याकूब 2 - सादरी नवाँ नियम

भेद भाव केर बिरोध में चेतावनी

¹ हे मोर भाईमन, तोहरेमन हमर महिमा से भरल प्रभु यीशु मसीह केर चेलामन हेका से लगिन तोहर माझे भेद भाव ना होवोक।

² माइन लेवा तोहरे केर सभा में एगो आदमी सोना केर अंगठी आउर किमती लुगा पिंध के आवी, आउर एगो गरीब हों पुरना फटल लुगा पिंध के आवी।

³ आउर तोहरेमन उ सुंदर लुगा पिंधल आदमी के बगरा आदर देई के कहबा, “तोंय हूवाँ खास ठाँव में बाइठ।” आउर उ गरीब से कहबा, “तोंय हिंयाँ ठड़ाय रह चाहे मोर गोड़ केर भीरे बाइठ।”

⁴ तो का तोहरेमन आपस में भेद भाव नी करला, आउर बुरा बिचार से न्याय करेक वाला नी ठहरला?

⁵ हे मोर भाईमन सुना, का परमेश्‍वर इ दुनिया केर गरीबमन के नी चुनलक कि उमन बिसवास में धनी आउर उ राइज केर अधिकारी होबैं, जेकर करार परमेश्‍वर उमन से काइर हे जेमन उकर से प्रेम करैना?

⁶ मगर तोहरेमन उ गरीब केर अपमान कराला। का धनी आदमीमन तोहर उपरे अत्याचार नी करैना, आउर का उमन हें तोहरेमन के कछैरीमन में जबराई घिसराय-घिसराय के नी लेगैना?

⁷ इमन ओहेमन हेकैं जेमन यीशु मसीह केर नाँव केर बिरोध में बुरा गोइठ गोठियायना, जे नाँव से तोहरे जुड़ल अहा।

⁸ पवितर किताब में लिखल अहे, “तोहरे अपन पड़ोसी से अपन नियर प्रेम करा।” अगर तोहरे इकर मोताबिक इ खास आगया के पूरा कराला तो बेस हें कराला।

⁹ अगर तोहरेमन भेद भाव कराला तो पाप कराला, आउर मूसा केर नियम तोहरेमन के अपराधी ठहरायला।

¹⁰ काले कि जे केऊ समूचा मूसा केर नियम के मानेला, मगर एक हें गोइठ में चुइक जायला तो उ सोउब गोइठमन में दोषी ठहइर चुकलक।

¹¹ इ लगिन कि जे इ कहलक, “तोंय ब्यभिचार ना करबे।” ओहे एहो कहलक, “तोंय हत्या ना करबे” इ लगिन अगर तोहरेमन ब्यभिचार तो नी करला मगर केखो हत्या करला, तो मूसा केर नियम के तोरेक वाला गिनाला।

¹² तोहरेमन उ आदमीमन नियर बचन कहा आउर ब्यवहार करा, जे मनक न्याय उ नियम केर मोताबिक होवी जे उमन के आजाद करेला।

¹³ काले कि जे दया नी करलक, उकर न्याय बेगर दया से होवी। मगर दया न्याय उपरे जीत जायला।

बिसवास आउर काम

¹⁴ हे मोर भाईमन, अगर केऊ कही कि मोंय प्रभु यीशु मसीह में बिसवास करोना आउर उ भला काम नी करी तो इकर से उके का फायदा? का एइसन बिसवास कहियो उके बचाएक पारी?

¹⁵ अगर केऊ भाई या बहिन के लुगामन केर जरुरत अहे आउर उकर ठिना रोज दिन केर खाएक लगिन नखे,

¹⁶ आउर तोहर में से केऊ उकर से कही, “शांति से जा परमेश्‍वर तोके आशीष देवोक, तोंय गरम रह आउर पेट भाइर के खा।” मगर जे चीजमन केर काया लगिन जरुरत अहे उ चीजमन के तोहरेमन नी देबा तो उके का फायदा?

¹⁷ ओइसनेहें बिसवास हों अपन भला काममन केर संगे नी होवी, तो उ अपन स्वभाव में मोरल अहे।

¹⁸ आउर केऊ एहो कहेक पारेला, “तोके बिसवास अहे, आउर मोंय भला काम करोना।” मगर मोंय तोके कहोना, “तोंय अपन बिसवास के मोके बेगर भला काम करले देखाव आउर मोंय अपन बिसवास अपन भला काम काइर के तोके देखामूँ।”

¹⁹ तोके बिसवास अहे कि एके गो परमेश्‍वर अहे आउर तोंय बेस करिसला। भूतमन हों एइसनेहें बिसवास करैना आउर उमन थरथरायना।

²⁰ मगर हे निरबुद्धिया आदमी, का तोंय एहो नी जानिसला कि भला काममन केर बिना बिसवास बेकार अहे?

²¹ का हमर पुरखा अब्राहम अपन काममन केर चलते धरमी नी ठहराल गेलक, जब उ अपन बेटा इसहाक के बेदी उपरे चढ़ालक?

²² देखा, अब्राहम ना सिरिफ परमेश्‍वर उपरे बिसवास काइर रहे मगर उ, ओहो काममन के काइर रहे जे परमेश्‍वर करेक लगिन कइह रहे, आउर उकर बिसवास उकर काममन केर चलते सिद्ध होलक।

²³ आउर पवितर किताब केर इ बचन पूरा होलक, “अब्राहम परमेश्‍वर में बिसवास करलक आउर उकर बिसवास केर चलते परमेश्‍वर उके एगो धरमी आदमी केर रूप में मानलक।” आउर उ परमेश्‍वर केर संगी कहालक।

²⁴ इ लेखे तोहरेमन देइख लेला कि आदमी सिरिफ बिसवास से हें निहीं, मगर अपन काममन केर जरिया से हों धरमी गिनाल जायला।

²⁵ एहे लेखे राहाब बेश्या हों जब उ भेद लेवेक वालामन के अपन घर में रहेक लगिन ठाँव देलक आउर उमन के दुश्मनमन से बचाएक लगिन दोसर डहर से भेइज देलक, तो का उ अपन भला काममन केर चलते धरमी नी गिनाल गेलक?

²⁶ जइसन काया बेगर आत्मा केर मोरल अहे तइसनेहें बिसवास हों बेगर भला काममन केर मोरल अहे।