यूहन्ना 5 - सादरी नवाँ नियम

अड़तीस साल केर बेमरिया के ठीक करेक

¹ इकर थोरेक समय पाछे यीशु यहूदी मनक एगो परब केर मोका में यरुशलेम शहर गेलक।

² यरुशलेम शहर में भेड़-फाटक ठिना एगो बड़का हाउदा अहे, जे इब्रानी भाषा में बैतहसदा कहायला आउर उकर पाँच गो छपरी अहे।

³ इ हाउदा में ढेइर बेमरिया आदमीमन अंधरा, लंगड़ा आउर एक अंगिया बेमरियामन पानी केर हिलेक केर आसरा देखते रहत रहैं।

⁴ काले कि बेरा-बेरा में परमेश्‍वर केर स्वरगदूत हाउदा में उतइर के पानी के हिलात रहे। पानी केर हिलते हें जे केऊ पानी में आगे उतरत रहे उ आदमी ठीक होई जात रहे चाहे उकर कोनों बेमारी रहोक।

⁵ हूवाँ एगो आदमी रहे, जे अड़तीस साल से बेमार रहे।

⁶ यीशु उके देइख के जाइन गेलक कि उ ढेइर दिन से इ दशा में पड़ल अहे, उकर से पूछलक, “का तोंय ठीक होवेक चाहिसला?”

⁷ उ बेमरिया आदमी उके जबाब देलक, “हे प्रभु, मोर केऊ आदमी नखे, जे पानी केर हिलते हें मोके हाउदा में उतराई। मोर पोंहचेक से आगे हें उकर में केऊ दूसरा आदमी उतइर जायला।”

⁸ यीशु उकर से कहलक, “उठ, अपन पटिया के उठाय के चल फिर।”

⁹ उ आदमी तुरते ठीक होई गेलक, आउर अपन पटिया के उठाय के चलेक फिरेक लगलक, जे दिन इ सोउब होलक, उ यहूदी मनक आराम केर दिन रहे।

¹⁰ से लगिन यहूदी धरम केर अगुवामन ठीक होवल आदमी से कहलैं, “आइज तो मूसा केर नियम केर मोताबिक यहूदी मनक आराम केर दिन हेके। पटिया उठाएक तोर लगिन उचित नखे।”

¹¹ उ आदमी उमन के जबाब देलक, “जे मोके ठीक करलक, ओहे मोर से कहलक, ‘अपन पटिया उठाय के चल फिर।’ ”

¹² उमन उकर से पूछलैं, “उ कोन आदमी हेके, जे तोर से कहलक, ‘अपन पटिया उठाय के चल फिर?’”

¹³ मगर जे आदमी ठीक होई रहे, उ नी जानत रहे कि उ के हेके, काले कि हूवाँ ढेइर भीड़ रहे से लगिन यीशु हूवाँ से चाइल जाय रहे।

¹⁴ थोरेक देरी केर पाछे यीशु के उ यहूदी मनक मंदिर केर अंगना में मिललक, तब यीशु उकर से कहलक, “देख, तोंय तो ठीक होई जाहिस। फिन पाप ना करबे, कहीं एइसन ना होवोक कि इकरो से आउर भारी बिपाइत तोर उपरे आय जाई।”

¹⁵ उ आदमी जाय के यहूदी धरम केर अगुवामन के बताय देलक कि जे मोके ठीक काइर हे, उ यीशु हेके।

¹⁶ यीशु यहूदी मनक आराम केर दिन एइसन काम करेला, से लगिन उमन यीशु के सताएक लगलैं।

¹⁷ यीशु उमन के जबाब देलक, “मोर आबा परमेश्‍वर एखन तक काम करते अहे, से लगिन मोंय हों लगातार काम करोना।”

