लूका 15 - सादरी नवाँ नियम

हेराल भेड़ी केर उदाहरन

¹ यीशु केर उपदेस सुनेक लगिन मालगुजारी लेवेक वाला सोउब आदमीमन आउर पापी आदमीमन आवत रहैं।

² इ देइख के फरीसी दल केर आदमीमन आउर मूसा केर नियम के सिखाएक वालामन कुड़कुड़ाय के कहेक लगलैं, “इ तो पापी आदमीमन केर स्वागत करेला आउर उमन केर संगे खायला-पियेला।”

³ तब यीशु उमन के इ उदाहरन बतालक,

⁴ “अगर तोहर में से केकरो ठिना सौ गो भेड़ीमन अहैं, आउर उमन में से एगो हेराय जाई, तो उ जरूर निनानबे के पहार किनारे अपन संगी चरवाहामन ठिना छोइड़ के, उ हेराल भेड़ी के सुनसान ठाँव में तब-तक खोजते रही जब तक कि उ नी मिल जाई।

⁵ आउर जब मिल जायला, तो उ खुशी से उके अपन खाँध में उठाय लेवेला।

⁶ आउर अपन घर आय के संगमन आउर पड़ोसीमन के जमा काइर के कहेला, ‘मोर संगे खुशी मनावा, काले कि मोर हेराल भेड़ी मोके मिल जाय हे।’

⁷ मोंय तोहरेमन से कहाथों कि एहे नियर केऊ एगो पापी आदमी केर पाप करेक छोड़ेक से उकर लगिन स्वरग में एतइ खुशी मनाल जायला जेतना उ निनानबे धरमी आदमीमन लगिन नी मनाल जायला, जेमन के पाप करेक से छोड़ेक केर जरुरत नखे।

हेराल सिक्का केर उदाहरन

⁸ या केऊ जनाना ठिना दस गो चाँदी केर सिक्का होवी, आउर उकर में से एगो हेराय जाई तो उ दीया बाइर के आउर घर के बढ़ाइर के तब-तक खोजते रही जब तक कि उ नी मिल जाई।

⁹ आउर जब उके उ हेराल सिक्का मिल जायला तो उ अपन संगमन आउर पड़ोसीमन के जमा काइर के कहेला, ‘मोर संगे खुशी मनावा, काले कि मोर हेराल सिक्का मोके मिल जाय हे।’

¹⁰ मोंय तोहरेमन से कहाथों कि एहे नियर पसताय के पाप करेक छोड़ेक वाला एगो पापी आदमी लगिन हों स्वरग में परमेश्‍वर केर दूतमन केर सामने खुशी मनाल जायला।”

बेड़ाल बेटा

¹¹ यीशु फिन एगो उदाहरन बतालक, “एगो आदमी केर दूई झन बेटा रहैं।

¹² छोटका बेटा अपन आबा से कहलक, ‘हे आबा, तोर सम्पति में से जे हिस्सा मोर होवी, मोके देई दे।’ से लगिन उ दुयो बेटा के अपन सम्पति बाँइट देलक।

¹³ थोरहें दिन केर पाछे छोटका बेटा अपन सोउब सम्पति के लेई के परदेस चाइल गेलक आउर हूवाँ माउज-मस्ती केर काम में अपन सोउब सम्पति के उड़ाय देलक।

¹⁴ आउर जइसनेहें उ सोउब कुछ सिराय देलक, तइसनेहें उ देस में भारी अकाल पड़लक, आउर उकर ठिना खाएक ले कोनों नी रहे।

¹⁵ से लगिन उ, हूवाँ केर एगो आदमी ठिना काम माँगेक गेलक, जे उके अपन खेतमन में सुवइर चराएक केर काम देलक।

¹⁶ उ एतना भूखल रहे कि जे चारा के सुवइरमन खात रहैं, उखे खाय के पेट भरेक लगिन तरसत रहे, मगर उके केऊ हों कोनों खाएक लगिन नी देवत रहैं।

¹⁷ जब उके होस आलक, तब उ सोचेक लगलक, ‘मोर आबा केर सोउब कमियामन के खोराकी से हों बगरा मजूरी मिलेला, आउर उमन बचाय लेवैना, मगर मोंय हिंयाँ भूखे मोराथों।

¹⁸ अब मोंय उइठ के अपन आबा ठिना जामूँ आउर उकर से कहमूँ कि आबा, मोंय परमेश्‍वर केर बिरोध में आउर तोर बिरोध में पाप काइर हों।

¹⁹ अब मोंय तोर बेटा कहाएक केर लाएक नखों, तोंय मोके अपन एगो धांगर नियर राइख ले। ’

²⁰ तब उ परदेस के छोइड़ के अपन आबा ठिना घूइर जाएक लगिन निकइल गेलक। घर पोंहचेक से आगे हें उकर आबा दूर हें से उके देखलक आउर उकर उपरे दया आलक। आउर उ कूइद के अपन बेटा ठिना गेलक आउर पोटाइर के ढेइर चूमलक।

²¹ बेटा अपन आबा से कहलक, ‘हे आबा, मोंय परमेश्‍वर केर बिरोध में आउर तोर बिरोध में पाप काइर हों, अब मोंय तोर बेटा कहाएक केर लायक नखों।’

²² मगर आबा अपन धांगरमन से कहलक, ‘झट सुन बेस से बेस लुगा लाइन के इके पिंधावा, आउर इकर हाँथ में अंगठी आउर गोड़ में जूता पिंधावा।

²³ आउर पोसल जानवर लाइन के काटा ताकि हमरे खाब आउर खुशी मनाब।

²⁴ काले कि मोर इ बेटा मोइर जाय रहे, फिन जी गेलक, हेराय जाय रहे, अब मिल गेलक।’ आउर उमन खुशी मनायक लगलैं।

²⁵ मगर इ सोउब होवेक बेरा उकर बाड़ बेटा खेत में काम करत रहे। जब उ घूइर के घर केर हेदना पोहोंचलक, तो गावेक बजाएक आउर नाचेक केर आवाज सुनलक।

²⁶ आउर उ एगो धांगर के बोलाय के पूछलक, ‘इ सोउब का होवाथे?’

²⁷ धांगर उकर से कहलक, ‘तोर भाई घर घूइर आय हे, आउर तोर आबा उके दोबारा भला-चंगा पाय हे, से लगिन तोर आबा बड़का भोज राइख हे।’

²⁸ इ सुइन के उ जोर से खिसालक आउर घर भीतरे जाएक नी खोजलक। तब उकर आबा बाहरे आय के उके मनायक लगलक।

²⁹ मगर उ अपन आबा के जबाब देलक, ‘देख, मोंय एतइ साल से एगो धांगर नियर तोर सेवा कराथों, आउर तोर आगया सोउब दिन मानलों सेकरो में तोंय मोके अपन संगमन केर संगे खुशी मनाएक लगिन एगो छगरी केर पठरू तक नी देले।

³⁰ मगर जब तोर इ बेटा घूइर आलक, जे तोर सम्पति के बेश्या मनक पिछे उड़ाय देलक, सेकर लगिन तोंय बड़का भोज राइख हिस।’

³¹ आबा अपन बेटा से कहलक, ‘हे मोर बेटा, तोंय सोउब बेरा मोर संगे अहिस आउर जे कोनों मोर हेके, उ सोउब तोर हें हेके।

³² मगर एखन खुशी मनाएक आउर रिझेक चाही काले कि इ तोर भाई मोरल जइसन रहे फिन जी गेलक, हेराय जाय रहे, अब मिल गेलक।’ ”