लूका 19 - सादरी नवाँ नियम

मालगुजारी लेवेक वाला जक्कई केर मन बदलेक

¹ यीशु आउर उकर चेलामन यरीहो शहर से होई के आगे जात रहैं।

² हूवाँ जक्कई नाँव केर एगो धनी आदमी रहे, जे मालगुजारी लेवेक वालामन केर सोउब से बाड़ अधिकारी रहे।

³ उ यीशु के देखेक खोजत रहे कि उ कइसन अहे। मगर उ नटरा रहे, से लगिन भीड़ में उके देखेक नी पारत रहे।

⁴ उ यीशु के देखेक लगिन आगे कूइद के एगो डुम्बाइर केर गाँछ में चाइढ़ गेलक, काले कि यीशु ओहे डहर से जाएक वाला रहे।

⁵ जब यीशु उ ठाँव में पोहोंचलक, तब उ उपरे देइख के उकर से कहलक, “हे जक्कई, झट उतइर के आव, काले कि आइज मोके तोर घर में रहेक जरुरी अहे।”

⁶ उ तुरते गाँछ से हेंठे उतरलक आउर यीशु के अपन घर लेई गेलक आउर खुशी से उकर स्वागत करलक।

⁷ इ देइख के सोउब आदमीमन कुड़कुड़ाय के कहेक लगलैं, “उ तो एगो पापी आदमी केर घरे गोतिया बाइन के जाय हे।”

⁸ जक्कई ठड़ाय के प्रभु यीशु से कहलक, “हे प्रभु, देख, मोंय अपन आधा सम्पति के गरीब आदमीमन के दान काइर देमूँ आउर अगर मोंय केकरो से अन्याय काइर के बगरा मालगुजारी लेई हों, तो उके चाइर गुणा घुराय देमूँ।”

⁹ तब यीशु उकर से कहलक, “आइज तोंय आउर तोर परिवार में छुटकारा आय हे, इ लगिन कि तोंय हों अब्राहम केर एगो बेटा हेकिस।

¹⁰ काले कि मोंय आदमी केर बेटा हेराल आदमीमन के खोजेक आउर उमन के बचाएक लगिन आय हों।”

दस गो सोना केर सिक्का

¹¹ जब उमन इ गोइठमन के सुनत रहैं, तब यीशु उमन के एगो उदाहरन बतालक, इ लगिन कि उ यरुशलेम शहर केर भीरे रहे, आउर आदमीमन के एइसन बुझालक कि परमेश्‍वर केर राइज एखन आवेक वाला अहे।

¹² “मोर धरती छोड़ेक आउर घूइर आवेक केर तरीका इ लेखे अहे, एगो धनी आदमी राजगद्दी पाय के फिन घूइर आवेक केर बिचार से परदेस चाइल गेलक।

¹³ जाएक से आगे उ अपन धांगरमन में से दस झन के बोलालक आउर उमन के एक-एक गो सोना केर सिक्का देई के कहलक, ‘मोर घूइर आवेक तक इकर से लेन-देन करा।’

¹⁴ मगर उकर नगर केर बसिंदामन उकर से बैर रखत रहैं, से लगिन उमन उकर पिछे खबर देवेक वालामन से कइह भेजलैं, ‘हमरे नी चाहिला कि इ हमर उपरे राइज करी।’

¹⁵ जब उ राजगद्दी पाय के घूइर आलक, तो उ अपन धांगरमन के जेमन के रुपया देई रहे, अपन ठिना बोलालक आउर इ जानेक चाहलक कि उमन लेन-देन से का-का कमाय हैं।

¹⁶ तब पहिला धांगर आय के कहलक, ‘हे मालिक तोर सिक्का से दस आउर सोना केर सिक्का कमाय हों।’

¹⁷ इ सुइन के मालिक उकर से कहलक, ‘धाइन अहिस हे मोर बेस धांगर, तोंय ढेइर हें थोर में बिसवास लायक निकलले, से लगिन तोंय दस गो नगर केर उपरे अधिकार रख।’

¹⁸ दूसरा हों आय के कहलक, ‘हे मालिक, मोंय तोर सोना केर सिक्का से पाँच आउर सोना केर सिक्का कमाय हों।’

¹⁹ उ उकर से हों कहलक, ‘तोंय हों पाँच गो नगर केर उपरे शासन कर।’

²⁰ आउर तीसरा हों आय के कहलक, ‘हे मालिक, देख, तोर सोना केर सिक्का इ हेके, जेके मोंय गमछा में बाइंध के राइख रहों।

²¹ मोंय तोर से डरात रहों, काले कि तोंय कठोर आदमी हेकिस। जेके तोंय नी राइख हिस उके उठाय लेविसला आउर जेके तोंय नी बुइन हिस, उके काटिसला।’

²² मालिक उकर से कहलक, ‘हे दुष्ट धांगर, मोंय तोर हें गोइठ से तोके दोषी ठहराथों। तोंय मोके जानत रहिस कि मोंय कठोर आदमी हेकों, जे मोंय नी राइख हों उके उठाय लेवोना, आउर जे मोंय नी बुइन हों, उके काटोना।

²³ तो तोंय मोर रुपया के महाजन ठिना काले नी राइख देले, ताकि मोंय आय के सूद समेत लेई लेतों?’

