यूहन्ना 7 - सादरी नवाँ नियम

यीशु आउर उकर भाई

¹ इ गोइठमन होवेक केर पाछे यीशु गलील परदेस में फिरेक लगलक। उ यहूदिया परदेस में फिरेक नी चाहत रहे, काले कि यहूदी धरम केर अगुवामन उके माइर मोराएक खोजत रहैं।

² आउर यहूदी मनक झोपड़ी केर परब भीरे रहे।

³ से लगिन उकर भाईमन यीशु से कहलैं, “इ परदेस छोइड़ के यहूदिया परदेस चाइल जा, काले कि तोंय जे महान काममन के करिसला, उ काममन के तोर चेलामन हों देखोक।

⁴ काले कि जे आदमी नाँव कमाएक चाहेला, उ लूइक के काम नी करेला। जब तोंय एइसन काम करिसला तो खुद के दुनिया केर आदमीमन केर सामने दिस्तार कर।”

⁵ काले कि उकर भाईमन हों उकर उपरे बिसवास नी करत रहैं।

⁶ तब यीशु उमन से कहलक, “एखन मोर समय नी आय हे, मगर तोहर लगिन सोउब समय ठीक अहे।

⁷ दुनिया केर आदमीमन तोहरेमन से दुश्मनी नी करबैं, मगर मोर से करबैं, काले कि मोंय उमन केर बिरोध में इ गवाही देवोना कि उ मनक काममन बुरा अहे।

⁸ इ परब मनाएक लगिन तोहरेमन जावा। मोंय एखन इ परब मनाएक लगिन नी जामूँ काले कि मोर समय पूरा नी होई हे।”

⁹ यीशु उमन से इ गोइठमन कइह के गलील परदेस में हें रइह गेलक।

झोपड़ी केर परब में यीशु

¹⁰ जब उकर भाईमन परब मनाएक लगिन चाइल गेलैं, तब पाछे यीशु हों बेगर दिस्तार देले हूवाँ गेलक।

¹¹ हूवाँ यहूदी धरम केर अगुवामन यीशु के खोजत रहैं, आउर आदमीमन से पूछत रहैं, “यीशु कहाँ अहे?”

¹² आदमीमन में यीशु केर बारे में कानाफूसी होवत रहे। थोरेक आदमीमन कहत रहैं, “उ भला आदमी हेके।” आउर थोरेक आदमीमन कहत रहैं, “निहीं, उ आदमीमन के भरमाथे।”

¹³ फिन भी आदमीमन यीशु केर बारे में खोइल के नी गोठियात रहैं, काले कि उमन यहूदी धरम केर अगुवामन से डरात रहैं।

झोपड़ी केर परब में यीशु केर उपदेस

¹⁴ जब परब केर आधा दिन बीत गेलक, तब यीशु यहूदी मनक मंदिर में गेलक आउर आदमीमन के उपदेस देवेक लगलक।

¹⁵ यहूदी धरम केर अगुवामन ताजुब होई गेलैं आउर कहेक लगलैं, “इ पवितर किताब केर शिक्षा कहियो नी पाय हे, फिन इके इ गेयान कहाँ से मिललक?”

¹⁶ यीशु उमन के जबाब देलक, “इ मोर अपन उपदेस ना लगे, मगर परमेश्‍वर केर हेके, जेके मोर ले भेइज हे।

¹⁷ अगर केऊ उकर इच्छा केर मोताबिक चलेक लगिन ठाइन लेई तो उ जाइन जाई कि मोर उपदेस परमेश्‍वर बटे से आवेला या मोंय खुद अपन बटे से देवोना।

¹⁸ जे अपन बटे से कहेला, उ अपन लगिन बड़ाई चाहेला, मगर जे अपन भेजेक वाला केर बड़ाई चाहेला, ओहे सच्चा हेके, आउर उकर में कोनों झूठ नखे।

¹⁹ का मूसा तोहर लगिन नियम नी बनाहे? फिन भी तोहर में से केऊ नियम केर मोताबिक नी चलेला। तोहरेमन मोके माइर मोराएक केर ताक में काले रहाला?”

