लूका 6 - सादरी नवाँ नियम

यीशु आराम केर दिन केर प्रभु

¹ फिन यहूदी मनक आराम केर दिन यीशु अन्न केर खेतमन में से होई के जात रहे, आउर उकर चेलामन बाइलमन के तोइर-तोइर के, आउर हाँथ से मीस-मीस के खाते जात रहैं।

² तब फरीसी दल केर आदमीमन में से थोरेक आदमीमन उमन से कहेक लगलैं, “यहूदी मनक आराम केर दिन काम करेक मूसा केर नियम केर मोताबिक उचित नखे, फिन भी तोहरेमन इ काम काले कराथा?”

³ यीशु उमन के जबाब देलक, “का तोहरेमन पवितर किताब में इ नी पइढ़ हा कि राजा दाऊद, जब उ आउर उकर संगमन के भूख लगलक तो का करलक?

⁴ दाऊद कइसन परमेश्‍वर केर तंबू में गेलक, आउर उ रोटीमन के लेई के खालक आउर अपन संगमन के हों देलक, जेके पुरोहित के छोइड़ आउर केखो खाएक उचित नी रहे।”

⁵ आउर यीशु उमन से कहलक, “मोंय आदमी केर बेटा यहूदी मनक आराम केर दिन केर हों मालिक हेकों।”

हाँथ सुखल आदमी के ठीक करेक

⁶ एक बेर यीशु फिन यहूदी मनक दोसर आराम केर दिन में, यहूदी मनक प्रार्थना घर में जाय के उपदेस देवत रहे, हूवाँ एगो आदमी रहे, जेकर भतखाइया हाँथ सुखल रहे।

⁷ आउर मूसा केर नियम के सिखाएक वालामन, आउर फरीसी दल केर आदमीमन यीशु केर उपरे दोष लगाएक लगिन मोका पावेक केर ताक में रहैं कि यीशु यहूदी मनक आराम केर दिन में बेमरियामन के ठीक करेला कि निहीं।

⁸ मगर यीशु उ मनक बिचार के जानत रहे, से लगिन हाँथ सुखल आदमी से कहलक, “उठ सोउब केर माझे ठड़ाव।” उ उइठ के ठड़ालक।

⁹ यीशु उमन से कहलक, “मोंय तोहरेमन से इ पूछाथों कि यहूदी मनक आराम केर दिन मूसा केर नियम केर मोताबिक का करेक उचित अहे, भला करेक या बुरा करेक, जान के बचाएक या नाश करेक?”

¹⁰ आउर यीशु चाइरो बटे उ सोउब आदमीमन के देइख के उ हाँथ सुखल आदमी से कहलक, “अपन हाँथ के बढ़ाव।” उ अपन हाँथ के बढ़ालक आउर उकर हाँथ ठीक होई गेलक।

¹¹ मगर फरीसी आदमीमन, आउर मूसा केर नियम के सिखाएक वालामन मुरुक खिसाय के एक दोसर से सलहा करेक लगलैं कि हमरे यीशु केर संगे का करब?

यीशु केर बारह खास चेला मनक चुनल जाएक

¹² आउर उ दिनमन में यीशु प्रार्थना करेक लगिन पहार उपरे गेलक, आउर परमेश्‍वर से प्रार्थना करेक में राइत भइर बिताय देलक।

¹³ जब बिहान होलक तो उ अपन चेलामन के बोलाय के उमन में से बारह झन के चुइन लेलक, आउर उमन के खास चेला कहलक।

¹⁴ आउर बारह खास चेलामन इमन हेकैं: सिमोन जेकर नाँव उ पतरस रखलक, आउर उकर छोटका भाई अन्द्रियास, याकूब आउर याकूब केर छोटका भाई यूहन्ना, फिलिप्पुस आउर बरतुल्मै।

¹⁵ मत्ती, थोमा आउर हलफई केर बेटा याकूब, आउर दोसर सिमोन जे क्रांतिकारी दल केर सदस्य रहे, जे जेलोतेस कहायला।

¹⁶ आउर याकूब केर बेटा यहूदा, आउर यहूदा इस्करियोती जे करियोत गाँव केर रहे, जे पाछे यीशु के धरुवाएक वाला बनलक।

