यूहन्ना 8 - सादरी नवाँ नियम

ब्यभिचार करेक वाला जनाना के क्षमा करेक

¹ इकर पाछे सोउब घर चाइल गेलैं, मगर यीशु अपन चेलामन केर संगे जैतून पहार उपरे गेलक।

² आउर अगला दिन बिहाने-बिहान उ फिन यहूदी मनक मंदिर में आलक। आउर ढेइर आदमीमन उकर ठिना आलैं आउर उ बाइठ के उमन के उपदेस देवेक लगलक।

³ ओहे बेरा मूसा केर नियम के सिखाएक वाला आउर फरीसी दल केर आदमीमन एगो जनाना के लानलैं, जे ब्यभिचार केर काम में धराल जाय रहे। उके आदमीमन केर माझे ठड़ुवाय के यीशु से कहलैं,

⁴ “हे गुरु, इ जनाना ब्यभिचार काम में धराय हें।

⁵ मूसा अपन नियम में हमरे के एइसन जनानामन के पखना से माइर मोराएक केर आगया देई हे, तोंय इ जनाना केर बारे में का कहिसला?”

⁶ उमन यीशु के परखेक लगिन एइसन कहलैं, जेकर से उमन के उकर उपरे दोष लगाएक केर मोका मिल जाओक। मगर यीशु निहइर के अंगुर से भूंई उपरे लिखेक लगलक।

⁷ उमन यीशु से घरी-घरी पूछते रहलैं, तब उ मूँड़ उठाय के उमन से कहलक, “तोहर में से जे कहियो कोनों पाप नी काइर हे, ओहे आगे इ जनाना के पखना मारी।”

⁸ इ कइह के फिन उ निहइर के भूंई उपरे अंगुर से लिखेक लगलक।

⁹ इ गोइठ सुनेक केर पाछे उमन इ जाइन के कि हमरे सोउब पापी अही बाड़मन से लेई के छोटमन तक सोउब एक-एक काइर के हूवाँ से चाइल गेलैं। सिरिफ यीशु आउर उ जनाना जे उकर आगे ठड़ुवाल जाय रहे बाइच गेलैं।

¹⁰ यीशु ठड़ाय के उकर से पूछलक, “हे बहिन, उमन कहाँ गेलैं? का केऊ तोके सजा नी देलैं?”

¹¹ उ जबाब देलक, “हे प्रभु, केऊ सजा नी देलैं।” यीशु कहलक, “मोंय हों तोके सजा नी देमूँ। जा, अब से फिन तोंय पाप ना करबे।”

यीशु दुनिया केर दीया हेके

¹² यीशु फिन आदमीमन से कहलक, “दुनिया केर दीया मोंय हेकों। जे मोर पिछे होई लेवी, आउर मोर चेला बनी, उ अंधार में नी चली, मगर जिंदगी केर इंजोत पावी।”

¹³ फरीसी दल केर आदमीमन उकर से कहलैं, “तोंय अपन बारे में खुद गवाही देविसला, से लगिन तोर गवाही सच नखे।”

¹⁴ यीशु उमन के जबाब देलक, “अगर मोंय अपन गवाही खुद देवोना, फिन भी मोर गवाही सच्चा अहे, काले कि मोंय जानोना कि मोंय कहाँ से आय हों आउर कहाँ जामूँ, मगर तोहरेमन नी जानाला कि मोंय कहाँ से आय हों आउर कहाँ जाथों।

¹⁵ तोहरेमन आदमी मनक रीति केर मोताबिक न्याय कराला। मोंय केकरो न्याय नी करोना।

¹⁶ आउर अगर मोंय न्याय हों करमूँ, तो मोर न्याय सही होवी, काले कि मोंय आउर मोर आबा परमेश्‍वर जे मोके भेइज हे, दुयो संगे अही।

¹⁷ आउर मूसा केर नियम में हों लिखल अहे कि दूई झन केर गवाही सच्चा मानल जायला।

¹⁸ एक तो मोंय खुद अपन बारे में गवाही देवोना आउर दूसरा, मोर आबा परमेश्‍वर जे मोके भेइज हे, मोर बारे में गवाही देवेला।”

¹⁹ उमन उकर से पूछलैं, “तोर आबा कहाँ अहे?” यीशु जबाब देलक, “तोहरेमन ना तो मोके जानाला, आउर ना मोर आबा परमेश्‍वर के जानाला। अगर तोहरेमन मोके जानता, तो मोर आबा परमेश्‍वर के हों जाइन जाता।”

²⁰ यीशु इ गोइठमन के यहूदी मनक मंदिर केर अंगना में दान पेटी केर भीरे उपदेस देते कहलक। केऊ उके नी धारलैं काले कि उकर दुःख उठाएक आउर मोरेक केर समय एखन तक नी आय रहे।

