लूका 3 - सादरी नवाँ नियम

यूहन्ना बपतिस्मा जल संस्कार देवेक वाला केर संदेश

¹ रोमी महाराजा तिबिरियुस केर राइज केर पन्द्रहवाँ साल में, पुन्तियुस पिलातुस यहूदिया परदेस केर राजपाल रहे। राजा हेरोदेस गलील परदेस केर, उकर भाई फिलिप्पुस इतूरैया आउर त्रखोनीतिस परदेस केर, आउर लिसानियास अबिलेने परदेस केर एक-एक चौथाई भाग केर राजा रहैं।

² जब हन्ना आउर काइफा यहूदी महापुरोहित रहैं, तब उ बेरा परमेश्‍वर केर बचन सुनसान ठाँव में जकरयाह केर बेटा यूहन्ना ठिना पोहोंचलक।

³ आउर यूहन्ना बपतिस्मा जल संस्कार देवेक वाला यरदन नदी केर आसे-पासे केर सोउब इलाका में, आदमीमन केर माझे जाय के इ परचार करेक लगलक कि पाप करेक छोइड़ देवा आउर बपतिस्मा जल संस्कार लेवा, तब परमेश्‍वर तोहर पाप के क्षमा करी।

⁴ जइसन यशायाह परमेश्‍वर केर संदेश के बताएक वाला केर किताब में लिखल अहे, “सुनसान ठाँव में एगो हकाएक वाला केर शबद सुनाथे कि ‘प्रभु केर उपरे बिसवास करेक लगिन आउर उकर से मिलेक लगिन अपन मन के तेयार करा।

⁵ हर एक घाटी भाइर देवल जाई, आउर हर एक पहार आउर टीलहा नीचा करल जाई, आउर जे डहर टेढ़ा अहे उके सोझ करल जाई, आउर जे डहर उबड़-खाबड़ अहे उके बराबइर करल जाई।

⁶ आउर सोउब आदमीमन परमेश्‍वर केर भेजल छुटकारा देवेक वाला के देखबैं।’ ”

⁷ जे आदमीमन यूहन्ना से बपतिस्मा जल संस्कार लेवेक लगिन उकर ठिना आवत रहैं, उमन से यूहन्ना कहत रहे, “हे जहरीला साँप नियर दुष्ट आदमीमन! तोहरेमन के केहर चेतालक कि आवेक वाला परमेश्‍वर केर सजा से भागा।

⁸ से लगिन बेस काम काइर के देखावा कि तोहरेमन सचमुच में पाप करेक छोइड़ देई हा, आउर अपन-अपन मन में इ ना सोचा कि हमरे सजा से बाइच जाब काले कि हमरे अब्राहम केर संतान हेकी। मोंय तोहरेमन से कहाथों कि परमेश्‍वर इ पखनामन से हों अब्राहम लगिन संतान जनमाएक पारेला।

⁹ जेमन पाप करेक नी छोड़ैना उ मनक न्याय करेक लगिन परमेश्‍वर एखन तेयार अहे, उमन के परमेश्‍वर नरक केर सजा देवी।”

¹⁰ तब आदमीमन उकर से पूछलैं, “तो हमरे परमेश्‍वर केर सजा से बचेक लगिन का करब?”

¹¹ यूहन्ना बपतिस्मा जल संस्कार देवेक वाला उमन के जबाब देलक, “जेकर ठिना दूई गो झुला अहे, उ एगो के उके देई देवोक, जेकर ठिना नखे आउर जेकर ठिना खाएक अहे ओहो एइसनेहें करोक।”

¹² आउर मालगुजारी लेवेक वाला आदमीमन हों बपतिस्मा जल संस्कार लेवेक आलैं आउर उकर से पूछलैं, “हे गुरु! परमेश्‍वर केर सजा से बचेक लगिन हमरे के का करेक चाही?”

¹³ यूहन्ना उमन से कहलक, “जेतना मालगुजारी अधिकारीमन बटले तोहर लगिन ठहराल जाय हे, उकर से बगरा ना लेबा।”

¹⁴ आउर सिपाहीमन हों उकर से इ पूछलैं, “हमरे के का करेक चाही?” यूहन्ना उमन से कहलक, “केखो डराय धमकाय के चाहे झूठा दोष लगाय के उकर से घूस ना लेबा आउर अपन तनखा से खुश रहा।”

¹⁵ जब सोउब आदमीमन मसीह केर जल्दी आवेक केर आसरा लगाय रहैं, तब उमन सोउब अपन-अपन मन में यूहन्ना केर बारे में बिचार करत रहैं कि का एहे तो मसीह ना लगे।

¹⁶ तब यूहन्ना उ सोउब आदमीमन से कहलक, “मोंय तो तोहरेमन के पानी से बपतिस्मा जल संस्कार देवोना, मगर उ आवेक वाला अहे, जे मोर से शक्तिशाली अहे, मोंय तो उकर जूता केर बाँधल के खोलेक लायक हों नखों, उ तोहरेमन के पवितर आत्मा आउर आइग से बपतिस्मा देवी।

