यूहन्ना 9 - सादरी नवाँ नियम

जनम से अंधरा के ठीक करेक

¹ जब यीशु अपन चेलामन केर संगे जात रहे तो उ डहर में एगो आदमी के देखलक, जे जनम से अंधरा रहे।

² उकर चेलामन उकर से पूछलैं, “हे गुरु, के पाप काइर रहे कि इ अंधरा जनमलक, इ आदमी या इकर आयो आबा?”

³ यीशु जबाब देलक, “ना तो इ आदमी पाप काइर रहे, ना इकर आयो-आबा। मगर इ आदमी अंधरा इ लगिन जनइम हे कि इकर में परमेश्‍वर केर काम दिसोक।

⁴ जे मोके भेइज हे, उकर काम के हमरे के दिने-दिन में जल्दी हें पूरा करेक अहे। उ राइत आवाथे, जेकर में केऊ आदमी काम करेक नी पारबैं।

⁵ जब तक मोंय दुनिया में अहों, तब तक दुनिया केर इंजोत हेकों।”

⁶ इ कइह के यीशु भूंई उपरे थूकलक आउर उ थूक से माटी केर लेप बनालक, आउर उ लेप के अंधरा केर आँइख में लगाय देलक।

⁷ आउर उकर से कहलक, “जा शीलोह केर हाउदा में धोई ले।” शीलोह केर मतलब हेके “भेजल”। उ आदमी जाय के धोवालक आउर देखते घूइर आलक।

⁸ तब पड़ोसीमन आउर उ आदमीमन जेमन आगे उके भीख माँगते देइख रहैं, कहेक लगलैं, “का इ ओहे ना लगे, जे बाइठ के भीख माँगत रहे?”

⁹ थोरेक आदमीमन कहलैं, “हाँ, इ ओहे हेके।” आउर थोरेक आदमीमन कहलैं, “निहीं, उकर नियर हें केऊ आउर हेके।” उ आदमी कहलक, “मोंय ओहे हेकों।”

¹⁰ तब उमन उकर से पूछेक लगलैं, “तोर आँइख केर नजइर कइसन खुइल गेलक?”

¹¹ उ आदमी जबाब देलक, “यीशु नाँव केर एगो आदमी माटी केर लेप बनालक आउर उके मोर आँइख केर उपरे लगाय के मोर से कहलक, ‘शीलोह केर हाउदा में जाय के धोई ले।’ मोंय गेलों आउर धोवालो, धोवाएक केर पाछे मोंय देखेक लगलों।”

¹² उमन उकर से पूछलैं, “उ आदमी कहाँ अहे?” उ आदमी जबाब देलक, “मोंय नी जानोना।”

फरीसी आदमीमन बटले चंगाई केर जाँच-पड़ताल

¹³ आदमीमन उके जे आगे अंधरा रहे फरीसी दल केर आदमीमन ठिना लेई गेलैं।

¹⁴ काले कि जे दिन यीशु माटी केर लेप बनाय के उकर आँइख केर नजइर खोइल रहे, उ दिन यहूदी मनक आराम केर दिन रहे।

¹⁵ फरीसी दल केर आदमीमन हों उकर से पूछलैं, “तोर आँइख केर नजइर का लेखे खुइल गेलक?” उ आदमी उमन से कहलक, “उ मोर आँइख उपरे माटी केर लेप लगालक, फिन मोंय धोवालो, आउर अब मोंय देखेक पाराथों।”

¹⁶ से लगिन थोरेक फरीसी दल केर आदमीमन कहलैं, “उ आदमी परमेश्‍वर केर हिंयाँ से नी आय हे, काले कि उ यहूदी मनक आराम केर दिन केर नियम के हों नी मानेला।” आउर थोरेक आदमीमन कहलैं, “पापी आदमी इ लेखे चमत्कार केर चिन्हा कइसन देखाएक पारी?” इ लेखे उमन में अनबन होई गेलक।

¹⁷ उमन फिन उ अंधरा आदमी से पूछलैं, “जे आदमी तोके देखेक केर नजइर देलक, उकर बारे में तोंय का कहिसला?” उ जबाब देलक, “उ परमेश्‍वर केर संदेश के बताएक वाला हेके।”

¹⁸ मगर यहूदी धरम केर अगुवामन के बिसवास नी होवत रहे कि उ अंधरा रहे। से लगिन उमन उकर आयो-आबा के बोलालैं।

¹⁹ आउर उमन से पूछलैं, “का इ तोहर बेटा हेके, जेकर बारे में तोहरेमन कहाला कि इ जनम से अंधरा रहे? तो फिन अब इ कइसन देखेक पाराथे?”