²⁴ आउर जे आदमीमन भीरे ठड़ाय रहैं, मालिक उमन से कहलक, ‘उ सोना केर सिक्का के उकर से लेई लेवा आउर जेकर ठिना दस गो सोना केर सिक्का अहे, उके देई देवा।’

²⁵ उमन उकर से कहलैं, ‘हे मालिक, उकर ठिना तो दस गो सोना केर सिक्का अहे।’

²⁶ मालिक कहलक, ‘मोंय तोहर से कहाथों, जेमन, उमन ठिना जे कोनों अहे उकर में बिसवास लायक अहैं, उमन के आउर बगरा देवल जाई, मगर जेमन बिसवास लायक नखैं, उमन से उ चीजमन के हों, जे कोनों उमन ठिना अहे, लेई लेवल जाई।

²⁷ मगर मोर उ बैरीमन के जे नी चाहत रहैं कि मोंय उ मनक राजा बनमूँ, उमन के हिंयाँ लाइन के मोर आगे माइर देवा।’ ”

जय-जयकार केर संगे यीशु केर यरुशलेम शहर में ढूकेक

²⁸ इ गोइठमन कइह के यीशु अपन चेलामन केर संगे यरुशलेम शहर बटे उ मनक आगे-आगे जाएक लगलक।

²⁹ जब यीशु आउर उकर चेलामन जैतून पहार केर भीरे बैतफगे आउर बैतनिय्याह गाँव ठिना पोहोंचलैं, तो उ अपन चेलामन में से दूई गो के इ कइह के अपन से आगे भेजलक,

³⁰ “अपन आगे केर गाँव में जावा, हूवाँ पोहोंचते हें एगो गधी केर छउवा बाँधल मिली, जेकर में कहियो केऊ नी बाइठ हैं, तोहरेमन उके खोइल के लेई आनबा।

³¹ आउर अगर केऊ तोहरेमन से पूछी, ‘तोहरे इके काले खोलाथा?’ तो उके कइह देबा, ‘यीशु हमर प्रभु के इकर दरकार अहे।’”

³² जेमन भेजल जाय रहैं, उमन जाय के जइसन यीशु उमन से कइह रहे तइसनेहें पालैं।

³³ जेखन उमन गधी केर छउवा के खोलत रहैं, तो उकर मालिकमन उमन से पूछलैं, “इ छउवा के काले खोलाथा?”

³⁴ उमन कहलैं, “यीशु हमर प्रभु के इकर दरकार अहे।”

³⁵ उमन गधी केर छउवा के यीशु ठिना लेई आनलैं आउर उकर उपरे अपन गमछा के डिसाय के यीशु के उकर उपरे बइठाय देलैं।

³⁶ जब यीशु जात रहे, तो उमन यीशु के एगो राजा नियर माइन देवेक लगिन उकर आगे सड़क केर उपरे अपन गमछामन के डिसाते जात रहैं।

³⁷ यीशु आगे बढ़ते गेलक आउर उ ठाँव में पोहोंचलक, जहाँ से सड़क जैतून पहार केर हेंठे जात रहे, हूवाँ सोउब चेला मनक दल खुशी से उ सोउब चमत्कार केर काममन लगिन जेके उमन देइख रहैं, जोर से परमेश्‍वर केर बड़ाई करेक लगलैं,

³⁸ “धाइन अहे उ राजा, जे प्रभु केर नाँव से आवेला, स्वरग में शांति आउर सोउब से ऊँचा स्वरग में महिमा हो।”

³⁹ तब भीड़ में से थोरेक फरीसी दल केर आदमीमन यीशु से कहेक लगलैं, “हे गुरु, अपन चेलामन के डाँट ताकि उमन चुप रहोक।”

⁴⁰ मगर यीशु जबाब देलक, “मोंय तोहर से कहाथों, अगर इमन चुप रहबैं, तो पखनामन चिल्लाएक शुरु काइर देबैं।”

यरुशलेम शहर लगिन दुःखी होवेक

⁴¹ जब यीशु यरुशलेम शहर केर भीरे आलक तो शहर के देइख के उकर लगिन काँदलक।

⁴² आउर कहलक, “तोर लगिन कतइ बेस होतक कि तोंय, हाँ तोंय हें, आइज केर दिन बुइझ पाते कि का गोइठमन से तोके शांति मिली, मगर एखन तक इ गोइठमन तोर आँइख से लुकल अहे।

⁴³ काले कि तोर उपरे उ दिन आवी, जब तोर दुश्मनमन तोके चाइरो बटे से घेइर लेबैं आउर तोर निकलेक केर डहर के बंद काइर देबैं।

⁴⁴ आउर तोके आउर तोर छउवामन के माइर मोराय देबैं, आउर तोर घरमन केर एगो पखना उपरे दोसर पखना के रहेक नी देबैं, काले कि तोंय उ मोका के नी चिन्हले जब परमेश्‍वर तोर उपरे दया काइर रहे।”

मंदिर से बेपारीमन केर निकलाल जाएक

⁴⁵ तब यीशु यहूदी मनक मंदिर में जाय के बेचाइयामन के इ कहते बाहरे निकलाएक लगलक,

⁴⁶ “लिखल अहे, ‘मोर घर प्रार्थना केर घर होवी।’ मगर तोहरेमन इके डाकू मनक अड्डा बनाय देई हा।”

⁴⁷ यीशु रोज दिन यहूदी मनक मंदिर में उपदेस देवत रहे, आउर यहूदी मुध पुरोहितमन, मूसा केर नियम के सिखाएक वालामन आउर आदमी मनक मुखियामन उके नाश करेक लगिन मोका केर ताक में रहत रहैं।

⁴⁸ मगर उमन के कोनों उपाय नी सूझत रहे कि उके कइसन करब काले कि सोउब आदमीमन खूब धेयान से उकर उपदेस के सुनत रहैं।