यीशु केर अपन बारे में बताएक

²¹ यीशु उमन से फिन कहलक, “मोंय जाथों, आउर तोहरेमन मोके खोजबा, आउर तोहरेमन बेगर पाप क्षमा पाले मोइर जबा। से लगिन मोंय जहाँ जाथों, हूवाँ तोहरेमन आवेक नी पारबा।”

²² इ गोइठ सुइन के यहूदी धरम केर अगुवामन कहलैं, “का इ आत्महत्या तो नी करी? इ तो कहाथे, ‘मोंय जहाँ जाथों, हूवाँ तोहरेमन आवेक नी पारबा।’ ”

²³ यीशु उमन से कहलक, “तोहरेमन हिंयाँ इ दुनिया में जनम लेई हा, मगर मोंय स्वरग से आय हों। तोहरेमन इ दुनिया केर हेका मगर मोंय इ दुनिया केर ना लगों।

²⁴ से लगिन मोंय तोहरेमन से कहलों कि तोहरेमन बेगर पाप क्षमा पाले मोरबा, अगर तोहरेमन मोर उपरे बिसवास नी करबा कि मोंय ओहे हेकों, तो तोहरेमन बेगर पाप क्षमा पाले मोइर जबा।”

²⁵ यहूदी धरम केर अगुवामन पूछलैं, “तोंय के हेकिस?” यीशु उमन के जबाब देलक, “जब से मोंय उपदेस देवेक शुरु काइर हों, तब से तोहरेमन के बताते आवाथों कि मोंय ओहे हेकों।

²⁶ मोके तोहर न्याय करेक लगिन ढेइर कुछ कहेक अहे, मगर जे मोके भेइज हे, उ सच्चा हेके आउर उकर से जे कुछ मोंय सुइन हों, उखे दुनिया केर आदमीमन के बतावना।”

²⁷ मगर यहूदी धरम केर अगुवामन नी बुझलैं कि यीशु उमन से आबा परमेश्‍वर केर बारे में कहाथे।

²⁸ से लगिन यीशु उमन से कहलक, “जब तोहरेमन मोंय आदमी केर बेटा के क्रूस उपरे चढ़ाबा, तब तोहरेमन इ जाइन जबा कि मोंय ओहे हेकों। आउर मोंय अपन बटे से कोनों नी करोना। जइसन मोर आबा मोके सिखाय हे, तइसनेहें इ गोइठमन के कहोना।

²⁹ जे मोके भेइज हे, उ मोर संगे अहे। उ मोके एकले नी छोइड़ हे, काले कि मोंय ओहे काम करोना, जेकर से उ खुश होवेला।”

³⁰ ढेइर आदमीमन यीशु केर इ गोइठमन के सुनलैं आउर उकर उपरे बिसवास करलैं।

सच्चाई तोहरेमन के आजाद करी

³¹ जे यहूदी आदमीमन उकर उपरे बिसवास करलैं, उमन से यीशु कहलक, “अगर तोहरेमन मोर बचन में बनल रहबा, तो सचमुच मोर चेला ठहरबा।

³² आउर तोहरेमन सच्चाई के जानबा आउर सच्चाई तोहरेमन के आजाद करी।”

³³ उमन उके जबाब देलैं, “हमरे तो अब्राहम केर संतान हेकी आउर कहियो केकरो गुलाम नी रही। फिन तोंय कइसन कहाथिस कि तोहरेमन आजाद होई जबा?”

³⁴ यीशु उमन के जबाब देलक, “मोंय तोहरेमन से सच-सच कहाथों कि जे केऊ पाप करेला, उ पाप केर गुलाम हेके।

³⁵ आउर गुलाम सोउब बेरा घर में नी रहेला, बेटा सोउब बेरा घर में रहेला।

³⁶ से लगिन अगर मोंय परमेश्‍वर केर बेटा तोहरेमन के आजाद करमूँ, तो सचमुच तोहरेमन आजाद होई जबा।

³⁷ मोंय जानोना कि तोहरेमन अब्राहम केर संतान हेका, फिन भी तोहरेमन मोके माइर मोराएक केर ताक में रहाला, काले कि तोहरेमन मोर शिक्षा के नी मानाला।

³⁸ मोंय अपन आबा परमेश्‍वर केर हिंयाँ जे कुछ देइख हों उखे तोहरेमन के बतावना आउर तोहरेमन अपन आबा से जे कुछ सुइन हा, उखे कराला।”

³⁹ उमन उके जबाब देलैं, “हमर पुरखा तो अब्राहम हेके।” यीशु उमन से कहलक, “अगर तोहरेमन अब्राहम केर संतान होता, तो अब्राहम नियर काम करता।

⁴⁰ मगर अब तोहरेमन मोके माइर मोराएक चाहाला, काले कि मोंय उ सच्चाई केर बचन के बताय हों जेके मोंय परमेश्‍वर से सुइन हों, अब्राहम तो एइसन काम नी काइर रहे।

