यूहन्ना 1 - सादरी नवाँ नियम

शुरु में बचन रहे

¹ दुनिया केर सिरजन से आगे बचन रहे, आउर बचन परमेश्‍वर केर संगे रहे, आउर बचन परमेश्‍वर रहे।

² एहे बचन शुरु से परमेश्‍वर केर संगे रहे।

³ परमेश्‍वर सोउब कुछ उकरे से सिरजालक आउर जे कुछ सिरइज हे, उकर में से कोनोवें चीज उकर बिना नी सिरइज हे।

⁴ बचन जिंदगी केर सोता हेके आउर ओहे सोउब आदमीमन के इंजोत देवेक वाला हेके।

⁵ आउर उ इंजोत अंधार में चमकेला आउर अंधार उके बुताएक नी पारलक।

⁶ परमेश्‍वर एगो आदमी के भेजलक, जेकर नाँव यूहन्ना रहे।

⁷ उ इंजोत केर बारे में बताएक आलक, ताकि सोउब आदमीमन इंजोत केर बारे में बताल उकर गोइठ के बिसवास करोक।

⁸ उ खुद तो इंजोत नी रहे, मगर उ इंजोत केर बारे में बताएक आय रहे।

⁹ जे सच्चा इंजोत हेके आउर सोउब आदमीमन के इंजोत करेला, दुनिया में आवेक वाला रहे।

¹⁰ उ दुनिया में रहे आउर दुनिया उकरे से सिरजलक मगर दुनिया केर आदमीमन उके नी चिन्हलैं।

¹¹ उ अपन आदमीमन ठिना आलक आउर उकर अपन आदमीमन हें उके ठुकराय देलैं।

¹² मगर जेतना आदमीमन उके अपनालैं आउर उकर उपरे बिसवास करलैं, उ सोउबमन के परमेश्‍वर केर संतान बनेक केर अधिकार देलक।

¹³ उमन ना तो आयो-आबा से, ना आदमी केर इच्छा से आउर ना आदमी केर संतान पावेक केर इच्छा से जनइम हैं, मगर उमन परमेश्‍वर से जनइम हैं।

¹⁴ आउर बचन एगो आदमी बनलक आउर उ आदमी किरपा आउर सच्चाई से भाइर के हमर माझे रहलक। आउर हमरे उकर एइसन महिमा देखली, जइसन परमेश्‍वर आबा केर बटे से आवल एकलौता बेटा केर महिमा।

¹⁵ यूहन्ना आदमीमन के हकाय-हकाय के उकर बारे में गवाही देई के कहलक, “इ ओहे हेके, जेकर बारे में मोंय कइह रहों कि जे मोर पाछे आवेक वाला अहे उ मोर से महान अहे, काले कि उ मोर से पहिले मौजूद रहे।”

¹⁶ काले कि उकर भरपूरी में से हमरे आशीष उपरे आशीष पाली।

¹⁷ परमेश्‍वर केर नियम मूसा बटले देवल जाय रहे, मगर परमेश्‍वर अपन किरपा आउर सच्चाई के यीशु मसीह बटले हमरे तक पोंहचालक।

¹⁸ परमेश्‍वर के केऊ कहियो नी देइख हैं मगर एकलौता बेटा जे खुद परमेश्‍वर हेके, जे आबा केर कोरा में अहे, ओहे उके हमर उपरे दिस्तार काइर हे।

यूहन्ना बपतिस्मा जल संस्कार देवेक वाला केर गवाही

¹⁹ यूहन्ना केर गवाही इ हेके कि जब यहूदी धरम केर अगुवामन यरुशलेम शहर से पुरोहितमन के आउर मंदिर में काम करेक वाला लेवी केर खानदान केर आदमीमन के यूहन्ना बपतिस्मा जल संस्कार देवेक वाला ठिना इ पूछेक लगिन भेजलैं, “तोंय के हेकिस?”