¹⁸ यीशु केर इ गोइठ से यहूदी धरम केर अगुवामन उके माइर मोराएक केर आउर हें कोशिश करेक लगलैं, काले कि उ ना सिरिफ यहूदी मनक आराम केर दिन केर नियम के तोराथे, मगर परमेश्‍वर के अपन आबा कइह के खुद के परमेश्‍वर केर बराबइर ठहराथे।

बेटा केर अधिकार

¹⁹ यीशु यहूदी धरम केर अगुवामन से कहलक, “मोंय तोहरेमन से सच-सच कहाथों, बेटा, मतलब मोंय अपन से कोनों करेक नी पारोना, सिरिफ ओहे करेक पारोना जे काममन के मोंय आबा परमेश्‍वर के करते देखोना, काले कि जइसन मोर आबा परमेश्‍वर करेला ठीक तइसनेहें मोंय हों करोना।

²⁰ काले कि मोर आबा परमेश्‍वर मोर से, मतलब बेटा से प्रेम करेला आउर जे-जे काम उ खुद करेला, उके मोके देखायला। उ मोके आउर हें महान काममन के देखाई, जेमन के देइख के तोहरेमन ताजुब होई जबा।

²¹ काले कि जइसन आबा परमेश्‍वर मोरलमन के फिन से जिंदगी देवेला, तइसनेहें मोंय बेटा हों जेमन के चाहोना उमन के जिंदगी देवोना।

²² आबा परमेश्‍वर केकरो न्याय नी करेला, उ न्याय करेक केर पूरा अधिकार मोके देई दे हे,

²³ से लगिन जे लेखे आदमीमन आबा परमेश्‍वर के माइन देवैना, तइसनेहें मोके हों माइन देवोक। जे मोके माइन नी देवेला, उ आबा परमेश्‍वर के हों माइन नी देवेला, जे मोके भेइज हे।

²⁴ मोंय तोहर से सच कहाथों, जे मोर बचन के सुनेला आउर सुइन के मोर भेजेक वाला केर उपरे बिसवास करेला, उके जुग-जुग केर जिंदगी मिल हे, उके सजा नी देवल जाई, मगर उ जुग-जुग ले मोरेक से बाइच के नवाँ जिंदगी पाय चुइक हे।

²⁵ मोंय तोहर से सच-सच कहाथों, उ समय आवाथे, आउर आइये जाहे, जेकर में मोरलमन मोंय परमेश्‍वर केर बेटा केर आवाज के सुनबैं, आउर जेमन सुनबैं उमन सोउब दिन जिबैं।

²⁶ काले कि जे लेखे आबा परमेश्‍वर खुद में जिंदगी रखेला, ओहे लेखे उ मोके हों खुद में जिंदगी रखेक केर अधिकार देई हे,

²⁷ हिंयाँ तक कि मोंय बेटा के, आबा परमेश्‍वर सोउब आदमी मनक न्याय करेक केर अधिकार देई हे, काले कि मोंय आदमी केर बेटा हेकों।

²⁸ इकर से ताजुब ना होवा, काले कि उ समय आवाथे, जेतना आदमीमन कबरमन में अहैं, मोर आवाज सुइन के जिंदा होबैं आउर कबर से निकलबैं।

²⁹ जेमन भलाई केर काम काइर हैं उमन जुग-जुग केर जिंदगी पावेक लगिन जी उठबैं आउर जेमन बुराई केर काम काइर हैं उमन सजा पावेक लगिन जी उठबैं।

यीशु केर बारे में गवाही

³⁰ मोंय खुद से कोनों करेक नी पारोना, आबा परमेश्‍वर जइसन मोर से कहेला, तइसनेहें मोंय आदमी मनक न्याय करोना, आउर मोर न्याय सच्चा हेके, काले कि मोंय अपन इच्छा के पूरा करेक निहीं, मगर अपन भेजेक वाला केर इच्छा के पूरा करेक चाहोना।