यीशु केर उपदेस देवेक आउर बेमरियामन के ठीक करेक

¹⁷ तब यीशु अपन खास चेलामन केर संगे पहार से उतइर के चातर ठाँव में ठड़ालक। हूवाँ उकर ढेइर चेलामन रहैं, आउर आदमी मनक एगो बड़का भीड़ हों रहे, उमन यहूदिया परदेस, यरुशलेम शहर, सूर आउर सैदा नगर केर समुदर केर किनारे से आय रहैं।

¹⁸ उमन यीशु केर उपदेस सुनेक आउर अपन बेमारीमन से ठीक होवेक लगिन उकर ठिना आय रहैं। हूवाँ यीशु भूतमन से सताल आदमीमन के हों ठीक करत रहे।

¹⁹ आउर सोउब आदमीमन यीशु के छुवेक चाहत रहैं, काले कि उकर में से शक्ति निकइल के सोउब के ठीक काइर देवत रहे।

दुःख केर बचन

²⁰ तब यीशु अपन चेलामन बटे देइख के कहलक, “धाइन अहा तोहरेमन, काले कि अपन जिंदगी में परमेश्‍वर केर जरुरत के जानाला, तोहरेमन परमेश्‍वर केर राइज में जबा।

²¹ धाइन अहा तोहरेमन जे एखन भूखल अहा, काले कि तोहरेमन अघुवाल जबा, धाइन अहा तोहरेमन जे एखन काँदाथा, काले कि पाछे हाँसबा।

²² धाइन अहा तोहरेमन, जब मोंय आदमी केर बेटा केर खातिर आदमीमन तोहरेमन से बैर करबैं, आउर तोहरेमन के निकलाय देबैं, आउर तोहरेमन केर निंदा करबैं, आउर तोहरे केर नाँव के बुरा जाइन के काइट देबैं।

²³ उ दिनमन में खुशी से नाचबा, काले कि तोहरेमन के स्वरग में बड़का इनाम भेटाई। उमन केर बाप-दादामन हों परमेश्‍वर केर संदेश के बताएक वालामन केर संगे एइसनेहें करत रहैं।

²⁴ मगर हाय, तोहरेमन जे धनी अहा, तोहरेमन अपन सुख-चाइन पहिलेहें पाय चुइक हा।

²⁵ हाय, जेमन एखन अघाल अहा, काले कि पाछे भूखे होबा। हाय, जेमन एखन हँसाथा, काले कि पाछे शोक करबा आउर काँदबा।

²⁶ हाय, जब सोउब आदमी तोहर बड़ाई करबैं, काले कि उ मनक बाप-दादामन हों झूठा संदेश देवेक वालामन केर एइसनेहें बड़ाई करत रहैं।

बैरीमन से हों प्रेम करेक केर आगया

²⁷ मगर मोंय तोहरे सुनेक वालामन से कहाथों कि अपन दुश्मनमन से प्रेम करा, जेमन तोहरे से बैर करैना उमन केर भला करा।

²⁸ जेमन तोहरेमन के सराप देवैना, उमन के आशीष देवा, जेमन तोहरेमन केर अपमान करैना, उमन लगिन प्रार्थना करा।

²⁹ जे तोर एक गाल में चटका मारी उकर बटे दोसर गाल हों फेइर दे। आउर जे तोर गामछा के लुइट लेवी, उके झुला लेगेग से हों ना रोकबे।

³⁰ जे केऊ तोर से माँगी, उके देबे, आउर जे केऊ तोर से तोर कोनोवें चीज के लेई लेवी, उके घुराएक ले ना कहबे।

³¹ आउर तोहरेमन दोसरमन से अपन लगिन जइसन ब्यवहार चाहाला, तइसनेहें तोहरेमन हों दोसरमन संगे ब्यवहार करा।

³² अगर तोहरेमन जेमन तोहर से प्रेम करैना ओहेमन से भइर प्रेम करबा, तो परमेश्‍वर तोहर बड़ाई काले करी? काले कि पापी आदमीमन हों अपन से प्रेम करेक वालामन से प्रेम करैना।

³³ आउर अगर तोहरेमन सिरिफ अपन भलाई करेक वालामन केर संगे भलाई करबा, तो परमेश्‍वर तोहर बड़ाई काले करी? काले कि पापी आदमीमन हों एइसनेहें करैना।

³⁴ आउर अगर तोहरेमन ओहे आदमीमन के सिरिफ उधरा देबा, जेमन से उधरा घुराएक केर आसरा रखाला तो परमेश्‍वर तोहर बड़ाई काले करी? काले कि पापी आदमीमन हों पूरा-पुरी देवल उधरा के फिन पावेक लगिन पापीमन के उधरा देवैना।