²⁰ आदमीमन जबाब देलैं, “तोर में भूत अहे, केहर तोके माइर मोराएक केर ताक में रहेला?”

²¹ यीशु उमन के जबाब देलक, “मोंय एगो चमत्कार केर काम करलों आउर तोहरेमन सोउब ताजुब होवाथा।

²² सुना, मूसा तोहरेमन के खतना कराएक केर नियम देई हे, मगर उ मूसा से निहीं पुरखामन से हें चलते आवाथे आउर तोहरेमन यहूदी मनक आराम केर दिन हों आदमी मनक खतना कराला।

²³ अगर तोहरेमन यहूदी मनक आराम केर दिन आदमीमन केर खतना इ लगिन कराला कि मूसा केर नियम ना टाइल जाओक, तो तोहरेमन मोर उपरे इ गोइठ लगिन काले खिसाथा कि मोंय यहूदी मनक आराम दिन एगो आदमी के ठीक करलों।

²⁴ मुँह देइख के न्याय ना करबा, मगर ठीक-ठीक न्याय करबा।”

का यीशु हें मसीह हेके?

²⁵ तब केतना यरुशलेम शहर केर रहेक वाला आदमीमन कहेक लगलैं, “का इ ओहे तो ना लगे, जेके हमर धरम केर अगुवामन माइर मोराएक केर ताक में अहैं?

²⁶ देखा तो, इ कइसन खुल्लम-खुल्ला गोठियाथे आउर उमन इके कोनों नी कहाथैं। का धरम केर अगुवामन सचमुच माइन लेलैं कि इ मसीह हेके?

²⁷ फिन भी हमरे जानिला कि इ कहाँ केर हेके, मगर जब मसीह दिस्तार होवी तो केखो पता नी होवी कि उ कहाँ केर हेके।”

²⁸ तब यीशु यहूदी मनक मंदिर में उपदेस देते जोर से कहलक, “तोहरेमन मोके जानाला आउर एहो जानाला कि मोंय कहाँ से आय हों। मोंय अपन इच्छा से नी आय हों। जे मोके भेइज हे उ सच्चा हेके आउर तोहरेमन उके नी जानाला।

²⁹ मगर मोंय उके जानोना, काले कि मोंय उकर ठिना से आय हों, आउर ओहे मोके भेइज हे।”

³⁰ इ सुइन के धरम केर अगुवामन उके धारेक चाहलैं, मगर केऊ उके धारेक नी पारलैं, काले कि एखन उकर समय नी होई रहे।

³¹ फिन भी भीड़ केर ढेइर आदमीमन उकर उपरे बिसवास करलैं। आउर कहेक लगलैं, “जब मसीह आवी, तो का उ इकर से हों बगरा चमत्कार केर काममन के देखाई जे इ देखालक?”

यीशु के धारेक केर कोशिश

³² फरीसी आदमीमन यीशु केर बारे में आदमीमन के इ लेखे गोठियाते सुनलैं। से लगिन यहूदी मुध पुरोहितमन आउर फरीसी दल केर आदमीमन यीशु के धारेक लगिन मन्दिर केर पहरादारमन के भेजलैं।

³³ तब यीशु कहलक, “अब मोंय थोरहें समय तक तोहर संगे रहमूँ। इकर पाछे मोंय अपन भेजेक वाला ठिना घूइर जामूँ।

³⁴ तोहरेमन मोके खोजबा, मगर मोंय तोहरेमन के नी मिलमूँ। आउर जहाँ मोंय रहमूँ, हूवाँ तोहरेमन आवेक नी पारबा।”

³⁵ यहूदी धरम केर अगुवामन आपस में कहलैं, “इ कहाँ जाई, जे हमरे इके खोजेक नी पारब? का इ उ यहूदी आदमीमन ठिना जाई, जेमन यूनान देस में जने-तने रहैना आउर इ उमन के हों उपदेस देवी?

