लूका 24 - सादरी नवाँ नियम

यीशु मोइर के फिन जी उठलक

¹ मगर हफ्ता केर शुरु दिन बड़ बिहाने उ बेस महकेक वाला चीजमन के जेके उ जनानामन तेयार काइर रहैं, लेई के कबर ठिना आलैं।

² उमन पखना के कबर केर दुरा से लुढ़काल पालैं।

³ उमन जब कबर केर भीतरे गेलैं तो प्रभु यीशु केर लाश के नी पालैं।

⁴ उमन इ सोउब देइख के ताजुब होवत रहैं, सेहे बेरा दूई गो मरदानामन चमचमाते लुगा पिंधल उ मनक ठिना आय के ठड़ालैं।

⁵ उमन डरे मूँड़ के झुकाय के भूंई के देखेक लगलैं, तब उ दुयो स्वरग दूतमन उमन से कहलैं, “जे जिंदा अहे, उके तोहरेमन मोरलमन केर माझे काले खोजाथा?

⁶ उ हिंयाँ नखे, मगर जी उइठ हे। उ गलील परदेस में रहते तोहरेमन से कइह रहे, उके याइद करा।

⁷ उ कइह रहे, ‘मोंय आदमी केर बेटा के पापीमन केर हाँथे धरुवाल जाएक, आउर क्रूस उपरे चढ़ाल जाएक आउर तीसरा दिन फिन जी उठेक जरुरी अहे।’”

⁸ तब जनानामन के यीशु केर कहल गोइठ याइद आलक।

⁹ आउर उमन कबर से घूइर के यीशु केर गारहों खास चेलामन के आउर दोसर सोउब चेलामन के इ सोउब गोइठमन के बतालैं।

¹⁰ जेमन इ गोइठमन के खास चेलामन के बतालैं, उमन मगदला गाँव केर मरियम, योअन्ना आउर याकूब केर आयो मरियम आउर उ मनक संगे दोसर जनानामन हों रहैं।

¹¹ मगर यीशु केर चेलामन के उ मनक गोइठ कहानी नियर लगलक आउर उ मनक गोइठ के बिसवास नी करलैं।

¹² फिन भी पतरस उठलक आउर कूइद के कबर ठिना गेलक, आउर निहइर के कबर केर भीतरे देखलक, हूवाँ लुगा छोइड़ आउर कोनों नी रहे। पतरस इ घटना से ताजुब करते अपन घर घूइर गेलक।

इम्माऊस गाँव केर डहर में चेलामन के यीशु केर देखाई देवेक

¹³ ओहे दिन यीशु केर चेलामन में से दूई झन इम्माऊस नाँव केर एगो गाँव जात रहैं, जे यरुशलेम शहर से लगभग गारह किलोमीटर दूर रहे।

¹⁴ इमन जे कुछ होई रहे इकर बारे में गोठियाते जात रहैं।

¹⁵ जब इ दुयो गोठियाते आउर एक-दोसर से पूछा-पूछी करते जात रहैं, सेहे बेरा यीशु आय के उ मनक संगे चलेक लगलक।

¹⁶ मगर परमेश्‍वर उ मनक नजइर के एइसन काइर देई रहे कि उमन यीशु के चिन्हेक नी पारलैं।

¹⁷ यीशु उमन से पूछलक, “डहर हिंठते तोहरेमन केकर बारे में गोठियाथा?” उमन उदास होई के ठड़ाय गेलैं।

¹⁸ तब उमन में से एगो जेकर नाँव क्लियुपास रहे, कहलक, “का यरुशलेम शहर में तोंय हें एइसन परदेसी हेकिस, जे इ नी जानिसला कि इ दिनमन में हूवाँ का-का होई हे?”

¹⁹ यीशु उमन से पूछलक, “का होई हे?” उमन उकर से कहलैं, “इ गोइठ नासरत नगर केर रहेक वाला यीशु केर बारे में हेके। उ परमेश्‍वर आउर सोउब आदमीमन केर नजइर में चमत्कार केर काम करेक वाला आउर शक्तिशाली परमेश्‍वर केर संदेश के बताएक वाला रहे।

²⁰ आउर हमर यहूदी मुध पुरोहितमन आउर सरदारमन उके धरुवालैं आउर उके मौत केर सजा देवाय के क्रूस उपरे चढ़ालैं।

²¹ मगर हमरे आसरा काइर रही कि ओहे रोमी सरकार केर गुलामी से इसराइली आदमीमन के छुटकारा देवी। इ सोउब गोइठमन केर अलावा इ घटना केर होवल तीसरा दिन हेके।

²² अब हमर में से थोरेक जनानामन जे बिहान के कबर ठिना जाय रहैं, हमरे के ताजुब में डाइल देई हैं।

²³ उमन हूवाँ यीशु केर लाश के नी पालैं आउर इ कहते आलैं कि हमरे स्वरगदूतमन केर दर्शन पाय ही, जेमन हमरे के बतालैं कि यीशु जिंदा अहे।

²⁴ उ जनाना मनक गोइठ सुइन के हमर संगमन में से कायनों झन कबर ठिना गेलैं आउर जइसन जनानामन बताय रहैं, तइसनेहें पालैं, मगर उमन यीशु के नी देखलैं।”

²⁵ तब यीशु दुयो चेलामन से कहलक, “हे निरबुद्धियामन, जे कुछ परमेश्‍वर केर संदेश के बताएक वालामन पवितर किताब में लीख हैं, उकर उपरे बिसवास करेक में तोहरेमन के ढेइर कठिन लगेला।

