याकूब 3 - सादरी नवाँ नियम

जीभ के काबू में रखेक

¹ हे मोर भाईमन, तोहर में से ढेइरमन परमेश्‍वर केर बचन के सिखाएक वाला ना बनबा, काले कि तोहरे जानाला कि हमरे सिखाएक वालामन केर आउर हें कड़ाई से फैसला करल जाई।

² हमरेमन से कायनों बेर गलती होई जायला। मगर जे केऊ बोलेक में गलती नी करेला ओहे सिद्ध आदमी हेके आउर उ खुद के पूरा काबू करेक पारेला।

³ जब हमरे घोड़ामन के अपन काबू में करेक लगिन उमन केर मुँह में लगाम लगाइयला, तब हमरे उ मनक समूचा काया के अपन काबू में करेक पारिला।

⁴ देखा, पानी जहाज हों चाहे केतना हों बाड़ होवेला आउर उके तेज धुका से चलाल जायला फिन भी एगो छोटेसन डांग से चलाएक वाला केर इच्छा केर मोताबिक घुमाल जायला।

⁵ तइसनेहें जीभ हों एगो छोटेसन अंग हेके मगर उ बड़का-बड़का डींग मारेला। सोचा तो, एगो छोटेसन चिनगी से केतना बड़का बान में आइग लाइग जायला।

⁶ जीभ हों एगो आइग नियर अहे। उ हमर काया केर छोटेसन अंग हेके, जेकर में दुनिया भइर केर बुराई अहे आउर उ आदमी केर पूरा काया उपरे दाग लगाय के उकर पूरा जिंदगी में आइग लगाय देवेला आउर खुद नरक केर आइग में पोड़ते रहेला।

⁷ हर रकम केर जंगली जानवर, चरई, रेंगेक वाला जंतु आउर पानी में रहेक वाला जीव-जंतुमन तो आदमी जाइत केर काबू में होवेक पारैना आउर होई हों जाय हैं।

⁸ मगर जीभ के आदमीमन में से केऊ हों अपन काबू में करेक नी पारैना, उ एगो एइसन बुरा अंग हेके, जे कहियो स्थिर नी रहेला। उ प्राण के नाश करेक वाला बिष से भरल अहे।

⁹ एहे जीभ से हमरे प्रभु आउर आबा परमेश्‍वर केर स्तुति करिला आउर इकरे से आदमीमन के जेमन परमेश्‍वर केर रूप में सिरजाल जाय हैं सराप देवीला।

¹⁰ एहे मुँह से हमरे धन्यबाद देवीला आउर एहे मुँह से सराप देवीला। हे मोर भाईमन, एइसन बिलकुल नी होवेक चाही।

¹¹ एके गो कुआँ से मिठा आउर खारा दुयो पानी नी निकलेला।

¹² हे मोर भाईमन, अंजीर केर गाँछ में जैतून चाहे अंगूर केर गाँछ में अंजीर नी फरेला, एहे नियर खारा कुआँ से मिठा पानी नी निकलेक पारेला।

स्वरग केर गेयान

¹³ तोहरेमन में गेयानी आउर समझदार के हेके? अगर तोहर में से केऊ अहा, तो बेस जिंदगी जी के आउर नरम बाइन के जे तोहर गेयान से आवेला बेस काम काइर के देखावा।

¹⁴ आउर अगर तोहरे अपन-अपन मन में ढेइर जलन रखेक वाला आउर मतलबी अहा तो इ घमंड ना करा कि गेयानी अहा। अगर एइसन कराला तो तोहरे सच के झूठ में बदइल देवाला।

¹⁵ इ गेयान उ ना लगे, जे परमेश्‍वर बटले आवेला मगर इ दुनियादारी आउर काया आउर शैतान केर बटले अहे।

¹⁶ काले कि जहाँ जलन आउर मतलबी स्वभाव होवेला हूवाँ अशांति आउर हर रकम केर बुरा गोइठ होवेला।

¹⁷ मगर जे गेयान परमेश्‍वर बटले आवेला उ पहिले तो पवितर होवेला, फिन शांति के पतियाएक वाला, कोमल, सभ्य, दया से भरल, बेस फारमन से लादल आउर भेद-भाव आउर कपट नी करेक वाला होवेला।

¹⁸ जेमन मेल-मिलाप करुवायना उमन शांति केर बिहीन बुनैना आउर धरमी होवेक केर अन्न काटबैं।