लूका 1 - सादरी नवाँ नियम

लूका केर मकसद

¹ ढेइर आदमीमन उ गोइठमन के जे हमरे माझे बीत रहे, धेयान से लिखेक केर कोशिश करलैं।

² उमन ठीक ओहे लिखलैं, जेके उ आदमीमन बटले हमरे के बताल जाय रहे, जेमन यीशु केर सेवकाई के शुरुवात से देइख रहैं आउर पाछे बचन केर सेवक बाइन गेलैं।

³ से लगिन हे श्रीमान थियुफिलुस, मोंय इ गोइठमन केर बारे में ठीक-ठीक जाँच पड़ताल करलों, आउर मोके बेस लगलक। से लगिन इ गोइठमन के तोर लगिन शुरु से आखरी तक जइसन होई रहे तइसनेहें लिखाथों।

⁴ ताकि तोके हर उ गोइठमन केर पूरा सच्चाई पता होवोक, जे आदमीमन बटले तोके सिखाल जाय हे।

जकरयाह आउर एलिशिबा

⁵ यहूदिया परदेस केर राजा हेरोदेस केर परिया में जकरयाह नाँव केर एगो यहूदी पुरोहित रहे। जे अबिय्याह नाँव से बनाल पुरोहित मनक दल केर सदस्य रहे, उ आउर उकर जनाना दुयो हारून पुरोहित केर बंश केर रहैं, उकर जनाना केर नाँव इलिशिबा रहे।

⁶ उमन दुयो परमेश्‍वर केर नजइर में धरमी रहैं, आउर प्रभु केर सोउब आगयामन आउर नियममन के माइन के उके खुश काइर रहैं।

⁷ मगर उमन केर एको गो संतान नी रहैं, काले कि इलिशिबा बाँझ रहे, आउर उमन दुयो बूढ़ा होई जाय रहैं।

स्वरगदूत बटे से यूहन्ना केर जनम केर भविष्यवाणी

⁸ एक बेर जकरयाह यरुशलेम शहर केर यहूदीमन केर मंदिर में परमेश्‍वर केर सामने पुरोहित केर काम करत रहे, काले कि उ हफ्ता पुरोहित केर काम केर पारी उकर दल केर रहे।

⁹ से लगिन जब उमन पुरोहितमन केर रिवाज केर मोताबिक चिट्ठी साजलैं, तो प्रभु केर मंदिर में धूप जलाएक लगिन उकर नाँव निकललक।

¹⁰ आउर धूप जलाएक केर बेरा आदमीमन केर सोउब मंडली बाहरे मंदिर केर अंगना में प्रार्थना करत रहैं।

¹¹ ओहे बेरा प्रभु केर एगो स्वरगदूत धूप बेदी केर भतखाइया बटे ठड़ाल जकरयाह के दिसलक।

¹² आउर जकरयाह उके देइख के घबरालक आउर मूरखे डरालक।

¹³ मगर स्वरगदूत उकर से कहलक, “हे जकरयाह, ना डराबे, काले कि परमेश्‍वर तोर प्रार्थना सुइन लेई हे आउर तोर जनाना इलिशिबा तोर लगिन एगो बेटा के जनम देवी, आउर तोंय उकर नाँव यूहन्ना रखबे।

¹⁴ आउर तोके आनंद आउर खुशी होवी आउर उकर जनमेक से ढेइर आदमीमन खुशी मनाबैं।

¹⁵ काले कि उ प्रभु केर नजइर में महान होवी आउर कोनों रकम केर नशापान नी करी। आउर अपन आयो केर पेट से हें पवितर आत्मा से भाइर जाई।

¹⁶ आउर इसराइली आदमीमन में से ढेइर आदमीमन के प्रभु परमेश्‍वर बटे घुराय लानी।

¹⁷ यूहन्ना एगो एइसन आदमी होवी, जे परमेश्‍वर केर संदेश के बताएक वाला एलिय्याह नियर आत्मा आउर शक्ति में होई के प्रभु केर आगे-आगे चली। उ प्रभु केर डहर तेयार करी आउर आबामन केर मन के छउवा-पुतामन बटे घुराई देई। उ आगया नी मानेक वालामन के परमेश्‍वर केर गेयान के मानेक सिखाई आउर परमेश्‍वर लगिन एगो बेस परजा तेयार करी।”

