लूका 17 - सादरी नवाँ नियम

ठोकर केर कारण बनेक

¹ यीशु फिन अपन चेलामन से कहलक, “दुनिया में आदमीमन बिसवास से जरूर भटकाबैं, मगर हाय, उ आदमी उपरे जे मोर उपरे बिसवास करेक वाला आदमीमन के भटकायला।

² अगर केऊ छउवा जइसन आदमी में से एको झन के मोर उपरे बिसवास करेक से बहकायला, उकर लगिन भला होतक कि उकर घेंचा में एगो बड़का पखना केर जाँता बाँधल जातक आउर उके डुबेक लगिन समुदर में फेइक देवल जातक।

³ से लगिन सावधान रहा कि तोहरेमन का कराला, अगर तोहर बिसवासी भाई गुन्हा करेला, तो उके मना करेक लगिन समझावा, आउर अगर उ अपन गलती माइन लेई तो उके क्षमा काइर देबा।

⁴ अगर दिन भइर में उ सात बेर तोहर बिरोध गुन्हा करी आउर सातों बेर तोहर ठिना आय के कही, ‘मोर से गलती होलक, मोके क्षमा काइर दे।’ तो तोहरेमन उके क्षमा करते जबा।”

⁵ तब खास चेलामन प्रभु यीशु से कहलैं, “तोर उपरे आउर हें मजबूत से बिसवास करेक लगिन हमर मदइत कर।”

⁶ प्रभु यीशु कहलक, “अगर तोहरेमन केर बिसवास राई केर माँजी बराबइर हों होतक, तो इ तूत केर गाँछ से कहता, ‘जाइर से उखइर के समुदर में चाइल जा।’ तो उ तोहरे केर आगया के माइन लेतक।

एगो बेस धांगर केर काम

⁷ तोहर में से एइसन मालिक के हेके, जेकर धांगर हार जोइत के चाहे भेड़ीमन के चराय के खेत से घर घूइर आवी, आउर उकर से कही, ‘तुरते आव आउर खाएक लगिन बाइठ?’

⁸ निहीं, मगर उ कही, ‘मोर खाएक लगिन तेयार कर आउर जब तक मोंय नी खामूँ-पीमूँ तब तक मोर सेवा करेक लगिन तेयार रह। इकर पाछे तोंय हों खाय-पी लेबे।’

⁹ का उ अपन धांगर के उ काम के करेक लगिन धन्यबाद देवी, जे काम के मालिक उके करेक लगिन कइह रहे? निहीं।

¹⁰ एहे नियर से जब तोहरेमन सोउब कुछ काइर लेई हा, जे तोहरेमन के करेक लगिन कहल जाय रहे, तो तोहरेमन के इ कहेक चाही, ‘हमरे नलायक धांगर हेकी, काले कि जेके हमरे के करेक चाही रहे, सिरिफ उके भइर काइर ही।’ ”

दस गो कोढ़ बेमरियामन के ठीक करेक

¹¹ जब यीशु आउर उकर चेलामन यरुशलेम शहर जाएक डहर में सामरिया परदेस आउर गलील परदेस केर सिमान से होई के जात रहैं।

¹² आउर जइसनेहें उमन एगो गाँव में ढूकेक वाला रहैं, तइसनेहें उमन के दस झन कोढ़ बेमरियामन भेटालैं।

¹³ आउर उमन दूर हें ठड़ाय के जोर से कहलैं, “हे यीशु, हे मालिक, हमर उपरे दया कर।”

¹⁴ यीशु उमन के देइख के कहलक, “तोहरेमन यरुशलेम मंदिर में जावा आउर खुद के अपन पुरोहितमन के जाँच करेक देबा, इ देखेक लगिन कि तोहरेमन ठीक होई जाय हा।” आउर उमन जाते-जाते डहर में हें ठीक होई गेलैं।

¹⁵ तब उमन में से एक झन इ देइख के कि उ ठीक होई जाय हे, जोर से परमेश्‍वर केर बड़ाई करते यीशु ठिना घूइर आलक।

¹⁶ आउर यीशु केर गोड़ तरे निहइर के उके धन्यबाद देवेक लगलक। इ सामरी आदमी रहे।

¹⁷ से लगिन यीशु कहलक, “का दसो झन ठीक नी होलैं तो फिन उ नौ झन कहाँ अहैं?

¹⁸ का इ परदेसी आदमी के छोइड़ के आउर केखो नी सूझलक कि घूइर के परमेश्‍वर केर बड़ाई करतैं?”

