यूहन्ना 19 - सादरी नवाँ नियम

यीशु के कोड़रा मारेक आउर मजाक उड़ाएक

¹ तब राजपाल पिलातुस यीशु के लेई जाएक आउर उके कोड़रा मारेक केर हुकूम देलक।

² आउर सिपाहीमन काँटा वाला डाइर से एगो मुकुट बनाय के उकर मूँड़ में पिंधालैं आउर उके एगो राजा नियर राजसी बैगनी रंग केर लुगा पिंधालैं।

³ फिन उकर ठिना आय के कहेक लगलैं, “हे यहूदीमन केर राजा, प्रणाम!” आउर उमन यीशु के थप्पड़ हों मारलैं।

मौत केर हुकूम

⁴ राजपाल पिलातुस फिन महल से बाहरे निकइल के आदमीमन से कहलक, “देखा, मोंय उके तोहर सामने बाहरे लानाथों, जेकर से तोहरेमन जाइन लेवा कि मोंय उकर में कोनों दोष नी पालों।”

⁵ तब उमन यीशु के काँटा केर मुकुट आउर राजा नियर बैगनी रंग केर लुगा पिंधले बाहरे लानलैं। राजपाल पिलातुस आदमीमन से कहलक, “देखा, इ आदमी के।”

⁶ तब यहूदी मुध पुरोहितमन आउर मंदिर केर पहरादारमन उके देखते हें, चिल्लाय के कहलैं, “इके क्रूस उपरे चढ़ाव, क्रूस उपरे।” पिलातुस उमन से कहलक, “इके तोहरेमन हें लेई जावा आउर क्रूस उपरे चढ़ावा। मोंय तो इकर में कोनों दोष नी पालों।”

⁷ यहूदी धरम केर अगुवामन उके जबाब देलैं, “हमर हों एगो नियम अहे आउर उ नियम केर मोताबिक इ मौत केर सजा पावेक लाएक अहे, काले कि इ खुद के परमेश्‍वर केर बेटा बतायला।”

⁸ पिलातुस इ सुइन के आउर हें डराय गेलक।

⁹ उ फिन महल केर भीतरे गेलक आउर यीशु से पूछलक, “तोंय कहाँ केर हेकिस?” मगर यीशु उके कोनोवें जबाब नी देलक।

¹⁰ पिलातुस यीशु से कहलक, “तोंय मोर से काले कोनों नी कहाथिस? का तोंय इ नी जानिसला कि तोके छोड़ेक केर अधिकार हों मोके अहे आउर तोके क्रूस उपरे चढ़ाएक केर हों अधिकार मोके अहे।”

¹¹ यीशु उके जबाब देलक, “अगर तोके परमेश्‍वर बटे से अधिकार नी देवल जातक, तो मोर उपरे तोर कोनों अधिकार नी होतक। इ लगिन जे मोके तोर हाँथ में जिम्मा देई हे उकर पाप बगरा अहे।”

¹² यीशु केर जबाब सुइन के राजपाल पिलातुस उके छोड़ेक केर आउर हें कोशिश करेक लगलक। मगर यहूदी धरम केर अगुवामन आउर भीड़ केर आदमीमन चिल्लाय-चिल्लाय के कहलैं, “अगर तोंय इके छोइड़ देबे तो तोंय महाराजा केर भलाई करेक वाला ना लगिस। जे केऊ हों खुद के राजा कहेला, उ महाराजा केर बिरोध करेला।”

¹³ इ गोइठ सुइन के राजपाल पिलातुस यीशु के बाहरे लानेक केर आगया देलक। आउर उ पखना केर चबूतरा में जे इब्रानी भाषा में गब्ब्ता कहायला, जहाँ फैसला करेक केर कुरसी रहे, उकर में बाइठ गेलक।

¹⁴ इ यहूदी मनक फसह परब केर हफ्ता रहे आउर तेयारी केर दिन रहे। आउर लगभग दूई पहर केर बेरा रहे, पिलातुस यहूदी आदमीमन से कहलक, “देखा, इ हेके तोहरेमन केर राजा।”

