यूहन्ना 4 - सादरी नवाँ नियम

यीशु आउर सामरी जनाना

¹ यीशु के पता चललक कि फरीसी दल केर आदमीमन के इ खबर मिल हे कि यीशु यूहन्ना से बगरा आदमीमन के चेला बनाथे, आउर बपतिस्मा जल संस्कार देवाथे।

² जबकि यीशु खुद बपतिस्मा जल संस्कार नी देवत रहे, मगर उकर चेलामन आदमीमन के बपतिस्मा जल संस्कार देवत रहैं।

³ तब उ यहूदिया परदेस के छोइड़ के अपन चेलामन केर संगे फिन गलील परदेस घूइर आलक।

⁴ आउर उके सामरिया परदेस से होई के जाएक जरुरी रहे।

⁵ उ सामरिया परदेस केर सूखार नाँव केर एगो नगर में पोहोंचलक। इ नगर उ खेत केर भीरे रहे, जेके याकूब अपन बेटा यूसुफ के देई रहे।

⁶ हूवाँ याकूब केर कोड़ल कुआँ हों अहे। यीशु डहर हिंठेक में थाइक जाय रहे, से लगिन कुआँ ठिना एइसनेहें बाइठ गेलक, इ लगभग दूई पहर केर बेरा रहे।

⁷ एतनेहें में एगो सामरिया परदेस केर सामरी जनाना पानी भरेक आलक। यीशु उकर से कहलक, “मोके पानी पियाव।”

⁸ उ बेरा यीशु एकले रहे काले कि उकर चेलामन नगर में अपन खाएक लगिन कोनों किनेक जाय रहैं।

⁹ यहूदी आदमीमन सामरी आदमीमन से कोनों संबंध नी रखैना। से लगिन उ सामरी जनाना यीशु से कहलक, “तोंय यहूदी होई के हों मोंय सामरी जनाना से पियेक लगिन पानी काले माँगाथिस?”

¹⁰ यीशु उके जबाब देलक, “अगर तोंय जानते कि परमेश्‍वर तोके का देवेक चाहाथे, आउर एहो जानते कि तोर से के पानी माँगाथे, तो तोंय मोर से इके माँगते आउर मोंय तोके जिंदगी देवेक वाला पानी देतो।”

¹¹ उ जनाना यीशु से कहलक, “हे प्रभु, तोर ठिना पानी भरेक लगिन कोनोवें नखे आउर कुआँ ढेइर गढ़हा अहे, तो फिन तोके इ जिंदगी केर पानी कहाँ से मिली?

¹² का तोंय हमर पुरखा याकूब से हों महान हेकिस? उ हमरे के इ कुआँ देलक। उ खुद आउर उकर संतान आउर उ मनक जानवरमन हों इ कुआँ केर पानी पियत रहैं।”

¹³ यीशु उके जबाब देलक, “जे केऊ इ पानी के पियी उके फिन पियास लगी।

¹⁴ मगर जे केऊ मोर देवल पानी के पियी, उके कहियो पियास नी लगी। जे पानी मोंय उके देमूँ, उ उकर में पानी केर सोता बाइन जाई आउर इ सोता से पानी निकलते रही, जे उके जुग-जुग केर जिंदगी देवी।”

¹⁵ इ गोइठ सुइन के उ जनाना यीशु से कहलक, “हे प्रभु, मोके उ पानी दे, जेकर से मोके फिन पियास नी लगी आउर ना पानी भरेक लगिन एतना दूर आवेक होवी।”

¹⁶ यीशु उकर से कहलक, “जा, अपन पति के हिंयाँ बोलाय लान।”

¹⁷ उ जनाना यीशु के जबाब देलक, “मोंय बेगर पति केर अहों।” यीशु उकर से कहलक, “तोंय ठीक कहले, ‘मोंय बेगर पति केर अहों।’

¹⁸ काले कि तोंय पाँच गो पति बनाय चुइक हिस, आउर जेकर ठिना तोंय एखन अहिस ओहो तोर पति ना लगे। इ तोंय सच कइह हिस।”

¹⁹ उ जनाना यीशु से कहलक, “हे प्रभु, मोंय जाइन गेलों कि तोंय परमेश्‍वर केर संदेश के बताएक वाला हेकिस।