²⁰ उकर आयो-आबा जबाब देलैं, “हमरे जानिला कि इ हमर बेटा हेके आउर इ जनम से अंधरा रहे।

²¹ मगर हमरे इ नी जानिला कि अब इ कइसन देखेक पाराथे। आउर हमरे इ हों नी जानिला कि के इकर आँइख केर नजइर के ठीक करलक। इ सेयाना अहे, इकरे से पूइछ लेवा। उ अपन बारे में खुद हें बताय देवी।”

²² उकर आयो-आबामन एइसन जबाब इ लगिन देलैं कि उमन यहूदी धरम केर अगुवामन से डरात रहैं। काले कि यहूदी धरम केर अगुवामन फैसला काइर रहैं कि अगर केऊ यीशु के मसीह मानी तो उ प्रार्थना घर से निकलाल जाई।

²³ से लगिन उकर आयो-आबा कहलैं, “उ सेयाना अहे, उकरे से पूइछ लेवा।”

²⁴ फरीसी आदमीमन उके, जे आगे अंधरा रहे, फिन बोलालैं आउर उकर से पूछलैं, “सच बताय के परमेश्‍वर केर स्तुति कर। हमरे जानिला कि उ पापी आदमी हेके।”

²⁵ उ जबाब देलक, “उ आदमी पापी हेके या निहीं, सेके मोंय नी जानोना। मोंय सिरिफ एगो गोइठ जानोना कि मोंय अंधरा रहों आउर अब देखेक पाराथों।”

²⁶ उमन उकर से फिन पूछलैं, “उ तोर संगे का करलक? उ तोर आँइख केर नजइर के का लेखे ठीक करलक?”

²⁷ उ आदमी उमन से कहलक, “मोंय तो तोहरेमन के बताय देई हों, मगर तोहरेमन नी सुनला, आउर अब काले फिन सुनेक चाहाला? का तोहरेमन हों उकर चेला बनेक चाहाला?”

²⁸ तब उमन उके बुरा-भला कहलैं, “तोंय हें उकर चेला हेकिस, हमरे तो मूसा केर चेला हेकी।

²⁹ हमरे जानिला कि परमेश्‍वर मूसा से गोठियाहे, मगर उ आदमी केर बारे में हमरे नी जानिला कि उ कहाँ से आय हे।”

³⁰ उ आदमी उमन के जबाब देलक, “एहे तो ताजुब केर गोइठ हेके। उ मोर आँइख केर नजइर के ठीक करलक आउर तोहरेमन एहो नी जानाला कि उ कहाँ से आय हे।

³¹ हमरे जानिला कि परमेश्‍वर पापी आदमीमन केर बिनती नी सुनेला, मगर, अगर केऊ परमेश्‍वर केर भक्त हेके, आउर उकर इच्छा के पूरा करेला तो परमेश्‍वर उकर बिनती के सुनेला।

³² जब से दुनिया केर सिरजन होई हे, तब से इ कहियो सुनेक में नी आलक कि केऊ जनम से अंधरा आदमी केर आँइख केर नजइर के ठीक काइर हे।

³³ इ आदमी परमेश्‍वर बटे से आय हे, से लगिन इ सोउब चमत्कार केर काम करेक पारेला।”

³⁴ उमन उकर से कहलैं, “तोंय तो बिलकुल पाप में जनइम हिस, तोंय हमरे के का सिखाइसला?” आउर उमन उके आराधना घर से बाहरे निकलाय देलैं।

आत्मा से अंधरा

³⁵ यीशु सुनलक कि फरीसी आदमीमन उके बाहरे निकलाय देई हैं, से लगिन जब उकर से भेंट होलक तो उ आदमी से पूछलक, “का तोंय परमेश्‍वर केर बेटा उपरे बिसवास करिसला?”

³⁶ उ जबाब देलक, “हे गुरु, मोके बताव कि इ परमेश्‍वर केर बेटा के हेके, जेकर से मोंय उकर उपरे बिसवास करमूँ?”

³⁷ यीशु उकर से कहलक, “इ, परमेश्‍वर केर बेटा मोंय हेकों, तोंय मोके आगे हें देइख हिस आउर एखन तोर संगे गोठियाथों।”

³⁸ उ आदमी कहलक, “हे प्रभु, मोंय तोर उपरे बिसवास करोना।” आउर यीशु केर भक्ति करलक।

³⁹ तब यीशु कहलक, “मोंय इ दुनिया में न्याय करेक लगिन आय हों, ताकि जेमन अंधरा अहैं उमन देखेक पारोक आउर जेमन देखेक पारैना उमन अंधरा होई जाओक।”

⁴⁰ जे फरीसी दल केर आदमीमन उकर संगे रहैं, उमन इ गोइठ सुइन के यीशु से पूछलैं, “का तोंय कहाथिस कि हमरे हों अंधरा अही?”

⁴¹ यीशु उमन से कहलक, “अगर तोहरेमन अंधरा होता तो तोहरेमन पापी नी गिनाता, मगर अब कहाथा कि हमरे देखिला, से लगिन तोहर पाप क्षमा नी करल जाई।”