¹⁸ जकरयाह स्वरगदूत से पूछलक, “इ मोंय कइसन पतियामूँ? काले कि मोंय तो बूढ़ा अहों, आउर मोर जनाना हों बुढ़िया होई जाय हे।”

¹⁹ स्वरगदूत उके जबाब देलक, “मोंय जिब्राईल स्वरगदूत हेकों, जे परमेश्‍वर केर भीरे ठड़ाय रहोना। आउर परमेश्‍वर मोके तोर से गोठियाएक आउर तोके इ शुभ समाचार सुनाएक लगिन भेइज हे।

²⁰ देख, तोंय मोर इ गोइठ उपरे बिसवास नी करले, से लगिन जे दिन तक इ गोइठ पूरा नी होवी, उ दिन तक तोंय चुप रहबे आउर गोठियाएक नी पारबे।”

²¹ आउर जेमन मंदिर केर अंगना में जकरयाह केर आसरा देखत रहैं, उमन आउर ताजुब होई के कहेक लगलैं, “उ मंदिर में एतना देरी काले कराथे?”

²² जब उ बाहरे आलक, तो उ आदमीमन से गोठियाएक नी पारलक, से लगिन उमन जाइन गेलैं कि उ मंदिर में कोनों दर्शन पाय हे, आउर उ आदमीमन से इशारा करते रहलक, मुँह से कोनों कहेक नी पारलक।

²³ जब मंदिर में उकर सेवा करेक केर दिन पूरा होलक, तो उ यरुशलेम शहर से अपन घर चाइल गेलक।

²⁴ थोरेक दिन केर पाछे उकर जनाना इलिशिबा गर्भवती होलक, आउर पाँच महिना तक खुद के दोसर मनक नजइर से इ कइह के लुकाय रखलक,

²⁵ “परमेश्‍वर आदमीमन केर माझे मोर बाँझ केर लज्जा के दूर करेक लगिन इ उमर में मोर उपरे दया काइर हे।”

प्रभु यीशु केर जनम केर संदेश

²⁶ जब एलिशिबा छाव महिना केर गर्भवती रहे, तब परमेश्‍वर बटे से जिब्राईल स्वरगदूत गलील परदेस केर नासरत नगर में एगो कुँवारी ठिना भेजल गेलक।

²⁷ जेकर मंगनी राजा दाऊद केर बंश यूसुफ नाँव केर एगो आदमी से होई रहे। उ कुँवारी केर नाँव मरियम रहे।

²⁸ स्वरगदूत उकर ठिना भीतरे आय के कहलक, “मरियम तोके मोर जोहार, तोर उपरे परमेश्‍वर केर ढेइर दया होई हे, उ तोर संगे अहे।”

²⁹ मरियम उकर कहल गोइठ के सुइन के ढेइर घबराय गेलक आउर सोचेक लगलक कि इ लेखे केर जोहार केर का मतलब हेके?

³⁰ स्वरगदूत उकर से कहलक, “हे मरियम, ना डराव, काले कि परमेश्‍वर तोर उपरे दया काइर हे।

³¹ देख, तोंय गर्भवती होबे, आउर एगो बेटा के जनम देबे, तोंय उकर नाँव यीशु रखबे।

³² उ महान होवी आउर परमप्रधान केर बेटा कहाई, आउर प्रभु परमेश्‍वर उकर पुरखा राजा दाऊद केर सिंहासन उके देवी।

³³ आउर उ याकूब केर बंश उपरे जुग-जुग राइज करी आउर उकर राइज केर अंत नी होवी।”

³⁴ मरियम स्वरगदूत से कहलक, “इ का लेखे होवी? मोर तो एखन बिहाय नी होई हे।”

³⁵ स्वरगदूत उके जबाब देलक, “पवितर आत्मा तोर उपरे उतरी, आउर परमप्रधान केर शक्ति तोर उपरे छाँई करी। से लगिन तोर से जे बेटा जनमी, उ पवितर होवी आउर परमेश्‍वर केर बेटा कहाई।