¹⁵ मगर उमन चिल्लाएक लगलैं, “इके लेई जा! इके लेई जा! इके क्रूस उपरे चढ़ाव।” पिलातुस उमन से कहलक, “का मोंय तोहरेमन केर राजा के क्रूस उपरे चढ़ामूँ?” यहूदी मुध पुरोहितमन जबाब देलैं, “रोमी महाराजा के छोइड़ के हमर केऊ आउर राजा नखे।”

¹⁶ तब पिलातुस यीशु के क्रूस उपरे चढ़ाएक लगिन उमन के जिम्मा देई देलक।

यीशु के क्रूस उपरे चढ़ाल जाएक

¹⁷ तब पलटनमन यीशु के अपन कब्जा में लेई लेलैं। आउर उमन उके अपन क्रूस खुद उठवालैं आउर यरुशलेम शहर से बाहरे खोपड़ी नाँव केर एगो ठाँव में लेई गेलैं, जेके इब्रानी भाषा में गुलगुता कहैना।

¹⁸ हूवाँ उमन यीशु के आउर उकर संगे आउर दूई झन आदमीमन के क्रूस उपरे चढ़ालैं, एगो के यीशु केर भतखाइया आरा आउर एगो के लेंगा आरा आउर माझे में यीशु के।

¹⁹ आउर राजपाल पिलातुस एगो दोष चिट्ठी हों लिखवाय के क्रूस उपरे लगाय देलक। उकर में इ लेखे लिखल रहे, “नासरत नगर केर रहेक वाला यीशु, यहूदीमन केर राजा।”

²⁰ इ दोष चिट्ठी के ढेइर यहूदी आदमीमन पढ़लैं, काले कि उ ठाँव जहाँ यीशु क्रूस उपरे चढ़ाल जाय रहे, यरुशलेम शहर केर भीरे हें रहे आउर दोष चिट्ठी इब्रानी, लतीनी आउर यूनानी भाषा में लिखल रहे।

²¹ तब यहूदी मुध पुरोहितमन राजपाल पिलातुस से कहलैं, “तोंय यहूदीमन केर राजा ना लीख। मगर इ लीख, ‘इ कइह रहे कि मोंय यहूदीमन केर राजा हेकों।’ ”

²² पिलातुस उमन के जबाब देलक, “मोंय जे लीख देलों, से लीख देलों, अब इके नी बदलमूँ।”

²³ यीशु के क्रूस उपरे चढ़ाएक केर पाछे पलटनमन उकर लुगा के लेई के चाइर टुकरा करलैं, आउर चाइरो पलटनमन एक-एक टुकरा लेई गेलैं। आउर उकर बाहरी लुगा के हों लेई गेलैं, उ बाहरी लुगा सियाल नी रहे मगर उपरे से हेंठे तक बिनल रहे।

²⁴ से लगिन पलटनमन एक दोसर से कहलैं, “हमरे इके नी चिरब, मगर इकर लगिन चिट्ठी साजब कि उ केके मिली।” एइसन इ लगिन होलक कि पवितर किताब में लिखल इ गोइठ पूरा होई जाओक, “उमन मोर लुगा के आपस में बाँइट लेलैं आउर मोर लुगा उपरे चिट्ठी साजलैं।” आउर पलटनमन एइसनेहें करलैं।

यीशु केर आयो

²⁵ यीशु केर क्रूस ठिना उकर आयो, उकर आयो केर बहिन, क्लोपास केर जनाना मरियम आउर मगदला गाँव केर मरियम ठड़ाय रहैं।

²⁶ यीशु अपन आयो के आउर उकर ठिना ठड़ाल एगो चेला के जेकर से उ प्रेम करत रहे, देखलक तो अपन आयो से कहलक, “हे महिला, देख, इ तोर बेटा हेके।”

²⁷ इकर पाछे यीशु उ चेला से कहलक, “देख, इ तोर आयो हेके।” आउर ओहे बेरा से उ चेला मरियम के अपन घर में लेई गेलक आउर परिवार केर हिस्सा बनालक।