³⁶ इ गोइठ केर का मतलब हेके, ‘तोहरेमन मोके खोजबा आउर मोंय तोहरेमन के नी मिलमूँ। आउर जहाँ मोंय रहमूँ, हूवाँ तोहरेमन आवेक नी पारबा।’ ”

जीवन-पानी केर नदीमन

³⁷ यहूदी मनक झोपड़ी परब केर आखरी दिन, जे खास दिन हेके, यीशु ठड़ाय के जोर से कहलक, “अगर केऊ पियासा अहे, तो उ मोर ठिना आवोक आउर पियोक।

³⁸ जे मोर उपरे बिसवास करी, उ अपन पियास के बुझाई। जइसन पवितर किताब में लिखल अहे, ‘उकर हृदय में से जिंदगी देवेक वाला पानी केर नदीमन बइह निकली।’ ”

³⁹ यीशु इ गोइठ पवितर आत्मा केर बारे में कहलक, इ पवितर आत्मा उ आदमीमन के मिलेक वाला रहे, जेमन उकर उपरे बिसवास करबैं। अब तक पवितर आत्मा नी उतइर रहे, काले कि परमेश्‍वर यीशु केर महिमा के एखन तक दिस्तार नी काइर रहे।

⁴⁰ इ गोइठ सुइन के भीड़ केर थोरेक आदमीमन कहलैं, “सचमुच में एहे उ परमेश्‍वर केर संदेश के बताएक वाला हेके, जेकर आवेक केर आसरा हमरे देखाथी।”

⁴¹ आउर थोरेक आदमीमन कहलैं, “इ मसीह हेके।” मगर थोरेक आदमीमन कहलैं, “काले? का मसीह गलील परदेस से आवी?

⁴² पवितर किताब में लिखल अहे कि मसीह राजा दाऊद केर बंश से आउर बैतलेहम नगर से आवी जहाँ राजा दाऊद रहत रहे।”

⁴³ इ लेखे यीशु केर बारे में आदमीमन में अनबन होई गेलक।

⁴⁴ थोरेक आदमीमन यीशु के धारेक चाहत रहैं, मगर केऊ उके धारेक नी पारलैं।

यहूदी धरम केर अगुवामन केर अबिसवास

⁴⁵ जब मन्दिर केर पहरादारमन, यहूदी मुध पुरोहितमन आउर फरीसी दल केर आदमीमन ठिना आलैं, तब फरीसी आदमीमन पहरादारमन से पूछलैं, “तोहरेमन उके काले नी लानला?”

⁴⁶ पहरादारमन जबाब देलैं, “जइसन इ आदमी कहेला, तइसन केऊ आदमी नी कहलैं।”

⁴⁷ इ सुइन के फरीसी दल केर आदमीमन उमन से कहलैं, “का तोहरेमन के हों उ डहर से भटकाय देई हे?

⁴⁸ का हमर अधिकारीमन चाहे फरीसी दल केर आदमीमन में से केऊ हों उकर उपरे बिसवास काइर हैं?

⁴⁹ मगर इ आदमीमन केर गोइठ दोसर हेके। इमन जे मूसा केर नियम के नी जानैना, परमेश्‍वर बटले श्रापित अहैं।”

⁵⁰ नीकुदेमुस जे उ फरीसी आदमीमन में से एगो रहे, एक बेर आगे राइत के यीशु से मिलेक लगिन उकर ठिना आय रहे। उमन से कहलक,

⁵¹ “का हमर नियम केऊ आदमी के, जब तक आगे उकर गोइठ के नी सुइन लेवी आउर इ ना पता लगाय लेवी कि उ का काइर हे, उके दोषीदार ठहराएला?”

⁵² उमन उके जबाब देलैं, “का तोंय हों गलील परदेस केर हेकिस? पवितर किताब में खोज, तब तोंय जानबे कि गलील परदेस से केऊ परमेश्‍वर केर संदेश के बताएक वाला नी दिस्तार होवी।”

⁵³ इकर पाछे सोउबमन अपन-अपन घर चाइल गेलैं।