इब्रानीमन 8 - सादरी नवाँ नियम

यीशु हमरे केर महापुरोहित हेके

¹ अब जे गोइठमन हमरे कहाथी उमन में से सोउब से बाड़ गोइठ इ हेके कि हमरे केर एइसन महापुरोहित अहे, जे स्वरग में महिमा से भरल परमेश्‍वर केर सिंहासन केर भतखाइया आरा बाइठ हे।

² आउर हमर महापुरोहित स्वरग में सोउब से पवितर ठाँव आउर परमेश्‍वर केर सच्चा तंबू में सेवा करेला, जेके केऊ आदमी निहीं, बल्कि प्रभु ठड़ा काइर हे।

³ एगो महापुरोहित के, पापमन केर क्षमा लगिन भेंट आउर बलिदान चढ़ाएक ले ठहराल जायला, इकर चलते जरुरी अहे कि महापुरोहित यीशु ठिना हों चढ़ाएक लगिन कोनों होवोक।

⁴ आउर अगर मसीह धरती में होतक तो कहियो पुरोहित नी बनतक, इ लगिन कि इ धरती में मूसा केर नियम केर मोताबिक पुरोहितमन तो अहैं जेमन भेंट चढ़ायना।

⁵ इ धरती केर पुरोहितमन जे काम के करैना उ तो स्वरग केर सिरिफ एगो नकल आउर नमूना हेके, मगर जे स्वरग में अहे उकर नियर नखे, से लगिन जब मूसा परमेश्‍वर केर तंबू के बनाएक ले तेयार रहे, तो परमेश्‍वर उके इ चेतावनी देलक, “देख, जे नमूना तोके पहार उपरे देखाल जाय रहे, उकरे मोताबिक सोउब कुछ के बनाबे।”

⁶ मगर जे महापुरोहित केर काम यीशु मसीह के देवल जाय हे, उ दोसर पुरोहितमन के देवल काम से बाइढ़ के अहे, काले कि उ जे करार के मिलाएक वाला हेके, उ पुरना करार से बेस अहे आउर बेस-बेस करारमन से टिकल अहे।

⁷ काले कि अगर पहिला करार निरदोष होतक तो दोसर करार केर जरुरत नी होतक।

⁸ मगर परमेश्‍वर अपन आदमीमन में गलती पालक तो कहलक, “प्रभु कहेला देखा, उ दिन आवाथे कि मोंय इसराइली आदमीमन से आउर यहूदा केर घराना केर आदमीमन से नवाँ करार करमूँ।

⁹ इ करार उ नियर नी होवी जइसन कि मोंय उ मनक पुरखामन केर संगे उ बेरा काइर रहों, जब मोंय उमन केर हाँथ धाइर के मिसर देस से निकलाय के लानलों। काले कि प्रभु कहेला उमन मोर करार उपरे बनल नी रहलैं, आउर मोंय उमन के छोइड़ देलों।

¹⁰ फिन प्रभु कहेला कि जे करार मोंय आवेक वाला दिन में इसराइली आदमीमन केर संगे करमूँ, उ इ हेके कि मोंय अपन नियम के उमन केर मन में याइद दिवामूँ, आउर उके उमन केर दिल में लिखमूँ, आउर मोंय उ मनक परमेश्‍वर होमूँ आउर उमन मोर आदमी होबैं।

¹¹ आउर हरेक अपन देसवासी के आउर अपन रिश्तेदार के इ शिक्षा नी देवी कि तोके प्रभु के जानेक अहे, काले कि छोट आदमी से लेई के बाड़ आदमी तक सोउब मोके जाइन जबैं कि मोंय परमेश्‍वर हेकों।

¹² काले कि मोंय उमन केर दुष्ट काम करेक केर बावजूद हों उमन के दया करमूँ, आउर उ मनक पापमन के फिन याइद नी करमूँ।”

¹³ परमेश्‍वर इके नवाँ करार कहलक, से लगिन उ पहिला करार के पुरना कहलक, आउर कोनोवें चीजमन जे पुरना आउर खिहाय जायला उ मिट जायला।