¹⁹ तब यीशु उकर से कहलक, “उइठ के चाइल जा, तोंय बिसवास करले से लगिन ठीक होई जाहिस।”

परमेश्‍वर केर राइज केर आवेक

²⁰ एक बेर फरीसी दल केर आदमीमन यीशु से पूछलैं, “परमेश्‍वर केर राइज कहिया आवी?” तो यीशु उमन के जबाब देलक, “परमेश्‍वर केर राइज एइसन आवाथे कि तोहरेमन अपन आँइख से देखेक नी पारबा।

²¹ आउर आदमीमन इ नी कहबैं, ‘देखा, हिंयाँ अहे, चाहे हूवाँ अहे।’ काले कि परमेश्‍वर केर राइज तोहर माझे में अहे।”

²² फिन यीशु अपन चेलामन से कहलक, “एइसन समय आवाथे कि तोहरेमन उ दिन के देखेक खोजबा, जब मोंय आदमी केर बेटा घूइर आमूँ, मगर इ संभव नी होवी, काले कि मोर आवेक केर बेरा तब तक नी पोंहइच रही।

²³ आदमीमन तोहरेमन से कहबैं, ‘देखा, मसीह हूवाँ अहे,’ चाहे ‘देखा, मसीह हिंयाँ अहे।’ मगर तोहरेमन हुने ना जबा आउर ना उ मनक पिछे चलबा।

²⁴ काले कि जइसन बिजली आकाश केर एक छोर से निकइल के दोसर छोर तक चमकेला, तइसनेहें मोंय आदमी केर बेटा हों अपन दिन में दिस्तार होमूँ।

²⁵ मगर आगे मोके इ जुग केर आदमीमन बटले ठुकराल जाएक आउर दुःख उठाएक जरुरी अहे।

²⁶ जइसन हमर पुरखा नूह केर परिया में होई रहे, तइसनेहें मोंय आदमी केर बेटा केर परिया में हों होवी।

²⁷ जे दिन तक नूह जहाज उपरे नी चढ़लक, उ दिन तक आदमीमन खाते-पिते रहैं, आउर उमन में सादी-बिहा होते रहे, तब बाइढ़-पानी आलक आउर सोउबमन के डुबाय के बरबाद काइर देलक।

²⁸ एहे नियर हमर पुरखा लूत जब सदोम शहर में रहे, से परिया हों होई रहे, आदमीमन खाते-पिते, किना-बेचा करते, गाँछ रोपते आउर घर बनाते रहैं।

²⁹ मगर जे दिन लूत सदोम शहर से निकललक, उ दिन आइग आउर गंधक आकाश से बरसलक आउर सोउब आदमीमन के जे शहर में रहैं, बरबाद काइर देलक।

³⁰ एहे नियर जे दिन आदमीमन मोर आवेक केर बारे में नी सोइच रहबैं, सेहे दिन मोंय आदमी केर बेटा हों फिन से वापस घूइर आमूँ।

³¹ उ दिन अगर केऊ अपन घर केर छाइन उपरे अहे, उ उतइर के कोनों चीजमन के लेगेक ले घर भीतरे ना ढूकोक आउर जे खेत में अहे ओहो घर ना घुरोक।

³² तोहरेमन याइद करा कि लूत केर जनाना संगे का होई रहे।

³³ जे केऊ अपन जीउ के बचाएक चाही, उ जुग-जुग केर जिंदगी के गवाँय देवी, आउर जे केऊ मोर लगिन अपन जीउ के गवाँय देवी, उ जुग-जुग केर जिंदगी के पावी।

³⁴ मोंय तोहर से कहाथों, उ राइत दूई झन आदमी एक खटिया में होबैं, उमन में से एक झन के लेई लेवल जाई, आउर दूसरा के छोइड़ देवल जाई।

³⁵ दूई झन जनानामन एके संगे जाँता पीसते रहबैं, उमन में से एगो के लेई लेवल जाई, आउर दूसरा के छोइड़ देवल जाई।

³⁶ एइसनेहें दूई झन आदमीमन खेत में काम करते रहबैं, आउर उमन में से एक झन के लेई लेवल जाई आउर दूसरा के छोइड़ देवल जाई।”

³⁷ इ गोइठ सुइन के उमन यीशु से पूछलैं, “हे प्रभु, इ सोउब घटना कहाँ होवी?” यीशु उमन से कहलक, “जइसन कि गिद्धमन हुवाँय जमा होबैं जहाँ लाशमन होवी तइसनेहें सोउबमन इ जाइन जाबैं कि इ गोइठ कहाँ होवाथे।”