²⁶ इ जरुरी रहे कि मसीह इ दुःख उठाओक आउर फिन अपन महिमा में ढूकोक।”

²⁷ तब यीशु उमन के पवितर किताब में मूसा केर नियम से शुरु काइर के सोउब परमेश्‍वर केर संदेश के बताएक वालामन बटले अपन बारे लिखल गोइठमन के समझाय देलक।

²⁸ एतनेहें में उमन उ गाँव ठिना पोंहइच गेलैं, जहाँ उमन जात रहैं। आउर यीशु एइसन देखालक कि उ आगे जाएक खोजाथे।

²⁹ मगर उमन इ कइह के उके रोकलैं “साँझ होई जाथे आउर बेरा हों ढेइर बीत जाहे, से लगिन तोंय हमर संगे रइह जा।” तब यीशु उ मनक संगे रहेक लगिन भीतरे गेलक।

³⁰ जब यीशु उ मनक संगे खाएक बइठलक तो उ रोटी लेई के परमेश्‍वर के धन्यबाद देलक आउर उके टुकइर के उमन के देवेक लगलक।

³¹ तब उ मनक आँइख खुइल गेलक आउर उमन यीशु के चीन्ह लेलैं, मगर यीशु उ मनक नजइर से लूइक गेलक।

³² उमन एक-दोसर से कहलैं, “जब उ डहर में हमर से गोठियात रहे आउर पवितर किताब केर मतलब हमरे के समझात रहे, तो का हमर मन में उमीद नी जाइग रहे?”

³³ उमन ओहे बेरा उठलैं आउर यरुशलेम शहर घूइर गेलैं। हूवाँ उमन उ गारहों खास चेलामन आउर उ मनक संगमन के जमा होवल पालैं।

³⁴ उमन इ कहत रहैं, “प्रभु सचमुच में जी उइठ हे आउर सिमोन के देखाई देई हे।”

³⁵ तब दुयो चेलामन हों डहर केर गोइठमन के उमन के बतालैं आउर जब यीशु रोटी टुकरत रहे, तो उमन कइसन चिन्हलैं।

यीशु केर अपन चेलामन के देखाई देवेक

³⁶ जब उमन इ सोउब गोइठमन के गोठियाते रहैं, तब यीशु खुद हें उ मनक माझे आय के ठड़ाय गेलक आउर उमन से कहलक, “तोहरेमन के शांति मिलोक।”

³⁷ मगर उमन घबराय गेलैं आउर डराय के सोचेक लगलैं कि हमरे कोनों मोरल आदमी केर छाँई के देखाथी।

³⁸ यीशु उमन से कहलक, “तोहरेमन एइसन काले घबराथा? आउर तोहरेमन मन में शंका काले कराथा?

³⁹ मोर हाँथ आउर गोड़ के देखा, मोंय ओहे हेकों। मोके छुई के देखा, काले कि भूत केर हाड़-माँस नी होवेला जइसन मोर में देखाथा।”

⁴⁰ इ कइह के यीशु उमन के अपन हाँथ आउर गोड़ के देखालक।

⁴¹ सेकरो में जब चेलामन के खुशी केर मारे इ बिसवास नी होवत रहे कि यीशु जिंदा अहे आउर उमन ताजुब करत रहैं, तब यीशु उमन से पूछलक, “का तोहर ठिना कोनों खाएक लगिन अहे?”

⁴² उमन उके भूरठाल मछरी केर टुकरा देलैं।

⁴³ यीशु उके लेई के उ मनक सामने खालक।

⁴⁴ फिन यीशु उमन से कहलक, “इ गोइठमन के मोंय तोहर संगे रहेक बेरा हें तोहरेमन के बताय रहों कि मोर बारे में जेतना गोइठमन मूसा केर नियम, परमेश्‍वर केर संदेश के बताएक वालामन आउर भजन संहिता केर किताबमन में लिखल अहे, उ सोउब पूरा होवेक जरुरी अहे।”

⁴⁵ तब यीशु पवितर किताब केर गोइठमन के बुझेक लगिन उ मनक बुद्धि के खोइल देलक

⁴⁶ आउर उमन से कहलक, “पवितर किताब में इ लिखल अहे कि मसीह दुःख उठाई आउर तीसरा दिन मोरलमन में से फिन जी उठी।

⁴⁷ आउर यरुशलेम शहर से लेई के सोउब जाइत केर आदमीमन में, पसताप काइर के पापमन के छोड़ेक केर आउर पापमन केर क्षमा केर परचार उकरे नाँव से करल जाई।

⁴⁸ तोहरेमन इ सोउब गोइठमन केर गवाह हेका।

⁴⁹ देखा, मोंय तोहर उपरे पवितर आत्मा के भेजमूँ, जेकर करार मोर आबा परमेश्‍वर काइर हे। से लगिन जब तक तोहरेमन के स्वरग से शक्ति नी मिली तब तक एहे शहर में उकर आसरा देखते रहा।”

यीशु केर स्वरग में घुरेक

⁵⁰ तब यीशु उमन के शहर से बाहरे बैतनिय्याह गाँव तक लेई गेलक, आउर अपन हाँथ उठाय के उमन के आशीष देलक।

⁵¹ आशीष देते-देते उ उमन से जुदा होई गेलक आउर स्वरग में उठाय लेवल गेलक।

⁵² चेलामन यीशु केर आराधना करलैं आउर रिझे-रिझे यरुशलेम शहर घूइर गेलैं।

⁵³ आउर उमन लगातार यहूदी मनक मंदिर में जमा होई के परमेश्‍वर केर बड़ाई करते रहलैं।