इब्रानीमन 5 - सादरी नवाँ नियम

¹ परमेश्‍वर हरेक महापुरोहित के इसराइली आदमीमन में से चुनेला, उ आदमीमन केर भलाई लगिन परमेश्‍वर केर सेवा करेक ले ठहराल जायला, आउर उ भेंट आउर बलिदान चढ़ायला ताकि परमेश्‍वर आदमीमन केर पापमन के क्षमा करोक।

² महापुरोहित हों एगो आदमी जाइत होवेक केर चलते कमजोर अहे, से लगिन उ, ना समझमन आउर भटकलमन केर संगे नरम ब्यवहार करेक पारेला।

³ आउर इ लगिन महापुरोहित के दोसर आदमीमन केर पापमन के दूर करेक लगिन आउर अपन पापमन के दूर करेक लगिन हों बलिदान चढ़ाएक जरुरी अहे।

⁴ केऊ आदमी महापुरोहित बनेक केर जे आदर केर पद हेके, इके खुद से नी लेवेला, जइसन कि परमेश्‍वर हारून के पहिला महापुरोहित बनेक लगिन बोलालक आउर चुनलक, ठीक एहे नियर उ दोसर महा पुरोहितमन के हों बोलायला आउर चुनेला।

⁵ एहे नियर मसीह हों महापुरोहित बनेक केर इ आदर केर पद के खुद से नी लेलक, बल्कि परमेश्‍वर मसीह के इ कइह के ठहरालक, जइसन आउर कोनोवें पुरोहित के नी कइह हे, पवितर किताब में भजन के लिखेक वाला का लीख हे, “तोंय मोर बेटा हेकिस, आइज मोंय तोके जनम देई हों।”

⁶ दूसरा ठाँव में परमेश्‍वर फिन उके कहलक, “जइसन मलिकिसिदक एगो पुरोहित रहे, तइसनेहें तोंय सोउब दिन लगिन पुरोहित बनल रहबे।”

⁷ यीशु इ दुनिया केर जिंदगी जियेक केर बेरा में जे उके माउत से बचाएक पारत रहे, जोर से हकाय-हकाय के, आउर काइंद-काइंद के उकर से प्रार्थना आउर बिनती करलक आउर आदर केर संगे समर्पण केर चलते उकर सुनल गेलक।

⁸ आउर जबकि यीशु परमेश्‍वर केर बेटा रहे, फिन भी उ, दुःख उठाय के परमेश्‍वर केर आगया मानेक सिखलक।

⁹ आउर सिद्ध बाइन के, अपन आगया मानेक वाला सोउब आदमीमन ले जुग-जुग लगिन छुटकारा देवेक वाला बाइन गेलक।

¹⁰ आउर जइसन मलिकिसिदक एगो पुरोहित रहे तइसनेहें यीशु के परमेश्‍वर बटले महापुरोहित केर पद मिललक।

बिसवास से भटइक जाएक केर नतीजा

¹¹ इकर बारे में हमरे के आउर ढेइर गोइठमन के बताएक अहे, मगर उमन केर बारे में खोइल-खोइल के बखाइन करेक कठिन अहे, काले कि तोहरे परमेश्‍वर केर बचन के सिखेक में कोढ़िया बाइन गेला।

¹² अब तक तो तोहरे के सिखाएक वाला बाइन जाएक रहे, मगर तोहरे के तो एइसन आदमी केर जरुरत अहे, जे तोहरेमन के परमेश्‍वर केर बचन केर शुरुवाती गोइठमन के सिखाओक। तोहरे तो छउवामन नियर अहा जेमन के दूध चाही ठोस आहार निहीं।

¹³ काले कि दूध पीयेकवाला छउवामन के तो धरमी बनेक केर बचन केर समझ नी होवेला, काले कि उमन छउवा हेकैं।

¹⁴ ठोस आहार उमन लगिन अहे, जेमन बचन केर पालन काइर के बिसवास में मजबूत होई जाय हैं, आउर अनुभव से भला-बुरा के चिन्हेक पारैना।