लूका 7 - सादरी नवाँ नियम

एगो रोमी अधिकारी केर बिसवास

¹ यीशु आदमीमन के अपन सोउब गोइठ सुनाएक केर पाछे कफरनहूम नगर में आलक।

² हूवाँ केऊ सौ सिपाही मनक रोमी अधिकारी केर एगो धांगर जे उकर दुलारा रहे, बेमार से मोरेक नियर रहे।

³ उ यीशु केर बारे में सुइन के यहूदी मनक थोरेक धरम केर अगुवामन के यीशु ठिना इ बिनती करेक लगिन भेजलक कि उ आय के मोर धांगर के ठीक करोक।

⁴ उमन यीशु ठिना आय के उकर से बिनती काइर के कहेक लगलैं, “सौ फौज केर रोमी अधिकारी सच में तोर दया केर लायक अहे, तोंय उकर लगिन एइसनेहें कर।

⁵ काले कि उ हमर जाइत से प्रेम करेला आउर ओहे हमर प्रार्थना घर के बनाय हे।”

⁶ यीशु उ मनक संगे-संगे गेलक, मगर जब उ घर केर भीरे हें रहे तब रोमी अधिकारी उकर ठिना इ कइह के संगमन के भेजलक, “हे प्रभु, दुःख ना उठाव, काले कि मोंय एइसन लायक नखों कि तोंय मोर घर में आबे।

⁷ एहे खातिर मोंय खुद के इ लायक हों नी समझलों कि तोर ठिना आमूँ, मगर तोंय सिरिफ मुँह से कइह दे, तो मोर धांगर ठीक होई जाई।

⁸ मोंय हों दोसर अधिकारी मनक हेंठे काम करेक वाला आदमी हेकों आउर मोर हेंठे हों सिपाहीमन काम करैना। जब मोंय एगो के कहोना, ‘जा,’ तो उ जायला, आउर दोसर से कहोना, ‘आव,’ तो उ आवेला। आउर अपन केऊ धांगर से कहोना, ‘इ काम के कर,’ तो उ करेला।”

⁹ यीशु उकर एइसन गोइठ सुइन के ताजुब होई गेलक, आउर अपन पाछे अवाइया भीड़ बटे मुँहराय के कहलक, “मोंय तोहर से कहाथों कि इसराइल देस में एको गो एइसन आदमी नी पालों, जे इ परजाइत आदमी नियर मोर उपरे पोक्ता बिसवास करेला।”

¹⁰ आउर रोमी अधिकारी बटले भेजल उकर संगमन हों घर घूइर के उ धांगर के ठीक पालैं।

बिधवा केर बेटा के जियाएक

¹¹ इ घटना केर थोरेक देरी केर पाछे यीशु आउर उकर चेलामन नाईन नाँव केर एगो नगर में जात रहैं आउर उमन केर संगे आदमी मनक एगो बड़का भीड़ हों जात रहे।

¹² जब उमन उ नगर केर फाटक ठिना पोहोंचलैं, तो आदमीमन एगो मुरदा के गाड़ेक लगिन बोइह के बाहरे लेई जात रहैं। उ अपन बिधवा आयो केर एकलौता बेटा रहे। आउर नगर केर ढेइर आदमीमन उकर आयो संगे जात रहैं।

¹³ उकर आयो के देइख के प्रभु के उकर उपरे दया आय गेलक, आउर उकर से कहलक, “ना काँद।”

¹⁴ तब यीशु भीरे आय के सरहा के छुलक, आउर सरहा बोहाइयामन रूइक गेलैं। यीशु कहलक, “हे जवान, मोंय तोर से कहाथों उठ!”

¹⁵ तब उ मुरदा उइठ के बइठलक, आउर गोठियाएक लगलक। आउर यीशु उके उकर आयो के जिम्मा देई देलक।

¹⁶ इ घटना के देइख के सोउब आदमीमन डराय गेलैं, आउर उमन इ कहते परमेश्‍वर केर बड़ाई करेक लगलैं, “हमर माझे एगो बड़का परमेश्‍वर केर संदेश के बताएक वाला आय हे आउर परमेश्‍वर अपन आदमीमन केर मदइत करेक लगिन दया काइर हे।”

¹⁷ आउर यीशु केर बारे में इ गोइठ गोटा यहूदिया परदेस आउर आसे-पासे केर सोउब इलाका में फाइल गेलक।

यूहन्ना बपतिस्मा जल संस्कार देवेक वाला केर सवाल

¹⁸ जब यूहन्ना बपतिस्मा जल संस्कार देवेक वाला केर चेलामन यूहन्ना के इ सोउब गोइठ के बतालैं।

¹⁹ तब यूहन्ना अपन चेलामन में से दूई झन के बोलाय के प्रभु ठिना इ पूछेक लगिन भेजलक, “का तोंय हें आवेक वाला मसीह हेकिस, जेके परमेश्‍वर हमरे के बचाएक ले भेजेक केर करार काइर हे, या हमरे दोसर केर आसरा देखब?”

