यहूदा 1 - सादरी नवाँ नियम

जोहार

¹ इ चिट्ठी मोंय यहूदा केर बटले हेके। मोंय यीशु मसीह केर एगो सेवक आउर याकूब केर छोट भाई हेकों। मोंय इ चिट्ठी तोहरेमन के लिखाथों जेके परमेश्‍वर अपन उपरे बिसवास करेक लगिन बोलाय हे। आबा परमेश्‍वर तोहरेमन से प्रेम करेला आउर तोहरे के यीशु मसीह में सही-सलामत राइख हे।

² मोंय प्रार्थना करोना कि दया आउर शांति आउर प्रेम तोहरेमन के भरपूर से मिलते रहोक।

झूठा गेयान पढ़ाएक वाला आदमीमन

³ हे दुलार बिसवासी भाई-बहिनमन, हमरे जे छुटकारा में भागीदार अही, उकर बारे में मोंय ढेइर हें लालायित होई के लिखेक चाहत रहों, मगर अब मोके इ जरुरी लगाथे कि इ चिट्ठी केर जरिया से तोहरे के समझामूँ कि तोहरे उ बिसवास केर हिफाजत लगिन कोशिश करा, जेके परमेश्‍वर पवितर आदमीमन के सोउब दिन लगिन देई हे।

⁴ काले कि थोरेक आदमीमन जे यीशु मसीह में बिसवास करेक केर देखावा करैना उमन तोहर माझे आय मिल हैं, उमन परमेश्‍वर के नी मानैना आउर गलत शिक्षा देवैना कि परमेश्‍वर अपन किरपा से हमरे केर पापमन के क्षमा काइर देवेला, एहे लगिन हमरे गलत काम में जिंदगी जियेक पारिला। उमन यीशु मसीह के इनकार करैना जे हमर एके गो मालिक आउर प्रभु हेके। ढेइर समय पहिले पवितर किताब में लिखल जाय रहे कि परमेश्‍वर एइसन आदमीमन के सजा देवी।

⁵ मोंय तोहरे के याइद दिवाएक चाहोना हालाँकि इ गोइठ तोहरे के पहिले से हें पता अहे, परमेश्‍वर इसराइली आदमीमन के गुलामी से आजाद करालक आउर उमन के मिसर देस से बाहरे लेई आलक, मगर पाछे उ उमन के माइर मोरालक, काले कि उमन उकर उपरे बिसवास नी काइर रहैं।

⁶ मोंय तोहरे के एहो याइद कराएक चाहोना कि परमेश्‍वर उ स्वरग दूतमन के कइसन दंड देलक जेमन अपन जिम्मेदारीमन के नी निभालैं आउर अपन पद के छोइड़ देलैं। परमेश्‍वर इ स्वरग दूतमन के अंधार ठाँव में सिकड़ से बाइंध के राइख हे, ताकि फैसला केर दिन उ मनक फैसला होवेक पारोक।

⁷ तइसनेहें सदोम आउर अमोरा नगर आउर आसे-पासे केर शहर केर आदमीमन उ स्वरग दूतमन केर नियर हें ब्यभिचारी होई जाय रहैं आउर पराया काया केर पिछे लाइग जाय रहैं। परमेश्‍वर उ शहर केर आदमीमन के आइग से नाश काइर देई रहे। उमन केर संगे जे हों होलक उ झूठा पढ़ाएक वालामन लगिन एगो चेतावनी हेके कि उमन के हों जुग-जुग बारेक वाला आइग केर दंड मिली।

⁸ ओहे लेखे बिसवास केर देखावा करेक वाला अधरमी आदमीमन इ दावा करैना कि परमेश्‍वर उमन के दर्शन में देखाय हे कि उमन अपन काया के गंदा काम काइर के अशुद्ध करेक पारैना। उमन परमेश्‍वर केर अधिकार के तुच्छ जानैना आउर स्वरग दूतमन केर बारे में बुरा भला कहैना।

⁹ मगर हिंयाँ तक कि मुध स्वरगदूत मीकाईल हों एइसन नी करलक जइसन बिसवास केर देखावा करेक वालामन करैना। जेखन शैतान मीकाईल से इ गोइठ से विवाद करलक कि उमन में से केके मूसा केर लाश के दफनाएक केर अधिकार अहे, तो मीकाईल शैतान के बुरा-भला कइह के उकर उपरे दोष नी लगालक। उ सिरिफ एतना कहलक, “प्रभु तोके डाँटोक।”

¹⁰ मगर इ आदमीमन जे गोइठमन के नी जानैना, उमन के बुरा भला कहैना, मगर जे गोइठमन के अनबुझ जानवरमन नियर स्वभाव से हें बुझैना, आउर इ पापी काममन के करेक केर चलते उमन खुद के नाश करैना।

