इब्रानीमन 6 - सादरी नवाँ नियम

¹ इ लगिन आवा मसीह केर बारे में जे हमरे के पहिले सिखाल जाय हे, उ शुरु केर शिक्षा केर गोइठमन के घरी-घरी दोहराएक छोइड़ देवब। हमरे सिद्ध बनेक केर शिक्षामन उपरे धेयान करब, अब हमरे माउत बटे लेगेग वाला पाप काम करेक के छोड़ेक, आउर परमेश्‍वर में बिसवास करेक,

² आउर बपतिस्मा जल संस्कार लेवेक, आउर बिसवासीमन उपरे हाँथ रखेक, आउर मोरलमन केर जी उठेक आउर जुग-जुग केर दंड केर शिक्षा रुपी नेव के फिन से नी रखब।

³ आउर अगर परमेश्‍वर मोका देवी तो हमरे पक्का शिक्षा के सिखाते रहब।

⁴ काले कि जेमन अपन बिसवास से दूर होई जायना, उमन दोबारा पाप करेक छोइड़ के वापस घुरेक नी पारबैं, उमन एक बेर परमेश्‍वर केर सच्चाई के जानलैं आउर स्वरग से बरदान के पालैं, आउर उमन दोसरमन से एके संगे पवितर आत्मा के हों पालैं,

⁵ आउर उमन परमेश्‍वर केर बेस संदेश के महसूस काइर चुइक हैं, उमन एहो महसूस काइर चुइक हैं कि परमेश्‍वर एक दिन शक्ति केर साथ राइज करी,

⁶ अगर उमन भटइक जाबैं तो उमन के फिन से वापस लानेक केर कोनों उपाय नखे, काले कि उमन परमेश्‍वर केर बेटा के फिन से क्रूस उपरे चढ़ायना आउर खुइल के उकर अपमान करैना, आउर दोसरमन केर सामने मसीह के नीचा देखायना।

⁷ जे आदमीमन बेस शिक्षा के पावैना उमन उ बेस खेत नियर अहैं जेकर में खूब पानी बरसेला, आउर हूवाँ से किसान लगिन बेस अन्न उपजेला आउर उ परमेश्‍वर से आशीष पावेला।

⁸ मगर, दोसर आदमीमन उ खेत नियर अहैं जेकर में काँटा झूँड़ आउर घास फूस बढ़ेला जे बेकार अहे, उमन में परमेश्‍वर केर सराप आवेक केर खतरा अहे आउर उमन आइग से भसम होई जबैं।

⁹ मगर हे मोर दुलार संगीमन, तोहरे भला काम कराथा काले कि परमेश्‍वर तोहरे के छुटकारा देई चुइक हे, से लगिन इ चेतावनीमन तोहर बारे में ना लगे। फिन भी हमरे तोहर बारे में इकर से बेस चीजमन आउर छुटकारा से जुड़ल आशीषमन लगिन भरसा करिला।

¹⁰ काले कि परमेश्‍वर भला अहे, उ तोहरे जे काम काइर हा, आउर दोसर बिसवासीमन केर मदइत काइर के परमेश्‍वर के प्रेम देखाय हा उके नी भुलाई। आउर तोहरे एखनो तक उमन केर मदइत करते अहा उखो याइद करी।

^11-12 से लगिन तोहरे कड़ा मेहनइत करा आउर कोढ़िया ना होवा, तोहरे के धीरज आउर बिसवास केर साथ लगातार इ भला काममन के आखरी तक करते रहेक चाही। आउर परमेश्‍वर जे आशीषमन के देवेक लगिन करार काइर हे उके पावेक लगिन उकर उपरे पक्का आसरा करा।

परमेश्‍वर केर पक्का करार

¹³ जब परमेश्‍वर अब्राहम से करार करत रहे, तो किरिया खाएक ले अपन से बड़का केखो नी पालक, तब उ अपनेहें नाँव से किरिया खाय के कहलक,

¹⁴ “मोंय तोके सचमुच में आशीष देमूँ आउर तोर बंशमन के अनगिनइत बढ़ाय देमूँ।”

¹⁵ अब्राहम ढेइर समय तक धीरज धारल केर पाछे करार केर फल पालक।

¹⁶ आदमीमन तो अपन से केऊ बाड़ केर नाँव से किरिया खायना, उमन में किरिया खाय के गोइठ के पक्का करल जायला आउर झगरा मेइट जायला।

¹⁷ इ लगिन परमेश्‍वर हों किरिया खालक, इकर से परमेश्‍वर आदमीमन के सफा-सफा इ देखाएक चाहत रहे कि जेमन से करार करल जाय हे, उमन लगिन करार के पक्का पूरा करी।

¹⁸ तो फिन हिंयाँ दूई गो गोइठ अहे, उकर करार आउर किरिया जे कहियो नी बदली, जेकर बारे में परमेश्‍वर कहियो झूठ नी बोलेला। इ लगिन हमरे जे परमेश्‍वर ठिना अपन रक्षा करेक ले आय ही आउर जे आसरा उ हमरे के देई हे, उके ढेइर हें उत्साह केर साथ धाइर ही।

¹⁹ आउर इ आसरा हमर जीउ लगिन उ डोरा नियर अहे जेकर से डोंगा के खूटी में बाँधल जायला आउर डोंगा बिलकुल स्थिर रहेला, सेहे नियर आसरा हमर जिंदगी के स्थिर राखेला, आउर जेकर में हमरे आसरा राखिला उ यीशु हेके, जे पवितर तंबू में परदा केर पिछे महा पवितर ठाँव में भीतरे परमेश्‍वर तक पोहोंचलक।

²⁰ जहाँ यीशु जइसन मलिकिसिदक एगो पुरोहित रहे, तइसनेहें जुग-जुग लगिन महापुरोहित बाइन के हमरे लगिन हमर से पहिले स्वरग में गेलक।