लूका 10 - सादरी नवाँ नियम

बहत्तर चेला मनक भेजल जाएक

¹ इ गोइठमन केर पाछे प्रभु यीशु बहत्तर झन आउर चेलामन के चुइन के, जे-जे नगर आउर गाँव में उ जाएक वाला रहे, हूवाँ उमन के दूई-दूई काइर के अपन से आगे भेजलक।

² आउर यीशु अपन चेलामन से कहलक, “जइसन खेतमन में अन्न पाइक जाय हे, मगर कटइयामन थोर अहैं। तइसनेहें ढेइर आदमीमन परमेश्‍वर केर संदेश के सुइन के बिसवास करेक ले तेयार अहैं। मगर उमन के परमेश्‍वर केर राइज केर बारे में बताएक लगिन आदमीमन थोर अहैं। से लगिन परमेश्‍वर से प्रार्थना करा कि उ अपन संदेश के बताएक वालामन के भेजोक।

³ जावा, मोंय तोहरेमन के भेड़ीमन नियर उमन केर माझे भेजाथों, जेमन हड़हामन नियर खतरनाक अहैं।

⁴ तोहरेमन डहर लगिन ना पैसा, ना झोला, ना जूता लेगबा, आउर ना डहर में केखो जोहार करबा।

⁵ जे कोनों घर में जबा, सोउब से पहिले कहबा कि ‘इ घर में परमेश्‍वर केर शांति होवोक।’

⁶ अगर हूवाँ केऊ आदमी तोहर स्वागत करी, तो तोहर देवल शांति, उकर उपरे बनल रही, मगर हूवाँ केऊ हों लायक नी होवी, तो तोहर देवल शांति, तोहर ठिना घूइर आवी।

⁷ आउर ओहे घर में रहबा, घर-घर ना बुलबा। जे कुछ उमन तोहरेमन के खाएक लगिन देबैं, उखे खाबा-पीबा, काले कि कमिया के अपन मजूरी मिलेक चाही।

⁸ अगर तोहरेमन कोनों नगर में जबा, आउर हूवाँ केर आदमीमन तोहर स्वागत करबैं, तो जे कोनों खाएक लगिन देबैं, उखे खाबा।

⁹ हूवाँ केर बेमरियामन के ठीक करबा आउर उमन से कहबा, ‘परमेश्‍वर केर राइज तोहरेमन केर भीरे आय पोंहइच हे।’

¹⁰ मगर जे कोनों नगर में तोहरेमन जबा, आउर हूवाँ केर आदमीमन तोहर स्वागत नी करबैं, तो उ मनक गली-कोचा में जाय के कहबा,

¹¹ ‘तोहरेमन केर नगर केर धूर हों, जे हमर तरवा में लाइग हे, हमरे तोहरेमन केर सामने उके झाइर देवाथी। फिन भी तोहरेमन इ जाइन लेवा कि परमेश्‍वर केर राइज तोहरेमन केर भीरे आय पोंहइच हे।’

¹² मोंय तोहरेमन से कहाथों कि न्याय केर दिन उ नगर केर आदमी मनक सजा, सदोम नगर केर आदमी मनक सजा से हों बगरा होवी।

पाप करेक नी छोड़ेक वालामन केर उपरे हाय

¹³ हाय, खुराजीन नगर केर आदमीमन, हाय बैतसैदा गाँव केर आदमीमन, जे चमत्कार केर काम तोहर माझे करल गेलक, अगर उ काममन के सूर आउर सैदा नगर केर आदमीमन केर माझे करल जातक, तो हूवाँ केर आदमीमन टाट लुगा ओइढ़ के अपन काया में राख के मखाय लेतैं, इ देखाएक लगिन कि उमन पाप करेक छोइड़ देलैं।

¹⁴ न्याय केर दिन परमेश्‍वर सूर आउर सैदा नगर केर आदमीमन के तो सजा देवी, मगर तोहरेमन केर सजा उ मनक सजा से हों कहीं बगरा होवी।