²⁰ उकर दुयो चेलामन यीशु ठिना आय के कहलैं, “यूहन्ना बपतिस्मा जल संस्कार देवेक वाला हमरे के तोर ठिना इ पूछेक लगिन भेइज हे, ‘का तोंय हें आवेक वाला मसीह हेकिस, जेके परमेश्‍वर हमरे के बचाएक ले भेजेक केर करार काइर हे, या हमरे दोसर केर आसरा देखब?’ ”

²¹ ओहे बेरा यीशु ढेइर बेमरियामन, दुःखीमन आउर भूत धारल आदमीमन के छोड़ालक आउर ढेइर अंधरा आदमी मनक नजइर के खोइल देलक।

²² आउर यीशु यूहन्ना केर चेलामन से कहलक, “जे काममन के तोहरेमन देखला आउर जे गोइठमन के सुइन हा, जाय के यूहन्ना के बताय देवा कि अंधरामन देखेक पारैना, लंगड़ामन हिंठेक पारैना, कोढ़ बेमरियामन के ठीक कराल जायला, आउर बहिरामन सुनेक पारैना, मुरदामन के जियाल जायला, आउर गरीब के शुभ समाचार सुनाल जायला।

²³ धाइन अहे उ जे मोर गोइठमन केर बारे में बिसवास करेक नी छोड़ेला।”

²⁴ जब यूहन्ना परमेश्‍वर केर संदेश के बताएक वाला केर भेजल चेलामन हूवाँ से चाइल गेलैं, तो यीशु यूहन्ना केर बारे में आदमीमन से पूछेक लगलक, “तोहरेमन सुनसान ठाँव में का देखेक जाय रहा? का धुका से हिलते सोंटा के?

²⁵ तो फिन तोहरेमन का देखेक जाय रहा? का बढ़ियाँ लुगा पिंधल आदमी के? देखा, जेमन बढ़ियाँ लुगा पिंधैना आउर सुख-चाइन से रहैना, उमन राजमहलमन में रहैना।

²⁶ तो फिन का देखेक जाय रहा? का तोहरेमन केऊ परमेश्‍वर केर संदेश के बताएक वाला के देखेक जाय रहा? हाँ, मोंय तोहर से कहाथों कि तोहरेमन परमेश्‍वर केर संदेश के बताएक वाला से हों बड़का के देखेक जाय रहा।

²⁷ इ ओहे हेके, जेकर बारे में पवितर किताब में लिखल अहे कि ‘देख, मोंय अपन संदेश के बताएक वाला के तोर आगे-आगे भेजाथों, जे आदमीमन के मोर उपरे बिसवास करेक लगिन तेयार करी।’

²⁸ मोंय तोहरेमन से कहाथों, आइज तक दुनिया में जे केऊ हों जनम लेई हैं, उमन में से यूहन्ना बपतिस्मा जल संस्कार देवेक वाला से केऊ बाड़ नी होलैं, मगर जे स्वरग राइज में छोट से हों छोट अहे, उ उकर से बाड़ अहे।”

²⁹ जब उमन यीशु केर कहल इ गोइठमन के सुनलैं तो, सोउब आदमीमन आउर हिंयाँ तक कि मालगुजारी लेवेक वालामन हों कहलैं कि परमेश्‍वर धरमी अहे आउर यूहन्ना केर बपतिस्मा जल संस्कार लेई के परमेश्‍वर के सच्चा माइन लेलैं।

³⁰ मगर फरीसी दल केर आदमीमन आउर मूसा केर नियम के सिखाएक वालामन यूहन्ना से बपतिस्मा जल संस्कार नी लेई के परमेश्‍वर केर इच्छा के अपन जिंदगी में पूरा होवेक नी देलैं।

³¹ यीशु आउर आगे कहलक, “अब मोंय इ समय केर आदमीमन केर जोड़ी केकर से करमूँ कि उमन केकर जइसन अहैं?

³² उमन उ छउवामन नियर अहैं जे बाजारमन में बाइठ के एक दोसर के दोष लगाय के कहैना, ‘हमरे तोहर लगिन खुशी केर गीत गाली सेकरो में तोहरेमन नी नाचला, हमरे मरण केर गीत गाली सेकरो में तोहरेमन नी काँदला!’

