लूका 23 - सादरी नवाँ नियम

राजपाल पिलातुस केर यीशु से सवाल

¹ तब सभा केर सोउब आदमीमन उइठ गेलैं आउर यीशु के राजपाल पिलातुस ठिना लेई गेलैं।

² आउर उमन इ कइह के उकर उपरे दोष लगाएक लगलैं, “हमरे उके हमर आदमीमन के बहकाते आउर महाराजा के मालगुजारी देवेक से मना करते आउर खुद के मसीह, आउर राजा कहते सुइन ही।”

³ राजपाल पिलातुस उकर से पूछलक, “का तोंय यहूदीमन केर राजा हेकिस?” यीशु उके जबाब देलक, “तोंय खुद हें कहाथिस।”

⁴ तब पिलातुस यहूदी मुध पुरोहितमन आउर सोउब आदमीमन से कहलक, “मोंय इ आदमी में कोनों दोष नी पालों।”

⁵ मगर उमन आउर हें जोर देई के कहेक लगलैं, “इ गलील परदेस से लेई के हिंयाँ तक गोटा यहूदिया परदेस में अपन उपदेस देई-देई के आदमीमन के दंगा करेक लगिन भड़कायला।”

⁶ इ सुइन के पिलातुस पूछलक, “का इ आदमी गलील परदेस केर रहेक वाला हेके?”

⁷ आउर इ जाइन के कि यीशु गलील परदेस केर राजा हेरोदेस केर अधिकार छेतर केर हेके, उ यीशु के राजा हेरोदेस ठिना भेइज देलक। राजा हेरोदेस हों उ दिनमन में यरुशलेम शहर में रहे।

राजा हेरोदेस केर यीशु से सवाल पूछेक

⁸ राजा हेरोदेस यीशु के देइख के ढेइर खुश होलक, उ ढेइर दिन से उके देखेक खोजत रहे, काले कि उ उकर बारे में सुइन रहे। आउर यीशु के कोनों चमत्कार केर काम करते देखेक केर आसरा करत रहे।

⁹ उ यीशु से ढेइर हें गोइठमन पूछते रहलक, मगर उ उके कोनोवें जबाब नी देलक।

¹⁰ यहूदी मुध पुरोहितमन आउर मूसा केर नियम के सिखाएक वालामन हूवाँ ठड़ाय रहैं, उमन पूरा तन-मन से यीशु उपरे दोष लगाते रहलैं।

¹¹ तब राजा हेरोदेस अपन सिपाहीमन केर संगे उकर मजाक काइर के बेइज्जत करलक आउर भड़किला लुगा पिंधाय के उके पिलातुस ठिना घुराय देलक।

¹² ओहे दिन से राजा हेरोदेस आउर राजपाल पिलातुस में दोस्ती होई गेलक। इकर से पहिले उमन एक-दोसर केर बैरी रहैं।

यीशु के मौत केर सजा देवल जाएक

¹³ ओहे दिन राजपाल पिलातुस यहूदी मुध पुरोहितमन, सरदारमन आउर आदमीमन के एक संगे बोलाय के उमन से कहलक,

¹⁴ “तोहरेमन इ आदमी के मोर ठिना इ दोष लगाय के लाइन हा कि इ आदमीमन के दंगा करेक लगिन बहकात रहे। मोंय तोहर सामने इकर जाँच करलों, मगर तोहर कोनों गोइठ में इके दोषी नी पालों।

¹⁵ राजा हेरोदेस हों इके दोषी नी पालक, काले कि उ इके मोर ठिना घुराय देलक। तोहरेमन देखाथा कि इ आदमी मौत केर सजा केर लाएक कोनों गुन्हा नी काइर हे।

¹⁶ से लगिन मोंय इके कोड़रा मरुवाय के छोइड़ देमूँ।”

¹⁷ राजपाल पिलातुस हर बरिस यहूदी मनक फसह परब केर मोका में एगो कैदी के यहूदीमन लगिन छोइड़ देवत रहे।

¹⁸ तब उमन सोउब एक संगे चिल्लाय उठलैं, “उके मौत केर सजा दे आउर हमरे लगिन बरअब्बा के छोइड़ दे।”

¹⁹ बरअब्बा रोमी सरकार केर बिरोध में नगर में लड़ाई काइर रहे आउर केखो मोराय देई रहे, सेकर चलते जेहेल घर में साजल जाय रहे।