¹⁵ हे कफरनहूम नगर केर आदमीमन, तोहरेमन सोचाला कि हमरे स्वरग राइज तक उठाल जाब? एइसन नी होवी, तोहरेमन तो मरणलोक में फेइक देवल जबा।

¹⁶ जे तोहरे केर संदेश के सुनेला, उ मोर के सुनेला, आउर जे तोहरेमन के ठुकरायला, उ मोके ठुकरायला, आउर जे मोके ठुकरायला, उ परमेश्‍वर के ठुकरायला, जे मोके भेइज हे।”

बहत्तर चेलामन केर घूइर आवेक

¹⁷ उ बहत्तर झन चेलामन रिझे-रिझे घूइर आलैं आउर यीशु के बताएक लगलैं, “हे प्रभु, भूतमन हों हमर गोइठ के मानलैं, जब हमरे तोर नाँव से उमन के आगया देली।”

¹⁸ यीशु उमन से कहलक, “जब भूतमन तोहर आगया मानलैं, तो मोंय शैतान के अचका बिजली नियर स्वरग से हेंठे गिरते देखलों।

¹⁹ देखा, मोंय तोहरेमन के साँपमन आउर बिच्छूमन के रौंदेक केर, आउर शैतान जे तोहर दुश्मन हेके, उकर सोउब शक्ति केर उपरे अधिकार देई हों, आउर कोनोवें चीज से तोहर कोनों नोकसान नी होवी।

²⁰ फिन भी तोहरेमन ना रिझबा कि भूतमन तोहर अधिकार में अहैं, मगर इ गोइठ लगिन रिझे होवा कि तोहर नाँव स्वरग में लिखल जाय हे।”

बेटा बटले आबा के दिस्तार करेक

²¹ ओहे बेरा यीशु पवितर आत्मा में होई के खुशी से भाइर गेलक, आउर कहलक, “हे परमेश्‍वर आबा, आकाश आउर धरती केर प्रभु, मोंय तोर धन्यबाद करोना कि इ गोइठमन के गेयानीमन, आउर समझदार आदमीमन से लुकाय के रखले। आउर उ आदमी मनक उपरे दिस्तार काइर हिस, जेमन छउवामन नियर बचन के सुइन के उकर में बिसवास करैना। हाँ, हे परमेश्‍वर आबा, काले कि तोके एहे बेस लगलक।

²² मोर परमेश्‍वर आबा मोके सोउब कुछ केर अधिकार देई हे, बेटा के हेके, केऊ नी जानैना, सिरिफ परमेश्‍वर आबा जानेला, आउर परमेश्‍वर आबा के हेके, इखो केऊ नी जानैना, सिरिफ बेटा हें जानेला, आउर बेटा जे आदमी के चाहेला, उकर उपरे उके दिस्तार करेला।”

²³ आउर यीशु चेलामन बटे उलइट के एकले में उमन से कहलक, “धाइन अहे तोहर आँइख जे तोहर देखल गोइठमन के देखेला।

²⁴ काले कि मोंय तोहर से कहाथों, जे गोइठमन के तोहरेमन देखाथा आउर सुनाथा, उ गोइठमन के परमेश्‍वर केर संदेश के बताएक वाला ढेइर आदमीमन, आउर राजामन देखेक आउर सुनेक चाहलैं, मगर उमन देखेक आउर सुनेक नी पारलैं।”

एगो बेस सामरी आदमी केर उदाहरन

²⁵ एक दिन यीशु आदमीमन के उपदेस देवत रहे, ओहे बेरा एगो मूसा केर नियम के सिखाएक वाला उठलक, आउर यीशु के परखेक लगिन उकर से पूछलक “हे गुरु, जुग-जुग केर जिंदगी केर हकदार होवेक लगिन मोंय का करमूँ?”

²⁶ यीशु उकर से कहलक, “मूसा केर नियम में का लिखल अहे? तोंय उकर से का बुझिसला?”

