लूका 21 - सादरी नवाँ नियम

गरीब बिधवा जनाना केर दान

¹ फिन यीशु अपन नजइर उठाय के देखलक कि धनी आदमीमन मंदिर केर भंडार में अपन-अपन दान देवाथैं।

² आउर उ एगो गरीब बिधवा के हों उकर में दूई गो तांबा केर सिक्का देते देखलक।

³ तब यीशु कहलक, “मोंय तोहरेमन के सच कहाथों कि यहूदी मनक मंदिर केर भंडार में दान देवेक वालामन में से इ गरीब बिधवा सोउब से बगरा दान देई हे।

⁴ काले कि सोउब आदमीमन अपन धन केर बढ़ती में से दान देई हैं, मगर इ गरीब बिधवा अपन घटी में से जे कोनोवें उकर ठिना रहे सोउब के दान में देई देलक।”

यहूदी मनक मन्दिर केर नाश होवेक आउर दुनिया में दुःख तकलीफ आवेक केर भविष्यवाणी

⁵ जब थोरेक आदमीमन यहूदी मनक मंदिर केर बारे में कहत रहैं कि उ कइसन सुन्दर पखनामन आउर भेंट केर चीजमन से संवराल जाहे, तो उ कहलक,

⁶ “उ दिनमन आवी, जे दिनमन में तोहरेमन जे इ सोउब के देखाथा, उमन में से हिंयाँ एको गो पखना के दुश्मनमन अपन ठाँव में नी छोड़बैं, सोउब के गिराय देबैं।”

⁷ उमन उकर से पूछलैं, “हें गुरु, हमरे के बताव कि इ सोउब गोइठ कहिया पूरा होवी? आउर जब इ सोउब गोइठ पूरा होवेक वाला रही, तो उ बेरा केर का चिन्हा होवी?”

⁸ यीशु जबाब देलक, “सावधान रहा, बहइक ना जबा, काले कि ढेइर आदमीमन मोर नाँव से आय के कहबैं, ‘मोंय मसीह हेकों!’ आउर इ हों कहबैं, ‘समय भीरे आय पोंहइच हें।’ तोहरेमन उ मनक पिछे ना चाइल जबा।

⁹ आउर जब तोहरेमन लड़ाई आउर मार-पीट केर गोइठमन के सुनबा, तो ना घबराबा। काले कि पहिले इ मनक होवेक जरुरी अहे, मगर उ बेरा तुरते दुनिया केर अंत नी होवी।”

¹⁰ तब यीशु उमन से कहलक, “एक जाइत केर आदमीमन दोसर जाइत केर आदमीमन उपरे हमला करबैं आउर एक देस केर आदमीमन दोसर देस केर आदमीमन से लड़बैं।

¹¹ आउर बड़का-बड़का भूंईडोल होवी आउर जगा-जगा अकाल आउर महामारी होवी आउर आकाश में भयानक डराएक वाला आउर बड़का-बड़का चिन्हा दिस्तार होवी।

¹² मगर इ सोउब गोइठमन से आगे तोहरेमन मोर चेला हेका, से लगिन उमन तोहरेमन के धारबैं आउर सताबैं, आउर यहूदी मनक प्रार्थना घर में जिम्मा देबैं, आउर जेहेल घर में सजुवाबैं, आउर तोहरेमन के राजामन आउर अधिकारी मनक आगे ठड़ुवाल जाएक ले मजबूर करबैं।

¹³ मगर इ सोउब होवेक से तोहरेमन के उमन के मोर बारे में शुभ समाचार सुनाएक केर मोका मिल जाई।

¹⁴ से लगिन तोहरेमन अपन-अपन मन में ठाइन लेबा कि हमरे आगे से जबाब देवेक केर चिंता नी करब।

¹⁵ काले कि मोंय तोहरेमन के एइसन बोल आउर बुद्धि देमूँ कि सोउब बिरोधी आदमीमन तोहरे केर सामना करेक चाहे गोइठ काटेक नी पारबैं।

¹⁶ तोहरे केर आयो-आबा, भाईमन, रिश्तेदारमन आउर संगमन जे मोर उपरे बिसवास नी करैना, तोहरेमन के धरुवाबैं, हिंयाँ तक कि तोहरे में से कायनों झन के माइर मोराबैं।

¹⁷ आउर तोहरेमन मोर उपरे बिसवास कराला से लगिन ढेइर आदमीमन तोहरेमन से नफरत करबैं।

¹⁸ मगर तोहरे केर कोनों नोकसान नी होवी।

¹⁹ तोहरेमन दुःख तकलीफ केर आखरी बेरा तक मोर उपरे भरसा कराला आउर हार नी मानाला। से लगिन अपन जीउ के बचाय लेबा।