³⁶ देख, तोर रिश्तेदार इलिशिबा केर हों बुढ़िया समय में बेटा होवेक वाला अहे, उ जे बाँझ कहात रहे अब छठवाँ महिना होवाथे।

³⁷ परमेश्‍वर सोउब कुछ करेक पारेला।”

³⁸ मरियम कहलक, “देख, मोंय प्रभु केर दासी हेकों, जइसन तोंय कहले तइसनेहें मोर संगे होवोक।” तब स्वरगदूत उकर ठिना से चाइल गेलक।

मरियम आउर एलिशिबा

³⁹ थोरेक दिन केर पाछे मरियम उइठ के जल्दी हें यहूदिया परदेस केर एगो पहार केर गाँव में गेलक।

⁴⁰ उ जकरयाह केर घर में जाय के इलिशिबा के जोहार करलक।

⁴¹ जइसनेहें इलिशिबा मरियम केर जोहार के सुनलक, तइसनेहें छउवा उकर पेट में उछललक, आउर इलिशिबा पवितर आत्मा से भाइर गेलक।

⁴² आउर इलिशिबा जोर से कहलक, “तोंय सोउब जनानामन में से धाइन अहिस, आउर तोर से जनम लेवेक वाला छउवा धाइन होवी।

⁴³ मोंय तोके हिंयाँ देइख के ढेइर खुश अहों, काले कि मोर प्रभु केर आयो मोर से मिलेक लगिन आय हे।

⁴⁴ जइसनेहें मोंय तोर जोहार कहेक केर शबद के सुनलों तइसनेहें छउवा मोर पेट में खुशी से उछललक।

⁴⁵ धाइन हेकिस तोंय, काले कि तोंय इ बिसवास काइर हिस कि प्रभु तोर से जे कुछ कइह हे, उ उके पूरा करी।”

मरियम बटले परमेश्‍वर केर बड़ाई

⁴⁶ तब मरियम कहलक, “मोंय दिल से प्रभु केर बड़ाई करोना

⁴⁷ आउर मोर आत्मा मोर छुटकारा देवाइया परमेश्‍वर से खुश अहे।

⁴⁸ काले कि उ, मोंय उकर नरम दासी उपरे दया काइर हे, से लगिन देखा, अब से सोउब जुग केर आदमीमन मोके धाइन कहबैं।

⁴⁹ काले कि शक्तिमान परमेश्‍वर जेकर नाँव पवितर अहे, मोर लगिन बड़का-बड़का काम काइर हे।

⁵⁰ आउर जे आदमीमन उकर से डरायना, उमन केर उपरे उकर दया पीढ़ी से पीढ़ी तक बनल रहेला।

⁵¹ उ अपन शक्तिशाली हाँथ से बड़का-बड़का काम काइर हे, आउर जेमन खुद के बड़का बुझैना उमन के तितिर-बितिर काइर देई हे।

⁵² उ राजामन केर राइज करेक केर अधिकार के लेई लेलक, आउर नरम आदमीमन के उपरे उठालक।

⁵³ उ भूखाल आदमीमन के बेस-बेस चीजमन के खियाय के अघुवाय देलक, आउर धनी आदमीमन के छुछे हाँथ निकलाय देलक।

⁵⁴ उ हमर पुरखामन से करल करार के याइद करलक, आउर अपन सेवक इसराइल केर मदइत करेक लगिन आय हे।

⁵⁵ जइसन उ हमर बाप-दादामन से करार काइर रहे कि अब्राहम आउर उकर बंश केर उपरे उकर दया सोउब बेरा बनल रही।”

⁵⁶ मरियम लगभग तीन महिना इलिशिबा संगे रइह के अपन घर घूइर गेलक।

यूहन्ना बपतिस्मा जल संस्कार देवेक वाला केर जनम

⁵⁷ जब इलिशिबा केर जनम देवेक केर समय पूरा होलक, आउर उ बेटा जनमालक।

⁵⁸ तब उकर पड़ोसीमन आउर रिश्तेदारमन इ सुइन के कि प्रभु उकर उपरे बड़का दया काइर हे, उकर संगे खुशी होलैं।

⁵⁹ आउर एइसन होलक कि आठवाँ दिन उमन बेटा केर खतना करेक आलैं आउर उकर नाँव उकर आबा केर नाँव में जकरयाह रखेक लगलैं।

⁶⁰ मगर उकर आयो इलिशिबा जबाब देलक, “निहीं, उकर नाँव यूहन्ना रखल जाओक।”

⁶¹ उमन उकर से कहलैं, “तोर रिश्तेदारमन में तो केकरो इ नाँव नखे!”

