इब्रानीमन 7 - सादरी नवाँ नियम

मलिकिसिदक एगो पुरोहित

^1-3 इ मलिकिसिदक शालेम नगर केर राजा, आउर सोउब से महान परमेश्‍वर केर पुरोहित रहे, उकर नाँव केर एगो मतलब धरमी बनाएक वाला राजा, आउर दूसरा शालेम केर राजा मतलब शांति केर राजा हेके। पवितर किताब में उकर आबा आउर आयो केर बारे में कोनों लिखल नखे, आउर ना हें उकर पुरखामन केर, ना उकर जनम आउर माउत केर बारे में कोनों लिखल अहे। उ सोउब दिन लगिन एगो पुरोहित हेके, से लगिन उ परमेश्‍वर केर बेटा नियर अहे, जब अब्राहम चाइर गो राजामन के माइर मोराय के घुरत रहे, तब मलिकिसिदक उकर से भेंट करलक आउर उके आशीष देलक। आउर अब्राहम लड़ाई में जीत के लेवल सोउब चीजमन केर दसवाँ हिस्सा उके देलक।

⁴ इकर उपरे धेयान देवा कि मलिकिसिदक कइसन महान रहे जेके पुरखा अब्राहम लड़ाई में दुश्मनमन से जीत के लेवल सोउब चीजमन केर दसवाँ हिस्सा देलक।

⁵ मूसा केर नियम सिखायला कि जे आदमीमन लेवी केर बंश आउर पुरोहित हेकैं उमन के दोसर इसराइली भाईमन से, उमन ठिना जे कोनों अहे उकर दसवाँ हिस्सा लेवेक केर अधिकार अहे, काले कि उमन सोउब अब्राहम केर बंश हेकैं।

⁶ मगर मलिकिसिदक जे लेवी केर बंश केर हों नी रहे अब्राहम से दसवाँ हिस्सा लेलक, आउर जबकि अब्राहम जेके परमेश्‍वर करार काइर रहे फिन भी उके मलिकिसिदक आशीष देलक।

⁷ हमरे पक्का जानिला कि जे आशीष देवेला उ आशीष पावेक वाला से बाड़ होवेला।

⁸ आउर पुरोहितमन जेमन लेवी केर डाइर केर हेकैं उमन दसवाँ हिस्सा लेवैना, आउर एक दिन मोइर जायना, मगर मलिकिसिदक जे अब्राहम से दसवाँ हिस्सा लेलक, उकर बारे में पवितर किताब बतायला उ कहियो नी मोरी।

⁹ जब अब्राहम मलिकिसिदक के दसवाँ हिस्सा देलक, तब तक लेवी अब्राहम केर परिवार में जनम नी लेई रहे, मगर फिन भी अब्राहम केर बंश होवेक केर चलते हमरे एहो कहेक पारिला कि लेवी खुद दसवाँ हिस्सा देलक।

¹⁰ काले कि जे बेरा मलिकिसिदक उकर पुरखा अब्राहम से भेंट करलक, से बेरा लेवी अपन पुरखा अब्राहम केर काया में रहे।

मलिकिसिदक नियर एगो दूसरा पुरोहित

¹¹ आदमीमन के पुरोहितमन केर रीति केर मोताबिक मूसा केर नियम देवल गेलक, मगर उ नियम आदमीमन के सिद्ध बनाएक नी पारलक। से लगिन एगो दूसर पुरोहित आवेक केर जरुरत पड़लक, जे पुरोहित हारून नियर ना होवोक मगर मलिकिसिदक नियर होवोक।

¹² काले कि जब पुरोहित केर पद बदलल जायला, तो मूसा केर नियम के हों बदलेक जरुरी अहे।

¹³ हमरे मसीह केर बारे में इ कहिला, जे दोसर गोतर केर हेके, जे गोतर में से कहियो केऊ पुरोहित नियर बेदी ठिना सेवा नी काइर हैं।