³⁵ मगर तोहरेमन अपन दुश्मनमन से प्रेम करा आउर उ मनक भलाई करा। आउर फिन पावेक केर आसरा राइख के उधरा ना देबा। तब तोहर इनाम महान होवी आउर तोहरेमन परमप्रधान केर संतान बाइन जबा, काले कि परमेश्‍वर बुरा आदमीमन केर आउर जेमन परमेश्‍वर के धन्यबाद नी देवैना, उ मनक उपरे हों दया करेला।

³⁶ से लगिन जइसन तोहर आबा दयालु अहे, तइसनेहें तोहरेमन हों दयालु बना।

दोष नी लगाएक

³⁷ केखो दोष ना लगावा तो परमेश्‍वर हों तोहरे उपरे दोष नी लगाई। केखो दोषी ना ठहरावा तो परमेश्‍वर हों तोहरेमन के दोषी नी ठहराई, क्षमा करा तो परमेश्‍वर तोहरेमन के हों क्षमा करी।

³⁸ देबा होले, तोहरेमन के हों देवल जाई। आदमीमन पूरा नाप दबाय-दबाय के आउर हिलाय-हिलाय के गिरत ले तोहरेमन केर कोरा में साजबैं। काले कि जे नाप से तोहरेमन नापाला, उकरे से तोहरे लगिन हों नापल जाई।”

³⁹ फिन यीशु उमन के एगो उदाहरन बतालक, “का अंधरा, अंधरा के डहर बताएक पारी? का दुयो गढ़हा में नी गिरबैं?

⁴⁰ चेला अपन गुरु से बाड़ नी होवेला, मगर जे केऊ पूरा शिक्षा पावेला, उ अपन गुरु केर नियर बाइन जायला।

⁴¹ तोंय काले अपन बिसवासी भाई केर जिंदगी केर छोटका-छोटका गलतीमन के देखिसला, जबकि तोंय खुद तोर जिंदगी केर बड़का-बड़का गलतीमन के नी देखिसला?

⁴² आउर जब तोंय खुद केर बड़का पाप के नी देखिसला, तो तोके खुद से कम पाप वाला आदमी केर मदइत करेक केर कोशिश नी करेक चाही। हे ढोंगी, पहिले तोंय खुद केर बड़का गलतीमन के सुधराय ले, फिन तोंय अपन बिसवासी भाई केर छोटका-छोटका गलतीमन के, बेस लेखे देइख के उके सुधराएक में मदइत करेक पारबे।

फार से गाँछ केर चिन्हाय जाएक

⁴³ केऊ हों बेस आदमी बुरा काम नी करी, आउर ना तो केऊ बुरा आदमी बेस काम करी।

⁴⁴ हरेक आदमी अपन काम से चिन्हाय जायला। काले कि आदमीमन काँटा झूँड़मन से अंजीर फार नी तोरैना, आउर ना झड़बेरी से अंगूर फार।

⁴⁵ भला आदमी अपन मन केर बेस भंडार से बेस गोइठमन के निकलायला, आउर बुरा आदमी अपन मन केर बुरा भंडार से बुरा गोइठमन के निकलायला, काले कि जे गोइठमन मन में भरल अहे, ओहे उकर मुँह से निकलेला।

घर बनाएक वाला दूई रकम केर आदमीमन

⁴⁶ जब तोहरेमन मोर कहेक केर मोताबिक नी चलाला, तो काले मोके ‘हे प्रभु, हे प्रभु,’ कहाला?

⁴⁷ जे केऊ मोर ठिना आवेला, आउर मोर गोइठमन के सुइन के उकर मोताबिक चलेला, मोंय तोहरेमन के बताथों कि उ केकर नियर अहे,

⁴⁸ उ एइसन आदमी नियर अहे, जे घर बनाएक बेरा भूंई गढ़हा कोइड़ के चट्टाइन उपरे नेव देलक। आउर जब बाढ़ आलक तो पानी केर धार उ घर में बजड़ालक, मगर उके धँसाएक नी पारलक, काले कि उ मजबूत बनाल रहे।

⁴⁹ मगर जे मोर गोइठ सुइन के उकर मोताबिक नी चलेला, से उ आदमी नियर अहे, जे भूंई केर उपरे बिना नेव केर घर बनालक। जब उकर उपरे पानी केर धार बजड़ालक, तो उ तुरते धाँइस गेलक आउर बरबाद होई गेलक।”