इब्रानीमन 9 - सादरी नवाँ नियम

इ दुनिया केर तंबू में सेवा करेक

¹ पुरना करार में हों भक्ति करेक केर नियम रहे आउर भक्ति करेक केर तंबू हों रहे, जे आदमीमन केर बनाल रहे।

² इ तंबू के जानवर केर चमड़ा से बनाल जाय रहे आउर माझे में परदा लगाय के दूई गो कोठरी बनाल रहे, पहिला कोठरी में दीया रखेक वाला एगो खूँटा रहे आउर उकर में सात गो दीया रहे, आउर टेबुल में परमेश्‍वर के भेंट चढ़ाल रोटी हों रहे, इ कोठरी पवितर ठाँव कहात रहे।

³ आउर तंबू में परदा केर पिछे दूसरा कोठरी रहे जे महा पवितर ठाँव कहात रहे।

⁴ इ कोठरी में धूप जलाएक वाला सोना केर बेदी रहे, आउर बाहरे भीतरे चाइरो बटे सोना केर लेप लगाल बकसा रहे, जेके करार केर बकसा कहल जात रहे। इकर भीतरे तीन चीज रहे, पहिला सोना केर एगो डिबा रहे जेकर में खास किसिम केर खाएक केर चीज रहे, जेके मन्ना कहल जात रहे, इकर में हारून केर लाठी हों रहे जेकर में पतइ नोगइज जाय रहे, आउर तीसरा चीज दूई गो पखना केर चेपटा पाटी रहे जेकर में परमेश्‍वर दस आगयामन के लीख रहे, आउर मूसा के देई रहे।

⁵ बकसा केर उपरे दूई गो डेना पसराल रूप में बनल रहे आउर उ तेज रोशनी से चमकत रहे, जेके करूब कहल जात रहे, जे इ चिन्हा केर रूप में रहे कि परमेश्‍वर उ ठाँव में रहत रहे। उ मनक पसराल डेनामन बकसा केर उपरे ढाँइप रहत रहैं, आउर जेकर उपरे लोहू के छिड़काल जात रहे, ताकि आदमी मनक पाप क्षमा होई जाओक। एखन हमरे इ गोइठमन केर बारे में खोइल-खोइल के गोठियाएक नी पारब।

⁶ इ नियर तंबू केर दुइयो कोठरी में चीजमन के तेयार काइर के रखल जाय रहे, आउर तंबू केर पहिला कोठरी में पुरोहितमन रोज दिन आराधना केर नियम के पूरा करेक लगिन जात रहैं।

⁷ मगर भीतरे केर कोठरी जे महा पवितर ठाँव रहे, हूवाँ महापुरोहित साल में एके बेर जात रहे, आउर जब भी उ भीतरे जात रहे तो अपन संगे जानवर केर लोहू लेई के जात रहे, आउर लोहू के अपन आउर इसराइली आदमीमन केर पापमन केर क्षमा लगिन परमेश्‍वर के चढ़ात रहे, जे पापमन के उमन अनजाने में करत रहैं।

⁸ इ आराधना केर नियम केर जरिया से पवितर आत्मा हमरे के एहे देखायला कि जब तक इ धरती में तंबू केर पहिला कोठरी में आराधना नियममन के मानल जाई, तब तक स्वरग में परमेश्‍वर ठिना महा पवितर ठाँव में पोंहचेक केर डहर नी खुली।

⁹ इकर से तो इ पता चाइल गेलक कि जानवरमन केर बलिदान जेके परमेश्‍वर लगिन चढ़ाल जायला, उकर में बलिदान चढ़ाएक वाला आदमीमन केर मन आउर हिरदय के सिद्ध करेक केर शक्ति नखे।

¹⁰ काले कि उ नियममन सिरिफ आदमीमन केर खाएक, पियेक आउर कायनों रकम केर नहाएक केर रीतिमन केर बारे में बतायला, जेकर से आदमीमन बाहरे से सफा होवैना। इ आराधना केर नियममन तब तक लगिन मानल जाई, जब तक परमेश्‍वर अपन नवाँ करार के शुरु नी काइर देवी।

मसीह केर लोहू केर शक्ति

¹¹ मगर जब मसीह महापुरोहित बाइन के आलक, तो नवाँ करार केर बेस-बेस चीजमन के देवेला, उ बड़का आउर सिद्ध तंबू में ढूकलक, जे आदमी केर बनाल ना लगे आउर ना इ धरती केर हेके।

¹² मसीह स्वरग केर महा पवितर ठाँव में एके बेर ढूकलक, उ अपन लगिन बकरा आउर बछरुमन केर लोहू के लेई के नी ढूकलक, मगर खुद के बलिदान काइर के अपनेहें लोहू के लेई के भीतरे ढूकलक, आउर उ हमरे के जुग-जुग लगिन पाप से छुटकारा करलक।

