लूका 20 - सादरी नवाँ नियम

यहूदी आदमीमन केर यीशु से सवाल

¹ एक दिन यीशु यहूदी मनक मंदिर में आदमीमन के उपदेस देवत रहे आउर शुभ समाचार सुनात रहे, सेहे बेरा धरम केर अगुवामन केर संगे यहूदी मुध पुरोहितमन आउर मूसा केर नियम के सिखाएक वालामन यीशु ठिना आय के ठड़ाय गेलैं।

² आउर उमन यीशु से पूछेक लगलैं, “हमरे के बताव, तोंय इ काममन के कोन अधिकार से करिसला, आउर उ केहर हेके, जे तोके इ अधिकार देई हे?”

³ यीशु उमन के जबाब देलक, “मोंय हों तोहरेमन से एगो गोइठ पूछाथों, मोके बतावा,

⁴ यूहन्ना के बपतिस्मा जल संस्कार देवेक केर अधिकार परमेश्‍वर बटे से मिल रहे या आदमीमन बटे से मिल रहे?”

⁵ तब उमन आपस में कहेक लगलैं, “अगर हमरे कहब, ‘यूहन्ना केर बपतिस्मा जल संस्कार देवेक केर अधिकार परमेश्‍वर बटे से मिल रहे,’ तो उ हमरे से कही, ‘तो फिन तोहरेमन काले उकर गवाही केर उपरे बिसवास नी करला?’

⁶ आउर हमरे एहो कहेक नी पारब, ‘यूहन्ना के इ अधिकार आदमीमन बटे से मिल रहे,’ अगर एइसन कहब तो सोउब आदमीमन हमरे के पखना से मारबैं, काले कि उमन सचमुच जानैना कि यूहन्ना परमेश्‍वर केर संदेश के बताएक वाला रहे।”

⁷ तब उमन यीशु के जबाब देलैं, “हमरे नी जानिला कि यूहन्ना के बपतिस्मा जल संस्कार देवेक केर अधिकार केहर देई रहे।”

⁸ यीशु उमन से कहलक, “तो मोंय हों तोहरेमन के नी बतामूँ, इ काम कोन अधिकार से करोना।”

दुष्ट किसानमन केर उदाहरन

⁹ तब यीशु आदमीमन के इ उदाहरन बताएक लगलक, “एगो आदमी अंगूर केर खेती करलक, आउर उकर ठिका किसानमन के देई के ढेइर दिन लगिन परदेस चाइल गेलक।

¹⁰ जब फार काटेक केर बेरा आलक तो खेत केर मालिक किसानमन ठिना अपन एगो धांगर के भेजलक, कि उमन अंगूर फार केर बाँटा उके देबैं। मगर किसानमन उके पीट के छुछा हाँथ घुराय देलैं।

¹¹ फिन खेत केर मालिक एगो आउर धांगर के भेजलक, आउर उमन उखो पिटलैं आउर उकर से बुरा ब्यवहार काइर के छुछा हाँथ घुराय देलैं।

¹² फिन मालिक तीसरा बेर एगो आउर धांगर के भेजलक, आउर उमन उके हों माइर के लोहू-लुहान काइर के निकलाय देलैं।

¹³ तब खेत केर मालिक कहलक, ‘मोंय का करमूँ? मोंय अपन दुलार बेटा के भेजमूँ, उमीद अहे उमन उकर आदर करबैं।’

¹⁴ जब किसानमन मालिक केर बेटा के देखलैं, तो आपस में सलहा करेक लगलैं, ‘एहे तो बपौती हकदार हेके। आवा, हमरे इके माइर मोराब ताकि इकर बपौती सम्पति हमरे केर होई जाई।’

¹⁵ आउर उमन उके अंगूर केर खेत से बाहरे निकलाय के मोराय देलैं। अब तोहरेमन केर का बिचार अहे कि अंगूर खेत केर मालिक उ मनक संगे का करी?

¹⁶ उ आय के उ किसानमन के नाश करी, आउर अंगूर केर बारी केर जिम्मा दोसर आदमीमन के देवी।” इ सुइन के उमन कहलैं, “परमेश्‍वर एइसन ना करोक।”

¹⁷ मगर यीशु उमन के धेयान से देखलक आउर उमन से कहलक, “पवितर किताब में लिखल इ गोइठ केर का अर्थ हेके, ‘जे पखना के राज मिस्त्रीमन बेकार जाइन के फेइक देई रहैं, ओहे कोना केर नेव केर पखना बाइन गेलक?’

¹⁸ जे केऊ इ पखना उपरे गिरी, उ चकनाचूर होई जाई आउर जेकर उपरे इ पखना गिरी, उके पीस देवी।”

¹⁹ ओहे बेरा मूसा केर नियम के सिखाएक वालामन आउर यहूदी मुध पुरोहितमन उके धारेक चाहलैं, काले कि उमन बुइझ गेलैं कि उ हमरे केर उपरे इ उदाहरन कइह हे, मगर उमन आदमीमन से डरालैं।

मालगुजारी देवेक केर सवाल

²⁰ फिन भी उमन यीशु के फँसाएक केर ताक में रहत रहैं। उमन यीशु केर भेद लेवेक लगिन अपन आदमीमन के भेजलैं कि उमन धरमी केर भेष बनाय के यीशु के कोनों ना कोनों गोइठ में फँसाओक, जेकर से उमन उके राजपाल केर हाँथे आउर उकर अधिकार में जिम्मा देवेक पारोक।

²¹ उमन यीशु से इ पूछलैं, “हे गुरु, हमरे जानिला कि तोंय सोउब बेरा सच गोइठ के बताइसला आउर सिखाइसला हों, तोंय सोउब केर संगे एक लेखे ब्यवहार करिसला आउर परमेश्‍वर केर डहर केर गोइठमन के सच्चाई से बताइसला।

²² अब तोंय हमरे के इ बताव कि महाराजा के मालगुजारी देवेक मूसा केर नियम केर मोताबिक उचित अहे कि निहीं?”