²⁰ तो यूहन्ना उमन के सोझे कइह देलक, “मोंय मसीह ना लगों।”

²¹ तब उमन उकर से पूछलैं, “तो फिन तोंय के हेकिस? का तोंय परमेश्‍वर केर संदेश के बताएक वाला एलिय्याह हेकिस?” यूहन्ना कहलक, “मोंय परमेश्‍वर केर संदेश के बताएक वाला एलिय्याह ना लगों।” तब उमन फिन पूछलैं, “तो का तोंय परमेश्‍वर केर संदेश के बताएक वाला उ हेकिस, जे आवेक वाला रहे?” यूहन्ना जबाब देलक, “निहीं।”

²² तब उमन फिन उकर से पूछलैं, “फिन तोंय के हेकिस? जेमन तोर से पूछेक लगिन हमरे के भेइज हैं, उमन के हमरे का जबाब देब? तोंय अपन बारे में का कहिसला?”

²³ यूहन्ना जबाब देलक, “जइसन परमेश्‍वर केर संदेश के बताएक वाला यशायाह कइह हे, ‘मोंय सुनसान ठाँव में एगो हकाएक वाला केर शबद हेकों कि तोहरेमन प्रभु से मिलेक लगिन अपन मन के तेयार करा।’”

²⁴ इमन के फरीसी दल केर आदमीमन भेइज रहैं।

²⁵ उमन यूहन्ना से इ सवाल पूछलैं, “अगर तोंय ना तो मसीह हेकिस आउर ना एलिय्याह, आउर ना आवेक वाला परमेश्‍वर केर संदेश के बताएक वाला हेकिस, तो फिन बपतिस्मा जल संस्कार काले देविसला?”

²⁶ यूहन्ना उमन के जबाब देलक, “मोंय तो पानी में बपतिस्मा जल संस्कार देवोना, मगर तोहरेमन केर माझे एगो आदमी ठड़ाल अहे, जेके तोहरेमन नी जानाला।

²⁷ मतलब जे मोर पाछे आवेक वाला अहे, मोंय तो उकर जूता केर बाँधल डोरा के खोलेक केर लाएक हों नखों।”

²⁸ इ गोइठमन यरदन नदी केर पार बैतनिय्याह गाँव में होलक, जहाँ यूहन्ना बपतिस्मा जल संस्कार देवत रहे।

परमेश्‍वर केर मेमना

²⁹ दूसरा दिन यूहन्ना यीशु के अपन बटे आते देइख के कहलक, “देखा, इ परमेश्‍वर केर मेमना हेके, जे खुद के बलिदान काइर के दुनिया केर पाप के उठाय लेवी।

³⁰ इ ओहे हेके, जेकर बारे में मोंय कइह रहों कि मोर पाछे एगो आदमी आवेक वाला अहे, उ मोर से महान अहे, काले कि उ मोर से पहिले मौजूद रहे।

³¹ मोंय हों उके नी चिन्हत रहों कि उ मसीह हेके, से लगिन इसराइली आदमीमन के इ बताएक लगिन कि उ के हेके, मोंय पानी में बपतिस्मा जल संस्कार देते आलों।”

³² आउर यूहन्ना इ गवाही देलक, “मोंय पवितर आत्मा के पेरवाँ केर रूप में आकाश से उतरते देइख हों, आउर उ यीशु केर उपरे रूइक गेलक।

³³ मोंय हों उके नी चिन्हत रहों कि उ मसीह हेके, मगर जे मोके पानी में बपतिस्मा जल संस्कार देवेक लगिन भेजलक, ओहे मोर से कहलक, ‘जेकर उपरे तोंय पवितर आत्मा के उतरते आउर उकर में रुकते देखबे, ओहे पवितर आत्मा से बपतिस्मा देवेक वाला हेके।’

³⁴ मोंय खुद देखलों आउर तोहरेमन से सच कहाथों कि एहे परमेश्‍वर केर बेटा हेके।”

यीशु केर पहिला चेला

³⁵ दूसरा दिन फिन यूहन्ना अपन दूई गो चेलामन केर संगे ठड़ाय रहे।

³⁶ उ यीशु के जाते देइख के कहलक, “देखा, एहे परमेश्‍वर केर मेमना हेके।”

³⁷ जब उ दुयो चेलामन यीशु केर बारे में इ गोइठ के सुनलैं तो उमन यीशु केर पिछे जाएक लगलैं।

³⁸ यीशु पिछे उलइट के उमन के अपन पिछे आवेक देखलक तो उमन से कहलक, “तोहरेमन का चाहाला?” उमन उकर से कहलैं, “हे गुरु, तोंय कहाँ रहिसला?”

