याकूब 4 - सादरी नवाँ नियम

दुनिया से दोस्ती

¹ तोहर माझे लड़ाईमन आउर झगरामन काले होवेला? इ उ स्वार्थी इच्छामन से आवेला जे तोहर अंगमन में लड़ते-भिड़ते रहेला।

² तोहरेमन जेकर लालसा कराला आउर उ तोहरे के नी मिलेला, तो तोहरेमन हत्या करेक ले तेयार होई जावाला। तोहरेमन उ चीजमन केर लोभ कराला जे दोसरमन ठिना अहे लेकिन तोहरे के कोनों नी मिलेला, सेहे लगिन तोहरे लाड़ाला आउर झगरा कराला। तोहरे के इ लगिन नी मिलेला काले कि तोहरे परमेश्‍वर से नी माँगाला।

³ तोहरेमन माँगाला फिन भी तोहरे के नी मिलेला, काले कि तोहरे बुरा इच्छा से माँगाला, ताकि अपन मौज मस्ती में उड़ाय देबा।

⁴ हे धोखा देवाइयामन, का तोहरेमन इ नी जानाला कि दुनिया से दोस्ती करेक परमेश्‍वर से बैर करेक हेके? एहे लेखे जे केऊ दुनिया से दोस्ती करेक चाहेला, उ खुद के परमेश्‍वर केर बैरी बनायला।

⁵ का तोहरेमन इ सोचाथा कि पवितर किताब बेकार हें कहेला कि जे पवितर आत्मा के उ हमर भीतरे बसाय हे, उ सिरिफ एहे इच्छा रखेला कि हमरे सिरिफ उकरे आराधना करब?

⁶ उ किरपा जे परमेश्‍वर हमरेमन के देवेला ढेइर शक्तिशाली अहे, एहे लगिन पवितर किताब में लिखल अहे, “परमेश्‍वर घमंडीमन से बिरोध करेला, मगर नरम आदमीमन केर उपरे किरपा करेला।”

⁷ से लगिन तोहरेमन परमेश्‍वर केर अधीन होई जावा आउर शैतान केर सामना करा, तो उ तोहर ठिना से भाइग जाई।

⁸ परमेश्‍वर केर भीरे आबा तो उ हों तोहर भीरे आवी। हे पापीमन, अपन जिंदगी के पापमन से दूर करा। हे दूई मन वाला आदमीमन, अपन हिरदय के पवितर करा।

⁹ अपन पापमन लगिन दुःखी होवा आउर शोक करा आउर काँदा। तोहर हँसी शोक में आउर तोहर खुशी उदासी में बदइल जाओक।

¹⁰ प्रभु केर सामने नरम बना तो उ तोहरेमन के ऊँचा उठाई।

दोसरमन केर निंदा नी करेक चाही

¹¹ हे भाईमन, एक दोसर केर निंदा ना करा। जे अपन भाई केर निंदा करेला चाहे उकर उपरे दोष लगायला तो उ परमेश्‍वर केर नियम केर निंदा करेला। आउर उकर उपरे दोष लगायला। अगर तोहरेमन परमेश्‍वर केर नियम केर उपरे दोष लगावला तो तोहरेमन उ नियम केर उपरे चलेक वाला निहीं मगर नियम केर फैसला करेक वाला बनाला।

¹² नियम देवेक वाला आउर फैसला करेक वाला हाकिम तो सिरिफ परमेश्‍वर हें हेके, जेकर में बचाएक आउर नाश करेक केर शक्ति अहे। मगर तोहरेमन के हेका, जे अपन पड़ोसीमन केर उपरे दोष लगावला?

घमंड केर बिरोध में चेतावनी

¹³ तोहरेमन जे इ कहाला, “आइज चाहे काइल हमरे कोनों आउर नगर में जाय के हूवाँ एक बरिस बिताब, आउर बेपार काइर के रुपया कमाब।”

¹⁴ मगर तोहरेमन इ नी जानाला कि काइल का होवी। सुइन तो लेवा, तोहरेमन केर जिंदगी कतइ हें दिन लगिन अहे? तोहरेमन केर जिंदगी तो कुहाँस नियर अहे, जे थोरेक देरी देखाई देवेला, फिन लूइक जायला।

¹⁵ इकर उलटा तोहरेमन के इ कहेक चाही, “अगर प्रभु चाही तो हमरे जिंदा रहब आउर इ चाहे उ काम के करब।”

¹⁶ मगर अब तोहरेमन अपन अहंकार से बनाल योजना उपरे घमंड कराला, एइसन सोउब घमंड बुरा होवेला।

¹⁷ एहे लगिन जे केऊ भलाई करेक जानेला आउर नी करेला, उकर लगिन इ पाप हेके।