¹⁴ इके सोउब केऊ जानैना कि हमर प्रभु यीशु यहूदा गोतर केर बंश में जनइम हे, आउर मूसा यहूदा गोतर केर बंश केर बारे में पुरोहित बनेक लगिन कोनों नी कइह हे, आउर ना यहूदा गोतर केर बंश में से कहियो केऊ पुरोहित बाइन हैं।

¹⁵ जे गोइठमन केर बारे में मोंय गोठियाथों उ बिलकुल सफा अहे कि मूसा केर नियम बदइल जाय हे, काले कि पहिलेहें से एगो दोसर पुरोहित अहे, आउर उ मलिकिसिदक नियर अहे।

¹⁶ यीशु काया केर मोताबिक लेवी गोतर में जनम लेई के पुरोहित नी बाइन हे, मगर नाश नी होवेक वाला शक्ति केर चलते उ पुरोहित बाइन हे।

¹⁷ काले कि उकर बारे में परमेश्‍वर पवितर किताब में गवाही देई हे कि तोंय मलिकिसिदक केर रीति केर मोताबिक जुग-जुग लगिन पुरोहित हेकिस।

¹⁸ अब मूसा केर नियम कमजोर आउर बेकार होवेक केर चलते बदलाय गेलक।

¹⁹ (इ लगिन कि मूसा केर नियम कोनों गोइठ के सिद्ध करेक नी पारलक) आउर उकर ठाँव में हमरे ठिना यीशु मसीह में एइसन बेस आसरा अहे, जेकर से हमरे परमेश्‍वर ठिना पोंहचेक पारिला।

²⁰ आउर इकर अलावा परमेश्‍वर मसीह के करार काइर के पुरोहित ठहराय हे।

²¹ (काले कि लेवी केर बंशमन तो परमेश्‍वर केर बेगर करार करले पुरोहित ठहराल जाय रहैं, मगर यीशु परमेश्‍वर बटले किरिया खाय के ठहराल जाय हे, जेकर बारे में पवितर किताब में कहल जाय हे कि मोंय परमेश्‍वर किरिया खाय हों, आउर मोंय अपन फैसला से नी पसतामूँ कि तोंय जुग-जुग पुरोहित बनल रहबे)

²² से लगिन यीशु मसीह हें अहे, जे हमरे के एगो सोउब से बेस करार केर गारांटी देवेला।

²³ आउर यीशु केर पुरोहित बनेक से आउरे फायदा अहे, उमन तो पुरोहित पद में लगातार बनल रहेक नी पारलैं बल्कि उ मनक ठाँव में दोसर पुरोहित बनते आलैं, काले कि उमन सोउब मोरते गेलैं।

²⁴ मगर यीशु जुग-जुग लगिन रही, आउर केऊ उकर पुरोहित केर पद के नी लेबैं।

²⁵ इ लगिन जेमन यीशु केर जरिया परमेश्‍वर ठिना आवैना, यीशु उमन के पूरा-पूरा बचाएक पारेला, काले कि उ उमन लगिन बिनती करेक ले जुग-जुग जिंदा अहे।

²⁶ एइसनेहें महापुरोहित हमरे केर जरुरत के पूरा करेक पारेला, जे पवितर अहे, बेगर दोष केर अहे, आउर शुद्ध अहे, आउर पापीमन केर असर से दूर रहेला, आउर सोउब से उपरे स्वरग तक ऊँचा उठाल जाय हे।

²⁷ आउर उ महा पुरोहितमन नियर जेमन हारून केर बंशमन हेकैं, यीशु के दरकार नखे कि रोज दिन पहिले अपन पापमन आउर फिन आदमीमन केर पापमन लगिन बलिदान चढ़ाओक, काले कि यीशु खुद के बलिदान चढ़ाय के एक हें बेर में निपटाय देलक।

²⁸ काले कि मूसा केर नियम तो कमजोर आदमीमन के महापुरोहित ठहरायला, मगर मूसा केर नियम केर पाछे परमेश्‍वर करार काइर के अपन बेटा के सिद्ध महापुरोहित केर रूप में जुग-जुग लगिन चुइन हे।