³¹ अगर मोंय खुद हें अपन बारे में गवाही देमूँ, तो मोर गवाही सच्चा नी होवी।

³² एक झन आउर अहे जे मोर आबा परमेश्‍वर हेके, उ मोर बारे में गवाही देवेला, आउर मोंय जानोना कि मोर बारे में जे गवाही देवेला उ सच्चा अहे।

³³ तोहरेमन यूहन्ना बपतिस्मा जल संस्कार देवेक वाला से पूछवाला आउर उ सच्चाई केर बारे में गवाही देई हे।

³⁴ मगर मोंय अपन बारे में आदमी मनक मुँह से गवाही सुनेक नी चाहोना, सेकरो में मोंय तोहरेमन के उ गवाही केर बारे में बताय हों, जेके यूहन्ना बपतिस्मा जल संस्कार देवेक वाला देई रहे ताकि तोहरेमन बाइच जबा।

³⁵ यूहन्ना बरते आउर चमकते दीया नियर रहे आउर उकर इंजोत में थोरेक देरी खुशी मनाएक तोहरेमन के बेस लगलक।

³⁶ मगर मोर ठिना जे गवाही अहे, उ यूहन्ना केर गवाही से हों महान अहे। उ काम जेके आबा परमेश्‍वर मोके पूरा करेक लगिन देई हे, ओहे काम मोंय कराथों, आउर ओहे काम मोर बारे में इ गवाही देवेला कि आबा परमेश्‍वर मोके भेइज हे।

³⁷ आउर आबा परमेश्‍वर हों जे मोके भेइज हे, मोर बारे में गवाही देई हे। तोहरेमन ना तो उकर आवाज कहियो सुइन हा, आउर ना उकर रूप देइख हा।

³⁸ आउर उकर संदेश के तोहरेमन अपन मन में स्थिर नी रखाला काले कि तोहरेमन मोर उपरे बिसवास नी कराला, जेके परमेश्‍वर भेइज हे।

³⁹ तोहरेमन इ समइझ के पवितर किताब के पाढ़ाला कि उकर में जुग-जुग केर जिंदगी में ढूकेक केर डहर मिली। ओहे पवितर किताब मोर बारे में गवाही देवेला।

⁴⁰ फिन भी तोहरेमन जुग-जुग केर जिंदगी पावेक लगिन मोर ठिना आवेक नी चाहाला।

⁴¹ मोंय आदमीमन से माइन पावेक केर आसरा नी करोना।

⁴² मगर मोंय तोहरेमन के जानोना कि तोहरेमन अपन मन में परमेश्‍वर से प्रेम नी कराला।

⁴³ मोंय अपन आबा परमेश्‍वर केर अधिकार केर संगे आय हों, फिन भी तोहरेमन मोर संदेश के नी सुनाला। मगर केऊ आदमी अपनेहें अधिकार से आवी तो तोहरेमन उकर संदेश के माइन लेबा।

⁴⁴ तोहरेमन मोर उपरे बिसवास नी करबा काले कि तोहरेमन एक दोसर से माइन चाहाला। आउर तोहरेमन उ माइन के पावेक केर कोशिश नी कराला जे सिरिफ आबा परमेश्‍वर बटे से मिलेला।

⁴⁵ तोहरेमन इ ना बुझबा कि मोंय आबा परमेश्‍वर केर सामने तोहर उपरे दोष लगामूँ, मूसा जेकर उपरे तोहरेमन अपन आसरा राइख हा, ओहे तोहरेमन केर उपरे दोष लगाई।

⁴⁶ अगर तोहरेमन मूसा केर उपरे बिसवास करता, तो मोर उपरे हों बिसवास करता, काले कि उ मोर बारे में लीख हे।

⁴⁷ मगर तोहरेमन उकर लिखल गोइठमन केर उपरे बिसवास नी कराला, तो मोर गोइठमन केर उपरे कइसन बिसवास करबा? तोहरेमन पक्का बिसवास नी करबा।”