⁶² तब उमन उकर आबा से इशारा काइर के पूछलैं, “तोंय छउवा केर का नाँव रखेक चाहिसला?”

⁶³ उ लिखेक केर पट्टी माँइग के लीख देलक, “उकर नाँव यूहन्ना हेके।” आउर सोउब आदमीमन ताजुब करलैं।

⁶⁴ तब जकरयाह केर मुँह आउर जीभ तुरते खुइल गेलक आउर उ बोलेक आउर परमेश्‍वर केर गुणगान करेक लगलक।

⁶⁵ आउर उकर आसे-पासे केर सोउब रहेक वाला आदमीमन डराय गेलैं आउर इ सोउब गोइठमन केर चरचा यहूदिया परदेस केर पहार केर ढेइर गाँवमन में फाइल गेलक।

⁶⁶ आउर सुनेक वाला सोउब आदमीमन ताजुब काइर के कहलैं, “इ छउवा बाइढ़ के कइसन होवी काले कि प्रभु केर हाँथ उकर संगे अहे?”

⁶⁷ आउर उकर आबा जकरयाह पवितर आत्मा से भाइर गेलक आउर भविष्यवाणी करेक लगलक:

⁶⁸ इसराइली आदमीमन केर परमेश्‍वर प्रभु केर महिमा होवोक, काले कि उ अपन आदमीमन केर माझे आलक आउर उमन के छोड़ालक।

⁶⁹ आउर अपन सेवक राजा दाऊद केर घराना में हमर छुटकारा लगिन एगो बलवान के भेइज हे,

⁷⁰ जइसन कि उ अपन पवितर परमेश्‍वर केर संदेश के बताएक वालामन बटले ढेइर आगे हें करार काइर रहे,

⁷¹ उ हमरे के हमर बैरीमन से आउर उ मनक सोउब शक्ति से छुटकारा देवी, जेमन हमरे से घिनायना,

⁷² आउर हमर बाप-दादामन केर उपरे दया काइर के अपन पवितर करार के याइद करी।

⁷³ आउर उ हमर पुरखा अब्राहम से इ किरिया खाय रहे,

⁷⁴ कि उ हमरे के हमर बैरीमन से बचाई।

⁷⁵ ताकि हमरे उकर सामने पवितर, धरमी आउर निडर होई के जिंदगी भइर उकर सेवा करते रहब।

⁷⁶ आउर हे मोर छउवा, तोंय परमप्रधान परमेश्‍वर केर संदेश के बताएक वाला कहाबे, “काले कि तोंय प्रभु केर डहर तेयार करेक लगिन उकर आगे-आगे चलबे।

⁷⁷ आउर प्रभु केर आदमीमन के छुटकारा केर बारे में बताबे, जेकर से उमन के अपन पापमन से क्षमा मिलेला।

⁷⁸ इ हमर परमेश्‍वर केर बड़का दया से होवी, जइसन बेइर इंजोत देवेक लगिन चमकेला, तइसनेहें मसीह हों हमर लगिन स्वरग से आवी,

⁷⁹ ताकि उ पाप में जिंदगी बिताएक वाला आउर जुग-जुग केर मौत केर खतरा में पड़ल आदमीमन के डहर देखाओक आउर हमर कदम के शांति केर डहर में आगे लेगोक।”

⁸⁰ आउर बालक यूहन्ना बढ़ेक लगलक आउर आत्मा में मजबूत होते गेलक, आउर उ इसराइली आदमीमन केर माझे उपदेस देवेक केर दिन तक सुनसान ठाँव में रहलक।