यीशु केर काम पूरा होवेक आउर उकर माउत

²⁸ इकर पाछे यीशु इ जाइन के कि अपन सोउब काम काइर सिरालक, पवितर किताब में लिखल गोइठ पूरा करेक केर मकसद से कहलक, “मोंय पियासा अहों।”

²⁹ हूवाँ अमल रस से भरल एगो बासन रहे, उमन एगो पाइनसोखा के अमल रस में डुबालैं आउर जुफे गाँछ केर सोंटा में चुभाय के यीशु केर मुँह में सटाय देलैं।

³⁰ यीशु अमल रस के चाइख के कहलक, “सोउब काम पूरा होलक।” आउर मूँड़ झुकाय के प्राण देई देलक।

यीशु के बरछा से बेधल जाएक

³¹ अब इ तेयारी केर दिन रहे। आउर अगला दिन यहूदी मनक आराम केर दिन आउर फसह परब दुयो रहे। इ यहूदी आदमीमन लगिन एगो खास दिन रहे। यहूदी धरम केर अगुवामन नी चाहत रहैं कि इ दिन लाश क्रूस उपरे रहोक। से लगिन उमन राजपाल पिलातुस से कहलैं कि उ दुयो आदमी मनक टांग तुरवाय दे ताकि उमन जल्दी मोइर जाओक आउर उ मनक लाश के हेंठे उतराल जाओक।

³² से लगिन पलटनमन आय के यीशु केर संगे क्रूस उपरे चढ़ाल पहिला आदमी केर टांग तोइर देलैं, फिन दूसरा केर हों।

³³ जब उमन यीशु ठिना आय के देखलैं कि उ मोइर चुइक हे, तो उकर टांग नी तोरलैं।

³⁴ मगर पलटनमन में से एगो बरछा से पंजरा के बेधलक आउर उकर में से तुरते लोहू आउर पानी निकललक।

³⁵ जे आदमी इ सोउब घटना के देखलक, ओहे इकर गवाही देई हे, ताकि तोहरेमन हों यीशु केर उपरे बिसवास करेक पारबा। आउर उकर गवाही सच हेके, आउर उ जानेला कि उ सच कहाथे।

³⁶ एइसन इ लगिन होलक कि पवितर किताब में लिखल इ गोइठ पूरा होई जाओक, “उकर एको गो हड्डी नी टुटाल जाई।”

³⁷ फिन पवितर किताब केर एगो आउर ठाँव में इ लिखल अहे, “जेके उमन बेइध हैं, उकर उपरे ओहोमन केर नजइर होवी।”

यीशु के पखना केर कबर में रखेक

³⁸ इ गोइठमन केर पाछे अरिमतियाह गाँव केर यूसुफ, जे यीशु केर चेला रहे, मगर यहूदी धरम केर अगुवामन केर डार से इ गोइठ के लुकाय रखत रहे। उ राजपाल पिलातुस से अरजी काइर के कहलक, “मोंय यीशु केर लाश के लेई जामूँ?” पिलातुस उकर अरजी के सुनलक, आउर उ आय के यीशु केर लाश के लेई गेलक।

³⁹ नीकुदेमुस हों जे आगे राइत केर बेरा यीशु से मिलेक आय रहे। ओहो लगभग तैंतीस किलो धमधमी महकेक वाला आउर एलवा मिलाल वाला गंधरस के लानलक।

⁴⁰ तब उमन यीशु केर लाश के लेलैं आउर यहूदीमन केर गाड़ेक केर रीति केर मोताबिक उकर में उ धमधमी महकेक वाला गंधरस आउर एलवा के माखलैं आउर उके मलमल केर कफन लुगा से लपाइट देलैं।

⁴¹ जहाँ यीशु के क्रूस उपरे चढ़ाल जाय रहे, उकर भीरे एगो बगाइचा रहे आउर उ बगाइचा में एगो नवाँ कबर पखना में खोदल रहे, उकर में कहियो केखो नी राइख रहैं।

⁴² से लगिन उमन यीशु केर लाश के हुवाँय राइख देलैं। काले कि इ दिन यहूदी मनक तेयारी केर दिन रहे, आउर कबर हों भीरे रहे।