³³ काले कि यूहन्ना बपतिस्मा जल संस्कार देवेक वाला घरी-घरी उपास करलक आउर दारू नी पीलक, सेकरो में तोहरेमन कहाला, ‘उकर में भूत अहे।’

³⁴ मगर मोंय आदमी केर बेटा खाते पिते आवाथों, सेकरो में तोहरेमन कहाला, ‘देखा, पेटू आउर पियंक्कड़ आदमी, मालगुजारी लेवेक वालामन आउर पापी आदमीमन केर संग हेके।’

³⁵ मगर परमेश्‍वर केर गेयान के उ सोउबमन केर बटले सच्चा देखाल जाय हे जेमन इके ग्रहण करैना।”

पापी जनाना के क्षमा करेक

³⁶ फिन एगो फरीसी दल केर आदमी यीशु के अपन संगे खाएक लगिन नेवता देलक। यीशु उ फरीसी आदमी केर घर में जाय के खाएक लगिन बइठलक।

³⁷ उ नगर केर एगो पापी जनाना इ जाइन के कि यीशु हिंयाँ फरीसी दल केर आदमी केर घर में खाएक बाइठ हे, तो उ जनाना संगमरमर केर पखना से बनाल एगो सीसी में महंगा सेंट भाइर के लानलक।

³⁸ आउर यीशु केर गोड़ ठिना पिछे ठड़ाय के काँदेक लगलक। आउर निहइर के अपन लोर पानी से यीशु केर गोड़ के धोई के अपन मूँड़ केर केंसमन से पोछेक लगलक। आउर यीशु केर गोड़ के घरी-घरी चूइम के उकर में सेंट लगात रहे।

³⁹ इके देइख के उ फरीसी दल केर आदमी जे यीशु के बोलाय रहे, अपन मन में सोचेक लगलक, “अगर इ सच में परमेश्‍वर केर संदेश के बताएक वाला होतक तो जरूर जाइन जातक कि जे जनाना उके छुवाथे, उ के हेके आउर कइसन अहे, काले कि उ तो पापी जनाना हेके।”

⁴⁰ यीशु उकर मन केर बिचार के जाइन के कहलक, “हे सिमोन, मोके तोर से कोनों कहेक अहे।” सिमोन कहलक, “हे गुरु, कह।”

⁴¹ तब यीशु इ उदाहरन बताएक शुरु करलक, “केऊ महाजन केर दूई झन कर्जदार रहैं, एगो पाँच सौ आउर दूसरा पचास गो चाँदी केर सिक्का धारत रहैं।

⁴² मगर उ दुयो झन ठिना करजा चुकाएक लगिन कोनों नी रहे, से लगिन महाजन दुयो झन केर करजा के माफ काइर देलक। अब तोंय बताव, उ दुयो झन में से केहर महाजन से बगरा प्रेम करी?”

⁴³ सिमोन जबाब देलक, “मोर बुझेक में तो जेकर बगरा करजा माफ होलक, उ बगरा प्रेम करी।” यीशु उकर से कहलक, “तोंय ठीक जबाब देई हिस।”

⁴⁴ आउर यीशु उ जनाना बटे मुँहराय के सिमोन से कहलक, “का तोंय इ जनाना के देखले कि इ का काम काइर हे? मोंय तोर घर में आय हों, मगर तोंय हमर रिवाज केर मोताबिक मोके गोड़ धोवाएक लगिन पानी नी देले, मगर इ जनाना मोर गोड़ के अपन लोर पानी से धोलक आउर अपन केंस से पोछलक।

⁴⁵ तोंय मोके चुमा नी करले, मगर जब से मोंय आय हों तब से इ मोर गोड़ के चुमा करेक नी छोड़लक।

⁴⁶ तोंय मोर मूँड़ में तेल नी माखले, मगर इ मोर गोड़ में सेंट माइख हे।

⁴⁷ से लगिन मोंय तोर से कहाथों, इकर जे ढेइर बगरा पाप रहे, क्षमा होई गेलक, इकर लगिन इ ढेइर प्रेम करलक। मगर जेकर थोरेक पाप क्षमा होई हे, उ थोरे हें प्रेम करेला।”

⁴⁸ आउर यीशु उ जनाना से कहलक, “तोर पाप क्षमा होई गेलक।”

⁴⁹ तब जे आदमीमन यीशु केर संगे खाएक बाइठ रहैं, उमन अपन-अपन मन में सोचेक लगलैं, “इ केहर हेके, जे पापमन के हों क्षमा करेला, जेके सिरिफ परमेश्‍वर करेक पारेला?”

⁵⁰ मगर यीशु जनाना से कहलक, “परमेश्‍वर तोके बचाय लेई हे, काले कि तोंय मोर उपरे बिसवास काइर हिस, शांति से चाइल जा।”