¹⁷ उ न्याय करेक लगिन आवेक वाला अहे, उ धरती केर आदमी मनक सच्चाई से न्याय करी, उ धरमी आदमीमन के स्वरग में लेगी आउर पापी आदमीमन के नरक केर आइग में साइज देवी।”

¹⁸ इ लेखे यूहन्ना ढेइर हें शिक्षा देई-देई के आदमीमन के शुभ समाचार सुनाते रहलक।

हेरोदेस बटले यूहन्ना के जेहेल घर में साजेक

¹⁹ मगर इसराइल देस केर एक चौथाई भाग गलील परदेस केर राजा हेरोदेस, अपनेहें भाई फिलिप्पुस जे एखन जीते रहे, उकर जनाना हेरोदियास के बिहा काइर रहे, आउर उकर सोउब बुरा काममन केर बारे में यूहन्ना उके डाँइट रहे।

²⁰ से लगिन यूहन्ना के जेहेल घर में साइज के, राजा हेरोदेस उ सोउब बुरा काममन से हों आउर बड़का बुरा काम करलक।

यूहन्ना बटले यीशु केर बपतिस्मा जल संस्कार

²¹ मगर यूहन्ना केर जेहेल घर में सजाल जाएक केर आगे, जब सोउब आदमीमन बपतिस्मा जल संस्कार लेलैं, तो यीशु हों बपतिस्मा जल संस्कार लेलक, आउर जइसनेहें उ प्रार्थना करत रहे, तब स्वरग खुइल गेलक।

²² आउर पवितर आत्मा पेरवाँ केर रूप में उकर उपरे उतरलक, आउर स्वरग से इ आवाज आलक, “तोंय मोर दुलार बेटा हेकिस, मोंय तोर से ढेइर खुश अहों।”

यीशु केर बंशावली

²³ जब यीशु अपन सेवा काम करेक शुरु करलक, तब उकर उमर लगभग तीस बरिस केर रहे। आउर सोउब आदमीमन एहे समझत रहैं कि इ यूसुफ केर बेटा हेके। आउर यूसुफ इली केर बेटा रहे।

²⁴ आउर इली मत्तात केर, आउर मत्तात लेवी केर, आउर लेवी मलकी केर, आउर मलकी यन्ना केर, आउर यन्ना यूसुफ केर।

²⁵ आउर यूसुफ मत्तित्याह केर, आउर मत्तित्याह आमोस केर, आउर आमोस नहूम केर, आउर नहूम असल्याह केर, आउर असल्याह नोगाह केर।

²⁶ आउर नोगाह मात केर, आउर मात मत्तित्याह केर, आउर मत्तित्याह शिमी केर, आउर शिमी योसेख केर, आउर योसेख योदाह केर।

²⁷ आउर योदाह यूहन्ना केर, आउर यूहन्ना रेसा केर, आउर रेसा जरुब्बाबिल केर, आउर जरुब्बाबिल शालतियेल केर, आउर शालतियेल नेरी केर।

²⁸ आउर नेरी मलकी केर, आउर मलकी अद्दी केर, आउर अद्दी कोसाम केर, आउर कोसाम इलमोदाम केर, आउर इलमोदाम एर केर।

²⁹ आउर एर यहोशुअ केर, आउर यहोशुअ इलाजार केर, आउर इलाजार योरीम केर, आउर योरीम मत्तात केर, आउर मत्तात लेवी केर।

³⁰ आउर लेवी सिमोन केर, आउर सिमोन यहूदाह केर, आउर यहूदाह यूसुफ केर, आउर यूसुफ योनान केर, आउर योनान इलयाकीम केर।

³¹ आउर इलयाकीम मलेआह केर, आउर मलेआह मिन्नाह केर, आउर मिन्नाह मत्तता केर, आउर मत्तता नातान केर, आउर नातान दाऊद केर।

³² आउर दाऊद यिशै केर, आउर यिशै ओबेद केर, आउर ओबेद बोअज केर, आउर बोअज सलमोन केर, आउर सलमोन नहशोन केर।

³³ आउर नहशोन अम्मीनादाब केर, आउर अम्मीनादाब अरनी केर, आउर अरनी हिस्रोन केर, आउर हिस्रोन फिरिस केर, आउर फिरिस यहूदा केर।

³⁴ आउर यहूदा याकूब केर, आउर याकूब इसहाक केर, आउर इसहाक अब्राहम केर, आउर अब्राहम तिरह केर, आउर तिरह नाहोर केर।

³⁵ आउर नाहोर सरुक केर, आउर सरुक रऊ केर, आउर रऊ फिलिग केर, आउर फिलिग एबिर केर, आउर एबिर शिलह केर।

³⁶ आउर शिलह केनान केर, आउर केनान अरफात केर, आउर अरफात शेम केर, आउर शेम नूह केर, आउर नूह लिमिक केर।

³⁷ आउर लिमिक मथूशिलाह केर, आउर मथूशिलाह हनोक केर, आउर हनोक यिरिद केर, आउर यिरिद महललेल केर, आउर महललेल केनान केर।

³⁸ आउर केनान एनोश केर, आउर एनोश शेत केर, आउर शेत आदम केर आउर आदम परमेश्‍वर केर बेटा रहे।