²⁷ उ जबाब देलक, “तोंय अपन प्रभु परमेश्‍वर से अपन पूरा मन, अपन पूरा प्राण, अपन पूरा शक्ति, आउर अपन पूरा बुद्धि से प्रेम करबे, आउर अपन पड़ोसी से अपन नियर प्रेम करबे।”

²⁸ यीशु उकर से कहलक, “तोंय ठीक जबाब देले, एहे करबे तो तोंय जुग-जुग लगिन जिंदा रहबे।”

²⁹ मगर उ खुद के धरमी ठहराएक केर इच्छा से यीशु से पूछलक, “तो मोर पड़ोसी के हेके?”

³⁰ यीशु उके जबाब देवेक लगिन एगो कहानी सुनालक, “एगो आदमी यरुशलेम शहर से यरीहो शहर जात रहे कि डाकूमन उके छेइक के, उकर लुगा आउर सोउब चीजमन के जे उकर ठिना रहे लुइट लेलैं, आउर मार-पीट काइर के अधमोरा छोइड़ के चाइल गेलैं।

³¹ फिन एइसन होलक कि ओहे डहर से एगो यहूदी पुरोहित जात रहे, उ उके देखलक, मगर बेगर मदइत करले चाइल गेलक।

³² एहे लेखे एगो लेवी केर खानदान जे मंदिर में काम करत रहे, ओहे डहर से आलक, ओहो उके देइख के बेगर मदइत करले चाइल गेलक।

³³ मगर सामरी परदेस केर एगो सामरी आदमी ओहे डहर से आलक, आउर उके देइख के उकर उपरे दया करलक।

³⁴ उ उकर ठिना आय के उकर घावमन में जैतून तेल आउर अंगूर केर रस लगालक। फिन उकर घावमन में पट्टी बाँधलक, आउर उके अपन गधा में चढ़ाय के धरमशाला में लेई गेलक। आउर हूवाँ उकर सेवा-सुसइर करलक।

³⁵ दूसरा दिन उ दूई गो चाँदी केर सिक्का निकलाय के धरमशाला केर मालिक के देलक आउर उकर से कहलक, ‘तोंय इकर सेवा-सुसइर करबे, अगर थोरेक खरचा आउर लगी, तो उके मोंय घूइर के तोके देई देमूँ।’

³⁶ अब तोर बिचार में जेकर उपरे डाकूमन हमला काइर रहैं, उकर पड़ोसी उ तीनों झन में से के होलक?”

³⁷ उ कहलक, “ओहे आदमी जे उकर उपरे दया करलक।” यीशु उकर से कहलक, “जा, तोंय हों एइसनेहें करबे।”

मारथा आउर मरियम केर घर में यीशु

³⁸ फिन जब यीशु आउर उकर चेलामन जात रहैं, तो यीशु एगो गाँव में गेलक, आउर हूवाँ मारथा नाँव केर एगो जनाना उके अपन घर में बोलाय के उकर स्वागत करलक।

³⁹ उकर एगो बहिन रहे, जेकर नाँव मरियम रहे, उ प्रभु केर गोड़ तरे बाइठ के उकर बचन सुनत रहे।

⁴⁰ मगर मारथा सेवा-सुसइर केर काम करेक में फँसल रहे, उ यीशु ठिना आय के कहेक लगलक, “हे प्रभु, का तोके कोनोवें फिकिर नखे? मोर बहिन मोके सोउब काम करेक लगिन एकले हें छोइड़ देई हे। तोंय उके मोर मदइत करेक लगिन कह।”

⁴¹ प्रभु यीशु उके जबाब देलक, “मारथा, हे मारथा, तोंय ढेइर गोइठमन केर बारे में चिंता करिसला, आउर घबराइसला।

⁴² मगर एके गो गोइठ अहे, जे चिंता करेक केर लायक अहे, आउर मरियम इके खोइज लेई हे, आउर इके उकर से केऊ लुटेक नी पारबैं।”