इब्रानीमन 4 - सादरी नवाँ नियम

परमेश्‍वर केर आदमीमन के आराम

¹ इ लगिन जबकि परमेश्‍वर हमरे के आराम केर ठाँव में जाएक ले करार काइर हे, तो हमरे के ढेइर सावधान रहेक चाही, ताकि तोहर में से केऊ उ आराम केर ठाँव में जाएक केर मोका से छूइट ना जाओक।

² ठीक जइसन हमरे यीशु मसीह केर बारे में शुभ समाचार के सुनली, तइसनेहें इसराइली आदमीमन हों आराम केर ठाँव में जाएक केर बारे में शुभ समाचार के सुइन रहैं, मगर उमन बिसवास नी करलैं, से लगिन उ संदेश उमन ले बेकार होई गेलक।

³ मगर हमरे, परमेश्‍वर जे कइह हे उकर उपरे बिसवास काइर ही, आराम केर ठाँव में जाएक पारब। जइसन दोसरमन लगिन पवितर किताब में परमेश्‍वर कइह हे कि मोंय अपन खीस में किरिया खालों कि उमन मोर आराम केर ठाँव में जाएक नी पारबैं। मगर हमरे जानिला कि जे आराम केर ठाँव एखन अहे, उ दुनिया केर सिरजन केर समय से अहे।

⁴ काले कि परमेश्‍वर पवितर किताब में सातवाँ दिन केर बारे में इ नियर कइह हे, “परमेश्‍वर सातवाँ दिन अपन सोउब काममन के सिराय के आराम करलक।”

⁵ हमरे एहो पढ़िला कि परमेश्‍वर कइह हे, “उमन मोर आराम केर ठाँव में जाएक नी पारबैं।”

⁶ तो उ इसराइली आदमीमन, जेमन के सोउब से पहिले शुभ समाचार सुनाल गेलक, आगया नी मानेक केर चलते आराम केर ठाँव में जाएक नी पारलैं, मगर एखनोहों आदमीमन के परमेश्‍वर केर आराम केर ठाँव में जाएक लगिन मोका अहे।

⁷ से लगिन परमेश्‍वर आराम केर ठाँव में जाएक लगिन दोसर समय के ठहरालक, आउर उ समय आइज हेके। ढेइर बरिस केर पाछे जब हमरे केर पुरखामन आगया नी मानलैं, तब परमेश्‍वर राजा दाऊद से इ कहुवालक जे पवितर किताब में पहिले से लिखल अहे, “अगर आइज तोहरेमन परमेश्‍वर केर आवाज के सुनाथा, तो उके मानेक से इनकार ना करा।”

⁸ हमरे एहो जानिला कि परमेश्‍वर केर करार करल आराम केर ठाँव, कनान देस ना लगे जहाँ यहोशू हमरे केर पुरखामन के लेगलक। काले कि अगर आराम केर ठाँव कनान देस रहतक, तो परमेश्‍वर दोसर दिन केर बारे में नी कहतक।

⁹ से लगिन परमेश्‍वर केर आदमीमन ले एखनोहों आराम केर ठाँव तेयार अहे, जहाँ उमन पूरा-पुरी आराम करबैं, उमन ओइसनेहें आराम करबैं जइसन परमेश्‍वर सातवाँ दिन आराम करलक।

¹⁰ काले कि अगर एगो आदमी आराम केर ठाँव में जायला, तो उ अपन समूचा काममन के पूरा काइर के आराम करेला, ठीक जइसन परमेश्‍वर अपन समूचा काम के पूरा काइर के आराम करलक।

¹¹ से लगिन हमरे के उ आराम केर ठाँव में जाएक लगिन कड़ा मेहनइत करेक अहे, हमर में से केखो उमन नियर नी होवेक चाही, जेमन परमेश्‍वर केर आगया के मानेक से इनकार काइर देलैं, जब हमरे परमेश्‍वर केर आगयामन के मानब तब हें हमरे आराम केर ठाँव में जाएक पारब।

¹² परमेश्‍वर केर बचन तो जिंदा आउर काम करेक वाला हेके, उ दुइयो आरा धार करल तलवाइर से हों बगरा चोखा अहे। उ आत्मा आउर प्राण, आउर काया केर जोड़, आउर गुदा तक पोंहइच जायला, आउर हमरे केर हिरदय केर सोच आउर बिचार के परखेला।

¹³ आउर परमेश्‍वर केर सिरजाल केऊवे आदमी उकर से लुकल नखैं, उकर भीरे सोउब चीज खुला आउर दिस्तार अहे। हमरे अपन जिंदगी में जे कुछ करिला, उ सोउब चीजमन केर हिसाब हमरे के परमेश्‍वर ठिना देवेक होवी।

बड़का महापुरोहित

¹⁴ यीशु मसीह जे स्वरग तक जाय हे उ परमेश्‍वर केर बेटा हेके, आउर उ हमरे सोउब केर महापुरोहित हेके। से लगिन आवा हमरे बिसवास में मजबूत खड़ा रहब जेके हमरे सोउब केर सामने स्वीकार काइर ही।

¹⁵ यीशु मसीह जे हमरे केर महापुरोहित हेके हमर सोउब कमजोरीमन के जानेला, शैतान उकर सोउब रकम से परीक्षा करलक जइसन हमरे के करेला, फिन भी उ कोनों पाप नी करलक।

¹⁶ इ लगिन आवा, हमरे साहस काइर के परमेश्‍वर ठिना आवब जे किरपा से भरल अहे, ताकि परमेश्‍वर हमरे के अपन दया आउर किरपा के देखाई, आउर जब हमरे के मदइत केर जरुरत होवी तब उ हमर मदइत करी।