¹³ जब मूसा केर नियम केर मोताबिक जे आदमीमन अपवितर होई जाय हैं, उमन परमेश्‍वर केर आराधना करेक केर लायक नखैं, फिन भी अगर उमन केर उपरे बकरा आउर साँढ़मन केर लोहू के, बलिदान करल बछरु केर राख केर साथ छिड़काल जायला, तो उमन के पवितर मानल जायला।

¹⁴ तो सोचा, मसीह केर लोहू आउर केतना बगरा हमरे के उ काममन से शुद्ध करी, जेकर सजा माउत हेके, ताकि हमरे जिंदा परमेश्‍वर केर आराधना करेक पारब। काले कि मसीह खुद के परमेश्‍वर लगिन जुग-जुग केर आत्मा केर शक्ति से सिद्ध बलिदान केर रूप में हमरे केर पापमन केर खातिर चढ़ाय देलक।

¹⁵ एहे खातिर मसीह नवाँ करार केर मिलाएक वाला हेके, ताकि जेमन के परमेश्‍वर बटले बोलाल जाय हे उमन जुग-जुग केर आशीषमन के पाओक, जेकर करार परमेश्‍वर काइर हे। एइसन इ लगिन करेक परायला, काले कि मसीह उमन के, उ पापमन केर दंड से छुटकारा देवेक लगिन प्राण देलक, जे पापमन के उमन पहिला करार केर समय में काइर रहैं।

¹⁶ हमरे जानिला कि अगर केऊ आदमी अपन सम्पति के अपन मोरेक केर पाछे केकरो अधिकार में होवोक कइह के लिखेला, तो उकर लिखल मोताबिक पूरा होवेक लगिन इ जरुरी अहे कि उकर माउत होवोक।

¹⁷ काले कि जब तक सम्पति केर मालिक जिंदा रही, तब तक उ लिखल केर कोनों कीमत नखे, उकर कीमत तब हें होवेला जब लिखेक वाला मोइर जायला।

¹⁸ सेहे लगिन पहिला करार हों तब हें पक्का होवेला जब कोनों जानवर केर लोहू छिड़काल जायला।

¹⁹ जब मूसा आदमीमन के नियम केर हरेक आगयामन के सुनाय चुकलक, तो उ बछरुमन आउर बकरामन केर लोहू के लेई के पानी में मिलालक, आउर उ लाल रंग केर ऊन के जूफा गाँछ केर लाठी में बाँधलक आउर उके लोहू में डुबाय के, लोहू के नियम केर किताब में आउर सोउब आदमीमन में छिड़काय देलक।

²⁰ आउर आदमीमन से कहलक कि इ लोहू करार के पक्का काइर देवेला, जेके मानेक केर आगया परमेश्‍वर देई हे।

²¹ आउर एहे रीति से मूसा तंबू आउर आराधना करेक केर सोउब सामान उपरे लोहू के छिड़कालक।

²² आउर नियम केर मोताबिक सोउब चीजमन के लोहू से शुद्ध करल जायला, बेगर लोहू बोहाले परमेश्‍वर आदमीमन केर पापमन के क्षमा नी करेक पारी।

मसीह केर बलिदान से पाप क्षमा

²³ इ लगिन तंबू आउर आराधना केर चीजमन के जे स्वरग केर चीजमन केर नमूना हेके, शुद्ध करेक ले जानवर के बलिदान करेक जरुरी अहे, मगर स्वरग केर असली चीजमन के शुद्ध करेक लगिन जानवरमन केर लोहू से हों आउर बढ़ियाँ बलिदान केर जरुरत अहे।

²⁴ काले कि मसीह आदमी केर बनाल पवितर ठाँव में नी ढूकलक, जे सिरिफ सच्चा पवितर ठाँव केर नमूना हेके, मगर उ हमरे केर फायदा लगिन स्वरग में हें ढूकलक, ताकि हमर लगिन अब परमेश्‍वर केर सामने ठड़ाओक।

^25-26 महापुरोहित हर साल जानवर केर लोहू लेई के महा पवितर ठाँव में ढूकेला, मगर मसीह खुद के घरी-घरी पवितर ठाँव में चढ़ाएक लगिन नी जायला, अगर उ एइसन करतक, तब उके दुनिया केर सिरजन से लेई के घरी-घरी दुःख उठाएक पड़तक, मगर इकर बदली मसीह सही समय में सोउब केर लगिन एक हें बेर दिस्तार देलक, ताकि उ हमरे लगिन अपनेहें खुद केर बलिदान काइर के पाप केर शक्ति के जुग-जुग लगिन दूर काइर देओक।

²⁷ आउर हरेक आदमी लगिन एक दिन मोरेक आउर उकर पाछे उकर फैसला होवेक ठहराल अहे।

²⁸ ठीक ओहे नियर मसीह हों सोउब आदमीमन केर पापमन के उठाय लेवेक लगिन एक बेर बलिदान होलक। जब उ फिन से आवी तब उ पाप केर लगिन बलिदान होवेक ले निहीं, मगर जे उकर आसरा देखेला उके छुटकारा देवेक लगिन आवी।