²⁰ मगर राजपाल पिलातुस यीशु के छोड़ेक चाहत रहे, से लगिन आदमीमन से अरजी करलक।

²¹ मगर उमन चिल्लाय के कहते रहलैं, “इके क्रूस उपरे चढ़ाव, इके क्रूस उपरे चढ़ाव।”

²² राजपाल पिलातुस तीसरा बेर फिन उमन से कहलक, “काले, इ आदमी कोन सा बुराई काइर हे? मोंय इकर में मौत केर सजा लायक कोनों दोष नी पालों। से लगिन मोंय इके कोड़रा मरुवाय के छोइड़ देमूँ।”

²³ मगर उमन चिल्लाय-चिल्लाय के राजपाल पिलातुस केर पिछे पाइड़ गेलैं कि इके क्रूस उपरे चढ़ाव, आखिर में पिलातुस उ मनक माँग केर मोताबिक करेक लगिन तेयार होई गेलक।

²⁴ से लगिन पिलातुस आगया देलक कि उ मनक माँग केर मोताबिक करल जाओक।

²⁵ राजपाल पिलातुस उ आदमी के तो छोइड़ देलक, जे बलवा आउर माइर-मोराएक केर चलते जेहेल घर में साजल जाय रहे, जेके उमन छोड़ेक केर माँग करत रहैं, मगर यीशु के आदमी मनक इच्छा केर मोताबिक उमन के जिम्मा देई देलक।

यीशु के क्रूस उपरे चढ़ाल जाएक

²⁶ जब उमन यीशु के लेई जात रहैं, तो उमन सिमोन नाँव केर एगो आदमी के धारलैं, जे कुरेन शहर केर रहेक वाला रहे, उ गाँव से यरुशलेम शहर आवत रहे, उमन उके धाइर के उकर उपरे क्रूस के लाइद देलैं कि क्रूस के बोइह के यीशु केर पिछे-पिछे लेई जाई।

²⁷ आदमी मनक बड़का भीड़ हों उकर पिछे-पिछे जात रहे आउर उमन में जनानामन हों रहैं, जे उकर लगिन छाती पीट-पीट के काँदत रहैं।

²⁸ यीशु उ मनक बटे मुँहराय के कहलक, “हे यरुशलेम शहर केर बेटीमन, मोर लगिन ना काँदा, मगर अपन आउर अपन छउवा-पुतामन लगिन काँदा।

²⁹ काले कि उ दुःख केर दिन आवाथे, जब आदमीमन कहबैं, धाइन हेकैं उमन जेमन बाँझ अहैं, आउर कहियो छउवामन के जनम नी देलैं आउर ना दूध पियालैं।

³⁰ उ बेरा आदमीमन पहारमन से कहेक लगबैं ‘हमर उपरे गिरा,’ आउर टोंगरीमन से कहबैं, ‘हमरे के ढाँइप लेवा।’

³¹ अगर केऊ धरमी आदमी केर संगे इ लेखे होवेला, तो उ सोचोक कि उ आदमीमन केर संगे का होवी, जेमन इ सजा के पावेक केर लाएक अहैं।”

³² उमन दूई झन अपराधी के हों यीशु केर संगे मौत केर सजा देवेक लगिन लेई जात रहैं।

³³ जब उमन उ ठाँव जेके खोपड़ी कहैना पोहोंचलैं तो हूवाँ यीशु के आउर उ दुयो अपराधीमन के क्रूस उपरे चढ़ालैं, एगो के यीशु केर भतखाइया बटे आउर दूसरा के लेंगा बटे चढ़ालैं।

³⁴ तब यीशु कहलक, “हे आबा इमन के क्षमा कर, काले कि इमन नी जानैना कि का कराथैं?” इकर पाछे उमन यीशु केर लुगामन के बाँटेक लगिन चिट्ठी साजलैं कि केके का लुगा भेटाई, तब उमन लुगा के बाँइट लेलैं।

³⁵ आदमीमन ठड़ाय के इ सोउब कुछ के देखत रहैं, आउर सरदारमन हों मजाक काइर-काइर के कहत रहैं, “इ दोसरमन के बचालक, अगर इ परमेश्‍वर केर मसीह आउर उकर चुनल हेके, तो खुद के बचाय लेवोक।”