²³ यीशु उ मनक चलाँकी के जाइन के उमन से कहलक,

²⁴ “एगो चाँदी केर सिक्का मोके देखावा। इकर उपरे केकर मूर्ति आउर नाँव अहे?” उमन जबाब देलैं, “महाराजा केर।”

²⁵ यीशु उमन से कहलक, “जे महाराजा केर हेके, उके महाराजा के देवा आउर जे परमेश्‍वर केर हेके, उके परमेश्‍वर के देवा।”

²⁶ इ लेखे उमन आदमी मनक आगे इ गोइठ में उके धारेक नी पारलैं, मगर यीशु केर जबाब से ताजुब होई के चुप रइह गेलैं।

मोरलमन केर जी उठेक आउर बिहा

²⁷ इकर पाछे थोरेक सदूकी दल केर आदमीमन यीशु ठिना आलैं। उमन मोरलमन केर जी उठेक के नी मानैना, यीशु से सवाल पूछलैं,

²⁸ “हे गुरु, मूसा हमर लगिन नियम बनाय हे कि अगर केकरो भाई अपन जनाना केर रहते बेगर संतान केर मोइर जाई, तो उकर भाई उकर बिधवा से बिहा काइर के अपन भाई लगिन संतान जनमाओक।

²⁹ एगो परिवार में सात भाई रहैं। बड़का भाई बिहा काइर के बेगर संतान केर मोइर गेलक।

³⁰ फिन दूसरा भाई उकर जनाना से बिहा करलक,

³¹ आउर तीसरा भाई हों उ जनाना के बिहा काइर लेलक। एहे लेखे सातों भाईमन उ जनाना से बिहा करलैं आउर बेगर संतान केर मोइर गेलैं।

³² सोउब केर पाछे उ जनाना हों मोइर गेलक।

³³ अब तोंय इ बताव कि उ जनाना केर बिहा तो सातों भाईमन से होई रहे, से जी उठेक केर पाछे उ केकर जनाना होवी?”

³⁴ यीशु उमन के जबाब देलक, “इ युग केर आदमीमन में तो बिहा-सादी होवेला।

³⁵ मगर जे आदमीमन उ जुग में जाएक लाएक होबैं आउर मोरलमन में से जी उठबैं, तो उमन में बिहा-सादी नी होवी।

³⁶ उमन फिन कहियो नी मोरबैं, काले कि उमन स्वरग में परमेश्‍वर केर दूतमन नियर रहबैं आउर मोरलमन में से जी उठेक केर चलते उमन परमेश्‍वर केर संतान हों बाइन जबैं।

³⁷ मगर इ गोइठ के कि मोरलमन जरूर जी उठैना, मूसा हों पोड़ते झूँड़ केर कहानी में इकर इशारा काइर हे, जहाँ उ प्रभु के ‘अब्राहम, इसहाक आउर याकूब केर परमेश्‍वर’ कहेला।

³⁸ परमेश्‍वर तो मोरलमन केर निहीं मगर जिंदा आदमीमन केर परमेश्‍वर हेके, काले कि उकर लगिन उकर सोउब आदमीमन जिंदा अहैं।”

³⁹ इ गोइठ सुइन के मूसा केर नियम के सिखाएक वालामन में से थोरेक आदमीमन कहलैं, “हे गुरु, तोंय बेस कहले।”

⁴⁰ इकर पाछे उमन के फिन यीशु से कोनों आउर सवाल पूछेक केर साहस नी होलक।

मसीह राजा दाऊद केर बेटा या उकर प्रभु हेके?

⁴¹ फिन यीशु उमन से पूछलक, “मसीह के राजा दाऊद केर बंश काले कहैना?

⁴² राजा दाऊद खुद हें भजन संहिता केर किताब में कहेला, ‘प्रभु मोर प्रभु से कहलक, “तोंय मोर सिंहासन केर भतखाइया बटे बाइठ,

⁴³ जब तक कि मोंय तोर बैरीमन के तोर गोड़ में नी गिराय देमूँ।”’

⁴⁴ पवितर किताब केर उ ठाँव में राजा दाऊद खुद हें मसीह के मोर प्रभु कहेला तो फिन उ सिरिफ राजा दाऊद केर बंश कइसन होवी?”

मूसा केर नियम के सिखाएक वालामन से सावधान

⁴⁵ जब सोउब आदमीमन सुनत रहैं, तो यीशु अपन चेलामन से कहलक,

⁴⁶ “मूसा केर नियम के सिखाएक वालामन से सावधान रहा, उमन इ देखाएक लगिन कि उमन ढेइर खास हेकैं, चौक-चौराहा में लम्बा आउर महंगा लुगा पिंध के फिरेक आउर बाजारमन में आदमी मनक मुँह से माइन केर संगे जोहार सुनेक पसिंद करैना! उमन के यहूदी मनक प्रार्थना घरमन में आउर भोजमन में मुध ठाँव में बइठेक बेस लगेला।

⁴⁷ उमन बिधवामन के धोखा देई के उ मनक घर आउर धन सम्पति के कब्जा काइर लेवैना आउर उमन के देखाएक लगिन ढेइर देरी तक प्रार्थना करते रहैना। एइसन आदमीमन के परमेश्‍वर कठोर सजा देई।”