³⁹ यीशु उमन से कहलक, “आवा आउर देइख लेवा।” उमन उकर संगे जाय के देखलैं कि उ कहाँ रहेला। इ समय साँझ केर लगभग चाइर बाइज रहे। आउर उ दिन उमन यीशु केर संगे रहलैं।

⁴⁰ जे चेलामन यूहन्ना केर गोइठ सुइन के यीशु केर संगे आय रहैं, उमन में से एगो सिमोन पतरस केर भाई अन्द्रियास रहे।

⁴¹ उ पहिले अपन सगा भाई सिमोन से मिललक आउर उके बतालक, “हमरे के ख्रिस्त मतलब मसीह मिल जाय हे।”

⁴² आउर उ सिमोन के यीशु ठिना लेई गेलक। यीशु उके धेयान से देइख के कहलक, “तोंय यूहन्ना केर बेटा सिमोन हेकिस, तोंय कैफा मतलब पतरस नाँव से जानल जाबे।”

फिलिप्पुस आउर नतनएल के बोलाल जाएक

⁴³ दूसरा दिन यीशु गलील परदेस केर इलाका में जाएक केर ठाइन लेलक। हूवाँ उकर भेंट फिलिप्पुस से होलक आउर यीशु उकर से कहलक, “मोर पिछे होई ले आउर मोर चेला बाइन जा।”

⁴⁴ फिलिप्पुस हों अन्द्रियास आउर पतरस केर नगर बैतसैदा गाँव केर रहेक वाला रहे।

⁴⁵ फिलिप्पुस नतनएल से भेंट करलक आउर उके बतालक, “हमरे के उ आदमी मिल गेलक जेकर बारे में मूसा केर नियम में लिखल अहे आउर परमेश्‍वर केर संदेश के बताएक वालामन हों लीख हैं। उ नासरत नगर केर यूसुफ केर बेटा यीशु हेके।”

⁴⁶ नतनएल उकर से कहलक, “का नासरत नगर से हों कोनों बेस चीज निकलेक पारेला?” फिलिप्पुस उकर से कहलक, “आव हमरे खुद हें देइख लेब।”

⁴⁷ यीशु नतनएल के अपन बटे आवेक देइख के उकर बारे में कहलक, “देखा, इ एगो सच्चा इसराइली आदमी हेके, इ एकदम ईमानदार अहे।”

⁴⁸ नतनएल यीशु से कहलक, “तोंय मोके का लेखे जानिसला?” यीशु उके जबाब देलक, “फिलिप्पुस तोके बोलाएक जाय रहे, सेकर से पहिले मोंय तोके अंजीर केर गाँछ हेंठे देइख रहों।”

⁴⁹ तब नतनएल उके जबाब देलक, “हे गुरु, तोंय परमेश्‍वर केर बेटा हेकिस आउर इसराइल देस केर राजा हेकिस।”

⁵⁰ यीशु उके जबाब देलक, “मोंय तोर से कहलों कि तोके अंजीर केर गाँछ हेंठे देइख रहों, का तोंय सेहे लगिन बिसवास करिसला? तोंय इकर से बड़का-बड़का काम देखबे।”

⁵¹ फिन यीशु उकर से एहो कहलक, “मोंय तोहरेमन से सच-सच कहाथों कि तोहरेमन स्वरग के खोलल आउर परमेश्‍वर केर स्वरगदूतमन के मोंय आदमी केर बेटा केर उपरे उतरते आउर मोर से फिन स्वरग जाते देखबा।”