²⁰ मोर सामरी पुरखामन एहे पहार उपरे परमेश्‍वर केर भक्ति करत रहैं, आउर तोहरे यहूदीमन कहाला कि यरुशलेम शहर हें उ ठाँव हेके, जहाँ भक्ति करेक चाही।”

²¹ यीशु उकर से कहलक, “हे नारी, मोर गोइठ उपरे बिसवास कर। उ समय आवाथे, जब तोहरेमन ना तो इ पहार उपरे आबा परमेश्‍वर केर भक्ति करेक पारबा ना यरुशलेम शहर में।

²² तोहरे सामरी आदमीमन जेके नी जानाला, उकर भक्ति कराला, मगर हमरे यहूदीमन जेके जानिला उकर भक्ति करिला, काले कि छुटकारा यहूदीमन में से अहे।

²³ मगर उ समय आवाथे, आउर आइये जाहे जब सच्चा भक्तमन आत्मा आउर सच्चाई से आबा परमेश्‍वर केर भक्ति करबैं, काले कि आबा परमेश्‍वर एइसनेहें भक्ति करइयामन के खोजेला।

²⁴ परमेश्‍वर आत्मा हेके, से लगिन इ जरुरी अहे कि उकर भक्ति करइयामन आत्मा आउर सच्चाई से उकर भक्ति करोक।”

²⁵ जनाना यीशु से कहलक, “मोंय जानोना कि मसीह, जे परमेश्‍वर केर अभिषेक करल आदमी कहायला, आवेक वाला अहे, जब उ आवी तो हमरे के सोउब गोइठमन के बताय देवी।”

²⁶ यीशु उकर से कहलक, “मोंय जे तोर से गोठियाथों, ओहे हेकों।”

चेलामन केर घूइर आवेक

²⁷ ओहे बेरा उकर चेलामन आय गेलैं आउर यीशु के एगो जनाना केर संगे गोठियाते देइख के ताजुब करेक लगलैं, फिन भी केऊ इ नी पूछलैं कि तोके का चाही या तोंय इ जनाना केर संगे काले गोठियाथिस?

²⁸ तब उ जनाना अपन गगरी के हुवाँय छोइड़ देलक आउर नगर में जाय के आदमीमन के बताएक लगलक,

²⁹ “आवा, एगो आदमी के देखा, जे मोके उ सोउब के बताय देलक जे मोंय काइर हों। कहीं ओहे तो मसीह ना लगे?”

³⁰ तब उमन नगर से निकइल के यीशु के देखेक लगिन उकर ठिना आवेक लगलैं।

³¹ एतने में उकर चेलामन यीशु से बिनती करेक लगलैं, “हे गुरु, कोनों खाय ले।”

³² मगर यीशु उमन से कहलक, “मोर ठिना खाएक लगिन एइसन चीज अहे, जेकर बारे में तोहरेमन नी जानाला।”

³³ तब चेलामन आपस में कहलैं, “का केऊ हमर जाएक केर पाछे उकर लगिन कोनों खाएक ले लाइन हे?”

³⁴ यीशु उमन से कहलक, “जे मोके भेइज हे उकर इच्छा के मानेक आउर उकर काम के पूरा करेक, जेकर जिम्मा उ मोके देई हे, एहे मोर खाएक हेके।

³⁵ का तोहरेमन नी कहाला कि अब कटनी होवेक में चाइर महिना बचल अहे? मगर मोंय तोहरेमन से कहाथों, अपन आँइख खोइल के आवेक वाला आदमीमन के देखा, उमन खेत केर फसल नियर अहैं, जेमन कटनी लगिन तेयार अहैं, आदमीमन आगे हें से उमन के संगे लानाथैं आउर उमन जुग-जुग केर जिंदगी पाबैं।

³⁶ काटेक वालामन आगे हें से काम कराथैं आउर अपन मजूरी पावाथैं, आउर उ इ हेके, उमन उ आदमीमन के जमा कराथैं, जेमन जुग-जुग केर जिंदगी पाबैं, जेकर से बुनेक वाला आउर काटेक वाला दुयो मिल के खुशी मनाबैं।

³⁷ काले कि इकर उपरे इ कहावत ठीक बइठेला, ‘बुनाइया केऊ आउर हेके आउर कटइया केऊ आउर हेके।’