⁴¹ तोहरेमन अपन आबा केर नियर काम कराथा।” उमन यीशु से कहलैं, “हमरे ब्यभिचार से नी जनइम ही, हमर एके गो आबा अहे आउर उ परमेश्‍वर हेके।”

⁴² यीशु उमन से कहलक, “अगर परमेश्‍वर तोहर आबा होतक, तो तोहरेमन मोर से प्रेम करता, काले कि मोंय परमेश्‍वर बटे से आय हों। मोंय अपन मरजी से नी आय हों, मोके ओहे भेइज हे।

⁴³ तोहरेमन मोर गोइठ के काले नी बुझाला? इकर कारण इ हेके कि तोहरेमन मोर गोइठमन के मानेक नी चाहाला।

⁴⁴ तोहर आबा शैतान हेके आउर तोहरेमन उकर इच्छा के हें पूरा करेक चाहाला। उ तो शुरु से हें हत्यारा अहे। आउर उके सच्चाई से कोनों लेना-देना नखे, काले कि सच्चाई उकर में हइये नखे। जब उ झूठ बोलेला, तो अपन स्वभाव केर मोताबिक बोलेला, काले कि उ झूठा हेके आउर झूठ केर आबा हेके।

⁴⁵ मगर मोंय सच कहोना, से लगिन तोहरेमन मोर उपरे बिसवास नी कराला।

⁴⁶ तोहर में से केहर मोर उपरे पाप करेक केर दोष लगाएक पारी? आउर अगर मोंय सच कहोना, तो तोहरेमन मोर उपरे काले बिसवास नी कराला?

⁴⁷ जे केऊ परमेश्‍वर से नाता जोड़ेला, उ परमेश्‍वर केर गोइठमन के सुनेला मगर तोहरेमन केर परमेश्‍वर से कोनों नाता नखे, से लगिन परमेश्‍वर केर गोइठमन के नी सुनाला।”

यीशु आउर अब्राहम

⁴⁸ इ गोइठ सुइन के यहूदी धरम केर अगुवामन यीशु से पूछलैं, “का हमर इ कहेक ठीक नखे कि तोंय सामरी आदमी हेकिस, आउर तोर में भूत अहे?”

⁴⁹ यीशु जबाब देलक, “मोर में भूत नखे। मगर मोंय अपन आबा केर आदर करोना, आउर तोहरेमन मोर निरादर कराला।

⁵⁰ मोंय अपन आदर नी चाहोना, मगर एगो अहे जे चाहेला कि मोके सम्मान करल जाओक आउर उ ओहे हेके, जे न्याय करेला।

⁵¹ मोंय तोहरेमन से सच-सच कहाथों कि अगर केऊ आदमी मोर बचन सुइन के उके मानी तो उ कहियो नी मोरी।”

⁵² यहूदी धरम केर अगुवामन उकर से कहलैं, “अब हमरे जाइन गेली कि तोर में भूत अहे। अब्राहम मोइर गेलक, आउर परमेश्‍वर केर संदेश के बताएक वालामन हों मोइर गेलैं। आउर तोंय कहिसला, ‘अगर केऊ मोर बचन के सुइन के उके मानी तो उ कहियो नी मोरी।’

⁵³ हमर पुरखा अब्राहम तो मोइर गेलक। का तोंय उकर से हों महान अहिस? आउर परमेश्‍वर केर संदेश के बताएक वालामन हों मोइर गेलैं। तोंय खुद के का बुझिसला?”

⁵⁴ यीशु जबाब देलक, “अगर मोंय खुद अपन बड़ाई करमूँ, तो उकर कोनों मोल नी होवी, मगर जे मोर बड़ाई करेला, उ मोर आबा हेके, आउर तोहरेमन उके कहाला कि उ हमर परमेश्‍वर हेके।

⁵⁵ तोहरेमन तो उके नी जानाला, मगर मोंय उके जानोना। अगर मोंय कहतो कि उके नी जानोना तो मोंय तोहर नियर झूठा बाइन जतो। मगर मोंय उके जानोना आउर उकर आगया के मानोना।

⁵⁶ तोहर पुरखा अब्राहम मोर दिन देखेक केर आसरा में ढेइर खुश रहे आउर उ देखलक आउर ढेइर खुश होलक।”

⁵⁷ यहूदी धरम केर अगुवामन उकर से कहलैं, “एखन तोंय पचास साल केर हों नखिस, आउर तोंय अब्राहम के देइख लेले?”

⁵⁸ यीशु उमन के जबाब देलक, “मोंय तोहरेमन से सच-सच कहाथों कि अब्राहम केर जनम लेवेक केर आगे से हें मोंय अहों।”

⁵⁹ तब उमन यीशु के मारेक लगिन पखना उठालैं, मगर उ लूइक के यहूदी मनक मंदिर से निकइल गेलक।