यरुशलेम शहर केर नाश

²⁰ जब तोहरेमन यरुशलेम शहर के सिपाहीमन से घेराल देखबा, तो जाइन लेबा कि उके जल्दी हें नाश करल जाई।

²¹ तब जे यहूदिया परदेस में अहैं, उमन खुद के बचाएक ले पहारमन केर उपरे भाइग जाओक। आउर जे यरुशलेम शहर केर भीतरे होबैं, उमन बाहरे निकइल जाओक। आउर जे गाँवमन में होबैं, उमन उ नगर में ना जाओक।

²² काले कि इ सजा देवेक केर एइसन दिन होवी, जेकर से पवितर किताब में लिखल सोउब गोइठमन पूरा होई जाई।

²³ उ दिनमन में उ जनानामन लगिन जे भारी गतर में होबैं आउर अपन छउवामन के दूध पियाते होबैं, भयानक समय होवी, उमन के भागेक लगिन ढेइर कठिन होवी! काले कि देस में बड़का दुःख आउर इ आदमी मनक उपरे भारी बिपइत आवी।

²⁴ उमन तलवाइर केर धार से मोराल जबैं, आउर ढेइर आदमीमन के बंधुवा बनाय के सोउब देस में लेगल जाई। जब तक परजाइतमन केर देस केर समय पूरा नी होवी, तब तक यरुशलेम शहर उ देस केर आदमीमन से रौंदाय जाई।

यीशु केर घूइर आवेक केर चिन्हा

²⁵ बेइर, चाँद आउर तइरगनमन में चिन्हा दिस्तार होवी, समुदर केर गरजेक आउर लहरामन केर हिलकोरा से दुनिया केर सोउब देस केर आदमीमन घबराय जबैं आउर उ मनक उपरे भयानक बिपइत आवी।

²⁶ दुनिया में आवेक वाला बिपइत केर आशंका से आदमीमन केर जीउ में जीउ नी रही, काले कि आकाश केर शक्तिमन हिलाल जाई।

²⁷ तब उमन मोंय आदमी केर बेटा के शक्ति आउर बड़का तेज चमक केर संगे बदरी में आते देखबैं।

²⁸ जब इ गोइठमन होवेक लगी, तो तोहरेमन सोझ ठड़ाय के अपन मूँड़ के उपरे उठाबा, काले कि तोहर छुटकारा होवेक केर बेरा भीरे अहे।”

अंजीर केर गाँछ केर उदाहरन

²⁹ यीशु उमन के एगो आउर उदाहरन बतालक, “अंजीर केर गाँछ आउर दोसर गाँछमन के देखा।

³⁰ जब उमन में नोगजा निकलेला, तो तोहरेमन देइख के खुद हें जाइन लेवाला कि गरमी केर दिन भीरे आय जाहे।

³¹ एहे लेखे जब तोहरेमन इ गोइठमन के पूरा होते देखबा, तब जाइन लेबा कि परमेश्‍वर केर राइज भीरे अहे।

³² मोंय तोहरेमन से सच कहाथों कि जब तक इ सोउब गोइठमन पूरा नी होई लेई, तब तक इ पीढ़ी केर आदमीमन नी मोरबैं।

³³ आकाश आउर धरती नाश होई जाई, मगर मोर कहल सोउब गोइठ सोउब दिन लगिन बनल रही।

सोउब बेरा तेयार रहा

³⁴ से लगिन तोहरेमन सावधान रहा, कहीं एइसन ना होवोक कि तोहरेमन माउज-मस्ती, नशापान आउर इ दुनिया केर चिंतामन से सुस्त होई जबा आउर उ दिन अचका एगो फंदा नियर तोहर उपरे आय जाई।

³⁵ काले कि उ दिन गोटा दुनिया में रहेक वाला सोउब आदमी मनक उपरे एहे नियर आवी।

³⁶ से लगिन जागते रहा आउर सोउब बेरा प्रार्थना करते रहा, जेकर से तोहरेमन इ सोउब आवेक वाला बिपइतमन से बचेक आउर मोंय आदमी केर बेटा केर सामने ठड़ाएक केर लायक बनेक पारबा।”

³⁷ यीशु दिन में यहूदी मनक मंदिर में उपदेस देवत रहे, मगर राइत के शहर केर बाहरे जाय के जैतून नाँव केर पहार में राइत बितात रहे।

³⁸ आउर बिहाने से हें सोउब आदमीमन उकर उपदेस सुनेक लगिन यहूदी मनक मंदिर में उकर ठिना आवत रहैं।