³⁶ सिपाहीमन हों उकर मजाक करलैं आउर उकर भीरे आय के अमल रस के देते कहलैं,

³⁷ “अगर तोंय यहूदीमन केर राजा हेकिस, तो खुद के बचाय ले।”

³⁸ यीशु केर क्रूस उपरे एगो दोष पत्र हों टांगल रहे, जेकर में लिखल रहे, “इ यहूदीमन केर राजा हेके।”

अपन गुन्हा के मानेक वाला अपराधी

³⁹ क्रूस उपरे टांगल अपराधीमन में से एगो यीशु केर निंदा करेक लगलक, “का तोंय मसीह ना लगिस? तो फिन खुद के आउर हमरे के बचाव!”

⁴⁰ मगर दूसरा अपराधी उके डाँइट के कहलक, “का तोंय परमेश्‍वर से हों नी डराइसला? तोंय हों तो ओहे सजा पावाथिस।

⁴¹ हमर सजा तो न्याय केर मोताबिक हेके, काले कि हमरे अपन करनी केर फल पावाथी, मगर इ कोनों अपराध नी काइर हे।”

⁴² इकर पाछे उ कहलक, “हे यीशु जब तोंय राजा बाइन के राइज करेक आबे, तो मोके याइद करबे।”

⁴³ यीशु उकर से कहलक, “मोंय तोर से सच कहाथों आइज हें तोंय मोर संगे स्वरग लोक में होबे।”

यीशु केर प्राण छोड़ेक

⁴⁴ लगभग बारह बजे से लेई के तीन बजे तक गोटा धरती में अंधार होई गेलक।

⁴⁵ आउर बेइर केर इंजोत चाइल गेलक आउर उ मोटा परदा जे यहूदी मनक मंदिर में लगाल रहे, उपरे से हेंठे तक फाइट के दूई टुकरा होई गेलक।

⁴⁶ यीशु जोर से हकाय के कहलक, “हे आबा, मोंय अपन आत्मा के तोर हाँथ में जिम्मा देवाथों।” इ कइह के अपन प्राण छोइड़ देलक।

⁴⁷ इ सोउब घटना के सूबेदार, जे सौ सिपाही मनक अधिकारी रहे, देइख के परमेश्‍वर केर बड़ाई करलक आउर कहलक, “जरूर हें इ आदमी धरमी रहे।”

⁴⁸ ढेइर आदमीमन इके देखेक लगिन जमा होई रहैं, उमन सोउब इ घटना के देइख के दुःख से छाती पीटते अपन घर घूइर गेलैं।

⁴⁹ यीशु केर सोउब जान-चिन्हार आदमीमन थोरेक दूर में ठड़ाय रहैं, उमन में जनानामन हों रहैं जे गलील परदेस से उकर संगे आय रहैं, उमन इ सोउब घटना के देखत रहैं।

यीशु केर गड़ाय जाएक

⁵⁰ हूवाँ यूसुफ नाँव केर एगो सज्जन आदमी रहे, जे धरमी आउर धरम महासभा केर सदस्य हों रहे।

⁵¹ उ सभा केर बिचार आउर इकर काममन से खुश नी रहे। उ यहूदीमन केर गाँव अरिमतियाह केर रहेक वाला रहे आउर परमेश्‍वर केर राइज केर आसरा देखत रहे।

⁵² उ पिलातुस ठिना जाय के यीशु केर लाश के माँइग लेलक।

⁵³ आउर उ लाश के क्रूस से हेंठे उतरालक आउर उके मलमल केर एगो कफन लुगा में लपाइट के चट्टाइन में खोदल एगो कबर में रखलक। जेकर में कहियो केखो नी रखल जाय रहे।

⁵⁴ इ दिन तेयारी केर दिन रहे, आउर दूसरा दिन यहूदी मनक आराम केर दिन शुरु होवेक वाला रहे।

⁵⁵ जे जनानामन यीशु केर संगे गलील परदेस से आय रहैं, उमन यूसुफ केर पिछे-पिछे जाय के उ कबर के देखलैं, आउर एहो कि उकर लाश का लेखे रखल जाय हे।

⁵⁶ आउर उमन घूइर के बेस बसाएक चीजमन के आउर सेंट तेयार करलैं, आउर यहूदी मनक आराम केर दिन तो उमन मूसा केर नियम केर मोताबिक आराम करलैं।