¹¹ उमन केर उपरे हाय! उमन आदम केर बेटा कैन नियर चाल चलैना, जे अपन भाई के माइर मोराय रहे। रुपया केर लोभ केर खातिर उमन खुद उइसनेहें काम करैना जइसन बिलाम काइर रहे। उमन कोरह बंश केर आदमीमन नियर नाश होई जबैं, जेमन बिरोध काइर रहैं।

¹² जब इमन प्रभु केर प्रेम के याइद करते तोहर संगे तोहरे केर संगति में भोजन करैना, तो इमन उ खतरनाक चट्टाइनमन नियर होवैना जे समुदर केर हेंठे लुकल रहेला, जे तोहर डुबेक केर कारण बाइन सकेला। उमन उ चरवाहामन नियर अहैं जे सिरिफ अपनेहें केर चिंता करैना। उमन उ बदरीमन नियर अहैं, जे भूंई में बरसल बिना सिरिफ गरजेला। उमन ठंढा मौसम केर गाँछमन नियर होवैना जेमन केर दूई बेर माउत होवेला काले कि उमन कोनों फार नी देवैना आउर जाइर से उखइर जायना।

¹³ जइसन समुदर केर खतरनाक लहरामन गंदा झाग बनायना, तइसनेहें इमन लज्जा वाला काम करैना। उमन थोरेक तइरगनमन नियर अहैं जे एक सोझ डहर में नी चलैना, उमन सही डहर नी देखायना। प्रभु उमन लगिन एगो ठाँव रखाथे जे पूरा रीति से अंधार अहे, जहाँ उमन के सोउब दिन लगिन रहेक पड़ी।

¹⁴ हनोक हों जे आदम से सातवाँ पीढ़ी में जनइम रहे, इमन केर बारे में इ भविष्यवाणी काइर रहे, “देखा, प्रभु अपन लाखो पवितर स्वरगदूतमन केर संगे

¹⁵ सोउब आदमीमन केर फैसला करेक लगिन आवाथे। ताकि आदमीमन जे बुरा काम काइर हैं आउर जेमन परमेश्‍वर केर बिरोध बुरा गोइठ कइह हैं, इ सोउब पापीमन के दंड देओक।”

¹⁶ आदमीमन हमेशा परमेश्‍वर केर बिरोध बोलैना आउर दोसर आदमीमन में गलती खोजैना। उमन लगातार उ बुरा काममन के करैना जे उमन केर मन करेक चाहेला। उमन अपन बारे में घमंड करैना आउर अपन लाभ लगिन दोसर आदमीमन केर मुँह देखी बड़ाई करैना।

चेतावनी आउर उपदेस

¹⁷ मगर हे दुलार बिसवासी भाई-बहिनमन, तोहरेमन उ गोइठमन के याइद रखा, जे हमर प्रभु यीशु मसीह केर चुनल खास चेलामन पहिलेहें कइह चुइक हैं।

¹⁸ उमन तोहरेमन से कहत रहैं, “आखरी समय में एइसन मजाक करेक वालामन आबैं, जे अपन अधरम केर वासनामन केर इच्छामन केर मोताबिक चाल चलबैं।”

¹⁹ इ आदमीमन, उमन हेकैं, जेमन तोहर माझे फूट काइर देवैना। इमन अपन बुरा इच्छा केर मोताबिक चलैना आउर इमन में पवितर आत्मा नखे।

²⁰ मगर हे दुलार बिसवासी भाई-बहिनमन, तोहरेमन बगरा पवितर बिसवास में बढ़ोतरी लगिन एक दोसर केर मदइत करते रहा, आउर पवितर आत्मा केर अगुवाई में प्रार्थना करते रहा।

²¹ परमेश्‍वर केर प्रेम में मजबूत बनल रहा, आउर जुग-जुग केर जिंदगी लगिन हमर प्रभु यीशु मसीह केर दया केर आसरा देखते रहा।

²² उमन केर परती दयालु बना, जे नी जानैना कि केकर उपरे बिसवास करब।

²³ आउर दोसरमन के जुग-जुग लगिन आइग में पोड़ेक केर सजा से खींच के निकलावा। ढेइर आदमीमन एइसन अहैं जेमन केर उपरे जरूर दया करा, मगर ढेइर सावधानी केर साथ एइसन करा। हिंयाँ तक कि उमन केर लुगा से हों घिरना करा, जेकर में उमन अपन पाप काममन केर दाग लगाय देई हैं।

आशीष बचन

²⁴ सिरिफ परमेश्‍वर हें तोहरे के ठोकर खाएक से बचाएक पारेला आउर अपन महिमा केर भरपूरी केर सामने खुश आउर निरदोष काइर के ठडु़वाएक पारेला।

²⁵ ओहे हमरे के यीशु मसीह जे कुछ हमरे लगिन काइर हे, उकर जरिया से छुटकारा देई हे। ओहे एक मात्र परमेश्‍वर हेके, उकरे ठिना महिमा, गौरव, पराक्रम आउर अधिकार शुरु से अहे, आउर एखन हो होवोक आउर जुग-जुग होते रहोक। आमीन।