोंय कतइ दिन तक तोहरेमन केर संगे रहमूँ? आउर कतइ दिन तक तोहरेमन के सहमूँ? उ छोंड़ा के मोर ठिना लाना।”

¹⁸ तब यीशु भूत के डाँटलक, आउर भूत उकर में से निकइल गेलक, आउर छोंड़ा ओहे बेरा ठीक होई गेलक।

¹⁹ पाछे चेलामन अलगे यीशु ठिना आय के पूछलैं, “हमरे उ भूत के काले निकलाएक नी पारली।”

²⁰ यीशु उमन से कहलक, “तोहर में बिसवास केर घटी अहे, से लगिन निकलाएक नी पारला। मोंय तोहरे से सच कहाथों, अगर तोहरे केर बिसवास राई केर माँजी बराबइर हों होवी, तो इ पहार से कहबा कि हिंयाँ से सरइक के हूवाँ चाइल जा, तो उ चाइल जाई आउर तोहरेमन लगिन सोउब कुछ पूरा होवी।”

²¹ मगर एइसन भूत बेगर प्रार्थना आउर उपास केर नी निकलेला।

अपन मौत केर बारे में फिन बताएक

²² जब यीशु आउर उकर चेलामन गलील परदेस में रहैं, तो यीशु उमन से कहलक, “मोंय आदमी केर बेटा आदमी मनक हाँथ में धरुवाल जामूँ।

²³ आउर उमन मोके माइर मोराबैं, आउर मोंय तीसरा दिन जी उठमूँ।” इ गोइठ सुइन के उकर चेलामन ढेइर उदास होलैं।

मन्दिर केर मालगुजारी लेवेक

²⁴ जब उमन कफरनहूम नगर में पोहोंचलैं, तो यहूदी मनक मंदिर केर मालगुजारी लेवेक वालामन पतरस ठिना आय के पूछलैं, “का तोहर गुरु यहूदी मनक मंदिर केर मालगुजारी नी देवेला?”

²⁵ पतरस कहलक, “देवेला।” जब उ घर में आलक, तो यीशु उकर पूछेक से पहिले उकर से कहलक, “हे सिमोन तोंय का सोचिसला? दुनिया केर राजा महसूल या मालगुजारी केमन से लेवेला? देस केर आदमीमन से या परदेस केर आदमीमन से?” पतरस उकर से कहलक, “परदेस केर आदमीमन से।”

²⁶ यीशु उकर से कहलक, “तब तो देस केर आदमीमन के मालगुजारी देवेक नखे।

²⁷ मगर उमन खिसाय ना जाओक, से लगिन तोंय झील किनारे जाय के बंसी फेक, जे मछरी आगे बाझी, उकर मुँह खोलबे, उकर में एगो चाँदी केर सिक्का मिली, उके लेई के मोर आउर अपन लगिन मालगुजारी उमन के देई देबे।”