यूहन्ना 17 - सादरी नवाँ नियम

यीशु केर अपन खुद लगिन प्रार्थना

¹ यीशु अपन चेलामन से इ गोइठमन के कहेक केर पाछे स्वरग बटे देइख के कहलक, “हे आबा परमेश्‍वर, उ बेरा आय जाहे कि तोंय मोर महिमा कर, जे तोर अपन बेटा हेकों, जेकर से मोंय तोर बेटा हों तोर महिमा करमूँ।

² काले कि तोंय मोके जे तोर बेटा हेकों, सोउब आदमीमन केर उपरे अधिकार देले, जेकर से मोंय सोउब आदमीमन के जेमन के तोंय मोके जिम्मा देई हिस, जुग-जुग केर जिंदगी देमूँ।

³ आउर जुग-जुग केर जिंदगी इ हेके कि उमन तोके जे एके गो सच्चा परमेश्‍वर हेकिस आउर मोंय यीशु मसीह के, जेके तोंय भेइज हिस, जानोक।

⁴ जे काम तोंय मोके करेक ले देई रहिस, उके मोंय पूरा काइर के दुनिया में तोर महिमा काइर हों।

⁵ आउर अब, हे आबा परमेश्‍वर, तोंय अपन संगे मोर महिमा उ महिमा से कर, जे दुनिया केर सिरजन होवेक से आगे मोर, तोर संगे रहे।

यीशु केर अपन चेलामन लगिन प्रार्थना

⁶ तोंय जे आदमीमन के दुनिया केर आदमीमन में से चुइन के मोके देले। उमन के मोंय बतालों कि तोंय के हेकिस, उमन तोर रहैं आउर तोंय उमन के मोके देले आउर उमन तोर बचन के माइन लेई हैं।

⁷ अब उमन जाइन जाय हैं कि जे कुछ तोंय मोके देई हिस, सोउब तोर बटे से अहे।

⁸ काले कि जे बचन तोंय मोके देई हिस, ओहे बचन मोंय उमन के बतालों आउर उमन बचन केर उपरे बिसवास करलैं। आउर सचमुच जाइन गेलैं कि मोंय तोर बटे से आय हों आउर एहो बिसवास काइर लेई हैं कि तोंय हें मोके भेइज हिस।

⁹ मोंय उमन लगिन प्रार्थना नी कराथों, जेमन दुनिया से नाता रखैना मगर उमन लगिन प्रार्थना कराथों, जेमन के तोंय मोके देई हिस, काले कि उमन तोर हेकैं।

¹⁰ आउर जेमन मोर हेकैं, उमन सोउब तोर हेकैं, आउर जेमन तोर हेकैं, उमन सोउब मोर हेकैं। आउर उमन से मोर महिमा दिस्तार होई हे।

¹¹ मोंय अब दुनिया में नी रहमूँ, मोंय तोर ठिना आवाथों मगर मोर चेलामन दुनिया में रहबैं। हे पवितर आबा परमेश्‍वर, तोंय उ नाँव केर शक्ति से जेके तोंय मोके देई हिस, उमन केर रक्षा कर। जेकर से उमन हों हमर लेखे एक होबैं।

¹² जब मोंय उमन केर संगे रहों, तो मोंय तोर उ नाँव केर शक्ति से जेके तोंय मोके देई हिस, उमन केर रक्षा करलों, मोंय उमन केर देख-रेख करलों। जेकर नाश होवेक पक्का रहे, उके छोइड़ के उमन में से केऊ नाश नी होलैं। जेकर से पवितर किताब में लिखल गोइठ पूरा होवोक।

¹³ मगर अब मोंय तोर ठिना आवाथों, आउर इ गोइठमन के दुनिया में रहते कहाथों। जेकर से उ मनक मन मोर खुशी से भाइर जाओक।

¹⁴ मोंय तोर बचन के उमन के बताय देई हों, आउर दुनिया केर आदमीमन उमन से घिरना करलैं। काले कि जइसन मोर दुनिया से कोनों नाता नखे, तइसनेहें उमन केर हों दुनिया से कोनों नाता नखे।

¹⁵ मोंय तोर से इ प्रार्थना नी कराथों कि तोंय उमन के दुनिया से उठाय ले, मगर मोंय इ लगिन प्रार्थना कराथों कि तोंय उमन के उ दुष्ट शैतान से बचाय के रखबे।

¹⁶ जइसन कि मोर दुनिया से कोनों नाता नखे, तइसनेहें उमन केर हों दुनिया से कोनों नाता नखे।

¹⁷ तोर बचन सच्चा हेके। से लगिन तोंय सच्चाई केर बचन से उमन के पवितर बनाव।

¹⁸ जे लेखे तोंय मोके दुनिया केर आदमीमन केर माझे भेइज हिस, ओहे लेखे मोंय हों उमन के दुनिया केर आदमीमन केर माझे भेइज हों।

¹⁹ आउर उमन केर फायदा लगिन मोंय खुद के पवितर कराथों, जेकर से उमन हों सच्चाई केर बचन से पवितर करल जाओक।

यीशु केर अपन सोउब बिसवासी आदमीमन लगिन प्रार्थना

²⁰ मोंय सिरिफ अपन चेलामन लगिन प्रार्थना नी कराथों, मगर उमन लगिन हों जेमन इमन केर देवल बचन के सुइन के मोर उपरे बिसवास करबैं,

²¹ कि उमन सोउब एक होई जाओक। हे आबा परमेश्‍वर, जइसन तोंय मोर में अहिस, आउर मोंय तोर में अहों, तइसनेहें उमन हों हमर में होई जाओक। जेकर से इ दुनिया केर आदमीमन इ बिसवास करोक कि तोंय हें मोके भेइज हिस।

²² तोंय जे महिमा मोके देले, ओहे महिमा के मोंय उमन के देई हों, ताकि उमन हों हमर नियर एक होबैं।

²³ तोंय मोर में आउर मोंय उमन में, जेकर से उमन पूरा-पुरी एक होई जाओक, आउर दुनिया केर आदमीमन जाइन लेवोक कि तोंय हें मोके भेइज हिस, आउर जे लेखे तोंय मोर से प्रेम करले, ओहे लेखे तोंय उमन से हों प्रेम करले।

²⁴ हे आबा परमेश्‍वर, मोंय चाहाथों कि जेमन के तोंय मोके देई हिस, उमन जहाँ मोंय अहों हूवाँ मोर संगे रहोक, जेकर से उमन मोर महिमा के देखेक पारोक, जेके तोंय मोके देई हिस, काले कि तोंय दुनिया केर सिरजेक से आगे मोर से प्रेम काइर हिस।

²⁵ हे धरमी आबा परमेश्‍वर, दुनिया केर आदमीमन तोके नी जानलैं, मगर मोंय तोके जानलों, आउर मोर चेलामन हों जानलैं कि तोंय हें मोके भेइज हिस।

²⁶ आउर मोंय उमन के बतालों कि तोंय के हेकिस आउर बताते रहमूँ, जेकर से जे प्रेम मोके देई हिस ओहे प्रेम उमन में बनल रहोक आउर मोंय हों उमन में बनल रहमूँ।”