³⁸ मोंय तोहरेमन के उ खेत काटेक लगिन भेजलों, जेकर में तोहरेमन मेहनइत नी करला, दोसरमन मेहनइत करलैं आउर तोहरेमन के उ मनक मेहनइत केर मजूरी मिल गेलक।”

सामरी आदमीमन केर बिसवास करेक

³⁹ आउर उ जनाना नगर केर ढेइर सामरी आदमीमन के इ बताय रहे, “उ मोके मोर बारे में सोउब कुछ जे मोंय काइर हों बताय देई हे।” इ गोइठ केर चलते उ नगर केर ढेइर सामरी आदमीमन यीशु केर उपरे बिसवास करलैं।

⁴⁰ से लगिन जब उमन यीशु ठिना आलैं, तो उकर से बिनती करेक लगलैं, “तोंय हमर हिंयाँ रह।” यीशु हूवाँ दूई दिन तक रहलक।

⁴¹ आउर ढेइर आउरो आदमीमन उकर उपदेस सुइन के उकर उपरे बिसवास करलैं।

⁴² आउर उ जनाना से कहलैं, “अब हमरे सिरिफ तोर कहेक से भइर बिसवास नी करिला। हमरे खुद हें उकर से सुइन लेई ही आउर हमरे जाइन गेली कि एहे सचमुच में दुनिया केर आदमीमन केर छुटकारा देवाइया हेके।”

⁴³ दूई दिन बितेक केर पाछे यीशु हूवाँ से गलील परदेस चाइल गेलक।

⁴⁴ काले कि यीशु खुद हें बताय रहे कि परमेश्‍वर केर संदेश के बताएक वाला अपन देस में माइन नी पावेला।

⁴⁵ जब उ गलील परदेस में पोहोंचलक, तो हूवाँ केर आदमीमन यीशु केर स्वागत करलैं, काले कि यीशु फसह परब केर दिनमन में यरुशलेम शहर में जे काममन के काइर रहे, उ सोउब के हूवाँ केर आदमीमन देइख रहैं, उमन हों परब में हूवाँ जाय रहैं।

राजा केर अधिकारी केर बेटा के ठीक करेक

⁴⁶ इकर पाछे यीशु फिन गलील परदेस केर काना नगर में आलक, जहाँ उ पानी के अंगूर केर रस बनाय रहे। हूवाँ राजा केर एगो अधिकारी रहे, जेकर बेटा कफरनहूम नगर में बेमार रहे।

⁴⁷ जब उ अधिकारी सुनलक कि यीशु यहूदिया परदेस से गलील परदेस में आय हे, तब उ उकर ठिना आलक आउर यीशु से बिनती करेक लगलक कि उ जाय के उकर बेटा के ठीक काइर देवोक, काले कि उ मोरेक वाला रहे।

⁴⁸ यीशु उकर से कहलक, “जब तक तोहरेमन चिन्हा आउर चमत्कार केर काम नी देखबा तब तक तोहरेमन बिसवास नी करबा।”

⁴⁹ राजा केर अधिकारी उकर से कहलक, “हे प्रभु, इकर से पहले कि मोर छउवा मोइर जाई, मोर संगे चल।”

⁵⁰ यीशु उकर से कहलक, “जा, तोर बेटा जिंदा रही।” उ अधिकारी यीशु केर कहल गोइठ उपरे बिसवास करलक आउर घर चाइल गेलक।

⁵¹ उ अधिकारी डहर में हें रहे कि उकर धांगरमन मिललैं आउर उकर से कहलैं, “तोर छउवा जिंदा अहे।”

⁵² अधिकारी उमन से पूछलक, “उ कोन बेरा से बेस होवेक लइग रहे?” उमन उकर से कहलैं, “काइल दूई पहर के उकर जार उतइर गेलक।”

⁵³ तब छउवा केर आबा जाइन गेलक कि यीशु ठीक ओहे बेरा उकर से कइह रहे, “तोर बेटा जिंदा रही।” आउर उ, आउर उकर परिवार में रहेक वाला सोउब आदमीमन बिसवास करलैं।

⁵⁴ इ यीशु केर दूसरा चमत्कार केर काम रहे, जे उ यहूदिया परदेस से घूइर के गलील परदेस में करलक।